TIRANË- Presidenti i Republikës së Shqipërisë, Bajram Begaj, ishte i pranishëm në ceremoninë e kremtimit të veprimtarisë “25 vite Kushtetutë”.
Ai theksoi se Shqipëria ka bërë hapa pozitivë me reformat që ka ndërmarrë, ndërsa veçoi reformën në drejtësi. Sipas kreut të shtetit sot, “sistemi i drejtësisë po përballet me një sfidë të madhe për shkak të numrit të madh të çështjeve që gjykata ka në shqyrtim”.
“Parimi i shtetit të së drejtës është një nga elementet themelor të sanksionuar në preambulën e Kushtetutës së Republikës së Shqipërisë. Ky parim përbën një kusht të domosdoshëm për funksionimin e një shoqërie të lirë për paqen, mirëqenien, kulturën solidaritetin shoqëror dhe respektimin e vlerave të demokracisë. Po kaq me rëndësi është edhe parimi i ndarjes së pushteteve dhe balancimi i tyre që përbën thelbin e ekzistencës dhe mirëfunksionimit të shtetit të së drejtës. Kushtetuta jonë arriti t’i paraprijë dhe të parashikojë procesin e integrimit Euroatlantik të Shqipërisë që lidhet ngushtësisht me parimin e së drejtës dhe sovranitetit shtetëror. Përmes kësaj Kushtetute u arrit të sanksionohen dispozita të rëndësishme që vendosin parimet bazë për përgatitjen dhe legjitimitetin e integrimit të Shqipërisë në aleancat ndërkombëtare duke i çelur rrugën anëtarësimin në NATO dhe procesit në integrimit në BE. Ndryshimet kushtetuese të vitit 2016 sollën ndryshime në sistemin e drejtësisë si reformimin e organeve ekzistuese dhe krijimin e strukturave të reja me qëllim forcimin e pavarësisë dhe rritjen e llogaridhënies së organeve të drejtësisë. Referuar progres-raportit të këtij viti Shqipëria ka bërë hapa pozitivë me reformat që ka ndërmarrë sidomos me reformën në drejtësi e cila po jep rezultate të dukshme duke kontribuar në luftën kundër krimit të organizuar dhe korrupsionit. Pavarësisht arritjeve sot sistemi i drejtësisë po përballet me një sfidë të madhe për shkak të numrit të madh të çështjeve që gjykata ka në shqyrtim”, tha ai.
Kreu i shtetit vlerësoi punë e bërë nga Gjykata Kushtetuese, e cila sipas tij ka ndihmuar vendin në disa drejtime. Ai tha se Shqipëria ndodhet para sfidash të reja, ndërsa vuri theksin tek integrimi evropian.
“Të gjithë ne kemi përgjegjësinë dhe detyrën që jemi garant të Kushtetutës dhe normave themelore që ajo pasqyron. Respektimi i saj ndihmon si në rritjen e cilësisë ligjvënëse ashtu edhe të kontrollit kushtetues. Sot është dita për të vlerësuar edhe kontributin e Gjykatës Kushtetuese. Drejtësia kushtetuese dhe roli i kësaj gjykate ka ndihmuar në tre drejtime që ka të bëjë më parimin e ndarjes dhe balanmcimit të pushteteve, parimin e sigurisë juridike, mbrojtjen dhe respektimin e të drejtave themelore të njeriut. Kemi shumë punë për të bërë sidomos në drejtimin e integrimit në BE që mbetet objektivi ynë madhor dhe parësor. Progresi është i vazhdueshëm, por edhe me sfida të reja për të cilat kërkohet angazhim maksimal nga institucionet për harmonizimin e plotë të legjislacionit tonë të brendshëm me atë të Bashkimit Europian dhe nxitjen e reformave të nevojshme në të gjitha fushat për të finalizuar sa më shpejtë anëtarësimin tonë në Bashkimin Europian”, shtoi mes tjerash presidenti Begaj.
