Soreca: BE të njohë progresin e Shqipërisë

18:10 | 06/06/2019

Ambasadori i Bashkimit Europian në Tiranë, Luixhi Soreka ka deklaruar se BE duhet ta njohë progresin që ka bërë Shqipëria në rrugën e integrimit. Në një intervistë për gjermanen “Di Velt”, Soreka ka nënvizuar se vendet anëtare duhet të kenë parasysh se hapja e negociatave nuk do të thotë anëtarësim në BE.

Ambasadori i Bashkimit Europian në Tiranë, Luigi Soreka ka deklaruar se hapja e negociatave të anëtarësimit për Shqipërinë do të ishte një sinjal inkurajues që BE i jep vendit. Në një intervistë për gjermanen “Di Velt”, Soreka ka nënvizuar se hapja e negociatave ka të bëjë me progresin dhe jo me zgjidhjen e të gjitha problemeve.

“Hapja e negociatave nuk do të thotë anëtarësim në BE. Do të thotë se vendi ka arritur një nivel domethënës progresi sa u takon prioriteteve të kërkuara nga Komisioni dhe Këshilli Europian dhe se tendencat në vend janë pozitive”, ka deklaruar Soreka.

Sipas diplomatit europian, është me rëndësi të shmanget ngatërresa që për hapjen e negociatave vendi duhet të jetë në nivelin e anëtarësimit në BE.

“Kjo do të arrihet në përfundim të procesit, sikurse ka ndodhur për të gjitha vendet e tjera që janë anëtarësuar. Ndaj, aktualisht ne duhet të fokusohemi tek progresi domethënës, që konfirmon zotimin për të arritur më pas një progres të qëndrueshëm”, ka thënë Soreka.

Ai ka theksuar se është koha që Bashkimi Europian të marrë një vendim sa i takon rrugës europiane të Shqipërisë.

“Ne jemi shumë të vetëdijshëm se vendimi i qershorit ka një rëndësi kritike për të ardhmen e vendit. Është një vendim shumë domethënës në radhë të parë për popullin shqiptar, që ka interesin më të lartë për t’u bashkuar me Europën sesa të gjithë popujt e tjerë në pjesën jug-lindore të kontinentit të vjetër”, ka shtuar Soreka. /ABC News Albania 24/7


Lini koment

E-maili nuk do te publikohet. Duhen plotesuar *


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F




Kontakt

Telefono