Loading ...
Presidenti i Ukrainës, Volodymyr Zelensky, ka shpallur një paketë të gjerë reformash në sektorin e energjisë, pasi hetimet anti-korrupsion zbuluan një skemë të dyshuar ryshfeti prej rreth 100 milionë dollarësh në kompaninë shtetërore bërthamore Energoatom. Rasti, i konsideruar si skandali më serioz i mandatit të Zelenskyt, ka nxitur reagim të ashpër nga opinioni publik dhe aleatët perëndimorë.
Zelensky njoftoi zëvendësimin e plotë të drejtuesve të Energoatom dhe riorganizim të disa kompanive të tjera të energjisë. Ai gjithashtu kërkoi nga qeveria të paraqesë një ligj urgjent për ndryshimin e përbërjes së komisionit rregullator të energjisë, ndërsa paralajmëroi emërime të reja në poste kyçe të sektorit.
Hetimet e Byrosë Kombëtare Kundër Korrupsionit përfshijnë një rrjet zyrtarësh që dyshohen se kërkonin ryshfete prej 10–15% nga partnerët e Energoatom. Mediat identifikuan si një figurë qendrore në skemë biznesmenin Timur Mindich, mik i vjetër dhe ish-partner biznesi i Zelenskyt, i cili u arratis nga vendi para arrestimit dhe dyshohet se ndodhet në Izrael. Publikimi i incizimeve audio që përfshijnë persona të afërt me presidentin e ka thelluar krizën.
Zelensky ka shkarkuar ministrin e energjisë dhe atë të drejtësisë, të dy të përfshirë në hetime, ndërsa analistët paralajmërojnë se skandali mund të shtrihet edhe në ministri të tjera.
Njoftimet për reforma erdhën para vizitës së Zelenskyt në Greqi, ku ai nënshkroi një marrëveshje për furnizimin e Ukrainës me gaz natyror të lëngshëm nga SHBA gjatë dimrit, në përpjekje për të zbutur pasojat e sulmeve të vazhdueshme ruse ndaj infrastrukturës energjetike. Presidenti ukrainas falënderoi SHBA-të për mbështetjen dhe vazhdon një tur diplomatik në Europë për të siguruar ndihmë të re ushtarake.
Ndërkohë, kriza shpërthen në një moment kur Ukraina përballet me sfida ekonomike të mëdha dhe kur BE-ja ende nuk ka rënë dakord për një paketë financiare të bazuar në asetet e ngrira ruse. Kryeministri hungarez, Viktor Orbán, ka përdorur skandalin për të sulmuar Zelenskyn dhe për të bllokuar bisedimet e anëtarësimit në BE.
Megjithatë, zyrtarët e NABU theksojnë se fakti që skema është zbuluar tregon funksionimin e mekanizmave të kontrollit dhe vullnetin e Ukrainës për të luftuar korrupsionin, pavarësisht se rasti mund të ketë zhvillime të mëtejshme./abcnews.al
