Të Gjitha

pd.jpg
G. P.17:15 | 18/03/2019

Pas thirrjes së Komisionit Qendror të Zgjedhjeve drejtuar partive politike për mos shkelje të afateve ligjore për propozimin e komisionerëve për KZAZ lidhur me zgjedhjet e ardhshme vendore, burime pranë Partisë Demokratike kanë bërë me dije për ABC News se kjo focë politike nuk do të depozitojë listat me kandidatët që ligji i lejon të propozojë.

Ky duket edhe si hapi i parë drejt bojkotit të zgjedhjeve nga ana e Partisë Demokratike edhe pse kreu i kësaj force politike apo strukturat e partisë nuk kanë asnjë vendimmarrje lidhur me këtë proces./abcnews.al

debate.jpg
G. P.16:59 | 18/03/2019

Është shoqëruar me debate komisioni i Sigurisë për raportin vjetor të SHÇBA-së. Drejtuesi i saj, Muhamet Rrumbullaku, kërkoi fonde dhe shtim të personelit, pasi veprimet kryen akoma në mënyrë manuale. Ndërkaq, disa anëtarë të komisionit kërkuan informacion për lëvizjet e fundit në Policinë e Shtetit.

Shërbimi për Çështjet e Brendshme dhe Ankesave në varësi të Ministrisë së Brendshme është përdorur si kamxhik në dorën e ministrave për të lëvizur apo larguar nga detyra punonjës të Policisë së Shtetit ndër vite.

Kështu u shpreh në Komisionin e Sigurisë, kreu i SHÇBA-së, Muhamet Rrumbullaku, të mbajtur me dyer të mbyllura. Bashkë me dy vartësit e tij, Rrumbullaku kërkoi që Shërbimi për Çështjet e Brendshme dhe Ankesave të jetë i pavarur nga titullari i ministrisë, gjë që do të ndihmonte në rritjen e performancës së efektivëve si edhe objektivitetin e institucionit.

ABC News ka mësuar se ka pasur edhe debate ndërmjet anëtarëve të komisionit dhe drejtuesit të SHÇBA për lëvizjet që janë kryer në polici në nivel drejtuesi me urdhër të kreut të Policisë së Shtetit, Ardi Veliu.

Sipas Rrumbullakut, disa nga ndryshimet u bënë falë edhe hetimeve proaktive të shërbimit që ai drejton, ndërsa shtoi se ka filluar edhe ecuria disiplinore për shumë prej tyre.

Një tjetër kërkesë që u bë në raportin vjetor të SHÇBA-së, ishte edhe kërkesa për të shtuar personelin, ku jo vetëm që ka mungesë në baza materiale por nuk ka, as mjaftueshëm staf për të ndjekur dinamikën e punonjësve të policisë në rrethe.

“Shënimet oficerët e mi i mbajnë akoma manualisht me bllok dhe me laps, ndërsa në shumë zyra mungon edhe kompjuteri për të ruajtur të dhënat”, u shpreh Rrumbullaku.

Gjithashtu kreu i Shërbimit për Çështjet e Brendshme dhe Ankesave theksoi se, nëse nuk shtohet personali që ai ka në varësi, atëherë procesi i Vetting-ut në radhët e policisë mund të kryhet brenda pesë viteve të ardhshme./abcnews.al

shtylla.jpg
G. P.16:58 | 18/03/2019

Partia Demokratike hedh poshtë me neveri deklaratat se pas shpërthimit me tritol të shtyllave të tensionit të lartë qëndron PD-ja dhe opozita. Në reagimin e selisë blu thuhet se një shpifje e tillë tregon dëshpërimin e thellë të Ramës, i cili sipas PD-së e ka lidhur fatin me krimin dhe porositësit e tritolit.

“Nëse ai nuk ka dorë në këtë propagandë helmuese, Edi Rama, i cili ka kontroll të plotë mbi policinë, shërbimin sekret dhe prokurorinë, duhet të zbulojë pa vonesë ata që kanë urdhëruar dhe kanë vendosur tritolin në shtyllën e tensionit të lartë” theksohet në reagimin e Partisë Demokratike./abcnews.al

stoltenberg-1280x720.jpg
ent ela16:45 | 18/03/2019

Në një intervistë për mediat serbe, Sekretari i Përgjithshëm i NATO-s, Jens Stoltenberg theksoi se aleanca do të vazhdojë misionin e saj në Kosovë me qëllim për të mbrojtur të gjithë qytetarët

NATO nuk do të tërhiqet nga baza në Bondsteel dhe do t’i mbrojë të gjithë qytetarët e Kosovës. Ka qenë kjo deklarata e sekretarit të përgjithshëm të NATO-s, Jens Stolltenberg, gjatë një interviste për mediat serve. Ai theksoi për të disatën e herë se nuk ka asnjë plan për reduktimin e trupave në Kosovë.

Stoltenbergut i është kërkuar të komentojë se si e sheh pas kaq vitesh bombardimin e Jugosllavisë në atë kohë. Sekretari i Përgjithshëm i NATO-s ndër të tjera u shpreh se ka qenë dhe është detyrë e NATO-s që të ndalohen tragjedi humanitare por dhe shmangia e viktimave mes civilëve.

Stoltenbergu tha se NATO e respekton qëndrimin e Serbisë, e cila nuk dëshiron të jetë anëtare e Aleancës duke kërkuar të mbetet neutrale, por gjithashtu respekton dhe faktin se Serbia dëshiron të jetë partnere e NATO-s në luftën kundër terrorizmit, dhe në rastet e fatkeqësive natyrore./abcnews.al

 

manastirliu-1280x701.jpg
ent ela16:20 | 18/03/2019

Spitalet publike ose private që nuk plotësojnë kushtet jo vetëm që nuk do të akreditohen, por do t’u pezullohet licenca deri në përmbushjen e tyre. Ndryshimet në ligjin e kujdesit shëndetësor u bënë të ditura nga ministrja e Shëndetësisë Ogerta Manastirliu e cila tha;  “Nëse nuk plotësojnë kushtet bazë, nuk do të munden të operojnë më, pasi do t’u pezullohet licenca deri në plotësimin e këtyre kushteve.  Më pas do të mund të përfshihen në procesin e akreditimi”.

Me ligj shpjegoi ministrja do te garantohet dhe funksionimi i portalit “Infermierë për Shqipërinë”, Manastirliu tha se bëhet “për të mos u kthyer kurrë prapa në punësimin me taraf e parti, por për të ligjëruar këtë mënyrë transparente punësimi, që i jep hakun që i takon gjithsecilit”. Deklaratat, ministrja i bëri gjatë një takimi me 218 infermierët dhe teknikët e shkencave mjekësore të punësuar së fundmi./abcnews.al

rama-8-1280x718.jpg
G. P.16:10 | 18/03/2019

Kryeministri Edi Rama ka inspektuar një nga pikat e mbështetjes së fermerëve dhe një fidanishte që ka përfituar nga Fondi i Programit për Bujqësinë dhe Zhvillimin Rural. Në të dy takimet, Rama nënvizoi se fermerët duhet të orientohen sipas kërkesave të tregut, pasi paratë për t’i ndihmuar nga buxheti i shtetit dhe nga Bashkimi Evropian nuk mungojnë.

Dritare e dedikuar për fermerët është agropika më e re që u çel në Tiranë, njëra prej 20 pikave të tillave, të hapura në disa qytete të vendit. Këtu marrin informacion të gjithë ata që duan të investojnë në bujqësi dhe zhvillimin rural apo të informohen për zhvillimet më të reja në sektorin e bujqësisë.

“Bëhet fjalë për 36 mijë familje bujqësore të cilat mund të vijnë dhe të marrin shërbimin në këtë pikë. Jemi në hapësirën e infoaplikimit. Pra, këtu vijë dhe përballen me zonjën, e cila i dëgjon dhe i kupton nevojat e tyre dhe i drejton në zyrat e tjera në qoftë se ka nevojë të marrin informacion për skemën mbështetëse që ofrohet apo për programin e IPARD apo për programin  e donatorëve të ndryshëm që ne ofrojmë si AZHBR”.

Në këtë agropikë bëhet aplikimi online me zero dokumente,mjafton një kartë identiteti dhe një numër NIPT-i. Në kuadër të Paktit për Universitetin, Agjencia për Zhvillim Bujqësor dhe Rural ka punësuar pranë kësaj pike 4 studentë të ekselencës.

 “Dola është studente ekselente. Është në ditën e saj të parë të punës pranë AZHBR-së. Është specialiste në departamentin tonë juridik”.

“Jam rekrutuar nga portali “Punë të mbarë”, ku jam përzgjedhur si një nga studentët e ekselencës, të cilëve ju dha një mundësi për të bërë një eksperiencë të tyre në administratën shtetërore”.

Kryeministri Edi Rama ka parë nga afër edhe frytet e punës 10-vjeçare të dy fermerëve në biznesin e tregtimit luleve. Në përgjigje të kërkesës së vazhdueshme nga fermerët e vegjël të zonës së Bërxullës, ata vendosën të investojnë në sera për mbjelljen e fidanëve. Ata kanë aplikuar dhe janë përfitues të skemës së investimeve, nga Fondi i Programit për Bujqësisë dhe Zhvillimin Rural, i vitit 2018 për “Ndërtimin e serës diellore” në shumën 10 milionë lekë.

“Ajo që mund të thuhet me gjithë gojën është që me fondet që kemi në dispozicion dhe me fondet që kemi marrë nga BE, kushdo që do realisht të punojë dhe investojë në bujqësi dhe i ve mendjen projektit dhe mëson si të aplikojë, merr para”, tha Kryeministri.

Kjo është një rrugë e shkelur nga vendet e bashkimit evropian u tha kryeministri Edi Rama i cili i këshilloi që të vazhdojnë të besojnë se bashkimi bën fuqinë.

“Aq më tepër që me fondet e Komisionit Europian nuk të jep asnjëri një kokërr leku nëse nuk je regjistruar nëse s’ke NIPT-in , nëse s’ke më shumë se 5 dynym, nëse nuk ke një biznes plan. Kjo është rruga, ne nuk mund të shpikim një rrugë tjetër që të mbajmë me lëmoshë situata që nuk kanë asnjë shans të ndryshojnë”, tha ai./abcnews.al

lulzim-basha-1.jpg
G. P.16:07 | 18/03/2019

Kreu i Partisë Demokratike, Lulzim Basha, ka takuar krerët e degëve të Partisë Demokratike për të diskutuar lidhur me vijimin e aksionit opozitar, dy ditë pas përfundimit të protestës së fundit të thirrur nga opozita e bashkuar, atë të 16 Marsit.

“Tre orë ka zgjatur mbledhja e kreut të Partisë Demokratike, Lulzim Basha, me kolegjin e kryetarëve, në përfundim të së cilës, mungesa e një date specifike për protestën e radhës identifikohet edhe si tipari surprizë i aksionit opozitar. Vijueshmërinë e këtij të fundit përmes protestave e konfirmoi vetë kreu i Partisë Demokratike”.

“Vendimi kryesisë është në fuqi. Këto janë takime organizative. Protestat do të vazhdojnë dhe do të fuqizohen nga dita në ditë dhe nga java në javë, derisa të realizojmë atë që do çdo shqiptar, zgjedhje të lira dhe të ndershme dhe një qeveri nga populli, për popullin dhe të popullit”, tha Basha.

Vendosja në Konferencën e Kryetarëve për zhvillimin e seancës së radhës parlamentare për ditën e enjte, dhe deklarata e kreut të opozitës Basha pas takimit me krerët e degëve, organ statutor këshillues i kreut të partisë, lë të hapur një front të mundshëm proteste përpara godinës së seancave plenare.

Këtë praktikë ka përdorur opozita në tre seancat e fundit parlamentare, dy prej të cilave u karakterizuan nga revoltimi i protestuesve, ndërsa ajo e fundit nga simbolika e përdorur nga kjo forcë politike në kundërshtimin që i bën legjitimitetit të qeverisë, por edhe opozitës së re parlamentare./abcnews.al

dibra-1280x716.jpg
ent ela16:00 | 18/03/2019

800 familjet e fshatit Brezhdan të Dibrës furnizohen me ujë të pijshëm vetëm 10 minuta në ditë. Për këtë arsye ata protestuan para bashkisë dhe kërcënojnë se do te bllokojnë rrugën kryesore.

Brezhdani është fshati më i madh i Dibrës me mbi 800 familje. Rrjeti i brendshëm shpërndarës mungon. Kurse pranë këtyre çezmave lagjesh  çdo familje vendos një tub për të çuar ujë në shtëpi.

Por e keqja në këtë vend nuk ndalon këtu. Banoret janë të alarmuar nga  kanalet e zeza që derdhen rrugëve të fshatit.

Një prej tyre vjen nga Llixhat dhe kalon mes për mes shtëpive. Përgjatë gjithë gjatësisë së tij, shkarkohen plehra të periferisë së qytetit, mbetjet spitalore si dhe ujërat e zeza të lagjes Kamen. E gjithë sasia grumbullohet në Brezhdan, aty ku nuk ekziston asnjë kosh apo sistem kullimi.

Për këtë qellim banoret mëngjesin e kësaj të hëne protestuan para Bashkisë se Dibrës. Ata kërcënojnë se nëse kërkesat e tyre nuk merren parasysh, 800 familjet do te bllokojnë rrugën kryesore dhe se në fshat nuk do te lejojnë asnjë kuti votimi.

Gazetar: Neki Feta

veliaj-dhe-lleshaj-1280x733.jpg
ent ela15:50 | 18/03/2019

Ministri i Brendshëm Sandër Lleshaj dhe kryebashkiaku i Tiranës Erion Veliaj i bëjnë thirrje qytetarëve të cilëve iu ka përfunduar afati i dokumenteve te identifikimit të mos lënë aplikimin për momentin e fundit. Lleshaj dhe Veliaj ishin në njësinë administrative numër pesë në kryeqytet ku u çelën zyra të reja për të aplikuar.

Qytetarët e Njësisë 5 në kryeqytet nuk do të duhet të presin në radhë për t’u pajisur me letërnjoftimet e reja. Bashkia e Tiranës, në bashkëpunim me Ministrinë e Brendshme dhe kompaninë ALEAT hapen zyrat e reja të aplikimit.

 “Njësia 5 ka kaluar nga 3 sportele në 8 sportele, pra thuajse kemi trefishuar aksesin për të gjithë qytetarët që marrin shërbim në 4-5 minuta”. 

Zyrat e reja te aplikimit do ju vijnë në ndihmë edhe zonave rurale. Për të lehtësuar shërbimin ndaj banorëve ato janë grupuar në qendrat administrative më të afërta.

 “Kjo është arsyeja pse te rrethrrotullimi i Shkollës Teknologjike kemi zyrën që ka bashkuar Njësinë 6 me 7, për ta liruar zyrën e Kombinatit kryesisht për Ndroqin, Pezën dhe Vaqarrin. Besoj me këtë frymë do të vazhdojmë edhe në njësitë e tjera rurale, për t’u siguruar që hyrja e tyre e parë në qytetin e Tiranës të jetë edhe baza më e madhe e shërbimeve. Ndërkohë, shërbimet ofrohen edhe në njësitë e tyre administrative, sidomos sipas raportit të banorëve. Shëngjergji ka më pak banorë, ndërkohë që Kashari është një zyrë më vete”. 

Ndërkohë ministri i Brendshëm iu bëri thirrje qytetarëve që iu ka përfunduar afati i dokumenteve të identifikimit të mos lënë aplikimin për momentin  e fundit.

 “Zgjatja e afatit është bërë për të ulur fluksin, për t’u krijuar kushtet qytetarëve që të aplikojnë jashtë stresit, por kjo nuk do të thotë që ta shtyjnë për në fund të dhjetorit. Duhet që intensiteti i aplikimeve të vijojë, në mënyrë që në fund të dhjetorit të evitojmë presionin e madh që do të krijohet nga kartat, por edhe nga pasaportat e shumta që skadojnë në vjeshtë”. 

Krahas zyrave të reja paralelisht qytetarët mund të aplikojnë për karta dhe pasaporta identiteti edhe pranë njësive administrative./abcnews.al

piktori-1280x678.jpg
ent ela15:40 | 18/03/2019

Drama shpirtërore e njeriut dhe bukurit e natyrës vijnë në ekspozitën e piktorit te njohur Adrian Devolli. Artisti  në një interviste për Abc News thotë se forca e kanavacës në artet pamore nuk njeh kohë.

Kanavaca është dashuri pa kushte dhe forma e të shprehurit  më e fortë në artet pamore  për piktorin Adrian Devolli. Në  këtë prezantim artisti sjell me një intensitet të fortë dramën shpirtërore, duke e nisur nga uni i tij.

Ndërkohë që përmes një auto-portreti ai shpreh keqardhje për largimin e brezit të ri.  Në  cikli tjetër, fokusuar në peizazhe Ardian Devolli sjell anën tjetër të medaljes, ku mbizotëron drita dhe ngjyra.

Silueta femërore kësaj here është pak prezente, por në ekspozitën e radhës ai thotë se do i dedikohet krejtësisht nudove. Punimet e Devollit karakterizohen nga një analizë e thellë dhe origjinale e figurës njerëzore përfshirë peizazhet, arkitekturën./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono