Zgjidhja e krizës, Basha: Mirëpres angazhimin e ndërkombëtarëve

18:16 | 14/05/2019

Nuk ka vonuar përgjigja e kreut të PD ndaj kryeministrit, njëlloj përmes një komunikimi me gazetarët. Lulzim Basha tha se mirëpret angazhimin ndërkombëtar për zgjidhjen e krizës, por me kushtin e pandryshuar se Edi Rama duhet të largohet si kryeministër.

Gjatë një komunikimi me gazetarët, kreu i PD-së, Lulzim Basha, nënvizoi disa herë se PD-ja dhe opozita janë gati për një proces politik për zgjidhjen e krizës me ndihmën e faktorit ndërkombëtar që ka shprehur tashmë gatishmërinë për ndërmjetësim. Por kreu i opozitës nuk heq dorë nga kushti që përsërit prej javësh: qeveri tranzitore pa Edi Ramën kryeministër.

“Partia Demokratike dhe opozita kanë qenë dhe janë gati të përfshihen në një proces të vërtetë politikë me ndihmën e partnerëve tanë ndërkombëtarë për të zgjidhur këtë krizë dhe për t’i kthyer shqiptarëve sovranitetin e vjedhur dhe institucionet dhe proceset politike të marra peng”, tha Basha.

Besimin për të mos hequr dorë nga kushti i tij, e gjen tek pjesëmarrja e lartë e qytetarëve në protestat e opozitës, si ajo e të hënës pasdite, një marshim mbi 9 kilometra në një kohë me shi.

Tek bashkimi i shqiptarëve gjen arsyen për të mos lejuar më në Shqipëri zgjedhje të marra peng nga krimi i organizuar. E pranon se kundërshtarin politik nuk e përcakton dot, por insiston se Edi Rama nuk mund të jetë më kryeministri i zgjedhjeve të ardhshme.

“Edi Rama nuk mund të jetë kryeministër kujdestar i një procesi tjetër zgjedhor”, tha Basha.

Opozita ka humbur afatin ligjor të regjistrimit për zgjedhjet vendore, por Basha beson se bashkimi i shqiptarëve në protestat e ardhshme, nuk do lejojë kapjen nga kryeministri edhe të qeverisë vendore më 30 Qershor.

“Nuk do ta lejojë që 30 qershori të hyjë në historinë e Shqipërisë, si dita kur tirania e krimit çimenton pushtetin dhe kap edhe pushtetin vendor”, tha Basha.

Bashkimi i shqiptarëve ka marrë përmasa që tejkalon kufijtë politik sipas Lulzim Bashës, që falenderoi disa herë shqiptarët dhe mediat që sfiduan shiun me marshimin mbi tre orësh të opozitës të hënën e 13 Majit./ABC News Albania 24/7


Lini koment

E-maili nuk do te publikohet. Duhen plotesuar *


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F




Kontakt

Telefono