Kulturë

gjergj-xhuvani.jpg
G. P.15:24 | 20/08/2019

Kineasti i shquar Gjergj Xhuvani është përcjellë për në banesën e fundit mes lotësh dhe heshtjes. Familjarët kanë zgjedhur që ceremoninë e lamtumirës për njeriun e tyre të dashur, ta bëjnë private.

Të pranishëm ishin familjarë, të afërm, miq dhe studentë të regjisorit.

Regjisori Gjergj Xhuvani la pas filma të rëndësishëm të kinematografisë shqiptare, si “Parrullat”, me të cilin ishte i pari kineast shqiptar që mundi të çojë Shqipërinë në Kanë, në vitin 2001.

Ai u nda nga jeta në moshën 56-vjeçare më 14 Gusht  në Romë, pas një arresti kardiak që ka pësuar teksa po realizonte montazhin e filmit të tij të fundit, “Liqeni im”.

Miku i tij i ngushtë, regjisori Besnik Bisha në një prononcim për Abc News e cilëson një ditë të trishtë përcjelljen për në banesën e fundit te regjisorit Gjergj Xhuvani.

“Nga ditët më të zeza të jetës sime. Erdhi një moshë, po largohen miqtë, shokët. E trishtueshme. Me Gjergjin kemi filluar një karrierë shumë të përbashkët që asistentë të. Kemi filluar njëkohësisht të bëjmë filma. Kemi qenë pedagogë që ditën e parë në Universitetin e Arteve dhe deri para një muaji që ka qenë kontakti i fundit. Jetë plot kujtime, plot të mira dhe të këqija. Është një ditë e trishtueshme besoj jo vetëm për mua, por për të gjithë miqtë e tij. Një ditë e trishtueshme edhe për të gjithë artdashësit. Gjergji ka qenë një krijues i vrullshëm, me një aktivitet filmik të vrullshëm”, tha Bisha./ABC News Albania 24/7

TT-1.jpg
G. P.16:19 | 19/08/2019

Fatmir Terziu njihet më shumë për krijimtarinë letrare dhe studimore, por  vitet e fundit kinemaja zë një vend të rëndësishëm. Filmi “Lapsi dhe kompjuteri”  u vlerësua me çmime si dhe rrëmbeu vëmendjen e BBC duke u shfaqur në ekranin e gjigandit mediatik.

Fatmir  Terziu  përveçse është pedagog në London South Bank University dhe autor i disa veprave letrare prej vitit 2007 ai i është dedikuar edhe filmit me metrazh të shkurtër. Dy filmat e Terziut “Windy Corner” dhe “ Clouds of Smoke” janë përzgjedhur nga British Cuncil Art dhe janë prezantuar online në mesin e filmave  britanikë dhe filmkrijuesve të këtij vendi.  Filmi “Pencil and Computer” ështe vlerësuar me çmime në festivale ndërkombëtare si dhe është shfaqur nga BBC.

Së fundmi është duke punuar për realizimin e “Djallit të Argadasit” në film. Letërsia dhe kinemaja janë si dy anë të medaljes për Fatmir Terziun. Fokusi i tij në kinema është rreth temave sociale dhe problematike. Fatmir Terziu ka realizuar mbi 10 filma me metrazh të shkurtër dhe dokumentari “Clouds of Smoke” (Retë e tymit) është përzgjedhur nga Festivali i Filmit të Pavarur në New York 2007./ABC News Albania 24/7

memoriali.jpg
G. P.17:35 | 18/08/2019

Të internuarit në diktaturë nuk harrojnë që çdo vit të mblidhen tek memoriali në Lushnje. Por disa grave që kanë përjetuar dramat në atë periudhe nuk u ka pëlqyer prezenca e disa socialistëve.

Të mbijetuarit e kampeve të internimit  u mblodhën në memorialin kombëtar të internim-dëbimeve ngritur në qytetin e Lushnjes. Për ish të internuarit dhe pasardhësve të tyre u çel një ekspozitë fotografike me materiale arkivore nga persekutimi komunist në zonën e Lushnjes.

Për herë të parë u bë publike dosja me materialet e përgjimit të përdorura ndaj njerëzve nga komunistët dhe albumi me fotografi për personat që u arratisën nga Shqipëria.

Në takim u mbajtën fjalime nga përfaqësuesit e pranishëm të ardhur nga Tirana, por edhe nga bashkia. Pak pas fillimit  nga salla u ngritën disa gra që kanë qenë të internuara në Lushnje, të cilat kërkonin largimin e deputetit Bashkim Fino. Ato e quanin hipokrizi, prezencën e Finos në këtë aktivitet. Pas debateve dhe ngritjes së zërave një pjesë e të pranishmeve braktisën sallën. Gjithashtu edhe kryetari i Bashkisë Lushnje, Fatos Tushe u largua nga salla sapo nisën debatet.

Uran Kostreci, ish i dënuar politik, Simon Mirakaj anëtar i Autoritetit të Dosjeve madje dhe vetë Bashkim Fino, e cilësuan ngjarjen si traumë psikike e shkaktuar nga regjimi komunist ndaj këtyre personave.

Një pjesë e historisë së 13 kampeve të internimit ne Lushnje është sjellë nëpërmjet kësaj ekspozite fotografike me shtëpitë e ndërtuara sidomos në Savër, kryeqendra e familjeve intelektuale shqiptare./ABC News Albania 24/7

kanina-ne-feste.jpg
G. P.16:30 | 16/08/2019

Në Vlorë është organizuar festa e Kaninës. Banorë e turistë të shumtë kaluan natën duke u argëtuar me këngë e valle të zonës.

Fshati që qëndron si ballkon mbi Vlorë, Kanina në festë. Përqendruar në kala në një nga zonat më të mrekullueshme dhe historike të Vlorës, mblodhi banorë të fshatit si dhe turistë.

Këngë dhe valle të zonës ishin repertori i koncertit. Të pranishmit u argëtuan me ritmet e muzikës popullore vlonjate, këngë polifonike etj.

Qyteti i Fortifikuar i Kaninës është ngritur aty nga shekulli i IV p.e.s. Kalaja u rindërtua nga Perandori Justinian në shekullin V, kurse rëndësia e saj u pa veçanërisht gjatë rezistencës së shqiptarëve të udhëhequr nga Skënderbeu ndaj pushtuesve turq.

Vendorët janë përpjekur në çdo kohë të tregojnë e ta paraqesin Kaninën si pikën më të fortë të Vlorës. Një resurs që ka joshur shumë të huaj, turistë e vizitorë ditorë. Një fshat për të cilin është shkruar aq shumë dhe shumë pak është treguar./ABC News Albania 24/7

promovime-ekspozita.jpg
G. P.15:30 | 16/08/2019

Ekspozita “Mbro dhe promovo” prezanton punimet e 10 fotografëve të rinj shqiptarë e të huaj në kangjellat e Presidencës. Organizatorja Ilda Mare thotë se qëllimi kryesor është promovimi i trashëgimisë kulturore dhe historike të Shqipërisë nga syri i të rinjve.

Për vitin e 3 radhazi konkursi i fotogtafisë “Mbro dhe promovo”, sjell monumentet arkeologjike dhe historike nga syri i të rinjve shqiptarë dhe të huaj. Organizatorja e këtij konkursi, Ilda Mara, teksa flet për interesin e madh të të rinjve jep edhe arsyet pse kanë zgjedhur institucionin e presidencës për këtë ekspozitë.

Megjithëse janë përzgjedhur nga një juri profesionale 10 prurjet më të mira, si fotografia fituese është shpallur “Sarda mesjetare shqiptare”, e studentit  polak të arkeologjisë Michal Pisz.

Syri i këtyre të rinjve ka pikasur larmi të monumenteve te ndryshme shqiptare nga veriu në jug, që nga kalaja e Gjirokastrës, Kullat e Veriut apo të Jugut edhe kalaja e Lezhës,  parku i Butrintit apo Apolonia.

Janë të shumtë kalimtarët apo turistët e huaj të cilët ndalojnë dhe kundrojnë bukuritë shqiptare të pasqyruara në këto fotografi.

Ekspozita do të qëndrojë e hapur deri në fund të Gushtit në kangjellat e Presidencës, për të rrugëtuar më pas edhe në qytetin e Shkodrës, në kalanë e Beratit dhe pazarin e Gjirokastrës./ABC News Albania 24/7

oriku-1280x715.jpg
Sej rie13:15 | 10/08/2019

Teatër, muzike, balet në një vend mistik tepër origjinal siç është Fontana në qytetin antik të Orikut.

Pjesëmarrësit ishin si rrallë herë në parkun arkeologjik.

Oriku u duk magjik nën tinguj e muzikës që depërtonte në natyrë.

Aktori Alexandros Memetaj lindur në Vlorë, i cili jeton në Itali me natyralitetin e tij interpretoi një monolog të krijuar nga vetë ai.  Ua dedikoi të gjitha nënave shqiptare.

Kurse, muzika e krijuar për këtë event nga kompozitori Aulon Naçi i ngjizej harmonisë se natyrës dhe lëvizjeve të balerinit Errik Nour. I ardhur nga Greqia performoi për herë të parë në vendlindje.

Regjisori Neritan Mehmetaj, i cili kishte organizuar dhe realizuar në detaj skenat e monologut së bashku me ndërthurjet muzikore tha se  një event i tillë është i rrallë për vendin e bukur te Orikut.

Muzikantët e talentuar, Ardita Bufaj pianistja e mirënjohur vlonjate së bashku me kuartetin  e harqeve i përbërë nga Dejon Bendaj, Vilson Guri, Albana Kola dhe Enea Nushi, fizarmonikë Elton Balla, perkusion Mirjan Sulovari, i dhanë skenës një atmosfere tepër origjinale duke bërë së bashku artin e bukur të muzikës, teatrin dhe baletin./ABC News Albnia 24/7

aktori-1280x716.jpg
Sej rie15:30 | 04/08/2019

Teatri i ri Kombëtar sipas aktorit Helidon Fino duhet të ndërtohet aty ku është.  Godina aktuale thotë aktori është amortizuar dhe atyre i është dashur të interpretonin në kushte të vështira.

Zërave pro ndërtimit të një Teatri të ri Kombëtar i është bashkuar dhe aktori Helidon Fino.  Aktori tregon se shpesh i është dashur të interpretojë në kushte të vështira për shkak të amortizimit të godinës aktuale.

“Në shtator bëj 24 vjet në teatër që do të thotë 24/24 orë dhe e kam shoqëruar këtë institucion në të gjitha mënyrat në aktivitetet artistike, në momente të ndryshme politike sidomos dhe në momentin kryesor të përfolur që është godina, e cila ka ardhur në një moment amortizimi total ku unë të paktën vitet e fundit sjell në memorje interpretimet e mia në skenë në -2 gradë dhe në 40 gradë, dhe kjo është fakt dhe është absolute. Mendoj dhe për të gjithë komunitetin sigurisht që nuk më ka pëlqyer ndërhyrja e politikës për këto ndarje të komunitetit sepse kur hyn politika ndan edhe një familje në dysh dhe jo më një komunitet dhe një komb”.

Helidon Fino mendon se Teatri i Ri Kombëtar duhet të ndërtohet në territorin e tij dhe kjo duhet të ndodhë sa më shpejt.

 “Kërkesa dhe kauza jonë është që Teatri Kombëtar duhet të ndërtohet i ri në territorin e vet që i takon, në sipërfaqen që i takon, në të gjithë parametrat bashkëkohor që i takojnë dhe është përgjegjësia e qeverisë që ta kryejë këtë sa më shpejt dhe jo më vonë jo vetëm për faktin që kanë kaluar mjaft vite 10-20 vjet me këtë diskutim, por mos të kalojnë dhe 18-20 vite të tjera sepse në këto diskutime dhe mundësi të vjetra duket sikur edhe brezat do t’i vjetrojnë para kohe. Është e nevojshme absolutisht dhe është një moment vullneti politik, por besoj edhe kombëtar dhe i komunitetit, që teatri të ndërtohet sa më shpejt aty ku është në sipërfaqen e vet ku i takon me të gjitha parametrat”.

Fino gjithashtu thotë se qeveria duhet të vërë në dispozicon të artit dhe kulturës një buxhet më të madh që aktorët sipas tij të mos interpretojnë me gjysma skenash apo gjysma kostumesh./ABC News Albania 24/7

muzeu.jpg
G. P.16:13 | 01/08/2019

Një prej burgjeve të kohës së komunizmit në Shkodër, i cili prej vitesh ka shërbyer edhe si komisariat policie është shndërruar në muze, si vendi i dëshmisë dhe kujtesës së diktaturës.    

“Muzeu i dëshmisë dhe kujtesës” është  i vetmi burg i mbijetuar gjatë periudhës komuniste. U ngrit në Shkodër pas luftës së dytë botërore deri nga mesi i viteve 60-të të shekullit të kaluar. Përgjegjësi i Muzeut tregon se në Shkodër kanë ekzistuar shume burgje, të përkohshme, por edhe disa që kanë qëndruar për një kohë të gjatë.
Vizitorët janë të shumtë. Shqiptarë që jetojnë jashtë vendit, ata që fëmijëve duan t’u tregojnë historinë.

Muzeu pasurohet me dëshmi, dokumente. Një punë e vazhdueshme dhe  bashkëpunimet për pasurimin e arkivës së muzeut, i cili në vitin 2014 është hapur për vizitorët vazhdojnë. Në Shkodër ka pasur rreth 13 burgje. Gjurmët e tyre ekzistojnë ende në qytet. Kurse qelitë e këtij burgu kanë qenë hapur deri në vdekjen Marie Tucit, apo Dom Mikel Beltoja, por edhe At Zef Pllumit.

Nga viti 1945, ky objekt pronë e etërve Franceskan e deri në vitin 1992 ka shërbyet si dega e punëve të brendshme të Shkodër. Me ndryshimet politike në vitin 1992 deri në vitin 1997 ka shërbyer si Komisariat i Policisë në Shkodër, për tu rikthyer si pronë Provincës franceskane të Shqipërisë. Kurse në vitin 2005 nisi puna për rikthimin në një muze në respekt të personave që vuajtën nëpër burgjet komuniste./ABC News Albania 24/7

heroglife.jpg
G. P.15:15 | 01/08/2019

Një shkëmb me simbole që dyshohet se përkasin mbi katër mijë vjet më parë është gjetur në Fan të Mirditës. Priten ekspertët Agjencisë së Shërbimit Arkeologjik për të saktësuar nëse kemi të bëjmë vërtetë me dëshmi të kësaj periudhe.

Një gur mbi të cilin shihen të gdhendura mbishkrime të pakuptimta për kohët e sotme u gjet në Xhuxhe të Fanit në Mirditë, gjatë punimeve për hapjen e një shtegu. Shkëmbi që tërhoqi menjëherë vëmendjen e punëtorëve për shkak të simboleve ndodhet mes pyllit dhe askush nuk di të shpjegojë ekzistencën e tij.

Por dyshohet se janë fakte nga periudha të largëta të prehistorisë mbi katër mijë vjet më parë. Punimet u ndërprenë menjëherë dhe ne zonë shkuan autoritetet vendore. Administratori i Fanit, Kolin Marku ka njoftuar specialistët e fushës për të analizuar rastin.

Kurse Drejtori i Kultures në Bashkinë Mirditë, Gjergj Marku, është i bindur se zona ku u gjet guri ka vlera historike e kjo e referuar edhe nga ky zbulim i rastit.

“Gjetja e këtij guri e çon historinë e banimit në këtë vend e çon shumë më në lashtësi. Dihet që në zonën e Mirditës të shënuar në prehistori janë piktogramet e Rubikut që sot janë monument i kulturës dhe janë pjesa më e vizitueshme. Uroj që këto të jebë të asaj periudhe, nga prehistoria. Imazhet shkëmbore janë librat e parë natyrorë për të cilat është shkruar atë kohë. Është shkruar siç ishte dhe muzika prehistorike. Ky është një nga atraksionet më interesante nëse del ose zbulohet në cilësi dhe detaje e cilës periudhë prehistorike është”.

Specialistët e Agjencisë së Shërbimit Arkeologjik do të shkojnë në Xhuxhe për të verifikuar e analizuar këtë zbulim si dhe për të identifikuar se për çfarë bëhet fjalë. Nëse vërtetë do të kemi të bëjmë me dëshmi të periudhës neolite, Mirdita, i shtohet hartës së zbulimeve këto 30 vitet e fundit.

Vendbanime të kësaj kohe janë gjetur në Maliq, në Cakran, në Vashtemi, në Burimas, në Podgorie, në Barç e në Dërsnik të rrethit të Korçës, në Kamnik të Kolonjës, në Blaz e Nezir të Matit, në Gradec e në Cetush të Dibrës, në Kolsh të Kukësit, në Rrajcë e në Rashtan të Librazhdit etj./ABC News Albania 24/7

KRIJOHET-UET-PRES-CLUB.mpg_snapshot_00.19-1280x720.jpg
ent ela21:40 | 31/07/2019

Në prag të 15 vjetorit të krijimit të UET Press, Instituti Europian Pashko dhe Universiteti Europian i Tiranës kanë zhvilluar takimin e parë të UET Press Club. UET pres në gati 15 vite numëron mbi 500 libra të botuar me rreth 200 autorë.

Deri pak kohë më parë, blihej libri dhe më pas flitej për të. Ndërsa sot,  flitet për librin e më pas shitet. Si pararendës të ndryshimeve të fundit në botën e Internetit, u krijua “UET Press Club” me 25 shkrimtarë të njohur të letrave shqipe.

Kreu i bordit të administrimit të UET pres, Henri Çili tregon se në 15 vite numërohen mbi 500 libra të botuar me rreth 200 autorë.

Ky ishte takimi i parë që UET Press Club zhvilloi me anëtarët e tij, ndërsa takimet e radhës u lanë pas muajit shtator. /ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono