Sport

beratii.png
G. P.17:02 | 11/11/2018

Dy lojtarë të kombëtares së Shqipërisë dolën fitues në Serinë A. Berat Gjimshiti shënoi gol në suksesin ndaj Interit, ndërsa Etrit Berisha luajti si titullar.

Po luan titullar, por po bën edhe më shumë. Berat Gjimshiti duket në formën më të mirë të kohëve të fundit, duke u konfirmuar me golin e realizuar në portën e një skuadre të madhe si Interi. Në formacion për Atalantën, mbrojtësi i kombëtares shqiptare tundi rrjetën në minutën e 88-të, duke e bërë të sigurtë suksesin me rezultatin e momentit 3-1.

Përfundoi 4-1 për ekipin nga Bergamo që pati titullar edhe një tjetër lojtar të Shqipërisë, portierin Etrit Berisha. Futboll i shkëlqyer nga skuadra vendase e trajnerit Gasperini, që arriti një triumf ndaj një ekipi ku punoi vetëm për pak kohë, dhe ku e shkarkuan pa shumë ceremoni.

Pyetja që vjen e para në mendje është: Çfarë ndodhi me Interin?

Një ekip që arriti të merrte barazimin ndaj Barcelonës dhe që kishte fituar 9 nga 11 ndeshjet e fundit, në Itali e në Europë, u dorëzua pa kushte. U ndje shumë mungesa e përvojës për të pretenduar njëkohësisht në Champions e në Serinë A.

Po ashtu, ndikoi fakti që Interi nuk ka stol aq të fortë sa Juventusi, dhe ndoshta vetë trajneri Luçiano Spaleti pak është mësuar të punojë në një ngarkesë të tillë fizike dhe psikologjike. Interi, natyrisht mbetet pretendent për në Champions, madje edhe për titullin, por luhatje të tilla ia rrezikojnë sezonin. Atalanta, ndërkaq, arriti një sukses të madh, që mund ta ndihmojë në një edicion kur nuk duket në formën e viteve të kaluara./abcnews.al

orges-shehu.png
G. P.23:55 | 10/11/2018

Skënderbeu shpreson të kthehet tek fitorja pas humbjes me Laçin. Trajneri Orges Shehi synon të mundë Flamurtarin dhe ish-trajnerin e tij, Ilir Dajën.

Nuk kuptohet mirë ky ekip. Menjëherë pas humbjes së papritur në Laç, Skënderbeu do të ketë përballë Flamurtarin, skuadrën që e mundi bindshëm brenda në Vlorë. Kuptohet, që luftohet sërish për kreun, por si ka mundësi që kampionët fitojnë me më të fortët, dhe dorëzohen thuajse plotësisht përpara më të vegjëlve?

“Jemi skuadër e re, me moshë shumë më të re. Kur lufton për objektiva madhore gara është e gjatë”, tha Shehi.

Orges Shehi do të jetë për të dytën herë përballë ish-trajnerit të tij, Ilir Dajës.

“Unë do thoja që është ndeshje mes Skëndërbeut dhe Flamurtarit. Siç studion Daja lojtarët tanë dhe ne i kemi studiuar lojtarët e tyre”, u shpreh trajneri i Skënderbeut.

Po kjo pyetje i bëhet edhe Dajës, që flet nga Vlora.

“Është hera e parë që shkoj si kundërshtar, si trajner i Flamurtarit. Shkojmë me idenë e qartë që nëse duam rezultat në Korçë, përveç se duhet të djerësijmë shumë, duhet të jemi dhe shumë të fortë psikologjikisht”, u shpreh Daja.

A mund të quhet ky një mision i pamundur për Flamurtarin, pas disfatës së merituar me korçarët në Vlorë?

“Ka gati dekadën e fundit që kryeson në kampionatin shqiptar. Në këto momente ka treguar se është në një formë shumë të mirë”, tha trajneri Daja.

Skënderbeu mban vendin e dytë në Superligë, ndërsa Flamurtari është i gjashti, plot 7 pikë prapa./abcnews.al

dortmund-1280x756.png
G. P.23:12 | 10/11/2018

Dortmundi fitoi duelin klasik të Bundesligës gjermane ndaj Bajernit, dhe u shkëput në krye të renditjes. Skuadra vendase përballoi diferencën e përvojës me kampionët duke arritur një sukses me përmbysje. Robert Levandovski kaloi Bajernin dy herë në epërsi, me golat e tij, por Dortmundi u përgjigj me kapitenin Marko Rojs, që shënoi gjithashtu dy gola.

Fati i ndeshjes u vendos në minutën e 73-të nga sulmuesi spanjoll, Pako Alkaser, që shënoi golin e tretë për vendasit, pas një kundërsulmi të shpejtë. Me këtë fitore, Dortmundi u ngjit në kuotën e 27 pikëve, duke qenë i shkëputur në krye. Bajerni zbriti në vendin e tretë me 20 pikë, ndërsa mbrojtja e titullit kampion u bë më e vështirë. Trajneri Niko Kovaç, po ashtu, rrezikon postin pas kësaj humbjeje./abcnews.al

femra.png
G. P.22:46 | 10/11/2018

Autoritetet iraniane kanë vendosur të zbusin rregullat arkaike që u ndalonin grave të ndiqnin ndeshjet e futbollit. Këtë herë qindra tifozeve femra u është lejuar hyrja në stadium për finalen e Ligës së Kampioneve Aziatike, e luajtur në kryeqytetin Teheran.

Qindra gra iraniane u lejuan nga autoritetet e Republikës Islamike të ndiqnin në stadium finalen e Ligës së Kampioneve të Azisë, në Teheran. Lëvizja e qeverisë iraniane shihet si një shans për t’i dhënë fund rregullit të rreptë që prej 35 vitesh u ndalon grave ndjekjen e ndeshjeve të futbollit. Pjesa dërrmuese e grave që ishin të pranishme në stadium ishin të afërme të lojtarëve, ose pjesëtare të ekipeve për femrat.

Ndeshja mes ekipit vendas Perspolis dhe atij japonez Kashima Antlers u mbyll në barazim zero me zero, por i dha titullin kësaj të fundit pas fitores 2-0 të regjistruar në ndeshjen e parë. Muajin e kaluar rreth 100 gra u lejuan të shihnin ndeshjen miqësore mes Iranit dhe Bolivisë, por menjëherë më pas kufizimet u rivendosën. Aktualisht edhe organi qeverisës i futbollit, FIFA po punon me Teheranin për t’i dhënë fund ndalimit.

Në Mars të këtij viti, 35 gra u arrestuan pasi u përpoqën të ndiqnin derbin kryeqytetas mes Persepolis dhe Esteklalit. I pranishëm në këtë ndeshje ishte edhe presidenti i FIFA-s, Xhani Infantino, së bashku me ministrin iranian të Sporteve, Masud Soltanifar. Që prej Revolucionit Islamik të vitit 1979, gratë dhe vajzat iraniane rrallë herë janë lejuar të ndjekin evente sportive ku performojnë meshkujt. “Stadiumet e Hapura”, një shoqatë që lufton për të drejtat e grave në Iran, i dërgoi më herët gjatë javës një peticion FIFA-s, i cili ishte nënshkruar nga mbi 200 mijë persona./abcnews.al

elseid-hysaj.jpg
G. P.22:37 | 10/11/2018

Ka lajme të mira nga Napoli për Elseid Hysajn. Mbrojtësi i kombëtares shqiptare është pranë rinovimit me klubin e Serisë A

Karriera pritet të vazhdohet pikërisht këtu. Napoli do të jetë sërish skuadra e Elseid Hysajt, ndërsa mbrojtësi shqiptar e klubi italian po përmirësojnë marrëdhëniet. Mediat në Apenine bëjnë me dijë se ka pasur afrim mes palëve dhe se pritet të arrihet një marrëveshje për rinovim të kontratës, deri në vitin 2023.

Agjenti i Hysajt, Mario Xhufredi raportohet se është takuar me presidentin e Napolit, Aurelio De Laurentis, dhe se besohet që rroga e mbrojtësit shqiptar të jetë 3 milionë euro në sezon. Hysaj, në të vërtetë, nuk ndihet aspak keq në Napoli, ku kalon shkëlqyeshëm me shokët e skuadrës, dhe luan në një ekip që merr pjesë rregullisht në Ligën e Kampionëve.

Vështirësitë me trajnerin Ançeloti besohet se mund të lihen pas dhe shqiptari ta ketë sërish rolin e rëndësishëm që ka pasur në të kaluarën. Pati shumë zëra që Hysaj mund të kalonte tek Çelsi, me ish-trajnerin e tij tek Empoli dhe tek Napoli, Mauricio Sarrin, por për momentin asgjë e tillë nuk do të ndodhë.

Napoli nuk dëshiron ta humbasë lehtë një lojtar kaq të rëndësishëm, që luan edhe me kombëtaren e Shqipërisë, dhe pritet që klauzola e tij e transferimit të jetë plot 50 milionë euro./abcnews.al

 

ardian-mema.png
G. P.21:14 | 10/11/2018

Tirana ndihet edhe më shumë nën presion pas dënimit nga ana e Disiplinës, për shkak të sjelljes së tifozëve. Trajneri Mema, i shqetësuar në prag të ndeshjes së Superligës në fushën e Luftëtarit.

Vetë presidenti deshi t’i takonte përpara një tjetër ndeshjeje. Futbollistët e Tiranës mendohet se morën zemër nga numri 1 i klubit, një ditë pas dënimit nga Federata dhe një ditë para ndeshjes së radhës në Superligë.

Hyrja e tifozëve në fushë i kushtoi dy ndeshje pa spektatorë, me vendim të Komisionit të Disiplinës, një tjetër goditje për moralin e skuadrës. Natyrisht, kjo nuk ka të bëjë me sfidën e së dielës ndaj Luftëtarit, por me atë ndaj Skënderbeut javën tjetër, por gjithsesi, ka shkaktuar shqetësim, siç shihet tek reagimi i trajnerit Mema.

“Më shumë do ishte një ndeshje kontrolli pastaj nëse loz pa tiofza. Një papërgjegjshmëri të disa personave aty sjellin dhe këto shqetësime. Ata nuk janë tifoza të Tiranës. Tirana boll halle ka dhe duhet të mbajë në shpinë edhe këta 10 apo 20 persona që nuk i kuptoj”, tha Mema.

Gjithsesi, për momentin, Mema duhet të përqëndrohet tek sfida në Gjirokastër.

“Normalisht është rival direkt sepse jemi me pikë ngjitur. Mendoj që është ekip shumë i fortë dhe që di të lozë në fazën e sulmit. Kemi mundësi për të qenë ekipi në ekuilibër dhe për ta fituar ndeshjen”, u shpreh trajneri i Tiranës.

Trajneri erdhi në një moment shumë të vështirë, ndërsa thekson se nuk e ka ndihmuar as kalendari.

“Kur kam ardhur kam bërë vetëm një ndeshje në shtëpi dhe vazhdojmë me ndeshjet jashtë si kjo e radhës dhe pastaj vijnë ndeshjet e radhës që janë Skëndërbeu, Partizani e kështu me radhë. Kjo fazë është një fazë shumë e fortë dhe ka pasur problematikat e veta”, theksoi Mema.

Tirana mban vendin e katërt nga fundit në Superlige me 10 pikë, vetëm 2 pikë larg zonës së rënies nga kategoria./abcnews.al

skender-gega.jpg
G. P.20:31 | 10/11/2018

Partizani shkon me debate të brendshme në ndeshjen ndaj Laçit në Superligë. Trajneri Gega, gjithsesi, ndihet i qetë, ndërsa flet edhe për aleancat e mundshme kundër ekipit të tij.

Qetësia nuk është e plotë, por ndoshta nuk prish punë. Edhe tek Partizani kryesues ka përplasje, dhe pas rastit të zv. kapitenit Trashi, ja ku vjen ai i sulmuesit Mensah. Afrikani bëri debat dhe bisedoi gati 20 minuta me trajnerin Gega në seancën e fundit stërvitore, duke kërkuar llogari se përse, sipas tij, luan pak.

Mos vallë kjo mund të ndikojë për keq në lojën dhe rezultatet?

“Zyra e një trajneri është fusha. Është irmale të bisedoj. Bisedoj gjithë kohës. Unë jam lider dhe kam për detyrë të sqaroj dhe t’i sheshoj gjërat, kurse për të vendos i vendos unë. Për çdo gjë tjetër do trajthen të gjithë njëlloj, e kam thënë që ditën e parë”, tha Gega.

Në prag, këtë të diel, është sfida e Superligës me Laçin, aspak e lehtë, pasi flitet për një rival direkt të vendeve të para.

“Jemi gati kundër Laçit. E kemi analizuar në momentet më të mira. Është një ndeshje e radhës. Ne luajmë në fushën tonë dhe për fat të mirë do kemi edhe tifozët tanë, një shtysë shumë e madhe”, u shpreh Gega.

Një nga shqetësimet më të mëdha në futbollin shqiptar janë aleancat, të cilat besohet se fillojnë në fazën së tretë e mbrapa.

“Është mënyra e tyre sesi do ta ndalojnë Partizanin. Është zgjedhja e tyre, me lekë, me mbështetje, me politika. Nuk e di, nuk e kam idenë. Është krejt normale njerëzit kanë aleancat e tyre, miqësitë e tyre. Ndoshta Partizani mbase është bëri i frikshëm, por kjo nuk duhet të na vërë në gjumë”, u shpreh trajneri Gega.

Gega ka pasur shqetësime në seancat stërvitore, pasi portieri dhe kapiteni Hoxha ka ndjerë probleme fizike, ashtu si mbrojtësi Ibrahimi, ndonëse besohet se do të jenë gati.

Me rëndësi do të jetë prania e tifozëve në “Selman Stërmasi”, pasi klubi e shleu me gjobë dënimin prej 1 ndeshjeje që kishte mbetur. Partizani kryeson Superligën me 28 pikë ndaj 26 të Skënderbeut, ndërsa Laçi është i treti me 22 pikë./abcnews.al

bb.png
G. P.16:58 | 10/11/2018

Bundesliga do të ketë sot ndeshjen më të madhe të sezonit. Dortmundi pret Bajernin, dhe pas shumë vitesh e ndjen veten favorit ndaj kampionëve.

Çdo ligë ka klasiken e vet dhe Gjermania për fat nuk mbetet pa të. Këtë herë luhet Dortmund-Bajern, një sfidë e madhe edhe në një kampionat të dominuar thuajse plotësisht nga bavarezët, siç është Bundesliga. Madje, për herë të parë pas shumë viteve, Bajerni shkon në këtë përballje jo me statusin e favoritit.

Dortmundi është 4 pikë përpara në renditje dhe diferenca mund të shkojë në shtatë nëse vendasit fitojnë. Kampionët nuk ndihen të sigurt, si dikur, madje trajneri Niko Kovaç është vënë në dyshim. Për më tepër, Bajernit do t’i mungojnë 4 lojtarë si Tiago, Koman, Roben apo Toliso. Gjithsesi, kroati Kovaç ndihet i fortë.

“Dortmundi ka shumë pika të forta dhe shumë pak dobësi, – tha ai, – një skuadër e aftë në çdo sektor të fushës, dhe do të duhej një lupë për të gjetur mangesitë e saj. Gjithsesi, Dortmundi ende nuk është ndeshur me një rival si Bajerni, pra të shohim sesi do të shkojë. Duhet të bëjmë lojën tonë dhe të kërkojmë maksimumin. Nuk e kam problem presionin, ishte shumë më i madh tek Frankfurti kur po binim nga kategoria”.

Dortmundi i trajnerit Lysien Favre po rikujton periudhën e lavdishme të Jurgen Klopit. Sukseset në Bundesligë dhe Champions kanë qenë të shumta, me shumë gola të shënuar, dhe me mjaft lojtarë të rinj në përbërje. Mungesat këtë herë do të jenë vetëm dy, Shmelcer e Dialo. Zvicerani Favre mbetet gjithsesi me këmbë në tokë, pasi humbja në fushën e Atletikos tregoi se gjithçka mund të ndodhë.

“Ne e dimë se do të luajmë ndaj një skuadre shumë të madhe, Bajerni mbetet Bajern. Duhet të jemi shumë të zgjuar. Ende nuk mund të them sesi do të luaj, por duhet të japim maksimumin në sulm dhe në mbrojtje. Ne kemi përparuar shumë këta 3-4 muaj, por kemi ende shumë për të mësuar, sidomos lojtarët e rinj”.

Kërcënimi më i madh për Dortmundin do të jetë nga ish-sulmuesi i saj, Robert Levandovski, golshënuesi më i mirë i viteve të fundit në Bundesligë. Bajerni jepet favorit me kuotën 2.05, ndërsa fitorja e vendasve ka koeficientin 3.25./abcnews.al

PARTIZANI-ME-TIFOZE-NDAJ-LACIT.mpg_snapshot_00.11-1280x720.jpg
G. P.08:20 | 09/11/2018

Partizani do ta luajë me tifozë ndeshjen e rëndësishme të radhës në Superligë. Klubi do ta shlyejë dënimin, duke paguar gjobën, ndërsa synon të mbajë kreun e renditjes.

Do të ketë një plus më shumë kur të dalin në fushë. Futbollistët e Partizanit pritet të luajnë me mbështetjen e mijëra tifozëve në ndeshjen e fundjavës në Superligë ndaj Laçit, në “Selman Stërmasi”. Klubi bën me dijë zyrtarisht se do të paguajë financiarisht për të shlyer dënimin prej 2 ndeshjesh pa tifozë, që iu bë nga Komisioni i Disiplinës në Federatë. Gjoba që do të paguhet është gjysmë milionë lekë të reja, ndërsa ndëshkimi erdhi pas parullës raciste antigreke të nxjerrë nga disa tifozë në ndeshjen kundër Skënderbeut.

Partizani u rikthye në vendin e parë në renditjen e Superligës pas fitores së arritur në fushë Krujë ndaj Kastriotit, ndërsa përfitoi edhe nga humbja e Skënderbeut me Laçin.
Skuadra e trajnerit Skënder Gega ka tani 28 pikë ndaj 26 të rivalit kryesor, dhe mbështetja e tifozëve shihet si shumë e rëndësishme për të pretenduar titullin.
Për më tepër, Laçi është treguar ekip i fortë këtë sezon, duke qenë në vend të tretë, vetëm 6 pikë larg kreut, dhe vetë Partizani nuk e ka pasur të lehtë këta vite për ta mposhtur. Gjithsesi, të kuqtë cilësohen favoritë në përballjen e fundjavës, edhe sepse luajnë në fushën e tyre, për më tepër me tifozë./abcnews.al

ANALIZA-E-SUPERLIGES-FLET-ERNEST-GJOKA.mpg_snapshot_00.30-1280x720.jpg
G. P.14:04 | 08/11/2018

Superliga shqiptare do të ketë shumë të papritura këtë sezon. Trajneri i njohur Ernest Gjoka analizon sezonin, dhe tregon problemet që po has Skënderbeu.

Një sezon të cilit nuk mund t’i zihet besë. Kreu i Superligës po ndryshon në pak ditë, jo në pak javë, diçka me të cilën duhet të mësohemi.Ky është mendimi i Ernest Gjokës, trajnerit të njohur të futbollit shqiptar, i cili e zgjeron shumë konkurrimin për titull.

Ernest Gjoka, trajner futbolli: “Sigurisht që mes Skënderbeut dhe Partizanit ka pasur më shumë rokadë, por që mos harroni se që nga vendi i gjatë deri tek vendi i parë, çdokush nga këto ekipe mund të dali kampion. Këtë e them sepse shoh që nuk ka ndonjë veçori të jashtëzakonshme apo diferenca të jashtëzakonshme.”

Partizani nuk duket më i forti i viteve të fundit, por Skënderbeu gjithashtu po gabon shumë.

“Është një veçori e Skënderbeut edhe në kampionatet e mëparshme, Skënderbeu ka lënë pikë me ekipe që kanë dashur më mbijetu në Superligë, ndërsa me ekipe që kanë qenë kundërshtarë direkt Skënderbeu gjithmonë ka bërë dallime. Mendoj se Skënderbeu nuk e kishte atë motiv që ne e pamë 3 ditë më përpara. Skënderbeu me këto lojtarë, me këtë eksperiencë që ka brenda. Në qoftë se këto nuk arrijnë të funksionojnë atëhere dhe Skënderbeu kthehet në një ekip të brishtë.”

Përmbysjet e rezultateve krijojnë entuziazëm në futboll, por çdo javë flitet shumë për dyshime për trukime.

“Kjo gjithmonë është në këndvështrimet e të supozuarit, ne mund ta supozojmë. Çështje e besueshmërisë është çështja e asaj këndvështrimi që e shohim ne. Në qoftë se ne duam ta shohm gotën plot do ta shohim, në qoftë se ne duam ta shohim gotën përgjysmë do ta shohim.”

Largohet edhe Klodian Duro nga Kamza, 6 trajnerë të shkarkuar në pak javë. Mendohet se trajnerët e rinj po dëmtojnë profesionin.

“Ata që do vijnë e që do ikin, të vazhdojnë rrugën dhe të ngrejnë stekën një shkallë më lart, sepse vetëvlerësimi për veten duhet të jetë gjithë kohës i shkallës maksimale. Sa më shumë ti vlerësove veten aq më shumë do të vlerësojë punëdhëniësi, aq më shumë do të vlerësojë sportisit, aq më shumë do të të vlerësojë publiku.”

Tirana ndryshon trajner, por rezultatet ende nuk vijnë.

“Ne të gjithë e duam të jetë sa më larta, sepse qenia e Tiranës është sa më larg në Superligën shqiptare është në të mirën e futbollit shqiptar dhe në të mirën tonë si kryeqytetas. Sepse të gjithë skuadrat e mëdha nëpër Europo, pak a shumë, janë në qytetet e mëdha. Tirana nuk po e realizon dot, nuk e di ku është ngërçi, mendoj që me ardhjen e Memës gjërat do të ndryshojnë. I uroj Memës që të gjejë sekretin edhe të eci Tirana përpara sa më shumë.”/abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono