103 vite nga disidentja Musine Kokalari. Mësuesit e letërsisë thonë se shkrimtarja nuk është e përfshirë në tekstet shkollore. Ndërkohë që nxënësit e shkollës 9-vjeçare që mban emrin e saj, festuan ditëlindjen e saj në pavijonin e terrorit komunist, të muzeut historik kombëtar i cili sapo ka hapur dyert pas dëmeve nga tërmeti.
Megjithëse është shkrimtarja dhe disidentja e parë femër ndaj regjimit komunist, Musine Kokalari ende nuk është e përfshirë sa duhet në tekstet shkollore edhe pse u premtua në kremtimet e 100 vjetorit të saj .
Këta nxënës janë të pakt në numër të cilët kanë fatin të njihen me figurën poliedrike të “Musine Kokalari”, pasi studiojnë në shkollën që mban emrin e saj, e ku mësuesit e letërsisë janë përqendruar në biseda të lira dhe përvjetor ditëlindjesh tek intelektualja më kurajoze dhe ikonë e opozitës shqiptare antikomuniste Musine Kokalari.
Mësuesja e letërsisë thotë se ka ardhur koha që ajo të zë vendin e merituar në tekstet shkollore.
Në kuadër të 103-vjetorit të lindjes, nxënës të shkollës 9-vjeçare që mban emrin e saj, zhvilluan një vizitë në Muzeun Historik Kombëtar, në Pavijonin e Terrorit Komunist ku panë nga afër një dorëshkrim dhe një foto të saj si artefaktet e vetme që muzeu posedon nga Musine Kokalari./abcnews.al
