Komiteti Ekzekutiv është mbledhur një ditë më parë në ambientet e Federatës Shqiptare të Futbollit dhe është diskutuar për problematika të ndryshme. Një detyrë e lënë është përcaktimi i tarifës që duhet të paguajnë klubet që duan të luajnë në “Air Albania Stadium”, me ose pa drita.
Në një artikull të botuar në “Panorama Sport”, bëhet me dije se UEFA ka përcaktuar edhe Fondin e Solidaritetit për klubet e Superiores, që duhet të dorëzojnë projektet e tyre për akademitë, në mënyrë qe çdo klub te marrë pjesën e vet nga 470 mijë eurot që jep qeveria e futbollit europian.
FRIKA TE PARTIZANI – Seanca e djeshme te “demat e kuq” nuk ka kaluar fort mirë, pasi sulmuesi Theophilus ka marrë një goditje me top, që e ka lënë pa fryme. Nigeriani ka parë t’i përplaset topi në kraharor dhe ka përfunduar i shtrirë.
Për një moment kishte probleme me frymëmarrjen. Solomon ka marrë ndihmën e parë të mjekëve dhe më pas ka dalë veçmas grupit, por ka bërë vetëm pak stërvitje dhe i është drejtuar dhomave të zhveshjes. /abcnews.al
