Politikë

petrit-vasili.jpg
G. P.21:43 | 13/10/2019

“Mbështetje deri në fund, mbështetje politike dhe njerëzore për heronjtë antidiktaturë të Unazës së Re”.

Kështu e nis reagimin e tij, nënkryetari i Lëvizjes Socialiste për Integrim, Petrit Vasili, pas shoqërimeve të protestuesve të Unazës së Re. Sipas Vasilit, ministri i Brendshëm, Sandër Lleshaj ka zgjedhur që të jetë përfundimisht armik i shqiptarëve të thjeshtë të Unazës së Re.

“Bedeli i Bablokut në Ministrinë e Brendshme Lleshaj zgjedh përfundimisht të jetë një armik i shqiptarëve të thjeshtë te Unaza e Re. Asnjë harresë, asnjë tolerance, asnjë keqardhje nuk do të ketë kurrë për ata si Lleshaj, që urrejtshëm vendosën kundër qytetarëve të thjeshtë.

Këta të pacipë dhe të urryer arrijnë deri aty sa të lexojnë paturpësisht si komunikata të tyre idiotësirat e kriminalizuara që ju dikton fjalë për fjalë Babloku i fshehur. Ta kenë të qartë që Babloku do t’i shesë si një kilogram fiq këta budallenj dhe do t’u lërë pas për gjithë jetën një urrejtje pa kthim te populli”, thotë Vasili./abcnews.al

lulzim-basha.jpg
G. P.21:36 | 13/10/2019

Kryetari i Partisë Demokratike, Lulzim Basha, reagoi pas shoqërimeve të protestuesve tek Unaza e Re.

Në një postim në rrjetet sociale, Basha thotë se sot regjimi i kryeministrit Rama tregoi sa i përkushtuar është ndaj vlerave evropiane, duke arrestuar dhunshëm protestuesit paqësorë.

Prandaj sipas kreut të PD-së nëse më 18 Tetor nga KiE vjen një lajm negativ, shkaku janë ngjarjet si kjo e ditës së sotme.

“Kjo është javë vendimtare për të ardhmen e Shqipërisë, kur do të vendoset nëse do të shkojmë përpara drejt Europës apo do të mbetemi ngecur në marshin indietro. Regjimi i Ramës vendosi ta tregojë sa i përkushtuar është ndaj vlerave Europiane të lirisë së shprehjes dhe sundimit të ligjit, duke arrestuar dhunshëm protestues paqësorë. Nëse lajmet nga Brukseli janë negative, askush mos ta vërë në dyshim, ngjarje si kjo e sotmja janë shkaku. Por ne nuk do ti lejojmë të na mbyllin gojën e të na mbajnë peng, beteja do të vazhdojë pareshtur drejt destinit tonë: Shqipërisë së zhvilluar, të lirë dhe Europiane”, shkruan Basha.

Të paktën 8 persona janë shoqëruar pas përfundimit të protestës tek Unaza e Re këtë të diel. Mes tyre është edhe ish-deputeti i PD-së, Klevis Balliu./abcnews.al

ZGJEDHJET-13-TETOR.mpg_snapshot_00.22-1280x720.jpg
ent ela16:39 | 13/10/2019

Edhe pse e diela e 13 tetorit ishte caktuar nga Presidenti Meta si datë për zhvillimin e zgjedhjeve lokale pas anulimit të 30 qershorit, institucionet dhe politika heshtën. Këtë të dielë edhe vetë kreu i Shtetit zgjodhi të merret me sport, ndërkohë që dyert e Komisionit Qendror të Zgjedhjeve ishin të mbyllura.

Sportivitetit me të cilin u shoqërua e diela në Tiranë, iu bashkuar edhe kreu i shtetit Ilir Meta. Në një video të postuar në rrjetet sociale  Presidenti nuk foli për zgjedhje por u shpreh optimist për të dielën e tij, duke deklaruar se dita është më e bukur kur nis me sport. Por në Tiranën e boshatisur, Presidenca nuk ishte i vetmi institucion që zgjodhi të respektojë ditën e pushimit.

Institucionet nuk iu bindën Presidentit të Republikës për të mbajtur zgjedhje të reja vendore, ndërkohë që opozita me bojktoin e 30 qershorit i hapi rrugë një drejtimi absolute të pushtetit vendor nga socialistët.  Demokratët janë të bindur se ditën që Shqipëria do të mbajë një palë zgjedhje atë ditë do të votohet edhe për kryetarët e rinj të Bashkive. Ndërkohë që maxhoranca luftën e saj politike e ka përqëndruar me personin që zhdekretoi datën kur ata nxorrën shqiptarët në zgjedhje, Ilir Metën. /ABC News Albania 24/7

holanda.jpg
Autor E15:34 | 12/10/2019

Teksa ka nisur numërimi mbrapsht për fatin e negociatave me BE, në Tiranë opozita po hesht kujdesshmëm, ndërsa KM vijon të përgatisë terrenin për JO-në, e cila javën politike që lamë pas, u përforcua edhe nga Holanda e Franca.

Kjo e fundit duket se do penalizojë edhe Maqedoninë e Veriut, një lehtësim politik për Km Rama.

Numërimi mbrapsht ka nisur edhe për Ilir Metën, teksa të hënën Venecia do publikojë Opinionin zyrtar.

Pavarësisht numrave bë kuvend, socialistët nuk kanë situatë të qetë brenda partisë, ndërsa nga Kosova fitorja e Albin Kurtit e Vjosa Osmanit, dukej sinjali i triumfi zgjedhor i të rinjve ndaj establishmentit politik shumëvjecar, një trend i viteve të fundit në Europë.

Po cfarë ndodhi javën politike që lamë pas?

Në një fjalim në Kuvend, kryeministri Rama tha se debati për zgjerimin ose jo të BE-së në politikën e Holandës po bëhet vetëm në kuadër të elektoraktit vendas.

“Besoj se duke ndjekur debatin në Parlamentin holandez, kushdo që dëshiron të kuptojë, ka mundur të kuptojë se të gjitha fjalimet e bëra në Parlament i janë drejtuar elektoratit të atij vendi dhe se në të gjithë qasjen e Parlamentit, apo të partive të ndryshme brenda Parlamentit është përvijuar i gjithë debati i brendshëm me forcat pro zgjerimit, me forcat kundër zgjerimit, me zërat që fuqizojnë mesazhin e nevojës për të vazhduar procesin e zgjerimit dhe zërat që fuqizojnë mesazhin e nevojës për ta ndaluar procesin e zgjerimit”, u shpreh Rama.

Një ditë përpara këtij qëndrimi, ministri i jashtëm i Holandës Stef Blok ishte thirrur në seancë dëgjimore para Komisionit të Çështjeve Europiane të parlamentit holandez mbi qëndrimin e MPJ për Shqipërinë e Maqedoninë e Veriut.

Qëndrimi që i ishte përcjellë parlamentit përmes këtij dokumenti, në të cilin konkludohej se “Shqipëria duhet të bëjë më shumë për të luftuar korrupsionin dhe krimin e organizuar.

Kabineti qeveritar mendonte se është e parakohshme hapja e negociatave tani. Në dokument pasqarohej edhe qëndrimi gjerman me kushtet e bundestagut por pa një vlerësim konkret ndaj tij.

Politika në ABC News ka mësuar se partitë e ekstremit te majtë, ato të ekstremit të djathtë, si dhe partia e koalicionit qeverisës CDA janë shprehur qarësisht kundër hapjes së negociatave me Shqipërinë.

Të vetmit që u shprehën pro gjatë asaj séance në komision ishin Social demokratët dhe Të gjelbrit e majtë.

Këta të fundit sugjeruan që Holanda të bashkohej me qëndrimin gjerman me kushte. Dy ishin pyetjet kryesore që iu drejtuan ministrit Blok.

A qëndron aleanca e vendeve të BE kundër Shqipërisë, si në 2018?

A do pajtohet JO, me kusht e Holandës, me PO, POR… të
Gjermanisë?

Politika në ABC News ka mësuar gjithashtu se së pari ministri Blok ka thënë se i qëndron mocionit të miratuar në dhomën e ulët në qershor kundër celjes së negociatave me Shqipërinë.

Për pyetjen e parë, ai ka pranuar se nuk është i sigurt nëse një aleancë kundër celjes së negociatave, si në vitin 2018 mes Francës dhe Danimarkës qëndron akoma.

Por ka lënë të hapur pozicionin e qeverisë holandeze për pyetjen e dytë, pra njësimin me pozicionin e Bundestag-ut gjerman për Shqipërinë, duke thënë se këtë do ta diskutojë edhe me vendet e tjera anëtare.

Politika në ABC news ka mësuar edhe se edhe dhoma e përfaqësuesve të Parlament ka kërkuar interpelancë me kryeministrin Rutte për qëndrimet e Holandës.

Interpelanca do mbahet të martën e 15 tetorit, pas mbledhjes së ministrave të jashtëm të BE në Luksenburg, ku Holanda do përfaqësohet vetëm me ambasadorin, pasi ministri i jashtëm do jetë në vizitë në Indi.

Nëse do ketë një vendim nga mbledhja e ministrave të jashtëm, Rutte do sqarojë qëndrimin e Holandës aty, e nëse jo, atëherë kryeministri do do të japë llogari në seancë plenare për qendrimin që do mbajë në Samitin e Këshillit Europian si për Shqipërinë ashtu edhe për Maqedoninë e Veriut.

Politika në ABC Neës ka mësuar se ka një lëkundje të qëndrimit të Holandës, jo për të ndryshuar pozicionin ndaj Shqipërisë, por për të mos e bllokuar Shqipërinë nëse Holanda mbetet e vetme në kundërshtinë e saj për hapjen e negociatave./Politika në ABC News/

giuzepe-conte-1280x683.jpg
nev ila13:15 | 12/10/2019

Qëndrimi francez kundër zgjerimit të BE-së mund të ndryshojë nesër, pasi kancelarja Merkel do të takohet me presidentin Macron.  Në linjën e lobimeve për të hapur negociatat, në vendin tonë do të mbrrijë të martën, kryeministri Italian Giuzepe Conte.

Shpresat e Shqipërisë për të marrë javën e ardhshme një “po” nga Bashkimi Evropian nuk janë shuar.

Ato ushqehen ende nga puna që po bëjnë disa nga vendet themeluese të Unionit, të cilat përkrahin hapjen e bisedimeve me Shqipërinë.

E tillë është edhe Italia. Kryeministri Giuzepe Conte do të vijë në Tiranë ditën e martë, dy ditë përpara se BE të vendosë për vendin tonë dhe Maqedoninë e Veriut.

Konte do të takohet me kryeministrin Edi Rama dhe me presidentin Ilir Meta.

Ndërkohë, Mediat gjermane raportojnë se Kancelarja Merkel është duke u përpjekur të bindë vendet skeptike, dhe se po këmbëngul që t’i ndryshojë mendje presidentit francez Emmanuel Macron.

Një takim mes dy liderëve pritet të mbahet këtë të dielë.

Nga ana tjetër, mediat në Paris, shkruajnë se Franca nuk është kundërshtuesja e vetme. Bashkë me të, janë edhe Spanja, Danimarka dhe Holanda./abcnews.al

jorida-tabaku.jpg
Autor E10:55 | 12/10/2019

Ish-deputetja demokrate Jorida Tabaku ka komentuar projektligjin e qeverisë për Korporatën e Investimeve Shqiptare duke theksuar se Kuvendi është kthyer në një noter që firmos dhe vulos çdo gjë që i shkon nga qeveria.

Tabaku shkruan në Facebook, se projektligji për koroporatën kishte shkuar në Kuvend jo nga burime zyrtare duke rritur dyshimet mbi qëllimin e hartimit të tij.

“Siç edhe kuptohet nga projektligji, qeveria ka bërë vetëm disa ndryshime estetike në këtë draft të ri. Shumica e kërkesave dhe vërejtjeve që i janë paraqitur qeverisë dhe mazhoranës nga institucionet serioze si BB dhe FMN nuk janë pasqyruar. Madje Banka Botërore ka kundërshtuar pohimet e mazhorancës në lidhje me projektligjin. Në një letër të drejtuar kryetarit të Komisionit të Ekonomisë dhe Financave ato nënvizojnë se shqetësimet e BB-së për draftin mbeten të pa adresuara”, shkruan Tabaku në Facebook duke theksuar se problemi në lidhje me mandatin e zgjeruar dhe portofolin e madh institucional që ka KISH e cila është edhe manaxhere pronash, edhe pronare por edhe invesitore nuk kanë gjetur rrugëzgjidhje logjike dhe ligjore.

Postimi i plotë
Banka Botërore: Korporata e Investimeve, mandat të gjërë, konflikt interesash dhe risk për buxhetin!

Nuk ka gjë më të rëndë për një shtet se sa shndërrimi i pushtetit legjislativ në një noter që voton dhe firmos çfarë t’i shkojë në mendje qeverisë apo pronarëve të ministrave (pra oligarkëve). Gjithsesi përpara disa ditësh parlamentarizmi shkoi edhe më poshtë, pasi në Komisionin e Ekonomisë dhe Financave u diskutua projekt-ligji i famshëm i Korporatës së Investimeve Shqiptare.

Mirëpo e veçanta e mbledhjes ishte se projektligji në fjalë nuk kish ardhur përmes një rruge zyrtare me protokoll. Jo! Komisioni kish vendosur që të shqyrtonte një projektligj që sekretariati i Ministrisë së Ekonomisë dhe Financave ia ka çuar kryetarit të Komisionit me email. Praktikisht parlamenti, institucioni më i lartë sipas kushtetutës në vend, nuk respekton as vetë rregullat bazë të diskutimeve proceduriale dhe marrjes së ligjeve. Tanimë është normale që qeveria (më saktë oligarkët) të komandojë parlamentin dhe deputetët përmes sekretarëve të ministrive.

Siç edhe kuptohet nga projektligji, qeveria ka bërë vetëm disa ndryshime estetike në këtë draft të ri. Shumica e kërkesave dhe vërejtjeve që i janë paraqitur qeverisë dhe mazhoranës nga institucionet serioze si BB dhe FMN nuk janë pasqyruar. Madje Banka Botërore ka kundërshtuar pohimet e mazhorancës në lidhje me projektligjin. Në një letër të drejtuar kryetarit të Komisionit të Ekonomisë dhe Financave ato nënvizojnë se shqetësimet e BB-së për draftin mbeten të pa adresuara.

Problemi në lidhje me mandatin e zgjeruar dhe portofolin e madh institucional që ka KISH e cila është edhe manaxhere pronash, edhe pronare por edhe invesitore nuk kanë gjetur rrugëzgjidhje logjike dhe ligjore. Sakaq BB vëren me të drejtë se propozimet e qeverisë për të supervizuar, rregulluar apo dhe audituar veprimet e KISH janë shumë të dobëta. Sikundër dhe mungesa e një analize të riskut financiar dhe ekonomik sa i takon borxhit publik.

Shqetësimet e BB janë mëse korrekte dhe parashtrojnë disa pika kyçe të hajdutërisë që po tenton të shndërrohet në ligj nga Parlamenti. I cili, siç dhe u tha nga deputetët, do të votojë brenda dy javësh në favor të projektligjit që vjedh pronat e qytetarëve dhe ua jep oligarkëve. Rruga që kryeministri Rama ka nisur të marrë do të jetë një kosto e lartë që shqiptarët do të mbajnë mbi supet e tyre. Pushteti i oligarkëve është tanimë aq i madh saqë me gjasë projektligjet e radhës do t’i shkojnë komisionit nga sekretaret e oligarkëve në email.

Kjo përbuzje ndaj shtetit dhe Kushtetutës është shembulli më i shëmtuar se si duhet të sillen deputetët e një Parlamenti. Natyrisht këtë ndjesi nuk mund ta kenë deputetë që kanë dalë ose nga paraja e krimit të organizuar apo nga ajo e oligarkëve. Shqipëtarët duhet t’i japin drejtim vendit dhe zgjedhjet e parakohshme janë e vetmja mundësi. Një parlament-noter është ëndrra e çdo trafikanti dhe oligarku madje e çdo qeveritari që shqiptarët i përdor për t’i mjelë kursimet e për t’i ndarë kursimet e tyre me monopolet dhe oligarkët e tenderave.

Prandaj nuk mund të pritet më asgjë, as taksa më të ulëta, as më shumë shërbime, as më pak informalitet, as ligje më të drejta dhe as konkurencë!

Misioni e funksioni i këtij parlamenti ka përfunduar! /abcnews.al/

gazment-bardhiii.jpg
G. P.20:08 | 11/10/2019

Sekretari i Përgjithshëm i Partisë Demokratike, Gazment Bardhi deklaroi se nuk ka pasur asnjë tryezë për reformën zgjedhore të organizuar të enjten dhe ku opozita nuk ka marrë pjesë.

Gjatë një interviste me gazetaren Mirela Milori në televizionin ABC News, Bardhi tha se ajo që u organizuar ditën e djeshme ishte mbledhje e komisionit parlamentar të reformës zgjedhore, diçka që opozita e bashkuar nuk e njeh dhe e konsideron ilegjitime.

“Dje nuk ka patur asnjë tryezë për reformën zgjedhore ku PD të ketë qenë e ftuar. Ka pasur një mbledhje të komisionit parlamentar. Atje marrin pjesë deputetët e Kuvendit. Kuvend që opozita e konsideron jo legjitim dhe të dalë nga zgjedhjet e manipuluara të vitit 2017. Zoti Gjiknuri apo PS është palë në këtë proces dhe është palë e barabartë me opozitën. Qoftë PD, qoftë PS janë aktorë të zgjedhjeve dhe në momentin kur reformohen rregullat e lojës secila prej tyre është e barabartë në trajtimin apo ndërmarrjes së reformës që sjell rregulla të tjera loje. Opozita e ka bërë të qartë qëndrimin që jemi të gatshëm, duke qenë se është prioritet kryesor i vendosur për hapjen e negociatave, që ditën e parë kur kjo çështje u kthye në një kusht të Bundestagut opozita tha se do të japë kontributin e vet në reformën zgjedhore. Si mund të përfshihemi? Duke siguruar barazi mes palëve në këtë proces”, tha Bardhi.

Në të njëjtën studio të enjten, bashkëkryetari i Komisionit të Posaçëm për Reformën Zgjedhore, Damian Gjiknuri deklaroi se Partia Socialiste është e hapur për depolitizim të plotë zgjedhor. Madje ai theksoi se mazhoranca është e gatshme të rishikojë formulën e Komisionit Qendror të Zgjedhjeve.

Për këtë të fundit, sekretari i PD-së tha se opozita është tërësisht dakord pasi janë kapur në shkelje në zgjedhjet e 30 Qershorit. Megjithatë, Bardhi vuri theksin te garantimi i një administrate zgjedhore që i nënshtrohet ligjit.

Sipas tij, edhe ndërkombëtarët janë larguar nga ideja e depolitizimit të plotë dhe flasin për ndryshim të procedurës që propozon administratorët e zgjedhjeve për të garantuar që ata i nënshtrohen në çdo rast ligjit.

“Edhe ne jemi të hapur për të parë të gjitha modelet që garantojnë administratë zgjedhore të balancuar dhe që qëzon besimin e të gjitha palëve sikundër një administratë zgjedhore që i bindet ligjit dhe jo urdhrave politikë. Përsa i përket KQZ është provuar që ky KQZ i zgjedhjeve është në pamundësi për të administruar zgjedhje të lira dhe të ndershme sepse është kapur në flagrancë nga OSBE/ODIHR duke shkelur ligjin, dhe kështu reformimi i KQZ dhe mbajtja përgjegjësi e anëtarëve aktualë për shkeljet gjatë votimeve moniste të 30 Qershorit sigurisht janë kërkesa të opozitës dhe këtu biem dakord. Unë fola për një administratë zgjedhore biem dakord dhe kemi bërë propozimet tona për një administratë zgjedhore që i nënshtrohet ligji. Nëse do të ketë një procedurë të tillë që garanton pavarësi në ushtrim të detyrës nga administrata zgjedhore, kjo është diçka që duhet parë. Gjiknuri është për depolitizimin e administratës zgjedhore, mundësisht propozimi i tij është që ti administronin mësuesit dhe drejtorët e arsimit, por ne i kemi parë si i trajtonte ata në 2016-n. I merrte në telefon dhe i kërcënonte. Këta do e administrojnë zgjedhjet? Kështu do e bëjnë depolitizmin e zgjedhjeve”, tha Bardhi.

Për sa i përket ndryshimit të sistemit zgjedhor, Bardhi tha se ky ka qenë qëndrim i hershëm i kreut të selisë blu Lulzim Basha. Megjithatë, për momentin opozita kërkon që të garantohet leximi i votës së qytetarëve.

“KÇK shkarkohet nga institucionet kushtetuese që quhen komisionet e vettingut. Nëse zotëria do të ngrejë një zyrë në këshillat e ministrave që të identifikojë prokurorët dhe gjyqatrët që hetojnë këtë dhe i shpall, kjo është çështje kundër Kushtetutës dhe akt që tregon identifikimin e të keqes tek të tjerët, kur të keqen e ka tek vetja”, tha Bardhi.  /abcnews.al

gazment-bardhi.jpg
G. P.19:37 | 11/10/2019

Sekretari i Përgjithshëm i Partisë Demokratike, Gazment Bardhi, tha këtë të enjte se Komisioni i Venecias vërtetoi s ePresidenti nuk ka kryer asnjë shkelje kushtetuese dhe nuk mund të shkarkohet nga kuvendi.

“Nuk ka kryer asnjë shkelje dhe nuk mund të shkarkohet nga Kuvendi, kjo tregon që e gjithë veprimtaria e kryer nga Kuvendi ka qenë një tjetër puç institucional për të kapur një nga institucionet e mbetura në vend i pakontrolluar nga qeveria”, tha Bardhi.

Sipas Bardhit, Komisioni i Venecias ngre pikëpyetje të forta mbi iniciativën për shkarkimin e Presidentit të Republikës. Ndërkohë çdo gjë tjetër në lidhje me këtë çështje, Bardhi e konsideron si pjesë të propagandës së qeverisë./abcnews.al

tedi-blushi-1.jpg
G. P.19:36 | 11/10/2019

Presidenca reagoi pas rekomandimit përfundimtar të Venecias duke nënvizuar se në raport thuhet qe Meta pati qëllim të zgjidhte krizën kur anuloi datën e zgjedhjeve. Ndërsa kryeministri publikoi 3 konkluzionet, ku Venecia i cilësonte të vlefshme zgjedhjet e 30 qershorit.

Zëdhënësi i Presidentit, Tedi Blushi akuzoi Taulant Ballën se ka shpërndarë informacione të rreme në Venecia, dhe nënvizoi faktin se opinioni i Venecias i njeh presidentit qëllimin e mirë brenda shtyrjes së zgjedhjeve.

Kryeministri, i cili nuk e mori bekimin e Venecias për të shkarkuar Presidentin e Republikës, rendit ato pjesë të opinionit që lënë në fuqi 30 qershorin.

“Bojkoti elektoral i subjekteve politike, edhe nëse ata përfaqësojnë një pjesë të madhe të votuesve, nuk mund të ndalojnë zhvillimin e zgjedhjeve të rregullta. Përndryshe, këto parti do të pengonin çdo proces zgjedhor. Anulimi i zgjedhjeve dhe më tej shtyrja e tyre cënoi të drejtën e shtetasve për të zgjedhur. Presidenti veproi në mungesë të bazës ligjore kur anuloi zgjedhjet dhe vendosi shtyrjen e tyre pa pasur një kompetencë të tillë në Kushtetutë dhe në ligj”.

Ngelet për tu parë nëse pas këtij raporti Komisioni Hetimor do të vijojë ose jo punën për shkarkimin e presidentit, dhe nga ana tjetër, nëse do të ndryshojë qëndrim Ilir Meta duke filluar me dekretimin e zgjedhjeve të pjesshme në Shkodër./ABC News Albania

edi-rama123-2.jpg
G. P.17:31 | 11/10/2019

Tre janë përfundimet thelbësore që ka nxjerrë Komisioni i Venecias sipas Kryeministrit Edi Rama. Në një postim në rrjetet sociale ai thotë se ato konfirmojnë pa asnjë ekuivok drejtësinë e qëndrimit të Partisë Socialiste para dhe pas zgjedhjeve të 30 Qershorit.

I pari sipas Ramës është se Komisioni i Venecias konkludon se “Bojkoti i subjekteve politike, edhe nëse ata përfaqësojnë një pjesë të madhe të votuesve nuk mund të ndalojë zhvillimin e zgjedhjeve të rregullta. Përndryshe, këto parti do të fitonin mundësinë të pengonin çdo proces zgjedhor”.

“Anulimi i zgjedhjeve dhe më tej, shtyrja e tyre cenoi të drejtën e shtetasve për të zgjedhur”, është përfundimi i dytë që ka parë kryeministri nga raporti.

Më tej, kreu i qeverisë thotë se përfundimi i tretë është se “Presidenti veproi në mungesë të bazës ligjore kur anuloi zgjedhjet dhe vendosi shtyrjen e tyre pa pasur një kompetencë të tillë në Kushtetutë e në Ligj”.

Ndërkohë më herët, zëdhënësi i Presidentit Ilir Meta, Tedi Blushi, tha se kreu i grupit parlamentar të mazhorancës ka dërguar në media një material, i cili nuk tregon në mënyrë të drejtë për raportin përfundimtar të Komisionit të Venecias.

/abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono