Teknologji

36330712_303.jpg
G. P.09:32 | 12/10/2018

Çdo ditë ka sulme kibernetike ndaj rrjeteve kompjuterike qeveritare. Garantimi i sigurisë në rrjet po vështirësohet. Përse? Përgjigjet jepen në raportin e Entit Federal për Sigurinë në Teknikën e Informacionit.

Në fund të vitit të kaluar, hakerët sulmuan një platformë mësimore në një shkollë të lartë të federatës, për të krijuar atje akses në rrjetin e Ministrisë së Jashtme. Ministri i Brendshëm Horst Seehofer e konsideron këtë një shembull paralajmërues për rrezikun e sulmeve kibernetike. Sulmuesit jo vetëm dështuan gjatë kësaj përpjekjeje, por ata u vrojtuan gjatë gjtihë kohës prej Entit Federal për Sigurinë në Teknikën e Informacionit (BSI). BSI është përgjegjëse për mbrojtjen nga sulmet kibernetike dhe konsulton shoqatat dhe ndërmarrjet. Ministri Seehofer e vlerësoi punën e këtij institucioni gjatë prezantimit të enjten (11.10) në Berlin të raportit të BSI-së për gjendjen aktuale.

Sipas raportit me rritjen e akseseve në rrjet në jetën e përditshme shtohet edhe numri i pikave të ndjeshme ndaj sulmeve në sistem. Megjithatë ministri i Brendshëm është i preokupuar për të garantuar që rrjetet elektronike të autoriteteve gjermane, të furnizuesve të energjisë apo të sipërmarrjeve të tjera të rëndësishme të jenë imune edhe në të ardhmen prej sulmeve të tilla. Gjendja e rrezikshmërisë në Gjermani është ashpërsuar për shkak të një cilësie të re të sulmeve kibernetike, thekson Seehofer.

Gjithnjë e më shumë lidhje në rrjet

“Kërcënimet në hapësirën kibernetike kanë një dinamikë të lartë”, tha Seehofer. Presidenti i BSI Arne Schönbohm raportoi, se autoriteti i tij ndërkohë njeh 800 milionë programe dëmtuese. Çdo ditë atyre u shtohenreth 390.000 versione të reja. Për aparaturat mobile ndërkohë kam bi 27 milionë programe dëmtuese vetëm për sistemet Android. Përmes kushteve laboratorike është arritur p.sh. që të sulmohen dhe të riprogramohen aparaturat e frymëmarrjes artificiale, shkruan BSI në raportin e publikuar. Njëkohësisht në të tilla apartura shpesh nuk vendosen kodet e sigurisë, për t’u mundësuar mjekëve në raste emergjence që të kenë akses të menjëhershëm në to. Meqënëse gjendja e rrezikshmërisë është kritike, duhet të hulumtohet më intensivisht në mekanizmat speical të sigurisë, shkruhet në raportin e BSI-së.

Infrastrukturat gjithnjë e më komplekse

Në periudhën nga 1 korriku 2017 deri më 31 maj 2018 BSI i kanë mbërritur nga operatorët gjermanë të infrastrukturave sensibël 145 njoftime për raste ndërhyrjeje – kryesisht bëhet fjalë për raste në fushën e Teknologjisë së Informacionit (IT) dhe Telekomunikacionit dhe në sektorin e energjetikës. Mundësia e suksesit të sulmuesve ndaj infrastrukturave sensibël është rritur, sepse ka rritje edhe të numrit të pikave të ndjeshme ndaj sulmeve si dhe vet infrastrukturat po bëhen gjithnjë e më komplekse dhe po shumëfishohet sasia e të dhënave, thuhet në raportin e BSI-së.

Ministri Seehofer deklaroi, se duke iu referuar gjendjes së rrezikshmërisë ai do ta pasurojë ligjin ekzistues të Siugrisë së IT “me një ligj të Sigurisë së IT-së 2.0 dhe në këtë mënyrë do të forcojë mandatin shtetëror për mbrojtjen”. Kur bëhet fjalë ëpr mbrojtjen e ekonomisë, kërkohet që „edhe vet sipërmarrjet të intensifikojnë masate tyre të sigurisë së IT-së dhe t’u përshtaten sfidave të reja”, kërkoi ai./DW

raketa.png
G. P.21:28 | 11/10/2018

Një anije kozmike ruse ka hasur problem gjatë lëshimit për në hapësirë. Fatmirësisht, dy austronautët që gjendeshin në bord arritën të shpëtonin pa dëmtime.

Një kapsulë kozmike që mbante dy anëtarë të ekuipazhit të raketës ruse “Soyuz” që hasi probleme gjatë lëshimit është ulur në mënyrë të sigurtë në Kazakistan. Kozmonauti rus Alexey Ovchinin dhe astronauti amerikan Nick Hague thuhet se janë “në gjendje të mirë”. Kjo është bërë e ditur nga mediat ruse që citojnë një deklaratë nga NASA. Ekipet e kërkimit dhe shpëtimit mbërritën menjëherë në vendin e uljes.

Raketa ishte nisur për në Stacionin Ndërkombëtar të Hapësirës (ISS) kur ajo pësoi një problem me përforcuesin e saj pas lëshimit. Ekuipazhi duhej të kthehej në në tokë me “mënyrën e zbritjes balistike”, nënvizon NASA, e cila shpjegoi se ishte “një kënd më i mprehtë i uljes krahasuar me normale”.

Raketa “Soyuz” u nis nga Kazakistani për në orbitë, në një udhëtim që do të zgjaste 6 orë dhe destinacioni ishte Stacioni Ndërkombëtar i Hapësirës ISS. Hague dhe Ovchinin do të shpenzonin 6 muaj në stacionin kozmik. Ata do të punonin në disa eksperimente shkencore./abcnews.al

sansforgeticafont.630x360.png
ent ela09:43 | 11/10/2018

Disa studiues të Institutit Mbretëror të Teknologjisë në Melburn sapo kanë publikuar një tipografi të re dhe e kanë bërë të disponueshme falas. Bëhet fjalë për Sans Forgetica  dhe është studiuar për të ndihmuar dhe për të kujtuar ata që lexojnë.

Ky truk qëndron në faktin se ky font i veçantë është mjaft i mundimshëm për t’u lexuar: lexuesi është i detyruar të bëjë një përpjekje më të madhe, sesa ajo e kërkuar me karaktere tradicionale dhe rrjedhimisht nxitet të analizojë më hollësisht kuptimin e tekstit dhe lë më shumë mbresa në kujtesë.

Ideja ka lindur nga një profesor i universitetit që donte të ndihmonte studentët e tij, por q ëu ëprqafua më pas edhe nga stilistët dhe shkencëtarët e kohës, bazohet në një koncept të psikologjisë njohëse e quajtur vështirësi e dëshirueshme. Me pak fjalë të arrish një shkallë vështirësie për të kryer një detyrë të caktuar do të përmirësonte përpunimin e njohurive dhe kujtesën.

Ekipi për këtë arsye krijoi disa fonte që u testuan nga 400 studentë. Sans Forgetica ishte më efikase. Për ta bërë leximin më të vështirë, ekipi e anulloi shkronjën në drejtim të kundërt në krahasim me kursivin e zakonshëm dhe gjithashtu hoqi disa pjesë të secilës shkronjë.

Nuk janë mrekulli! Natyrisht një shkronjë e tillë ngadalëson leximin dhe nuk mund të jetë mrekullia që shpëton studentët që ulen mbi libra një natë para provimit. Megjithatë, sipas psikologëve njohës, sa i përket kohës së leximit informacionet e ruajtura janë të mëdha.

Sipas studiuesve, ky karakter i ri është i dobishëm jo vetëm për studentët, por për këdo që ka nevojë për të kujtuar datat ose shënimet personale. Nëse jeni kuriozë dhe dëshironi ta provoni, ju  duhet të vizitosh faqen e universitetit dhe ta shkarkoni atë. /abcnews.al

 

 

spiunazh.png
G. P.23:40 | 04/10/2018

Kompanitë më prestigjoze të teknologjisë në Shtetet e Bashkuara, mes të cilave Apple dhe Amazon kanë rënë viktima të sulmeve kibernetike. Duke publikuar rezultatet e një investigimi, agjencia “Bloomberg” ka bërë me dije se spiunazhi kinez ka depërtuar në rrjetet e mbi 30 kompanive.

Apple dhe Amazon janë mes shumë kompanive dhe agjencive amerikane të cilave u janë vjedhur të dhënat nga shërbimet kineze të spiunazhit. Sipas agjencisë së lajmeve “Bloomberg”, të dhënat janë transmetuar përmes qarqeve të vogla elektronike të vendosura në qarqet mëmë të kompanive.

Sipas “Bloomberg”, serverat janë kompromentuar gjatë punës fizike dhe qarqet janë vënë në punë menjëherë sapo ata janë ndezur.

Vetë gjigandët e teknologjisë e kanë mohuar lajmin, por agjencia e lajmeve insiston në investigimin e saj njëvjeçar, gjatë të cilit ka gjetur prova për një sulm kibernetik në masë të madhe, që i ka mundësuar Pekinit aksesin në 30 kompani dhe institucione federale amerikane.

Sipas investigimit, të dhënat e para për një vjedhje kibernetike kanë dalë gjatë testit të sigurisë së kryer nga Amazon në vitin 2015, përpara se të kishte filluar përdorimin e serverave të një kompanie amerikane, por të prodhuar në Kinë.

Konstatimi bëri që agjencitë amerikane të inteligjencës të nisnin një hetim sekret, përmes të cilit është zbuluar se depërtimi kinez kishte arritur bazat e të dhënave të Pentagonit, sistemet elektronike të luftanijeve dhe në të dhënat e mbledhura nga dronët e CIA-s.

“Bloomberg” nënvizon më tej se, Pekini ka të gjitha mundësitë për të bërë një sulm të tillë sepse 90 për qind e kompjuterëve në mbarë botën prodhohen në Kinë./abcnews.al

rrjetet-sociale.jpg
G. P.16:23 | 04/10/2018

Teknologjia dhe rrjetet sociale janë pjesë përditshmërisë së të rinjve dhe jo vetëm. Psikologët shpjegojnë se varësia nga rrjetet sociale dhe interneti mund të dëmtojë seriozisht shëndetin dhe komunikimin.

Zhvillimi i teknologjisë dhe përdorimi i rrjeteve sociale vitet e fundit kanë mbërthyer para kompjuterave dhe smartfonëve adoleshentët dhe të rinjtë në mbarë botën. Për shumë prej tyre varësia nga internet është totale, në çdo kohë dhe në çdo vend.

Duke folur për varësinë e të rinjve nga rrjetet sociale profesori dhe psikologu Edmond Dragoti thotë se teknologjia dhe rrjetet sociale janë pjesë e pandashme e përditshmërisë, por që mbartin dhe problematika të ndryshme.

“Teknologjia e informacionit sot është zhvilluar me hapa shumë të shpejta dhe jo më kot sepse është nevojë e shoqërisë. Por duke qenë e tillë ajo mbart dhe probleme sepse përdoret më shumë seç duhet, kthehet në rrezik të madh ose serioz, siç janë në përgjithësi krimet e ndryshme që ndodhin në shoqëri, të cilat janë më të ndjeshme dhe kanë më shumë efekte negative te brezat e rinj”, thotë psikologu.

Ndërsa videolojërat duke qenë se janë sfiduese, sipas psikologut, shpeshherë nxisin edhe agresivitetin te fëmijët apo të rinjtë.

“Videolojërat janë sfida mjaft interesante sepse provon aftësitë e tua intelektuale, emocionale, ekuilibrat e ndryshëm të zhvillimit e pjekurisë të individit e të tjera dhe videoloja është një nga sfidat e këndshme që njeriu aplikon shpesh, por sidomos të rinjtë dhe fëmijët. Ka të keqen mbrapa sepse duke qenë një element sfidant ajo duke pasur edhe ngarkesën pozitive të kënaqësisë zakonisht, duke qenë dhe e pakontrolluar nga të rriturit, si dhe e paorientuar dhe e paplanifikuar në aspektin e saj të edukimit, moralit, të mesazheve që jep, loja elektronike, virtuale, videolojërat janë më të vërtetë tërheqëse, por kur varësohen të rinjtë drejt tyre atëherë si çdo gjë që varësohesh është e dëmshme. Edhe videolojëra kthehet në një rrezik serioz. Të bëjnë që të përfshihesh në një aktivitet paraprak fillestar si një pedanë që të hedh në bixhozin e të rriturve dhe si me thënë të përgatit për t’u përfshirë në jetën e ardhshme të bixhozit”, sipas Dragotit.

Psikologu këshillon qëndrimin me kohë të kufizuar në rrjetet sociale.

“Në përgjithësi prindërit duhet ta kenë të qartë që vetë ata nuk duhet të përfshihen totalisht në komunikimet virtuale gjatë gjithë kohës sepse do t’u jepnin në këtë rast modelin e gabuar fëmijëve të tyre. Së dyti, prindërit duhet të kenë vëmendjen e vazhdueshme, nuk është nevoja të kesh kontrollin pedant ndaj kohës që harxhojnë fëmijët e tyre, por vëmendjen e mjaftueshme ndaj kohës që të rinjtë dhe fëmijët shpenzojnë për përfshirjen në komunikimet virtuale. Marrim gjithmonë parasysh sa më shumë virtualisht të përfshihet një individ, aq më pak e jeton realitetin”, shprehet Edmond Dragoti.

Sipas psikologëve, komunikimi për një kohë të gjatë online përmes rrjeteve sociale, i shkëput njerëzit nga bisedat dhe kontaktet ballë për ballë, duke e zhytur gjithmonë e më shumë drejt botës virtuale çdo aspekt të jetës njerëzore./abcnews.al

SINKRON-RAMA-NE-FORUMIN-E-DAVOSIT.mpg_snapshot_00.04-1280x720.jpg
G. P.14:45 | 02/10/2018

Kryeministri Edi Rama ishte i pranishëm në Forumin Ekonomik Botëror. Në këtë takim kreu i qeverisë mori konfirmimin për ngritjen në Tiranë të qendrës rajonale që do të shërbejë për kërkimin në fushën e teknologjisë.

Edi Rama, Kryeministër: “Ne kemi pasur një takim të frytshëm, jo se kështu thuhet gjithmonë, por sepse janë marrë disa vendime konkrete dhe ndër to unë kam kënaqësinë të informoj se qendra rajonale e të ashtëquajturit revolucioni i katërt industrial do të jetë në Tiranë, e cila do të shërbejë si një pikë referimi ndaj inovacionit për kërkimin e fushës së teknologjisë. Do të jetë pjesë e rrjetit të këtyre qendrave të mbështetura nga forumi botëror në San Francisco dhenë vende të tjera që do të sjellë një vlerë të shtuar në një porces të digjitalizimin dhe inovacionit ku Shqipëria dhe rajoni ka hyrë.”/abcnews.al

ttt.jpg
G. P.09:57 | 25/09/2018

Shtëpia e Bardhë ka përpiluar një urdhër ekzekutiv që lejon agjencitë federale amerikane të hetojnë praktikat e kompanive si Google dhe Facebook. Me këtë nismë, Trump synon të zbulojë nëse gjigandët e teknologjisë kanë vepruar në kundërshtim me ligjet e konkurrencës.

Google, Facebook dhe rrjetet sociale janë në shënjestër të Donald Trump. Shtëpia e Bardhë ka përpiluar një urdhër ekzekutiv që do të lejonte agjencitë federale të konkurrencës të hetojë praktikat e gjigandëve të teknologjisë.

Në rendin ekzekutiv – raporton agjensia Bloomberg që ishte në gjendje ta shihte – asnjë kompani nuk u emërua, por autoriteteve të konkurrencës u kërkohet që “të hetojnë me kujdes nëse platformat në internet kanë vepruar në kundërshtim me ligjet e konkurrencës apo antitrust, siç cilësohen ndryshe”.

Agjencive qeveritare u është dhënë një muaj kohë nga firmosja e dekretit për të rekomanduar çdo mjet juridik për të mbrojtur konkurrencën dhe adresuar çdo paragjykim politik të gjetur.

Shtëpia e Bardhë përcakton dekretin si një projekt në fazat fillestare që ende nuk është transmetuar në agjencitë federale: një projekt që nuk është rezultat i ndonjë vendimmarrjeje brenda administratës amerikane.

Në fakt, nuk është e qartë nëse dokumenti do të vijë ndonjëherë në tryezën e presidentit dhe nëse Trump do ta nënshkruajë atë. Por nëse presidenti do ta miratojë atë, do të ishte një përshkallëzim i ‘betejës’ së Trump-it kundër Google, Facebook dhe mediave sociale që presidenti akuzon për heshtjen e konservatorëve.

Kohë më parë, kreu i Shtëpisë së Bardhë akuzoi Google se rendit në fillim vetëm lajmet negative për të në motorin e kërkimit./abcnews.al

intelligenti.630x360.jpg
ent ela23:55 | 22/09/2018

Atë verbale të shkrimtarëve apo atë matematikorë të inxhinierëve? Sipas një psikologu amerikan nuk ka vetëm një inteligjencë, por janë 9 ose 10 dhe secila prej tyre kontribuon në atë që ti je.

A jeni një sportist ose një muzikant? Një politikan apo një mësues? Varet shumë nga lloji i inteligjencës që keni. Sipas psikologut amerikan Howard Gardner nuk ekziston vetëm një.

Studiuesi është përpjekur t’i përkufizojë të gjitha dhe për të dy të njohurat që nga fillimi i shekullit të njëzetë (ajo e logjikës-matematikore dhe verbale), shtoi në vitet ’80 pesë lloje të tjera për të mbërritur në vitet  ’90, me nëntë. Kjo mbase nuk mjafton, pasi kohët e fundit është propozuar edhe ajo dixhitale, një kapacitet i të gjithë prerogativës së mijëvjeçarit, të lindur në fillim të viteve ’80 dhe 2000, gjë që i bën ata shumë të aftë në shfrytëzimin e teknologjisë.

Sipas studiuesit cilat janë nëntë inteligjencat e klasifikuara dhe profesionet përkatëse ndaj të cilave janë ato të predispozuara të karakterizohen.

Gjuhësor/ Verbal. Është inteligjenca e atyre që janë në gjendje të shprehen me fjalë, për shembull për të treguar ose shpjeguar, por edhe për gjuhët ose krijimin. Kush e zotëron atë? Për shembull shkrimtarë, gazetarë, avokatë dhe mësues.

Ekzistencial /Teorik. Është aftësia për të reflektuar mbi temat e mëdha të ekzistencës, nga natyra e Universit në ndërgjegjen e njeriut, duke arsyetuar në kategori konceptuale abstrakte. Është ajo që mund të bëjnë shumë mirë filozofët dhe fizikantët.

Logjikë / Matematikë. Është inteligjenca tipike e atyre që mund të zgjidhin aksionet matematikore, të identifikojnë lidhjet logjike, të eksperimentojnë me idetë dhe të zhvillojnë argumente logjike. Është ajo e shkencëtarëve, inxhinierëve dhe programuesve.

Natyralistika. Kush e zotëron, di se si të identifikojë, katalogojë dhe të gjejë marrëdhëniet mes objekteve natyrore, por edhe të imagjinojë mjedise dhe eksperimente me elementë të natyrës. Është puna e biologëve, gjeologëve, mbarështuesve dhe fermerëve.

Vizuale / Hapësinore. E atyre që mund të arsyetojnë në shumë dimensione, përfaqësojnë objekte në hapësirë, përdorin harta, vizatojnë. Siç bëjnë piktorët, projektuesit, artistët, arkitektët.

Ndërpersonale. Konsiston në hyrjen në kontakton me të tjerët, duke njohur ndjenjat, sjelljet dhe synimet e tyre. Siç funksionojnë politikanët apo tregtarët.

Muzikore. Është ajo që bën të mundur dallimin e tingujve, ritmeve, toneve, timbreve muzikore, kompozimit të muzikës dhe luajtjes së instrumenteve me lehtësi. E zotërojnë atë këngëtarët, kompozitorët dhe instrumentalistët.

Intrapersonale. Kjo do të thotë të kesh një shkallë të lartë të analizës së vetvetes, të jesh në gjendje të reflektosh mbi veten dhe emocionet e tua, madje edhe duke ua transmetuar mirë edhe të tjerëve. Është inteligjenca e atyre që bëhen aktorë, shkrimtarë, sipërmarrës.

Trupore-Kinestetike. Është inteligjenca tipike e atyre që kanë një zotërim të madh të lëvizjeve dhe dinë të shprehen me gjuhën e trupit. Ata që e shfrytëzojnë janë sportistët dhe kërcimtarët.

Burimi: focus.it

Përshtati: abcnews.al

 

FACEBOOK-FUSHATA-NDIHMA-1280x720.jpg
ent ela16:20 | 21/09/2018

Facebook nuk do të dërgojë punonjës për të ndihmuar kandidatët politikë në fushatat e tyre elektorale. Pavarësisht kësaj, kompania prestigjoze do të ndihmojë ekipet e fushatave përmes uebsajtit zyrtar.

Facebook nuk do të dërgojë punonjës për të punuar në zyrat e fushtave elektorale gjatë zgjedhjeve. Lajmi është konfirmuar nga vetë kompania prestigjoze. Në të kaluarën, rrjeti social ka ofruar staf të dedikuar për fushatat politike, për t’I ndihmuar kandidatët në zhvillimin e fushatës së reklamimit online.

Drejtori digjital i Donald Trump në zgjedhjet presidenciale të 2016-s ka thënë se asistenca e Facebook ka ndihmuar shumë në fitoren. Ndërsa gjigandi i teknologjisë ka njoftuar se candidates demokrate Hillary Clinton i është ofruar e njëjta mbështetje, por kjo e fundit në atë kohë kishte refuzuar. Rrjeti social është platforma më e madhe e reklamimit në internet, pas Google.

Gjithashtu edhe Tëitter dhe Google ofrojnë këshillimin e specializuar të tyre për fushatat politike. Megjithatë këto dy kompani nuk kanë njoftuar se do t’i japin fund kësaj praktike. Kurse Facebook tha se do të ofrojë këshillim falas për të gjitha partitë politike përmes uebsajtit zyrtar. Megjithatë, fushatat do të mund të marrin mbështetje online dhe kompania nuk përjashtoi organizimin e mbledhjeve me politikanë. Sipas një dokumenti të siguruar nga media amerikane Bloomberg, fushata e Trump shpenzoi 44 milionë dollarë në reklamimin në Facebook. Ndërsa Clinton shpenzoi 28 milionë dollarë. /abcnews.al

turistii.jpg
G. P.19:17 | 19/09/2018

Turisti i parë hapësinor që do të bëjë një udhëtim rreth hënës, i cili do të zgjasë pesë ditë, është një miliarder japonez 42 vjeç. Udhëtimi pritet të bëhet në vitin 2023, ndërsa nuk bëhet e ditur shuma e parave që ai ka paguar për këtë udhëtim në hapësirë.

Do të jetë japonez, turisti i parë që do të udhëtojë në vitin 2023 përreth Hënës. Lajmi është konfirmuar nga “Space X”, shoqëria hapësinore e transportit e krijuar nga Elon Musk, themeluesi i Tesla. Personi i parë që do të udhëtojë në bortin e “Big Falcon Rocket” është miliarderi dhe koleksionisti i artit Jusaku Maezaua, 42 vjeç, pronar i Zozo, shoqëri mode që shet produktet e saj online.

Administrator i deleguar i qendrës më të madhe tregtare online të specializuar në fushën e modës në Japoni, ai ka një pasuri prej 3 miliardë dollarësh. Maezaua bëri të ditur se do të ftojë dhe tetë artistë që të marrin pjesë në udhëtim në mënyrë që të frymëzohen për krijimet e  tyre të ardhshme. Në një deklaratë për mediat miliarderi u shpreh se kjo ishte ëndrra e jetës së tij.

“Space X” ka ndërmend të përdorë për udhëtimin, raketën më të madhe e cila aktualisht është endë në fazë zhvillimi. Testi i parë i fluturimit sipas ekspertëve do të ndodhë brenda dy vitesh. Sipas Musk ky është një hap i rëndësishëm para për t’i lejuar njerëzve të zakonshëm që të realizojnë ëndrrën e tyre duke udhëtuar në hapësirë. Udhëtimi do të zgjasë katër deri në pesë ditë.

Shuma që ka paguar miliarderi japonez për këtë udhëtim, nuk është bërë publike, por është e qartë se turizmi hapësinor është një privilegj që u takon shumë pak personave.

Ishin miliarderë dhe shtatë turistët hapësinorë që blenë një udhëtim të shkurtër me anijen kozmike ruse Soiuz për të shkuar në stacionin hapësinor ndërkombëtar. Turisti i parë që ka vizituar orbitën tokësore në prill të 2001-shit ishte Denis Tito, me një pushim mes yjesh që zgjati shtatë ditë./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono