Të Gjitha

Capture-85.jpg
in a07:19 | 28/02/2020

Gjatë ditës së sotme do të kemi reshje e shiu në pjesën më të madhe të vendit.

Sipas Meteoalb, deri në mesditë i gjithë vendi do të jetë me reshje shiu dhe reshje dëbore në zonat malore.

Por orët e pasdites dhe në vijim përmirësojnë gradualisht kushtet e motit.

Në të gjitha zonat malore e deri në lartësitë kodrinore do të ketë reshje dëbore, këto hera herës të dendura në veri e verilindje. Reshjet pritet të ndërpriten në orët e pasdites.

Temperaturat zonat malore parashikohen -2ºC deri në 5ºC, zonat e ulëta 1ºC deri në 12ºC dhe në zonat bregdetare 2ºC deri në 13ºC.

horoskopi-1.jpg
in a07:08 | 28/02/2020

Dashi
Buzëqeshja është kundërpërgjigjja më e mirë për të gjitha problemet tuaja. Do të keni fitime mjaft të mira nga një burim. Mendoni pozitivisht teksa ndërmerrni një vendim. Beqarët e kësaj shenje këshillohen të bëjnë kujdes me veshjen, pasi mund të kenë një takim tepër të rëndësishëm gjatë ditës së sotme.

Demi
Përpiquni të përfundoni herët punën sot dhe të kryeni aktivitetet që ju dëshironi. Është koha e duhur për investime në pasuri të patundshme. Sharmi dhe personaliteti do t’ju ndihmojë të bëni miq të rinj. Partneri/partnerja juaj mund t’ju kërkojë diçka sot, të cilën nuk do të mund ta përmbushni.

Binjakët
Presioni nga shefat në punë dhe mosmarrëveshjet në shtëpi mund t’ju sjellin stres. Kjo do të shkaktojë edhe shpërqendrim për ju lidhur me çështje të rëndësishme. Bëni kujdes, pasi mund të bëni shpenzime të kota gjatë ditës së sotme.

Gaforrja
Performanca e fëmijës suaj sot t’ju lumturojë pamasë. Disa persona të rëndësishëm do të jenë të gatshëm të financojnë një projekt, pjesë e së cilës do të jeni edhe ju. Ekziston mundësia që beqarët e kësaj shenje të marrin një propozim.

Luani
Personat e kësaj shenje që vuajnë nga problemet me zemrën duhet të lënë menjëherë kafenë. Përdorimi i mëtejshëm pritet që të shkaktojë probleme. Beqarët e kësaj shenje do të bëhen konfuzë nga një moment i papritur romantik.

Virgjëresha
Besimi në vetvete dhe një axhendë jo e ngarkuar në punë do t’ju japë mjaft kohë për t’u relaksuar. Tregohuni sot të matur në dashuri. Është dita e duhur për të kontaktuar sërish me disa miq të vjetër.

Peshorja

Merrni pak kohë nga axhenda juaj e ngarkuar për t’ua përkushtuar aktiviteteve shoqërore. Kjo do t’ju ndihmojë që të çliroheni nga stresi i përditshëm. Bëni kujdes me fjalët gjatë një bisede me partnerin/partneren tuaj.

Akrepi
Ekziston mundësia që të debatoni me partnerin/partneren tuaj, vetëm për të dalë fjala juaj. Partneri/partnerja do të përpiqet maksimalisht që ju ta kuptoni. Për disa persona të kësaj shenje, sporti zë një pjesë të rëndësishme në jetën tuaj, por mos e teproni duke neglizhuar gjëra të tjera më të rëndësishme.

Shigjetari
Përkushtimi juaj në punë do të vlerësohet sot. Kjo mund të shpërblehet edhe financiarisht. Dikush prej jush mund të marrë një dhuratë të çmuar sot.

Bricjapi
Një letër mund t’ju sjellë një lajm mjaft të mirë, duke bërë që jeta juaj të marrë një tjetër kurs. Jeta në çift do të jetë e mbushur plot dashuri. Bëni kujdes me xhelozitë e panevojshme.

Ujori
Mos hezitoni të shprehni pikëpamjet tuaja. Përpiquni të rrisni besimin në vete, pasi në të kundërt, problemet tuaja mund të komplikohen. Sa i përket aspektit profesional, rekomandohet të zgjidhni projekte që duket se sjellin prosperitet për të gjithë familjen.

Peshqit
Nuk përjashtohet mundësia që sot të shihni një anë të panjohur të partnerit/partneres suaj, çfarë do t’ju vërë tepër në siklet. Sot kolegët do të vlerësojnë punën tuaj. Nuk parashikohet ditë me fat për beqarët e kësaj shenje.

ilir-meta-1.jpg
R D00:04 | 28/02/2020

Presidenti Meta kritikoi dy herë opozitën duke deklaruar se ajo ka bërë gabim historik për largimin nga institucionet. “Ata kanë bërë një gabim historik me largimin nga parlamenti. Ashtu si Edi Rama ka një përgjegjësi historike që vrapoi për t’i zëvendësuar. Sipas Kushtetutës një deputet duhet 30 ditë për ta zëvendësuar. Ilir Meta i është drejtuar shqiptarëve për të kthyer rendin kushtetues”, tha Meta.

I ftuar mbrëmjen e sotme në Opinion, Presidenti sqaroi se megjithëse mazhoranca ia ktheu dekretin për zgjedhjet e 30 qershorit, populli u përgjigj duke mos marrë pjesë në votime. Sa i përket çështjes së 13 tetorit të cilën ai e dekretoi si datën e re të zgjedhjeve, Meta shtoi se fakti që në atë ditë ato nuk u zhvilluan zgjedhjet është faji i opozitës.

“Mazhoranca ia ktheu dekretin presidentit por populli fare sepse nuk doli në votime… 5% dolën. 27 ditë që të dilnin rezultatet 13 tetori ishte gabimi i opozitës”, tha Presidenti.

Ndërsa iu përgjigj pyetjes së një prej ndjekësve në FB e “Opinion” nëse do të kishte një koalicion me Edi Ramën për zgjedhjet e vitit 2021, Meta u shpreh: “0% interes. Madje edhe për Monikën më ka humbur interesi, që kur la mandatet dhe më gënjeu mua. Do t’ju tregoj mesazhet që i kam dërguar asaj dhe Petrit Vasilit”, tha Meta. /Opinion.al

Sormani-Egbo.jpg
Veronik Istrefaj23:56 | 27/02/2020

Trajneri i mirënjohur shqiptar, Sulejman Starova, ka folur në emisionin Pressing, në ABC News, për dy trajnerët që do të drejtojnë nesër në derbi, Adolfo Sormani dhe Emanuel Egbo.

TRAJNERËT – “Rrallë vjen që gjatë gjithë sezonit, të bëhen trajnerët protagonistë direkt. Ndodh, por shumë rrallë. Trajneri dihet që ka vendin e vet, bëhet protagonist. Është shumë e vështirë për të vërtetuar atë që thashë.

Niveli është i lartë te ne dhe është shumë e vështirë që një trajner, me taktikat e veta, ta fitojë ndeshjen. Por në harkun e kampionatit, ndodh që trajnerët të vendosin një ndeshje. Ndeshja e nesërme është për t’u parë.

Kur humbet një ndeshje, që humbet gjatë harkut të një kampionati, nuk humbet për një ndërrim. Janë aspekte të tjera që ndikojnë. Por ndoshta dhe për ndonjë ndërrim, mund ta humbasësh ndeshjen. Ka një parim në futboll, që nuk ndërrohet një mbrojtës qendre në 10 minutat e fundit, se deri sa të futet tjetri… janë parime. Futbolli ka dhe fat, në shumicën e rasteve vendos individi. Kundër Kukësit, Batha vendosi dhe Tirana e përmbysi takimin”, tha Starova./abcnews.al

 

Sulejman Starova, Pressing
grenell.jpg
R D23:48 | 27/02/2020

I dërguar i posaçëm i Presidentit Trump për dialogun Kosovë-Serbi, Richard Grenell ka reaguar ashpër ndaj vendimit të qeverisë së Kosovës për të hequr në mënyrë të pjesshme dhe me afate taksën ndaj mallrave serbe. Në një reagim në Twitter, Grenell thotë se Kosovës i është kërkuar heqja e plotë e taksës.

“Ne nuk e mbështesim vendimin gjysmak të kryeministrit Kurti. Pozicioni ynë është mjaft i qartë: tarifat duhet të bien plotësisht. Z. Kurti është duke bërë një gabim serioz – dhe kjo u bë e qartë për Presidentin Thaçi sot në Shtëpinë e Bardhë”. 

Qendrimi i Grenell vjen disa orë pasi kryeministri i Kosovës, Albin Kurti, tha se “gjatë javës së ardhshme, qeveria e Kosovës merr vendim që nga data 15 mars e këtij viti të hiqet tarifa për lëndën e parë që importohet nga Serbia dhe Bosnja e Hercegovina, shenjë e vullnetit të mirë dhe gatishmërisë për fillim të zgjidhjes së mirëfilltë të mosmarrëveshjeve ekonomike, tregtare dhe politike me Serbinë”.

Ai i bëri thirrje Serbisë që të zotohet se do t’i jap fund fushatës për çnjohjen e pavarësisë së Kosovës dhe të fillojë heqjen e barrierave tregtare jo tarifore ndaj Kosovës. Kurti tjeksoi se “në rast se pala serbe nuk reflekton as pas një periudhe prej 90 ditësh nga vendimi fillestar për heqjen e tarifës për importin e lëndës së parë, atëherë qeveria e Kosovës me fillim nga data 15 qershor e rikthen tarifën për importet nga Serbia”./abcnews.al

Ermal-Tahiri-Pressing-e1582843520636.jpg
Igli Nikolli23:44 | 27/02/2020

Tema e debateve në emisionin “Pressing” në ABC News ka kaluar te Lorenc Trashi, mungesa e madhe e Partizanit për derbin e nesërm. Ermal Tahiri analizon se pse mungesa e lojtarit të kombëtares ka rëndësi të madhe, teksa ndalet edhe te rikthimi i Malës.

Trashi ka shumë të mirë anën ofensive, del shumë në krahun e majtë. Partizani është mbështetur shumë kohë te ky lojtar dhe ka fituar ndeshjes falë Trashit. Kush merr mesfushën ka shanse të marrë derbin. Të dy derbet kanë përfunduar me gola, edhe nesër do të ketë gola.

Partizani? Sulmi është pika më e dobët, ndërsa Tirana prodhon e shënon. Telushi është golashënuesi më i mirë i ndeshjeve të fundit. Trajneri duhet ta fusë Malën, e përgatiti në ndeshjen e Partizanit B. E njoh si lojtar, është top në anën fizike, pavarësisht se i mungojnë ndeshjet. Do i japë shpejtësi Partizanit, sidomos nga krahët. Është dëm i madh mungesa e Trashit, nuk do lejonte Dokën dhe Cobbinah të dilnin lirshëm përpara“, deklaron Tahiri. /abcnews.al

OBSH-1024x576-1.jpg
R D23:36 | 27/02/2020

Drejtori i Përgjithshëm i OBSH-së Tedros Adhanom tha se bashkësia ndërkombëtare ndodhet “në një pikë vendimtare” sa i takon koronavirusit dhe se “nëse veprohet në mënyrë agresive tani, mund të parandalohet që të tjerë njerëz të sëmuren e të shpëtohen jetë”.

Ndërkohë, zyrtarët e shëndetit publik në të gjithë botën janë përqendruar në marrjen e masave për të ndaluar përhapjen e koronavirusit të ri (COVID-19) që ka infektuar të paktën 82,000 vetë në më shumë se 40 vende, që nga momenti i shfaqjes në Kinë në fund të muajit dhjetor.

Shtetet e Bashkuara dhe Koreja e Jugut kanë pezulluar stërvitjet e përbashkëta ushtarake. Uashingtoni lëshoi një paralajmërim të ri lidhur me udhëtimet duke këshilluar qytetarët amerikanë që të shmangin vizitat në Korenë e Jugut, vend që ka raportuar më shumë raste deri më tani pas Kinës.

Autoritetet në Korenë e Jugut njoftuan të enjten 505 raste të tjera, që e çuan totalin e personave të prekur nga virusi në 1766 vetë. Kryeministri japonez Shinzo Abe bëri thirrje për mbyllje të shkollave për disa javë.

Gjithashtu u bë thirrje që njerëzit të shmangin tubimet e mëdha për anulim të ngjarjeve sportive ose zhvillimit të tyre pa spektatorë, në një përpjekje për të parandaluar përhapjen e virusit. Japonia ka njoftuar rreth 200 raste, pa llogaritur më shumë se 700 të tjera që ndodhen në një anije kruz e futur prej javësh në karantinë në Jokohama.

Presidenti i Francës Emmanuel Macron vizitoi të enjten një spital në Paris, ku këtë javë një person humbi jetën si pasojë e virusit. Ai shprehu mbështetje për punonjësit e kujdesit shëndetësor.

Ndërkohë, Danimarka raportoi rastin e saj të parë me koronavirus, bëhej fjalë për një person që ishte kthyer nga një udhëtim në Itali. Kjo pason rastin e parë të raportuar në Brazil, i pari në Amerikën Latine, që gjithashtu ISHTE një person që kishte vizituar Italinë. /abcnews.al

canaj-1.png
Igli Nikolli23:34 | 27/02/2020

Agim Canaj është futur në analizën taktike. Trajneri vazhdon të flasë për derbin në emisionin “Pressing” në ABC News dhe thekson se kjo përballje do të ketë gola.

Qarkullimi i topit është shumë i rëndësishëm në minutat e para të ndeshjes. Derbet kanë adrenalinë të veçantë, kjo ndikon që lojtarët të dalin ndonjëherë nga detyrat taktike. Tirana është një skuadër që në dy ndeshjet e fundit ka pësuar gol, por ka ditur të kthejë atmosferën negative, duke barazuar dhe kthyer ndeshjen.

Ka një skuadër ofensive dhe të egër para, por lënë hapësira pas dhe mund të goditen. Kanë probleme në krahët e mbrojtjes, aty janë goditur. Do të jetë edhe një lojë trajnerësh. Tirana ishte e vrullshme ndaj Kukësit, dominoi minutat e para, ka luftuar fort për topin e parë.

Partizani ka shfaqur mangësi në sulm, ka lëvizje pozicionesh që nuk kanë gjetur fytyrën e vërtetë në sulm. Cilësia është në skuadër, por mungon ekuilibri mes reparteve. Do të jetë një derbi që, për mendimin tim, do të ketë gola“, deklaron Canaj. /abcnews.al

WhatsApp-Image-2020-02-27-at-22.46.40.jpeg
Veronik Istrefaj23:26 | 27/02/2020

Sulejman Starova ka vazhduar analizën e tij në Pressing, duke u ndalur më gjerësisht tashmë në derbin e kryeqytetit mes Tiranës dhe Partizanit.

DERBI – “Konkretisht, në rast humbje, Partizani shkon -9. Janë shumë, imagjinoni çfarë ndodh. Është dhe një kundërshtar tjetër, Kukësi. Ka dhe skuadra të tjera që po luftojnë për Kupat e Europës. Sa pikë janë në valle? Nuk bëhet krahasimi i humbjes me barazimin, asnjëherë. Pse, Tirana ka ndonjë diferencë të madhe me tre kundërshtarët e vet?”

MOSHAT – “Ajo është ëndrra e çdo futbollisti, të bëjnë maksimumin te moshat dhe të arrijnë tek ekipi i parë. Duhet ta kenë ambicie që të bëhen lojtarë të mëdhenj”.

STRATEGJITË – “Pak a shumë, ato që thamë ne këtu, e kanë thënë dhe trajnerët. Nuk është se e sfumojnë derbin, por luhet vetëm për pikë. Siç e tha dhe Sormani, me këto tre pikë, afrohet për titullin kampion. Egbo thotë të na ndihmojë Zoti dhe të arrijmë te titulli kampion. Loja është e thjeshtë dhe duhet edhe fati, shansi”.

NDESHJA – “Sa i përket derbit, e veçanta është se sado që është ndeshje e rëndësishme, është ndeshja ku sa bie bilbili, çdo futbollist lufton në çdo cep të fushës, për të fituar duelin e parë. Është karakteristikë e të gjithë ndeshjeve derbi në botë, luftohet jo duke pritur, por duke fituar duelet. Ndeshjet e forta dhurojnë pakicë golash, mobilizimi është maksimal. Skuadra që pret kur topin e ka kundërshtari, luan fort për t’u mbrojtur mirë, edhe sulmuesi jep kontribut 100% për të mos e lënë kundërshtarin të afrohet” tha Starova./abcnews.al

Screenshot_7-6.png
R D23:23 | 27/02/2020

Vendimi i qeverisë së Kosovës për heqjen e tarifës ndaj produkteve serbe ka shkaktuar krisjen e parë të koalicionit Vetëvendosje-LDK.
Zv, kryeministri i parë i Kosovës nga radhët e Lidhjes Demokratike të Kosovës, Avdullah Hoti paralajmëroi tërheqjen nga qeveria nëse tarifa, nuk hiqet pa kushte. “A mund të qeverisësh suksesshëm një qeveri e cila nuk e ka mbështetjen e SHBA’ve? Në një qeveri të tillë LDK nuk rrin. LDK nuk rri në qeveri nëse nuk hiqet taksa pa kushte. Një qeveri e cila e izolon veten, nuk mund të çojë përpara agjendën e Kosovës. Unë kam qenë në dakordim për t’i diskutuar kushtet. Nuk është qëndrim i dakorduar nga ne vendimi i Kurtit lidhur me taksën”, u shpreh ai.

Me reagim të ashpër, ky vendim u prit edhe nga ish-kryeministri i Kosovës Ramush Haradinaj. Ai e quajti pasardhësin e tij në qeveri, mashtrues.

“Sonte Albin Mashtruesi u dorëzua para Serbisë. Ky është fillimi i kthimit të Serbisë dhe Rusisë në Kosovë. Albin Mashtruesi nga sot je përgjegjës për ripushtimin ekonomik të Kosovës nga Serbia”.

Ndërkaq, kreu i PDK Kadri Veseli shkruan në Facebook se Kosova është e rrezikuar nga Albin Kurti.

“Si opozitar, Albini ishte në gjendje ta digjte Kosovën dhe të përdorte dhunë dhe jetë të rinjsh idealistë për të ardhur në pushtet. Ndërsa sot, kur udhëheq Qeverinë, ideali i tij po shihet se është vetëm mbajtja e pushtetit. E mendonte veten si më të mençurin dhe më të fortin; Po del që është edhe i padijshëm, edhe i dobët, edhe mashtrues, dhe që Kosova në krye me të mund të rrezikohet seriozisht”.

Tarifa 100 për qind ndaj produkteve serbe u vendos në kohën kur Haradinaj ishte kryeministër, ç’ka u pasua edhe me ngecjen e dialogut Prishtinë-Beograd. /abcnews.al

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono