Samiti në Sofje/ Tusk, Juncker e Borissov: Integrimi i Ballkanit prioritet kryesor

16:43 | 17/05/2018

Samiti mes Bashkimit Europian dhe Ballkanit Perëndimor është përmbyllur me deklarata positive. Drejtuesit e Unionit ripërsëritën se integrimi i rajonit është prioritet për Brukselin megjithatë nuk pranuan të flasin për data konkrete.

Me firmosjen e deklaratës së përbashkët që përmban shumë marrëveshje bashkëpunimi, përfundoi punimet samiti i mbajtur në Sofje mes Bashkimit Europian dhe 6 vendeve të Ballkanit Perëndimor. Pas kësaj drejtuesit më të lartë të Unionit dolën në një konferencë për shtyp. I pari që foli ishte, Donald Tusk, i cili e konsideroi shumë të suksesshëm këtë samit, megjithëse theksoi se nuk dëshiron të flasë për data.

Donald Tusk, President i Këshillit të Europës: “Ne sapo përmbyllëm një samit shumë të mirë mes BE-së dhe Ballkanit Perëndimor. Ky është ilustrimi më i mirë se integrimi i Ballkanit Perëndimor është prioritet kryesor për BE-në. Sot ne konfirmuam të gjithë perspektivën europiane për të gjithë rajonin. Ashtu siç e kam thënë edhe gjatë vizitave të mija në rajon, Bashkimi Europian do të mbetet partneri më i qëndrueshëm për Ballkanin Perëndimor. Për të shmangur çdo konfuzion, më lejoni që të jem shumë i qartë. Nuk shoh të ardhme tjetër për ballkanin përveç BE-së”.

Nga ana tjetër, organizatori i këtij samiti, kryeministri i Bullgarisë, Boyko Borissov, i cili drejton presidencën e BE-së deri në qershor, i konsideroi punimet shumë frytdhënëse.

Boyko Borissov, Kryeministër i Bullgarisë: “Ju sapo patë presidentin Vuçiç dhe presidentin Thaçi që shtrënguan duart për marrëveshjen e interkonjeksionit. Kjo ishte diçka e pamundur edhe ta imagjinoje disa vite më parë. Ne patëm një diskutim shumë të frytshëm dhe të sinqertë”.

Presidenti I Komisionit Europian Jean-Claude Juncker u ndal më shumë tek çështjet ndërkombëtare të Unionit si marrëveshja bërthamore me Iranin si dhe mardhëniet tregtare me Shtetet e Bashkuara. Ai ritheksoi se vendet anëtare dhe Brukseli do të vazhdojë të rrespektojë paktin me Teheranin derisa Irani të respektojë akordin. Ndërsa për tarifat e vendosura nga presidenti amerikan Donald Trump, Juncker nënvizoi se BE duhet të përjashtohet. /abcnews.al



Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono