Maqedoni, DASH ofron mbështetje për negociatat me Greqinë

16:09 | 13/03/2018

Zyrtari i Departamentit të Shtetit, Wes Mitchell gjatë vizitës së tij në Shkup, ofroi mbështetjen e Shteteve të Bashkuara për zgjidhjen e kontestit të emrit me Athinën. Nga ana e tij, kryeministri i Maqedonisë, Zoran Zaev deklaroi se bisedimet me Greqinë për këtë çështje, janë në fazën e fundit.

Ndihmës sekretari amerikan i shtetit për Europën dhe Euroazinë, Wes Mitchell, vijon turin e tij të vizitave në Ballkan. Këtë herë, zyrtari i DASH u ndal në Shkup, ku u takua me kryeministrin maqedonas, Zoran Zaev. Pas takimit ata dolën në një konferencë për shtyp. Gjatë fjalës së tij, Mitchell shprehu mbështetjen e Shteteve të Bashkuara për negociatat mes Shkupit dhe Athinës për zgjidhjen e kontestit të emrit.

Wes Mitchell, ndihmës sekretar amerikan i shtetit për Europë dhe Euroazinë: “SHBA mbështet të dy vendet që të arrijnë zgjidhjen e kontestit të emrit. Me kryeministrin Zaev diskutuam për bisedimet me Greqinë, forcimin e ekonomive te vendeve të rajonit dhe mbi të gjitha folëm për rrugën e Maqedonisë drejt integrimeve euro-atlantike. SHBA mbështet dhe do vazhdojnë të mbështesë Maqedoninë në përmbushjen e reformat për të hyrë në BE dhe për t’u bërë pjesë e NATO-s”.

Nga ana tjetër, edhe kryeministri Zaev komentoi negociatat për kontestin e emrit me Greqinë.

Zoran Zaev, Kryeministër i Maqedonisë: “Në këtë drejtim, diskutova me ndihmës Sekretarin Mitchell për zhvillimet e fundit në bisedimet me Greqinë për problemin që fqinji jonë ka me emrin tonë. Shpreha bindjen time se fillojmë fazën e fundit, e cila në fund do të sjellë zgjidhje dinjitoze për këtë çështje. Mbetet e rëndësishme që të ndërtohet besimi mes dy palëve”.

Më tej, kreu i qeverisë nënvizoi se bisedimet kanë ardhur në këtë fazë falë të gjitha partive dhe qytetarëve të Maqedonisë. I pyetur për marrëveshjen, të cilën pritet ta dërgojë në Shkup, ministri i Jashtëm grek, Zaev tha se do ta mirëpresë dhe do ta shqyrtojnë nëse do të ndikonte pozitivisht në gjetjen e një zgjidhje që do të respektonte dinjitetin dhe identitetin e të dyja palëve.

Ndërkohë, pas Maqedonisë, Mitchell do të udhëtojë për në Serbi dhe më pas në Greqi. Vizitën do ta përmbyllë në Qipron greke, ndërsa Shqipëria nuk është në agjendën e vizitave të zyrtarit të Departamentit të Shtetit./abcnews.al




Lini koment

E-maili nuk do te publikohet. Duhen plotesuar *


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F




Kontakt

Telefono