Spanjë, ETA njofton zyrtarisht shpërbërjen

20:46 | 02/05/2018

Grupi separatist ETA ka njoftuar zyrtarisht shpërbërjen e strukturave të tij, duke i dhënë fund konfliktit me shtetin spanjoll për pavarësinë e rajonit bask, një përballje disadekadëshe që ka marrë jetët e 850 personave.

Grupi separatist bask ETA ka njoftuar shpërbërjen e strukturave të tij, duke i dhënë fund luftës 50-vjeçare. Njoftimi është bërë përmes një letre të hartuar nga lidershipi i grupit më 16 prill, por i publikuar të mërkurën nga gazeta spanjolle online “El Diario”.

Organizata pritet ta formalizojë shpërbërjen në një event zyrtar që do të mbahet më vonë gjatë javës, një lëvizje kjo që i jep fund konfliktit për pavarësinë e rajonit bask në veri të Spanjës, që në 5 dekada ka marrë 850 jetë njerëzish. “ETA ka shpërbërë tërësisht strukturat e saj dhe i ka dhënë fund iniciativës së saj politike”, thuhet në letrën e publikuar në “El Diario” e që u është dërguar organizatave të ndryshme baske.

ETA, akronim i Shtetit të Lirë Bask, shpalli armëpushim në vitin 2011 dhe 6 vjet më vonë uli armët, duke i dhënë fund asaj që konsiderohet si konflikti më i rëndëi i armatosur në Europën perëndimore.

Vendimet e fundit të organizatës, siç thuhet në letër, synojnë shkëputjen nga epoka e dekadave të fundit dhe ndërtimin e një të ardhmeje nga një këndvështrim i ri. Kapitulli final i tërheqjes së ETA-s, që u formua në vitin 1959 nga studentët që iu rebeluan diktaturës shtypëse të gjeneralit Fransisko Franko, është pritur sa me duartrokitje, aq edhe me mosbesim. Një zëdhënës i qeverisë spanjolle ka deklaruar se shteti do të vazhdojë t’i ndjekë anëtarët e organizatës të dyshuar për krime. /abcnews.al

 


Lini koment

E-maili nuk do te publikohet. Duhen plotesuar *


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F




Kontakt

Telefono