Maduro: Trump, kreu i një bande ekstremistësh

19:19 | 12/02/2019

Në një intervistë të rrallë, presidenti Nikolas Maduro ka akuzuar homologun amerikan Donald Trump, duke e cilësuar kreun e një bande ekstremistësh, që synon pushtimin e Venezuelës. Duke folur për BBC, Maduro ka akuzuar gjithashtu Uashingtonin se po përgatit ndërhyrjen ushtarake në vendin e tij.

Presidenti në fuqi i Venezuelës, Nikolas Maduro ka kritikuar ashpër administratën e presidentit Donald Trump, duke e quajtur atë një “bandë ekstremistësh” dhe ka fajësuar Shtetet e Bashkuara për krizën në vendin e tij. Në një intervistë për BBC, Maduro ka deklaruar se Uashingtoni zyrtar po nxit luftën vetëm e vetëm për të pushtuar Venezuelën.

“Shpresoj që ky grup ekstremist në Shtëpinë e Bardhë të mposhtet nga opinioni publik mbarëbotëror”, ka deklaruar Maduro në intervistën e rrallë.

Nga Karakasi, ai ka thënë për gazetaren e BBC, Orla Guerin se kriza në Venezuelë është një luftë politike e perandorisë amerikane, e përbërë nga interesat e supremacistëve të bardhë që drejtojnë Shtëpinë e Bardhë dhe që synojnë të pushtojnë Venezuelën. Presidenti i vendit latin ka refuzuar edhe një herë ndihmat e dërguara nga Shtetet e Bashkuara, duke nënvizuar se qeveria e tij ka mjaftueshëm kapacitete për të plotësuar nevojat e popullsisë dhe të mos i lypë për ndihmë askujt.

“Shtetet e Bashkuara synojnë të krijojnë një krizë humanitare në mënyrë që më pas të justifikojnë ndërhyrjen e tyre ushtarake”, ka theksuar Maduro. Për kreun e shtetit, gjithçka është pjesë e një maskarade.

“Prandaj, me gjithë dinjitetin tonë u them se nuk i duam thërimet e tyre, ushqimin e tyre toksik, apo mbeturinat e tyre”, ka vijuar Maduro.

Marrëdhëniet mes Shteteve të Bashkuara dhe Venezuelës ishin përkeqësuar që përpara se presidenti Donald Trump të bëhej i pari lider ndërkombëtar që njihte liderin e opozitës venezueliane Huan Guaido’ si liderin legjitim të vendit. Gjithashtu, Karakasi zyrtar shkëputi marrëdhëniet diplomatike si reagim ndaj deklaratës së Trump se, opsioni ushtarak për Venezuelën ishte i hapur./abcnews.al


Lini koment

E-maili nuk do te publikohet. Duhen plotesuar *


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F




Kontakt

Telefono