Rajoni

vucic.jpg
G. P.11:45 | 19/08/2019

Presidenti i Serbisë Aleksandër Vuçiç ndodhet për një vizitë zyrtare në Shtetet e Bashkuara të Amerikës. Të martën, ai do të takohet me sekretarin amerikan të Shtetit Mike Pompeo.

Lajmi është konfirmuar nga një deklaratë për media e Departamentit Amerikan të Shtetit. Tema kryesore e bisedës mes Vuçiç dhe Pompeo pritet të jetë gjendja në Kosovë.

Pompeo në New York do të marrë pjesë në mbledhjen e Këshillit të Sigurimit të OKB-së për Lindjen e Mesme ndërsa parashikohet edhe një takim mes tij dhe sekretarit të përgjithshëm të Kombeve të Bashkuara, Antonio Guterres./ABC News Albania 24/7

isa-mustafa.jpg
G. P.11:42 | 19/08/2019

Mediat kosovare raportojnë se kryetari i Lidhjes Demokratike të Kosovës, Isa Mustafa, do të takohet me kreun e Partisë Socialdemokrate, Shpend Ahmeti. Burime të Gazetës Express brenda PSD-së, e konfirmojnë se takimi mes dy krerëve të partive do të mbahet në orën 11:00.

Ndërsa mediat e tjera raportojnë se edhe kryetari i Aleancës për Ardhmërinë e Kosovës, Ramush Haradinaj, dhe kryetari i Nismës Socialdemokrate, Fatmir Limaj, do të jenë pjesë e këtij takimi.

Të dielën mediat raportonin se gjatë ditës pritet të nënshkruhet një marrëveshje për koalicion parazgjedhor mes partisë së Ahmetit dhe kryeministrit Haradinaj. Ky koalicion pritet të formalizohet me datën 21 Gusht, një ditë para shpërbërjes së Kuvendit.

Më parë, Mustafa ishte takuar edhe me kryetarin e Lëvizjes Vetëvendosje, Albin Kurti, ku shprehën nevojën për një qeverisje të re./ABC News Albania 24/7

maqedoni.jpg
G. P.17:15 | 18/08/2019

Për analistët në Maqedoninë e Veriut, situata e krijuar në vend pas publikimit të videove të çështjes “Zhvatja” paralajmëron një vjeshtë të nxehtë politike. Ata vlerësojnë se e vetmja rrugëdalje nga kjo situatë është ndryshimi i ligjit për Prokurorinë e Përgjithshme.

Duke komentuar zhvillimet e fundit politike në vend, njohësit e këtyre rrethanave vlerësojnë se Maqedonia e Veriut për momentin është në një udhëkryq, si atë të brendshëm por edhe të jashtëm. Rasti ‘Zhvatja’ dhe implikimet që mund të ketë ky rast në skenën politike, për analistin Isak Sherefi, Maqedonisë së Veriut janë duke i kushtuar shumë.

Isak Sherifi, analist:Maqedonia këto ditë do t’i kalojë edhe ditët më të vështira, për shkak se problemi tashmë është hedhur brenda përbrenda Prokurorisë Speciale. Në të njëjtën vijë është edhe Presidenti Stevo Pendarovski, i cili kërkon hetim më të zgjeruar kundër këtyre hetimeve  që ndodhën me aferën ‘Zhvatja’. Faktikisht, ndaj mendimin se Maqedonisë është duke i kushtuar shumë si në arenën ndërkombëtare por edhe në establishmentin politik brenda përbrena Maqedonisë së Veriut”.

Nga ana tjetër, analisti Naser Ziberi vlerëson se te qytetarët po humbet shpresa se në Maqedoni mund të vendoset ligji, e drejta të del në sipërfaqe dhe të pengohen gjithë ata padrejtësi  që në 10 vitet e kaluar ndodhën në RMV. Sipas Ziberit struktura aktuale e qeverisjes si rezultat i ngjarjeve të fundit po e humb dalëngadalë mbështetjen e qytetarëve.

Naser Ziberi, analist: “Qeveria aktuale mendoj se do ta kalojë këtë fazë dhe supozoj se zgjedhjet ardhshme do të jenë ata të rregullat ose me një afat prej tre muaj të parakohshme, sepse vendin e pret anëtarësimi i plot në NATO, marrja e datës për fillim të negociatave dhe këto duhet të jenë prioritetet e politikës, por struktura aktuale e qeverisjes po e humb dalëngadalë mbështetjen e qytetarëve si rezultat e këtyre ngjarjeve aferave në pamundësi të qeverisë ta luftoj këtë situatë”.

Ndërkohë, partia më e madhe opozitare maqedonase VMRO–DPMNE kërkon dorëheqje të kryeministrit Zoran Zaev dhe zgjedhje të parakohshme. Njëkohësisht, opozita paralajmëroi se në shtator do të filloj edhe protestat. Duke u bazuar në  këto qëndrime të opozitës për Analistin Isak Sherifi vendin e pret një vjeshtë e nxehtë politike.

Isak Sherifi, analist:Si duket VMRO-ja është e mobilizuar, qeveri teknike ka që 6 muaj që kërkon Vmro-DPMNE-ja dhe ndaj mendimin që këto protesta do të japin një vrull mjaftë të fuqishëm në shtator, mirëpo nga opozita maqedonase, shtrohet pyetja çfarë bën opozita shqiptare. VMRO-ja nga kongresi i fundit ka dalë më e fuqishme më e strukturuar dhe më e organizuar prandaj edhe kreu i kësaj partie kërkon qeveri teknike e cila siç ka theksuar ai do të jetë shpëtim për Maqedoninë e veriut në prag të negociatave me Bashkimin Evropian”.

Sipas analistit Naser Ziberi, Prokurorja Katica Janeva është dëshpërimi më i madh i kësaj periudhe në vend, pasi sipas tij ajo e vrau shpresën te qytetari se do të vendoset drejtësia. Ai shton se e vetmja rrugëdalje është të ndryshohet urgjentisht Ligji për Prokurorinë e Përgjithshme dhe në kuadër të kësaj prokurorie të gjendet zgjidhje për Prokurorinë Speciale./ABC News Albania 24/7

prokue-1280x719.jpg
Sej rie16:15 | 17/08/2019

Kreu i Prokurorisë për ndjekjen e krimit të organizuar, në Maqedoninë e Veriut, Vilma Ruskoska, do të marrë në pyetje shefen në dorëheqje të Prokurorisë së Posaçme Publike, Katica Janeva. Paraqitja e kësaj të fundit pritet me interes për shkak se dëshmitë e saj do të hedhin më shumë dritë, si për rastin ‘Zhvatja’, por edhe për spekulimet se në Prokurorinë Speciale mund të jenë zhdukur shumë prova për raste shumë të ndjeshme.

Ekspertët e fushës nuk ngurojnë ta ndërlidhin këtë krizë më të re institucionale me atë që quhet gatishmëri e shtetit për të luftuar krimin e organizuar. Kjo për shkak se në regjistrimet-audio, të publikuara në gazetën italiane ‘La Verita’, rezulton pa pikë dyshimi se në skandalin ‘Zhvatja’ është e implikuar edhe prokurorja speciale publike Katica Janeva nga e cila pritej që ta zhbllokojë shtetin e kapur prej vitesh.

Të martën, kjo zonjë, që ndërkohë humbi epitetin ‘e çelikt’, do të dëshmojë në Prokurorinë e Shkupit dhe deponimet e saj do t’u japin përgjigje shumë pyetjeve, temave e dilemave, të shtruara e të hapura pas skandalit më të fundit. Kjo për shkak se ‘Zhvatja’ rezulton të na dalë një aferë shumëdimensionale, sikundër u shpreh presidenti Pendarovski në paraqitjen e fundit publike të tij. Të rikujtojmë: Javëve të shkuara ka pasur lajme për kompjuterë, për telefona të fshirë, jo dikur tjetër, por pikërisht në Prokurorinë Speciale Publike.

Burime të Televizionit Klan thonë se zbardhja e së vërtetës mund të përshkallëzojë edhe më këtë krizë ngaqë në ‘trezorët’ e saj kanë qenë ose ka qenë dashur të jenë ‘bombat’ politike të dorëzuara nga opozita e para tre vjetëve, Lidhja Socialdemokrate, sot në pushtet, e kryeministrit Zoran Zaev.

Risetimi i kompjuterëve nënkupton edhe zhdukjen e provave për rastet për të cilat Kryeministri me shokë rrihte gjoksin se ka për t’i zbardhur e që kanë të bëjnë me keqqeverisjen e qeverisë së kaluar të Nikola Gruevskit, por edhe me rastin e incidentit të rëndë të armatosur në Lagjen e Trimave në Kumanovë apo ‘Monstrën’ – me shumë viktima në njerëz.

Prandaj është me rëndësi dëshmia e prokurores Katica Janeva që, ndër të tjera të heq dilemën e shtruar në median maqedonase dhe jo vetëm maqedonase, nëse projekti politik i quajtur Prokuroria Speciale Publike, është pasuar me ndonjë pazar, po ashtu politik, mes kreut të saj Katica Janeva, dhe shefit të ekzekutivit, Zoran Zaev.

Komuniteti ndërkombëtar euro-amerikan nuk është se, jo njëherë, nuk ka tërhequr vërejtjen që mazhoranca dhe opozita në Shkup të bëjnë punën e tyre, pa veprime e manovrime për interesa thjesht politike-partiake, por të japin kontributin e tyre për vendosjen e shtetit të së drejtës, para së gjithash, dhe për llogaridhënie e përgjegjësi, çfarëdo natyre qoftë ajo. Shi për këtë menaxhimi juridik i skandalit ‘Zhvatja’ ka për të qenë busull orientuese se nga do të shkojë Maqedonia e Veriut./ABC News Albania 24/7

prishtiuna.jpg
G. P.14:15 | 16/08/2019

Ndonëse ndodhet në listën e CNN për 20 vendet që duhen vizituar, Prishtina nuk është ende një qytet atraktiv për turistët.

Yagiz Durhan është nga Turqia, ai aktualisht gjendet për vizitë në Prishtinë. I pëlqen të vizitojë vende të ndryshme të botës për hiking për çka ka ardhur edhe në Kosovë. Thotë se e ka shfrytëzuar rastin që të vizitojë edhe kryeqytetin.

Yagin Durhan, turist:Është hera e parë që jam në Prishtinë. Më pëlqen ky vend dhe dua ta vizitoj përsëri”.

Së fundmi Prishtina është në top 20-en e vendeve që duhet vizituar nga mediumi ndërkombëtar CNN. Kryeqyteti kosovar zakonisht nuk është në krye të listave të dëshirave të destinacioneve për shumë turistë, por kjo nuk është arsye për të mos e vizituar. Mund të ketë qenë sinonim i luftës 20 vjet më parë, por Prishtina ka pësuar një transformim të madh.

CNN përmend Muzeun Etnografik dhe atë kombëtar që duhet vizituar. Ndërsa për bibliotekën Kombëtare thotë se ka një arkitekturë magjepsëse. Atyre që kërkojnë të qetësohen CNN u rekomandon të vizitojnë pishinën e qytetit që ndodhet në Parkun Germia. Gazetarja Sërbeze Haxhiaj thotë se autoritetet në Kosovë kanë dështuar në politikat e të bërit turizëm.

Serbeze Haxhiaj, gazetare: “Është koha të kthehet vëmendja tek pjesa atraktive e Prishtinës, por dhe tek zona të tjera të Kosovës”.

Turistët e huaj e vizitojnë Kosovën kryesisht në kuadër të tureve ballkanike. Të rrallë janë ata që kalojnë disa ditë pushimi vetëm në Kosovë, thonë agjencitë turistike.

Besnik Gashi, agjencia turistike “Gizi Travel”: “Në Prishtinë vijnë nga pak, kryesisht nga vendet ballkanike. Kur vizitojnë Shqipërinë, Maqedoninë zgjedhin edhe Kosovën”.

Në kuadër të vizitave të tyre në Prishtinë, turistët zgjedhin edhe parkun arkeologjik të Ulpianës për ta vizituar, i cili gjendet pak kilometra larg Prishtinës./ABC News Albania 24/7

pendarovski.jpg
G. P.13:15 | 16/08/2019

Presidenti i Maqedonisë së Veriut, Stevo Pendarovski ka kritikuar institucionet e vendit për mënyrën e menaxhimit të çështjes “Zhvatja”. Në një intervistë për VOA, Pendarovski ka deklaruar se nga ecuria e kësaj çështjeje varet çelja e negociatave të anëtarësimit me BE-në.

Presidenti i Maqedonisë se Veriut Stevo Pendarovski është treguar tepër kritik për mosreagimin si duhet të institucioneve ndaj problemeve dhe sfidave aktuale, sidomos kur është fjala për megaskandalin e fundit  ‘Zhvatja’, ku një afaristi i janë marrë 1.5 milionë euro për të shpëtuar nga një proces gjyqësor, e në të cilin, përveç dy personave të paraburgosur, dyshohet të jetë e implikuar edhe prokurorja speciale në dorëheqje, Katica Janeva.

“Institucionet vitale të këtij shteti nuk funksionojnë, nuk i servisojnë qytetarët dhe nuk po e luftojnë krimin dhe korrupsionin në atë nivelin që është i domosdoshëm për të thënë përfundimisht se jemi demokraci e pjekur. Jo vetëm demokraci në tranzicion”.

Pendarovski duke konfirmuar se ka dyshime në publik për zhdukje të provave në Prokurorinë Speciale Publike. Sipas tij, nga mënyra se si do të menaxhohet rasti ‘Zhvatja’ do të varet edhe vendimi për çeljen apo jo të bisedimeve për anëtarësimin e vendit në Bashkimin Evropian:

“Të mos lëmë hapësirë që dikush me të vërtetë këtu i mundëson dikujt tjetër që të bëjë diçka lidhur me këtë rast, për shkak se pohoj: nga reagimi i shtetit, jo i individëve, President, Gjykatë, prokuror, Kryeministër, ministër, nga reagimi i Republikës së Maqedonisë së Veriut, në tërësi, do të varet në masë të madhe vlerësimi i anëtarëve të Bashkimit Evropian, në vjeshtë, kur do të shqyrtojnë kërkesën tonë për çeljen e negociatave për anëtarësim”.

Presidenti i Maqedonisë se Veriut ka vlerësuar se garnituara aktuale në pushtet gjatë këtyre tre viteve e gjysmë ka bërë shumë për transformimin e shtetit dhe për pavarësinë e institucioneve të drejtësisë nga ndërhyrja e politikanëve, por e njëjta duhet të bëjë më shumë për përballimin e problemeve me të cilat aktualisht po përballet Maqedonia e Veriut./ABC News Albania 24/7

sheqernaska-1280x722.jpg
G. P.18:30 | 15/08/2019

Deri në momentin e fundit Maqedonia do të jetë pre e sulmeve të faktorëve të brendshëm e të jashtëm, që do të mundohen të pengojnë anëtarësimin e saj në NATO. Paralajmërimi është bërë nga ministrja e Mbrojtjes, Radmilla Sheqerinska, e cila ka nënvizuar se institucionet vendase janë të dobëta përballë këtyre kërcënimeve.

Vetëm disa muaj para anëtarësimit të pritur zyrtar në NATO, ministrja e Mbrojtjes Radmila Sheqerinska thotë se edhe më tej do të ketë sulme, nga forca të brendshme dhe të huaja të cilat duan ta pengojnë integrimin euro-atlantik të Maqedonisë. Por megjithatë, shumë shembuj si publikimi i bisedave të incizuara në fshehtësi në rrjetet sociale, bashkëbisedues të rrejshëm me kryeministrin, ose krijimi masiv i lajmeve manipuluese, sugjerojnë se sistemet vendase të sigurisë dhe komunikimeve janë të rrezikuara.

Radmila Sheqerinska, ministre e Mbrojtjes: Dobësi në lidhje me kërcënimet e reja janë vërejtur në të gjitha shtetet, ky po bëhet një lloj i ri i rrezikimit të sistemit dhe të institucioneve. Ka shumë persona në vend por edhe jashtë tij të cilët mendojnë se duhet të bëjnë gjithçka që vendi ynë të mos bëhet anëtar i NATO-s dhe të mos fillojë negociata me BE-në. Është interesi ynë strategjik që të mos lejojmë të kenë sukses në këtë qëllim. Dhe për këtë arsye kemi nevojë për institucione dhe politikanë të fuqishëm të cilët nuk do të bëjnë kompromis me shtetin juridik.

Mysafiri i Ministres së Mbrojtjes, komandanti i Gardës Kombëtare të shtetit federal amerikan të Vermontit, Gregori Najt, me të cilin ushtria e Maqedonisë ka një bashkëpunim 25-vjeçar, shpreh bindjen se anëtarësimi në Aleancë është i padiskutueshëm, në emër të sigurisë në Evropë.

Gregori Night, komandant i Gardës Kombëtare Vermont: Ne jemi të përkushtuar ta ndihmojmë Republikës së Maqedonisë së Veriut, ta rrumbullakësojë anëtarësimin në NATO, të bëhet pjesë e ekipit, anëtarja e 30-të dhe të ndihmojë në arritjen dhe ruajtjen e stabilitetit në Evropë.

Gjatë më se dy dekadave të kaluara rreth 5000 ushtarë nga ushtria e Maqedonisë janë trajnuar me ndihmën e Gardës Kombëtare të Vermontit, janë mbajtur rreth 400 stërvitje dhe trajnime të përbashkëta. Gjenerali Night tha se do të dëshironte që bashkëpunimi ushtarak në të ardhmen të zgjerohet edhe në nivel civil. Senati Amerikan pritet që së shpejti ta ratifikojë protokollin për anëtarësimin e Maqedonisë në NATO, ndërkohë që këtë e kanë bërë 20 vende të tjera anëtare të organizatës më të madhe ushtarake në botë./ABC News Albania 24/7

marreveshje.jpg
G. P.16:45 | 15/08/2019

Apeli i vendeve të Quint-it që Kosova dhe Serbia të rikthehen në dialog, për analistët në Prishtinë është vetëm tregues i zbehjes së rolit të BE-së në këtë proces dhe forcimit të asaj të Shteteve të Bashkuara dhe Rusisë. Sipas tyre, nën ndikimin e dy superfuqive, çështja e korrigjimit të kufijve do të jetë sërish në tryezë.

Thirrja e vendeve të QUINT-it këtë javë që të rinis sa më shpejt dialogu Prishtinë Beograd me ndërmjetësimin e Bashkimit Evropian e forcon edhe më shumë bindjen e analistëve se kjo çështje nuk do të kalojë në duar të vendeve evropiane si Franca e Gjermania siç pretendonte kryeministri në dorëheqje Ramush Haradinaj.

Për analistin Fisnik Halimi, këtë dialog vetëm formalisht do ta udheheqë Bashkimi Evropian, por do të jetë e sponsorizuar nga Shtetet e Bashkuara të Amerikës dhe do të garantohet nga Rusia.

“Fuqia e Bashkimit Evropian për të arritur marrëveshje të mëdha politike është inekzistente dhe sponsor kryesor do të jetë SHBA-ja e garantuar nga Rusia”, thotë ai.

Ndërsa çështja e korrigjimit të kufijve do të jetë sërish në tavolinën e bisedimeve.

“Çështja e korrigjimit të kufijve nuk është hequr në asnjë moment nga tavolina e bisedimeve. Legjislatura e ardhshme e Kuvendit të Kosovës do të jetë para një akti të kryer për të votuar pikërisht atë marrëveshje”, shprehet Halimi.

Dialogu Prishtinë-Beograd aktualisht është stopuar për shkak të taksës së vënë nga qeveria e Kosovës ndaj produkteve serbe./ABC News Albania 24/7

kosove-3-1280x733.jpg
Sej rie18:30 | 14/08/2019

Kur duhet rreth një javë nga seanca që do të shpërndajë parlamentin, partitë politike kosovare duken të prirura të shkojnë në zgjedhje të vetme. Megjithatë, në vartësi të zhvillimeve, ato nuk i përjashtojnë koalicionet zgjedhore.

Tash kur kanë mbetur edhe më pak se një javë për tu mbajtur seanca e thirrur për shpërndarjen e parlamentit kanë nisur edhe negociatat si dhe deklaratat e ndryshme për koalicione të mundshme parazgjedhore ndërmjet partive politike. Partia Demokratike e Kosovës, sipas nënkryetarit të saj Envej Hoxhaj, programin e saj nuk do ta përziej me askënd. Ai thotë se është e pamundur të ketë koalicion parazgjedhor me partitë e mëdha.

Enver Hoxhaj, nënkryetar i PDK-së: “Ne do të shkojmë në zgjedhje të vetëm. Nuk e përjashtojmë mundësinë për koalicion me ndonjë parti të vogël, por jo me ato të mëdha parlamentare”.

Deputeti nga radhët e LDK-së, Arben Gashi tha se do të ishte mirë që secila parti të garojë e vetme në zgjedhje që të shihet forca politike e secilit subject. Sipas tij, nëse partitë e tjera vendosin të shkojnë në garë me koalicione, atëherë kjo parti nuk përjashton mundësinë e një koalicioni me VV-në.

Sinkron Arben Gashi, LDK:  “Nëse do të kemi koalicione prej partive parlamentare, si AAK-ja, apo PDK-ja që vendosin të bëhen bashkë, normalisht ne kemi mendimin tonë strategjik dhe preferojmë koalicion opozitar”.

Derisa AAK-ja nuk ka vija të kuqe për askënd, por më e përafërt është me Nismën Social Demokrate dhe PSD-në.

Ahmet Isufi, nënkryetar i AAK-së: “Do bashkëpunojmë me ata që janë për shtetin, që bëjnë 100 për qind shtet”.

Shikuar nga praktika e zgjedhjeve të kaluara partitë e mëdha politike presin gjithmonë momentin e fundit për tu certifikuar në KQZ  si koalicione parazgjedhore apo të garojnë të vetme./ABC News Albania 24/7

zoran-zaev-1280x698.jpg
Sej rie17:30 | 14/08/2019

Kryeministri i Maqedonisë së Veriut Zoran Zaev është vënë në qendër të kritikave për shkak se ka etiketuar si homoseksual një gazetar kritik ndaj qeverisë të tij. Shoqata e Gazetarëve ka reaguar duke kërkuar që Zaev të kërkojë falje.

Zoran Zaev, kryeministër i RMV:  “Unë jam Zoran Zaev, kam ardhur falë votës së qytetarëve duke luftuar. Duke luftuar për liri dhe për demokraci, për shtet të së drejtës dhe për sundim të së drejtës, dhe për shtet normal. Unë jam luftëtar dhe do të vazhdoj të luftoj deri në fund. Sigurisht që nuk do të lejoj që disa kriminelë, një gazetar koti dhe i kërkoj falje komunitetit LGBTI një “homoseksual” t’ia rrëzojnë nga pushteti këtë qeveri”.

Fjalë të ashpra në deklaratën e kryeministrit ose defokusim nga rasti “Zhvatja”. Këto janë dilemat kryesore një ditë pas deklaratës së kryeministrit Zoran Zaev, në shënjestër të së cilës ishin protagonistët në rastin për zhvatjen e parave, i cili pret zgjidhje gjyqësore. Shoqata e gazetarëve paralajmëron se në këtë mënyrë nxitet dhuna ndaj punëtorëve mediatikë dhe kufizimi I lirisë së fjalës, duke sugjeruar në autorin e teksteve në të cilat për herë të parë u zbardhën detaje për rastin.

Grafik Shoqata e Gazetarëve të Maqedonisë: “I bëjmë thirrje Kryeministrit Zoran Zaev që menjëherë t’u kërkojë falje gazetarëve, para së gjithash kolegut Branko Geroski, në qoftë se kjo deklaratë i ishte drejtuar atij, dhe në të ardhmen të përmbahet nga diskreditimi i këtillë i gazetarëve”.

Këshilli për etikë në media deklaratën e vlerëson si të pahijshme dhe të papërshtatshme për bartës të detyrës publike.

Grafik Këshilli për Etikë në Media: “Roli i pushtetit në demokraci në asnjë rast nuk d.m.th. përzierje në punën e gazetarëve, ndërsa deklaratat e tilla mund të llogariten si presion I hapur dhe përpjekje për diskreditim publik të profesionit”.

Nga Këshilli për etikë e dënojnë, siç thonë, deklaratën jo-shembullore të kryeministrit me të cilën drejtpërdrejt paragjykohet komuniteti LGBTI në vend. Në reagimin e parë të Uranija Pirovskës, drejtoresha ekzekutive e Komitetit të Helsinkit për të drejta të njeriut, në rrjetet sociale sugjerohet në dyfytyrësi të politikanëve.

Uranija Pirovska, Komiteti i Helsinkit: “Kaq nga pranimi i dallimeve dhe respektimi i tyre! Demagogji e rëndë do të ishte gjithçka që është thënë dhe është bërë më parë!”.

Kryeministri u përpoq të dalë nga situata, gjithashtu nëpërmjet rrjeteve sociale, në Tuiter, ka shkruar.

Zoran Zaev, Twiter:  “Komuniteti LGBTI ka respektin tim. Për këtë arsye, para se t’ia përdorim fjalën “homoseksual” kërkova falje. Këtë fjalë e përdora që të përshkruaj një tipar karakteri, jo të theksoj përkatësi seksuale. Ju kërkoj falje personave LGBTI. Do të luftoj për të drejtat e tyre, siç kam bërë deri tash”.

Për deklaratën e kryeministrit Zaev shkruajnë edhe një pjesë e madhe e mediave në rajon.


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono