Nga Leontina Nika
Gjurmët e familjes së Ismail bej Vlorës, vijnë të rrëfyera përmes fotografive familjare dhe historike të shkrepura në harkun kohor 1800-1950.
Artifakte të ruajtur me fanatizëm nga Nedim Vlora, stërnip i Ismail Qemal Vlorës, vijnë për herë të parë për publikun shqiptar, në këtë 110-vjetor të Pavarësisë së Shqipërisë.
Kuratorja e ekspozitës njëkohësisht drejtoresh e COD, Erna Bulku thotë se kjo është një majë e ajsbergut të arkivit familjar që ruhet në Bari.
Me mjaft rëndësi historike është letra prej disa faqesh e shkruar në frëngjisht nga Ismail Qemali ku kërkon pavarësinë e Kosovës dhe bashkimit Kombëtar, të parin bashkim në këtë letër, ai cilëson Lidhjen e Prizrenit 1878.
Në këtë letër, ku nuk dihet viti, Ismail Qemali rendit vitet 1913, 1914, 1915, ku e kanë mbushur historinë e Kosovës me faza të shumta shtypjeje.
U morën të gjitha masat nga autoritetet serbe që të zhdukej edhe emri shqiptar nga kjo krahinë, u mbyllën shkollat shqipe, u ndalua leximi i librave, apo gazetave në shqip, kjo përpjekje u rifillua me dhunshëm në 1918. Përpjekjet e serbe për ta jugosllavizuar Kosovën do të përballen me patriotizmin e banorëve të saj, theksohet në letrën e Ismail Qemalit.
Kjo ekspozitë kushtuar familjes që numëron dhjetëra personazhe me kontribute të vyera në jetën politike shqiptare, mbart një vlerë të jashtëzakonshme në njohjen e ngjarjeve me rëndësi historike për kombin tonë.
Në këtë shtegtim fotografik shfaqen përveç familjes, edhe figurat historike si Qemal bej Karaosmani, njeriu i besuar i Ismail Qemalit, ku njihet roli i spikatur për shpalljen e Pavarësisë./Abcnews.al/
