“Republika e Maqedonisë së Veriut”, emri i ri krijon polemika


11:17 | 13/06/2018

Emri i ri “Republika e Maqedonisë së Veriut”, i dakordësuar mes kryeministrave Zoran Zaev dhe Aleksis Tsipras ka krijuar polemika të shumta në Athinë dhe Shkup. Partitë opozitare të dy vendeve kundërshtojnë me forcë zgjidhjen e kontestit të emrit. Kryetari i VMRO-DPMNE-së, Hristian Mickoski, në një konferencë për shtyp u shpreh se kjo është një ditë e vështirë për vendin. Ai e vlerëson ngjarjen si një marrëveshje kapitullimi për vendin.

Hristian Mickoski, kryetar i VMRO-DPMNE: “Zoran Zaev po përpiqet të demonstrojë eufori. Po shihet qartë se kjo është një humbje. Qytetarët po ndiejnë dhimbje dhe hidhërim. Negociatat u mbajtën të fshehta. Opozita dhe VMRO-DPMNE-ja nuk ishin përfshirë në bisedime, tani është e qartë pse”.

Sipas kreut opozitar, në këtë marrëveshje janë pranuar të gjitha qëndrimet për të cilat ka këmbëngulur pala greke. Ndërsa nga ana tjetër, lideri i Demokracisë së Re, Mitsotakis, tha se kryeministri grek nuk ka asnjë legjitimitet që të nënshkruajë marrëveshjen e emrit, pasi ajo nuk është aprovuar nga partnerët e koalicionit të tij, Grekët e Pavarur.

Deklarata u bë gjatë një takimi me presidentin Prokopis Pavlopoulos. Partia opozitare greke ka kritikuar akordin duke thënë se njeh gjuhën dhe etninë Maqedonase. Këtyre pretendimeve iu është përgjigjur ministri i Jashtëm, Kotzias, që akuzoi Demokracinë e Re se po mundohet të fshehë përçarjet brenda partisë me këto akuza.

Përtej kundërshtimeve marrëveshja historike është përshëndetur nga faktori ndërkombëtar. Përfaqësuesja e Lartë e BE-së, Federica Mogherini dhe komisioneri për Zgjerim, Johannes Hahn kanë përgëzuar dy vendet për akordin e arritur. Ndërsa, Sekretari i përgjithshëm i NATO-s, Jens Stoltenberg, tha se ky zhvillim i hap rrugën anëtarësimit të Shkupit në Aleancë. Gjithashtu edhe ndërmjetësuesi i OKB-së, Matthew Nimetz ka përshëndetur marrëveshjen./abcnews.al


Lini koment

E-maili nuk do te publikohet. Duhen plotesuar *


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono