Vuçiç: Serbia legjitimoi pavarësinë e Kosovës në 2008-n

14:16 | 17/04/2018

Presidenti i Serbisë, Aleksandër Vuçiç, tha se Beogradi legjitimoi pavarësinë e Kosovës me pyetjen e ngritur në Gjykatën e Hagës. Gjithashtu theksoi me ironi se për Kosovën nuk do të bisedojë me Prishtinën por me Uashingtonin.

Presidenti serb, Aleksandër Vuçiç, gjatë një interviste për “TV Pink”, tha se shteti i tij, me një vendim të pamenduar mirë, i ka dhënë legjitimitet shpalljes së pavarësisë së Kosovës. Ai I bëri këto komente ndërsa po fliste për kritikat e opozitës ndaj politikave të tij.

Aleksandër Vuçiç, President i Serbisë: “Kundërshtarë për ne, në çështjen e Kosovës, nuk janë shqiptarët, por ata që e kanë krijuar atë shtet, dhe të cilët na e kanë marrë atë territor, kur Kosova shpalli pavarësinë, më 2008. Serbia, me pyetjen e çuditshme, para Gjykatës Ndërkombëtare të Drejtësisë, i ka dhënë legjitimitet kësaj”.

Në atë kohë, Serbia duke u bazuar në rezolutën 63/3 të OKB-së, ngriti këtë pyetje në Gjykatën e Hagës: “A është Deklarata e njëanshme e Pavarësisë, e marrë nga institucionet vetëqeverisëse të Kosovës, në përputhje me të drejtën ndërkombëtare?”. Mendimi këshillimor i Gjykatës Ndërkombëtare të Drejtësisë u dha me 22 Korrik 2010. Me 10 vota pro dhe 4 kundër, ai mendim ishte se”Deklarata e Pavarësisë së Kosovës, e 17 shkurtit 2008, nuk cënon normat e së drejtës ndërkombëtare”.

Ndërkohë, më tej Vuçiç theksoi se për Kosovën nuk do të flasë me Prishtinën por me SHBA-të.

Aleksandër Vuçiç: “Ky vit nuk do të jetë i lehtë. Do të ekzistojë dëshira e madhe për zgjidhjen e çështjes së Kosovës, por a do të mundemi ta bëjmë këtë, pasi jemi ne, në Serbi njëra anë, dhe në anën tjetër janë ata, pala e Prishtinës dhe amerikanët për të cilët vetë Haradinaj tha se ata e udhëheqin politikën e tyre të jashtme”.

Gjithashtu Presidenti serb tha se në Prishtinë nuk ekziston njëra nga shtyllat kryesore të shtetit, që e cila sipas tij është pranuar nga vetë kryeministri Ramush Haradinaj dhe Hashim Thaçi./abcnews.al





Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F




Kontakt

Telefono