Të fundit

ilir-meta-oponion.jpg
ger ta22:27 | 27/02/2020

Presidenti i Republikës Ilir Meta u shpreh se do të firmosë një dekret më 2 Mars, por nuk tregoi se për çfarë dekreti bëhet fjalë.

Gjatë një interviste në emisionin “Opinion”, ai theksoi se Presidenti i ka bërë të gjitha veprimet në mënyrë zyrtare por nuk funksionojnë institucionet.

Kreu i shtetit theksoi se nuk bëhet fjalë për betejë për kompetenca, por për Gjykatën Kushtetuese që sipas tij është interesi më i lartë kombëtar. “Në 2 mars do ndodhi manifestimi më i mrekullueshëm për liri dhe demokraci’, u shpreh Meta.

Ndërkohë, Meta ftoi dhe Ramën që t’i bashkohet në shesh në 2 mars, nëse ai s’ka urdhëruar sipas tij, Etilda Gjonajn të firmoste ato që Presidenti i quan akte komplotuese kundër Kushtetutës për të kapur Reformën në Drejtësi.

‘Edhe Edi Rama po se ka urdhëruar atë zonjën të firmoste. Se ai kështu thotë gjithmonë që unë s’bëra këtë, s’bëra atë. Nëse ai ska lidhje të vijë në shesh, është i ftuar dhe ai’, shtoi Meta.

Pjesë nga bisdeda në studio:

Ilir Meta: Kur bien institucionet ngrihet populli. Ça thotë neni 2? Sovraniteti në Republikën e Shqipërisë i përket popullit.

Blendi Fevziu: Si do ta ushtroni këtë sovranitet, në ç’mënyrë.

Ilir Meta: Ju të gjitha nuk do t’i mësoni sot.

Blendi Fevziu: Keni thënë që do të firmosni një dekret?

Ilir Meta: Çdo ditë do të ketë zhvillime. Atë ditë do ta firmos, nuk do ta firmos tani.

Blendi Fevziu: Presidenti duhet të dalë në shesh ta firmosë dekretin, nuk ka zyrë?

Ilir Meta: Presidenti ka zyrë dhe i ka bërë gjërat si zyrtar perfekt, por institucionet nuk funksionojnë. Çfarë mund të bëjë presidenti kur parlamenti, pushteti gjyqësor Dvorani në këtë rast dhe ministria e Drejtësisë bëhen bashkë dhe komplotojnë kundër Republikës. Kjo nuk është betejë kompetencash. Me ligj ata i morënPresidentit edhe kryetarin e Akademisë së Shkencave, por unë nuk i bëra thirrje popullit.

Blendi Fevziu: Çfarë do bëni me popullin?

Ilir Meta: Gjykata Kushtetuese është Kushtetuta e Shqipërisë, është interesi kombëtar. Nuk mund të pushtohet gjykata Kushtetuese me ligje antikushtetuese. Kur bëhet kjo gjë këtu ka rënë rendi antikushtetues.

124f42b6-ac4e-49ed-8889-cd42d311756b-1-1.jpg
R D22:22 | 27/02/2020

Një mjet që po transportonte klandestinë nga Lindja e Mesme ka dalë nga rruga dhe ka përfunduar në kanal. Ngjarja ndodhi në orët e vona të mbrëmjes së sotme në qytetin e Korçës. Në mjet udhëtonin 4 refugjatë sirianë, 2 prej te cilëve janë transportuar në spital me plagë të lehta. Sakaq policia ka shoqëruar drejtuesen e mjetit. Burimet thanë për gazetaren Lediona Xheladinaj se automjeti “Citroen” ishte në ndjekje nga FNSH-ja.

Vetëm 1 javë më parë humbën jetën në aksidentin fatal të Gramshit 2 refugjatë siriane. (Makina ku udhëtonin 10 persona, 9 sirianë dhe drejtuesi i mjetit nga Tirana doli nga rruga në Gramsh, ku për pasojë mbeten të vdekur dy persona, shtetas sirianë

Njoftimi zyrtar i policisë:

Më datë 27.02.2020, rreth orës 21:25, në rrugën Dishnicë-Çiflig, shtetasja F. D., duke drejtuar mjetin tip “Citroen”, ka dalë nga rruga ku për pasojë janë dëmtuar dy shtetas të huaj, pasagjerë në këtë mjet, të cilët u dërguan në Spitalin e Korçës, ku ndodhen nën kujdesin e mjekëve.

Drejtuesja e mjetit, është shoqëruar në ambientet e Komisariatit për veprime të mëtejshme proceduruale.

Grupi hetimor po punon për sqarimin e plotë të rrethanave të ngjarjes. /abcnews.al

hoti.png
ger ta21:29 | 27/02/2020

Zëvendëskryeministri i parë i Kosovës, Avdullah Hoti, ka thënë se Lidhja Demokratike e Kosovës nuk rri në qeveri nëse taksa nuk hiqet pa kushte.

Në emisionin Pressing të T7, Hoti është shprehur se një qeveri e cila e izolon veten, nuk mund të çojë përpara agjendën e Kosovës

“A mundë të qeverisësh suksesshëm një qeveri e cila nuk e ka mbështetjen e SHBA’ve? Në një qeveri të tillë LDK nuk rrin. LDK nuk rri në qeveri nëse nuk hiqet taksa pa kushte. Një qeveri e cila e izolon veten, nuk mund të çojë përpara agjendën e Kosovës. LDK’ja nuk ka asnjë interes në qeveri e cila e izolon veten”, është shprehur Hoti.

Hoti tha se vendimi i Kurtit lidhur me taksën nuk është qëndrim i dakorduar. “Unë kam qenë në dakordim për t’i diskutuar kushtet. Nuk është qëndrim i dakorduar nga ne vendimi i Kurtit lidhur me taksën”, ka thënë Hoti.

Ndërkohë, më herët Kurti në konferencën e jashtëzakonshme u shpreh se vendimin për të hequr përkohësisht takësn ndaj Serbisë e ka konsultuar edhe me LDK-në.

ERzrPh5WkAIdkwq.jpg
R D21:09 | 27/02/2020

Koronavirusi ka njohur një rritje të konsiderueshme në Francë. Numri i rasteve të konfirmuara ka shkuar nga 18 në 38.

Ministri i Shëndetësisë në një deklaratë për mediat mbrëmjen e kësaj të enjte tha virusi i ri ka njohur një “rritje të konsiderueshme”, duke kaluar në 38 raste të konfirmuara në 19 orët e fundit.

Një ditë më parë në Francë ishin 18 të infektuar tha Ministri i Shëndetësisë Olivier Véran./abcnews.al

 

Screenshot_5-10.png
R D20:51 | 27/02/2020

N/kryetarja e LSI-së, Erisa Xhixho e ftuar mbrëmjen e sotme në Abc News me Mirela Milorin tha se tubimi i 2 Marsit i thirrur nga Presidenti Ilir Meta do të jetë paqësor, me simbole kombëtare dhe pa mesazhe politike. Ndër të tjera ajo u shpreh se edhe kreu i PD-së, Lulzim Basha do të jetë në miting si qytetar.

Sa i përket betejës ligjore të Metës me Ministren e Drejtësisë, Etilda Gjonaj u shpreh: Unë prisja që Gjonaj si juriste dhe shtetare ë jepte dorëheqjen dhe të hetohet nga SPAK. Ajo e njeh ligjin dhe e di se vendimet e KED publikohen vetem në uebsajtin e Gjykatës së Lartë dhe jo në Fletoren Zyrtare.

Ndërsa akuzave të mazhorancës se Ilir Meta ka frikë nga reforma në drejtësisë, Xhixho iu përgjigj: Të gjithë pushtetarët duhet të kenë frikë nga shkelja e ligjit. Alibia se posaçërisht Meta ka frikë është e ulët dhe asgjë më shumë se propagandë.

A do ta shkarkojë Parlamenti, Metën?

Xhixho: Frika më e pakët e Ilir Metës është nga parlamenti antikushtetues me 122 deputetë, monopartiak. Po shkelet Kushtetuta po kapet Gjykata Kushtetuese, neni 129 e thotë qartë se ku betohen anëtaret e Gjykatës Kushtetuese. Të gjitha këto janë shqetësimet e Presidentit.

A do të jetë një protestë paqësore dhe a do të ketë fjalime LSI?

Xhixho: Do të jetë një tubim qytetar, unë do të shkoj si juriste dhe pedagoge sepse është shkelur kushtetuta, por çdo qytetar duhet të jetë për arsyet e veta, për ekonmonisë, arsimin, etj. Besoj se do të jetë paqësore sepse në filozofinë e LSI nuk është që të ketë konfrontime. Kjo është një protestë paqësore që e thërret Presidenti i Republikës në moment të rëndësishëm të shetit.

Gjatë manifestimit Meta do të firmosë dekretin për kthimin në parlament të ligjit për betimin e anëtareve të Kushtetueses. Z. Basha e ka konfirmuar se do të jetë në protestë si qytetar nuk do të ketë ngjyrime politike. Pjesëmarrja në protestë nuk interferon në tryezën për reformën zgjedhore, pse ne kemi kërkuar prej kohësh miratimin e kodit zgjedhor, por është dhe një nga kushtet e Bundestagut. Opozita nuk do të bëhet pengesë për integrimin e vendit. /abcnews.al

kadri-veseli.jpg
ger ta20:38 | 27/02/2020

Kryetari i Partisë Demokratike të Kosovës, Kadri Veseli, ka reaguar pas paralajmërimit të kryeministrit Albin Kurti për heqjen e taksës 100 përqind ndaj mallrave serbe, ndërsa ka theksuar se Albin Kurti duke u shantazhuar, po djeg veten më shpejtë sesa kanë pritur të tjerët.

Lideri i opozitës ka shkruar në faqen e tij në Facebook se Albin Kurti po del që është edhe i dobët, edhe mashtrues, dhe që Kosova në krye me të mund të rrezikohet seriozisht.

Deklarata e plotë e Kadri Veselit:

Asgjë e re nga Albini! Të paktën, ta respektonte të drejtën e autorit. Sepse, vendimi i tij për taksën dhe reciprocitetin qenka huazuar nga ideja e propozimit tim të janarit të vitit 2019, të cilin, si çdo gjë tjetër, ai e pat refuzuar.

Si opozitar, ishte në gjendje ta digjte Kosovën dhe të përdorte dhunë dhe jetë të rinjsh idealistë për të ardhur në pushtet. Sot, kur udhëheq Qeverinë, ideali i tij po shihet se është vetëm mbajtja e pushtetit. Duke u shantazhuar, po e djeg veten më shpejtë sesa që kanë pritur të tjerët.

E mendonte veten si më të mençurin dhe më të fortin; sikur të ishte vetë Kosova. Po del që është edhe i padijshëm, edhe i dobët, edhe mashtrues, dhe që Kosova në krye me të mund të rrezikohet seriozisht.

spiropali-dade.jpg
ger ta20:18 | 27/02/2020

Ministrja e Shtetit për Marrëdhëniet me Parlamentin, Elisa Spiropali e ftuar në “Mbrëmje në Abc” me Mirela Milorin komentoi edhe letrën e 8 socialistëve dhe propozojnë ndryshime në statusin socialist.

Mes tyre është edhe kritikja e kryeministrit Rama, Arta Dade, ish-zv.ministrja Irena Beqiraj dhe figura të tjera. Lidhur me këtë Spiropali u shpreh se personat në fjalë nuk janë delegatë, por  megjithatë nuk përjashton edhe mundësinë e diskutimit në Kongres, nëse ky mocion vjen nga delegatët.

“Me gjithë respektin për Arta Daden, kur një letër përfundon kërkojmë largimin e kryetarit të partisë, më e votuara sot për sot. Ç’të thuash? Nuk janë delegatë, në kongres diskutohen ata që janë delegatë. Ka një statut, po të ishin delegatë ta bënin këtë mocion nga brenda. Tani unë nuk di se cilët janë të gjithë emrat. Ne kemi zhvillimet e Kongresit. Nesër është dita e parë, një takim i madh me gratë. Në ditën e dytë mbahet ai që quhet Kongresi i madh i partisë, konventa. Në ditën e tretë pastaj, takimi me të rinjtë për riformatimin e forumit rinor.

Ne nuk do shikojmë asgjë që është vetëm për konsum mediatik. Ne kemi diskutime për statutin aty, nëse ka delegatë që e mbështesin, në rast se propozohet aty patjetër që do e diskutojmë.

Do të diksutohet me gjithë të tjerat dhe pastaj do të votohen. PS nuk ka konkurente jo vetëm organizmimit por edhe ideve që hidhen”, u shpreh ministrja.

E pyetur nëse do u japin zë emrave simbolikë, si Dade Irena Beqiraj zv.ministre, apo Maqo Lakrori.

Për Irena Beqirajn spiropali tha se nuk di të ketë qenë ndonjëherë anëtare e PS, ndonëse Rama e bëri zv.ministre. “Shumë mirë e bëri për merita të tjera. Nuk e di të jetë në strukturat e PS. Zonja Dade është figurë emblematike e PS, padiskutim dhe ka patjetër meritat dhe vendin e vet. Në rast se këto ide zënë vend në Kongres përmes delegatëve do ta shohim”, tha Spiropali.

 

/abcnews.al

 

 

73M2mNVMFn-nov-incident-nad-baltikot-borben-avion-na-nato-presretnal-ruski-avion-vo-koj-se-naogjal-sergej-sojgu.png
R D20:09 | 27/02/2020

Shtetet e Bashkuara të Amerikës i kanë dhënë vendit tonë plot 750 mijë dollar që do të përdoren për të rritur parametrat e sigurisë ajrore por edhe mbikëqyrjen detare. Përmes një postimi në facebook, ambasada e SHBA-ve bën të ditur se “ky sistem e mundëson Shqipërinë të bëhet një aleate më e fortë në NATO duke e ndihmuar vendin të mbrojë territorin e tij”.

Deklarata e plotë

Sot, Ambasada e Shteteve të Bashkuara priti me kënaqësi nënshkrimin e marrëveshjes prej më shumë se 750,000 dollarësh midis Ministrisë së Mbrojtjes dhe Lockheed Martin, një kompani amerikane globale për sigurinë dhe hapësirën ajrore, për mbështetje dhe mirëmbajtje të Sistemit të Integruar të Mbikëqyrjes së Hapësirës Detare (ISSSS). Ky sistem e mundëson Shqipërinë të bëhet një aleate më e fortë në NATO duke e ndihmuar vendin të mbrojë territorin e tij. #NeJemiNATO

kurti-6.jpg
R D19:43 | 27/02/2020

Kryeministri i Kosovës, Albin Kurti njoftoi pasditen e sotme se Qeveria ka vendosur të heqë taksën ndaj mallrave pjesërisht dhe me kushte. Kurti ka vendosur ta heqë tarifën për lëndën e parë që importohet nga Serbia dhe Bosnia e Hercegovina duke filluar nga data 15 mars.

“Nga 15 mars të hiqet tarifa për lëndën e parë që importohet nga Serbia dhe Bosnia e Hercegovina”, është shprehur ai, duke sqaruar se “kjo si shenjë për gatishmëri për marrëveshjen ekonomike tregtare me Serbinë. Ftojmë Serbinë që të zotohet që ta ndërpresë fushatën për çnjohjen e pavarësisë së Kosovës”. 

E nëse Serbia vazhdon fushatën miqësore, atëherë nga data 1 prill tarifa do të hiqet tërësisht për një periudhë 90 ditëshe.

“Nëse pala serbe dëshmon përkushtim të mirëfilltë në këtë fushatë miqësore, atëherë duke filluar nga data 1 prill 2020, do ta heqë tërësisht tarifën për një periudhë 90 ditëshe”. 

Por Kryeministri i Kosovës nuk ka vendosur kushte vetëm ndaj Serbisë. Ai kërkon që “BE ta vlerësojë lart heqjen e tarifës duke ofruar liberalizimin e vizave para Samitit të Zagrebit. Nëse Serbia nuk e përfill qëndrimin e Kosovës dhe nuk fillon heqjen e barrierave, me fillim nga data 1 prill do të nisë zbatimi i reciprocitetit, njëherë me fushën e tregtisë e pastaj në fushën ekonomisë. Në rast se pala serbe nuk reflekton as pas një periudhe 90 ditësh për heqjen e tarifës për lëndën e parë, atëherë Qeveria nga data 15 qershor do ta kthejë tarifën, deri në zbatimin e reciprocitetit”, ka thënë kryeministri Kurti.

Kujtojmë se Samiti i Zagrebit do të mbahet me datat 5-7 maj. /abcnews.al

piro-2.jpg
ger ta19:38 | 27/02/2020

“Nuk më duket se Lulzim Basha po e bën me shpirt mbështetjen  e aksionit të Ilir Metës”. Kështu u shpreh  ministrja e Shtetit për Marrëdhëniet me Parlamentin, në studion e Abc News me Mirela Milorin, teksa komentoi tubimin e 2 marsit të thirrur nga Presidenti Meta.

E pyetur nga gazetarja për pozicionin e Lulzim Bashës në një kohë kur është ulur në tryezë me qeverinë për Reformën Zgjedhore dhe nga ana tjetër mbështet tubimin e Metës, Spiropali tha se Basha ka nisur një kurs të ri opozitar. Sipas saj kryedemokrati është më i arsyeshëm. Ministrja tha se tubimin e 2 marsit e sheh si aksion të izoluar të LSI dhe Metës.

“Është një marrëdhënie skizoide se Lulzim Basha mirë keq ka nisur një kurs të ri opozitar të them të drejtën është i arsyeshëm, edhe për mënyrën si reagon për cështje si koronavirusi, tërmeti, çështje që kanë interes,duket i arsyeshëm, bashkëpunues dhe do të krijojë profilin e një drejtuesi shteti në të ardhmen. Nga ana tjeter ne mendojmë se është nën presionin e jashtëzakonshmë të këtyre heronjve të përhershëm, të Ilir Metës dhe Sali Berishës sepse gjuha e tyre opozitare është krejtësisht ndryshe nga ajo e Lulzim Bashës. Në fakt përçarja më e madhe ekziston në opozitë, por ne nuk kemi ndërmend të ndërhyjmë sepse nuk është puna jonë, le ta gjejnë vetë rrugën. Nuk më duket se Lulzim Basha po e bën me shpirt mbështetjen  e aksionit të Ilir Metës, do ishte absurde të mbështeste një aksion politik që do të fuqizojë Ilir Metën dhe LSI. Unë e shoh si një aksion të izoluar të LSI dhe Metës personalisht”, tha Spiropali. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono