Në një raport të fundit të Komisionit Europian 69 % e punonjësve shqiptarë janë të pakënaqur në ambientet e tyre të punësimit.
Në një lidhje direkte më studion e ABC Live, eksperti i punësimit Erion Muça shpjegoi për gazetaren Sibora Bitri, që arsyet janë të njëjta me ato të largimit jashtë dhe që kanë të bëjnë kryesisht me pagën e ulët dhe mungesën e zhvillimit profesional.
Sipas tij, ka dhe arsye të tjera, por dy arsyet e para janë dhe arsyet që të rinjtë të largohen jashtë.
Ndërkohë që kreu i shoqatës së eksportuesve shqiptarë Alban Zusi theksoi që është koha që sipërmarrësit shqiptarë të ndryshojnë sjelljen e tyre ndaj punonjësve, në të gjitha nivelet, që nga më të ulëtat, deri te ato më të larta.
Për ekspertin e punësimit Erion Muça ‘vizioni dhe mentaliteti i një pjese të sipërmarrësve nuk e shohin investimin te punonjësit si një formë që do të maksimizojë fitimin dhe të ardhurat e tyre sepse një pjesë e tyre kanë arritur që ta kenë dhe ta formojnë biznesin me forcat e tyre’.
Nga ana tjetër, sipas tij as konsumatorët nuk kanë qenë agresivë ndaj sipërmarrësve, duke bërë zgjedhje të tjera, nëse nuk marrin shërbimin e duhur nga punonjësit.
Kreu i eksportuesve shqiptarë Alban Zusi tregoi eksperiencën e tij personale në sipërmarrjen e tij private.
‘Prej dy vitesh ne kemi shtuar funksionin e menaxherit të burimeve njerëzore, doli në mënyrë sporadike, impakti ka qenë i shkëlqyer. Jemi përfshirë në disa iniciativa globale, dhe javën tjetër me një sociolog, filozof, një proces që do të kenë një pyetësor psikologjik social, cilat janë pritshmëritë e punonjësve’.
Edhe kreu i eksportuesve shqiptarë Alban Zusi përmendi faktin që një nga problemet është largimi i punonjësve.
‘Një nga problemet që kemi sot, është largimi, e them që e kemi rritur me 10% stafin në këto kohë. Njerëzit na e kanë ndryshuar qasjen, ndërmarrja nuk është vetëm një entitet prodhues, por është një familje e madhe, ku njerëzit duhet të ndihen të respektuar, kemi njerëz më paga shumë të larta, që nuk kanë pasur respekt’./Abcnews.al/
