“Vdes” traktati i 87-ës, SHBA tërhiqen zyrtarisht nga marrëveshja bërthamore

13:50 | 02/08/2019

Shtetet e Bashkuara janë tërhequr zyrtarisht nga traktati bërthamor i vitit 1987, që ndalonte vendosjen në terren të raketave me rreze të mesme veprimi. Uashingtoni zyrtar ka akuzuar Moskën si përgjegjësen e vetme për shfuqizimin e marrëveshjes së arritur nga presidentët Ronald Regan dhe Mikhail Gorbaçov.

Shtetet e Bashkuara të Amerikës janë tërhequr zyrtarisht të premten nga traktati bërthamor me Rusinë, duke rritur frikën për nisjen e një gare të re armatimi mes dy superfuqive. Traktati për raketat bërthamore me rreze të mesme veprimi ishte nënshkruar në vitin 1987 nga presidenti amerikan Ronald Regan dhe lideri i Bashkimit Sovietik, Mikhail Gorbaçov. Ai ndalonte raketat që mbulonin një rreze veprimi nga 500 deri në 5.500 kilometra. Por më herët gjatë vitit Shtetet e Bashkuara dhe NATO akuzuan Rusinë se e kishte shkelur marrëveshjen, duke vendosur në terren modele të reja të raketës “Kruis”, akuzë të cilën Moska e ka mohuar vazhdimisht. “Rusia është përgjegjësja e vetme për shfuqizimin e traktatit”, deklaroi të premten sekretari amerikan i Shtetit, Majk Pompeo. Ai shtoi se, me mbështetjen e plotë të NATO-s, Amerika ka konstatuar shkeljen e traktatit nga Rusia dhe rrjedhimisht ka pezulluar detyrimet që rrjedhin prej tij. Po të premten, përmes një deklarate të publikuar nga agjencia e lajmeve “RIA Novosti”, Ministria e Jashtme ruse konfirmoi se traktati i vitit 1987 praktikisht “ka vdekur”. Në shkurt të këtij viti, presidenti Donald Trump caktoi datën 2 gusht si afatin e fundit për tërheqjen e Shteteve të Bashkuara nëse Rusia nuk përmbushte detyrimet e saj. Me një lëvizje të ngjashme, pak kohë më vonë presidenti rus Putin tërhoqi vendin e tij nga detyrimet që rrjedhin nga traktati. /ABC News Albania 24/7


Lini koment

E-maili nuk do te publikohet. Duhen plotesuar *


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F




Kontakt

Telefono