Skënderbeu “vret” kampionatin

21:29 | 09/02/2018

Skënderbeu u shkëput në 11 pikë në krye të renditjes së Superligës. Skuadra më e mirë shqiptare mundi 1-0 Flamurtarin në Korçë, ndonëse nuk e pati aspak të lehtë.

Ajo që pritej ndodhi në Korçë.

Skënderbeu arriti fitoren e radhës, pikërisht ndaj atij që ishte rivali i tij kryesor, Flamurtarit dhe u shkëput në 11 pikë largësi në renditjen e Superligës.

Skuadra më e mirë e Shqipërisë mund të thuhet se “e vrau” kampionatin, kur Gjergji Muzaka e dërgoi topin në rrjetë 6 minuta para fundit.

Trajneri i Flamurtarit, Shpëtim Duro, e kishte parashikuar që ekipi i tij nuk quhej pretendent për titull dhe kjo u pa në stadiumin “Skënderbeu”.

Përballja, e vlefshme për javën e 19-të, u luajt e fortë, por me më shumë epërsi të vendasve.

Formacioni i trajnerit Ilir Daja pati më tepër raste për shënim, duke pretenduar edhe dy herë për 11-metërsha.

Flamurtari, po ashtu pati mundësitë e veta, por më të pakta, dhe shumë rrallë e gjeti kuadratin e portës së mbrojtur nga portieri Shehi.

Kampionati, natyrisht, nuk ka marrë fund, pasi ka ende edhe 17 javë për t’u luajtur, por diferenca e kryesuesve me të tjerët është shumë e madhe.

Flamurtari, Kukësi, Laçi apo Partizani mund të luftojnë thjesht për një vend në Europë.

Pas 19 ndeshjeve të luajtura, Skënderbeu kryeson me 43 pikë, ndaj 32 të Flamurtarit e 29 të Kukësit./abcnews.al


Lini koment

E-maili nuk do te publikohet. Duhen plotesuar *


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono