Liderët e qeverive të huaja ofruan ndihmë, Rama: Sigurimi i banesave, tema që duhet diskutuar

12:27 | 22/09/201912:270

Kryeministri Edi Rama bëri të ditur sot gjatë një mbledhje me grupin parlamentar se është kontaktuar menjëherë nga liderët e qeverive evropiane pas tërmetit që shkaktoi dëme të shumta materiale të shtunën.

Rama theksoi se Ministria e Financave kur përgatit buxhetin i ka bërë skenarët duke imagjinuar një rast më të rëndë se sa ky që ndodhi dje. Megjithatë, në rastet ku situata janë të papërballueshme ndërhyjnë edhe shtetet e huaja, të cilat i drejtohen solidaritetit ndërkombëtar.

“Kjo është arsyeja pse menjëherë dje, punë minutash, mua më kanë marrë në telefon kryeministri i Italisë, Presidenti i Francës, kancelarja austriake, komisionari Avramopulos edhe të tjerë për të thënë çfarë doni. Më vonë, Presidenti i Turqisë. Ata kanë aktivizuar direkt strukturat e tyre sepse lajmi ka qenë tronditës dhe eksperienca ka treguar se në këtë raste duhet solidaritet”, tha Rama.

Pas tërmetit, sipas Ramës, është e nevojshme që të diskutohet për një temë të rëndësishme siç është ajo për sigurimin e banesave.

“Ka edhe tema të tjera për t’u diskutuar më pas siç është tema e sigurimit të banesave që për fat të keq është trajtuar si tabu. Unë e kam prekur që kur kam qenë kryetar bashkie. Më tutje është prekur edhe nga kryetari aktual i Bashkisë së Tiranës dhe Durrësit që është e domosdoshme që të ketë tjetër hap siç e ka gjithë bota për sigurimin nga fatkeqësitë natyrore sepse është e pamundur që të jetë vetëm buxheti i shtetit, por mbi të gjitha kompanitë e ndërtimit. Ka ardhur koha ta përmbyllim këtë proces shekullor më duket mua edhe pse janë 20 vjet që kur është trajtuar si çështje të ndërtimit të lidhur me policinë e ndërtimit edhe me kolaudimin në bashki. Ndërtimi i çdo godine sidomos për pallatet duhet të jetë i lidhur me sigurimin. Duhet të jetë kompania e sigurimit që jep viston dhe që mban përgjegjësi për shkeljen në ndërtim. Kompania e sigurimit është roja që duhet t’i rrijë në kantier ndërtuesit për të mos bërë dalje nga projekti që mund të kërcënojnë strukturën”, tha Rama.

Të shtunën një tërmet 5.8 ballë i shkallës Rihter goditi Shqipërinë. Si pasojë e lëkundjeve, të cilat u pasuan edhe nga tërmete të tjera më të vegjël, pësuan dëmtime të mëdha materiale shumë banesa, kryesisht në Durrës dhe Tiranë.

Gjithashtu 105 vetë mbetën të plagosur, shumica e të cilëve kanë marrë mjekimin e nevojshëm dhe janë larguar nga ambientet e spitaleve.  Ministria e Shëndetësisë dhe Mbrojtjes Sociale njoftoi të dielën se në spital janë vetëm 10 persona, 7 në Tiranë dhe 3 në Durrës./abcnews.al

Lini koment

E-maili nuk do te publikohet. Duhen plotesuar *


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F




Kontakt

Telefono