Kryesore

daci-1-1280x633.jpg
in a17:32 | 16/11/2019

Ka nisur mbrëmjen e sotme protesta te “Unaza e Re”, ku banorët janë bashkuar sërish për të protestuar në mbrojtje të kauzës së tyre.

“Ne shtëpitë tona do t’i mbrojmë, do të vazhdojmë rezistencën, kriminelët që dhunuan banorët duhet të dalin para drejtësisë”, shprehen banorët.

I pranishëm në protestë është edhe Sekretari i Përgjithshëm i LSI-së, Endrit Braimllari . Braimllari shprehet se Edi Rama e ka shkatërruar sistemin e drejtësisë.

“Edi Rama nëpërmjet ushtarëve të tij kërkon të kapë Gjykatën Kushtetuese sepse kështu nuk do të ketë hetim për Unazën e Re dhe do të thellojë më tej projktligjet e tij kriminale”, tha Braimllari.

Protesta po zhvillohet e qetë, banorët shprehen se nuk do të heqin dorë dhe do të dënojnë rëndë dhunën e ushtruar, gjithashtu i bëjnë thirrje qeverisë dhe kryebashkiakut Veliaj se nuk do të heqin dorë nga e drejta e tyre.

Sipas banorëve 83 banesa pritet që të shemben nga IKMT në ditët në vijim, raporton për abcnews.al gazetarja Glidona Daci.

/abcnews.al

POLITIKA-NE-ABC-NEWS-KUSH-PO-E-KAP-GJYKATEN-KUSHTETUESE-1280x720.jpg
ent ela16:26 | 16/11/2019

Besimi publik tek Gjykata Kushtetuese u lëkund nga akrobacitë politike me emërimet e kandidatëve për gjykatën më të lartë të vendit. Një përplasje në dukje institucionale, por që nxori në pah ambicjet e njohura për dominim politik në kapërcim të ligjit. Mimoza Koçiu na sjell këtë dinamikë plot dritëhije, të javës politike që lamë pas. Ndjekim Politika në ABC News.

Historia po përsëritet me konfliktin institucional President-Mazhorancë, që rikthehet pas 4 muajsh, njëlloj si në fillim qershorin e 2019, kur Presidenti anulloi datën e zgjedhjeve vendore, e KQZ nuk e konsideroi dekretin, duke u mbështetur në një rezolutë që nxori parlamenti. Katër muaj më vonë, kur procesin e zgjedhjes së anëtarëve të Gjykatës Kushtetuese, dy emra u shpallën fitues për të njëjtin vend, që i takonte kreut të shtetit, një nga Presidenti e një nga KED, mazhoranca po përmes një rezolute, i kërkoi GJK, që të mos njihte dekretin e Ilir Metës për Marsida Xhaferllarin. Për herë të parë një gjyqtar i shpallur kushtetues nga KED, Arta Vorpsi, shkoi të betohej para një noteri, e po për herë të parë presidenti Meta e artikuloi vullnetin për të shpërndarë parlamentin. Mbresues mbeti niveli i energjive të shpenzuara nga aktorët vendimmarrës për këtë cështje.

Po çfarë ndodhi javën politike që lamë pas?

Afro dy vjet pa Gjykatë Kushtetuese, ringritja e saj po shoqërohet me konflikte institucionale. Aktualisht detyrimin kushtetues për të propozuar nga 3 anëtarë, po e përmbushin vetëm presidenti e parlamenti, e jo GJL e cila ende nuk është ngritur. Këtë proces sipas ligjit e rregullon KED, institucioni që administron kandidaturat, që u shkojnë institucioneve që shpallin vakancat. KED bën vlerësimin e përmbushjes së kushteve për kandidim dhe profesionalizmin, si dhe u dërgon institucioneve, në këtë rast Presidentit e Kuvendit, renditjen e kandidatëve të vlerësuar prej tij. Kushtetuta saktëson një rend punë në procesin e përzgjedhjes, të parin presidentin, të dytin parlamentin, e këshu me rradhë deri në shterrimin e vakancave. Të dy institucionet kanë një afat 30 ditor për të zgjedhur, Presidenti e ka detyrim me ligj, kurse Parlamenti, detyrim me Kushtetutë.

Ishte Presidenti i pari që akuzoi kreun e KED Ardian Dvorani se nuk respektoi radhën e institucioneve, duke i imponuar presidentit zgjedhjen e dy kandidatëve njëri pas tjetrit, pa pritur kuvendin, sic e parashikon Kushetuta. E madje këtij të fundit i kishte dërguar kuvendit listën me të njëjtët emra si të Presidentit, por më vonë. Presidenti e kishte zgjedhur anëtarin e vet të parë, Besnik Muçin, e kërkonte që edhe parlamenti të bënte zgjedhjen e tij të parë, në mënyrë që më pas presidenti të zgjidhte kandidatin e dytë e sërish parlamenti pas tij. Me këtë arsyetim Presidenti i kërkoi publikisht KED stopimin e procesit, që do stoponte edhe afatin e tij 30 ditor, deri sa kuvendi të bënte zgjedhjen e vet. Ndërsa presidenti priste kuvendin, ky i fundit caktoi që seanca plenare të bëhej pasi kreut të shtetit t’i skadonte afati. KED publikoi në FZ renditjen e kandidatëve që i kishte çuar presidentit, që me skadimin e afatit 30 ditor, konsideronte automatikisht fituese, kandidaten e renditur të parën, Arta Vorpsin.

Para seancës plenare ku kuvendi do votonte për dy kandidatet e mbetura në listë, Presidenti përmes një mesazhi në FB i kujtonte deputetëve se përzgjedhja e anëtarëve ka një rradhë të përcaktuar dhe Kuvendi duhet të bëje detyrën, ashtu siç përcaktohet në Kushtetutë. Por mesazhi i tij nuk u dëgjua dhe kuvendi i votoi të dy kandidatët e vet, të dy emrat që kishte në listë Elsa Toskën e Fiona Papajorgjin me nga 105 vota pro.

Kryeministri Rama u shfaq vetëm në momentin e votimit, për t’u larguar edhe unë pas tij. (efekt)Ilir Meta u gjend para faktit të kryer, pasi teksa priste radhën e Kuvendit, pa shprehur kundërshtim për të vazhduar përzgjedhjen, zgjedhja e tij ishte bërë automatike, sipas KED. Kundërpërgjigja e Metës ishte shpërfillja e emërimit të Arta Vorpsit dhe dekretimi i Marsida Xhaferllarit, emri i fundit në listën me 4 emra të KED. Në sqarimin para gazetarëve, epiteti mafioz ishte më i përdoruri nga kreu i shtetit, si për kreun e KED ashtu edhe për mazhorancën.

Por Presidenti nuk shpjegon se përse vetë nuk respektoi afatin 30 ditor që i njihte ligji. Njëlloj edhe Ardian Dvorani nuk sqaron se përse ka shmangur këtë radhë kushtetuese të institucioneve për emërimin e gjyqtarëve kushtetues, por flet vetëm për detyrime të institucioneve të tjera.

“KED ka ezauruar të gjitha procedurat e verifikimit, vlerësimit dhe të renditjes së kandidatëve për të gjitha vendet vakante. Cilido autoritet tjetër, përfshirë organet e emërtesës, kanë detyrimin të respektojnë vendimet e KED në këtë proces. Prandaj, ato janë të detyruar t’i përmbahen listave të publikuara përsa i takon renditjes dhe përbërjes së tyre, në këtë rast të dërguara Presidentit dhe Kuvendit”.

Ky është momenti kur nis loja e nervave me kohën. Presidenti bën të ditur se do zhvillojë ceremoni betimi vetëm për gjykatës që i konsideron në përputhje me kushtetutën.

Perceptimi se mos presidenti nuk do bënte ceremonitë e betimit për dy anëtaret e GJK të zgjedhura nga Kuvendi, solli alarmim të mazhorancës, që si zakonisht, mbështetje ka numrat në kuvend

Por për rastin e Arta Vorpsit, nuk përfshihej dot Kuvendi, duke qenë se ajo ishte pjesë e vakancave të kreut të shtetit, që nuk e njihte si zgjedhje.

Zgjidhja ishte edhe më kreative sa ajo e KQZ në qershor 2019. Mëngjesin e të enjtes, gjyqtarja e renditur e para nga KED dhe e shpallur automatikisht fituese për në Gjykatën e Lartë, bëri një betim vullnetar tek një notere, duke anashkaluar si kushtetutën ashtu edhe presidentin. Formula e betimit në deklaratën që e kishte përpiluar vetë Vorpsi, ishte ajo e parashikuar në betimin para presidentit, por një të tillë e me dorën në kushtetutë, nuk kishte patur, të paktën jo para noteres, edhe pse Vorpsi garantonte me firmë për atë akt.

Veprimi i noteres u mbështet edhe nga dhoma kombëtare e noterëve.

Por ç’ka noterja apo kryetarja e dhomës së noterëve nuk thonë është se noteri nuk është një procedues kaq mekanik në punën e tij, pasi ligji u njeh edhe detyrime e përgjegjësi. Ato janë të qarta në ligjin për Noterinë në germën o të nenit 62 të tij

“Noteri refuzon kryerjen e veprimeve ose akteve noteriale në rast se dokumentacioni i paraqitur nga pala kërkuese nuk është i plotë; objekti ose përmbajtja e tyre është në kundërshtim me ligjin dhe parimet e përgjithshme të së drejtës, ose në raste të tjera ku noteri krijon bindjen personale se veprimi ose akti noterial i kërkuar është fiktiv”.

A konsiderohet vallë akt fiktiv mungesa e betimit për të cilën vetë Vorpsi kishte nënshkruar?

Kreu i shtetit e trajtoi me ironi përmes zëdhënësit, ndërsa qeveria u kujdes të përcillte në media se procedura e Vorpsit ishte e rakorduar me partnerët ndërkombëtarë, e në mbështetje të një rekomandimi të Venecias, që i cilëson betimet si akte të thjeshta ceremoniale. I dha zë edhe KM Rama.

Pas pohimeve të Kryeministrit, pikëpyetja është edhe më e fortë: përse vallë qeveria duhet të impenjohej për një vakancë që i takon një institucioni tjetër, në këtë rast Presidenti?

Për një jurist si Ylli Manjani, ish ministër drejtësie, betimi i Arta Vorpsit para një notereje, thyen çdo logjikë normale.

Në të njëjtën linjë u duk edhe nënkryetari i KQZ-së, juristi Denar Biba. I zgjedhur nga socialistët, ai e vlerësonte jo serioze situatën dhe e konsideronte një shfaqje të njëanshme të vullnetit të gjyqtares. Thjesht mund të merret me mend se përse nënkryetari i KQZ nxitoi që ta fshinte atë qëndrim një orë më vonë.

Por pavarësisht rezervave të presidentit dhe opozitës, ndërkombëtarët përshëndetën votimin e dy anëtareve të reja të GJK nga kuvendi. E para ambasada amerikane, sipas të cilës me atë votim Shqipëria shkon përpara në ringritjen e Gjykatës Kushtetuese, një organ jetësor për llogaridhënien dhe ekuilibrat demokratikë. Në të njëjtën linjë edhe BE edhe ambasada Gjermane, ndërsa ngritja e gjykatës kushtetuese është kushti i parë i Bundestagut. Dukshëm ndërkombëtarët po nxisin finalizimin e një procesi që kanë financuar e mbështetur vetë prej vitesh.

Për ish presidentin Sali Berisha, vendit i bëhet dëm kur nxitet shkelja e kushtetutës

Presidenti Meta ishte më i ashpër e foli për diplomatë të korruptuar

Ilir Meta thirri për betim tre anëtare të Gjykatës Kushtetuese, dy të emëruar nga kuvendi e një prej tij. Edhe radha e betimit reflektonte qëndrimin e Metës se kushtetuta impononte një rend mes Presidentit e Kuvendit. Mbrëmjen e të enjtes, bënë betimin me dorën mbi kushtetutë Elsa Toska, Marsida Xhaferllari dhe Fiona Papajorgji, në një ceremoni solemne ku ishin ftuar edhe dy antarët e tjerë të GJK, Vitore Tusha e Besnik Muci, si dhe sekretari i përgjithshëm i kësaj gjykate.

Por edhe mazhoranca po bënte lëvizjen e vet. Thirri në seancë të jashtëzakonshme kuvendin. Synimi: miratimi i një rezolute ku i bëhej thirrje Gjykatës Kushtetuese, njëlloj si në qershor KQZ-së, që të mos njihte dekretin e presidentit për zgjedhjen e Marsida Xhaferllarit. Rezoluta e Kuvendit nuk ka fuqi detyruese mbi një organ të pavarur, por socialistët e bënë lëvizjen e tyre. Seanca kishte tipare formaliteti, pasi nga deputetët pritej thjesht vota e jo mendimi. Kreu i grupit socialist paraqiti rezolutën, kurse KM përdori fare pak nga 70 minutat që i ishin lënë në dispozicion, por pavarësisht epiteteve, mungoi agresiviteti i zakonshëm.

Nuk iu referua procedurës së nisur për shkarkimin e Metës, por si masë reaguese paralajmëroi kufizim me ligj të kompetencave të presidentit.

Ilir Meta e ka të qartë se me numrat që ka në kuvend, Edi Rama mund të bëjë çfarë të dojë, edhe ta kufizojë në kompetenca. Në fakt në më pak se 100 minuta, miratoi lehtësisht një rezolutë kundër Metës, me një shumicë përtej asaj kushtetueses, me 97 vota. Kundërpërgjigja ishte paralajmërimi për një akt drastik: shpërndarjen e parlamentit, edhe pse i mungon ajo kompetencë e qartë.

Deputetët socialistë nuk e lexuan me alarm.

Sytë e të gjithëve tani ishin tek GJK, aty ku mëngjesin e të premtes u paraqit edhe Arta Vorpsi, e betuar tek noterja, edhe Marsida Xhaferllari e dekretuar e betuar tek presidenti. Vorpsi që nuk disponon një dokument emërimi si anëtarët e tjerë të Gjykatës Kushtetuese, u kishte kërkuar anëtarëve, që ta validonin zgjedhjen e saj. Trupa tani katër anëtarëshe, ishte njohur edhe me rezolutën e parlamentit dhe përmes një njoftimi në faqen zyrtare, bënin të ditur se nuk kishin kuorumin e duhur, për të marrë një vendim. Por me fjalinë e fundit, i jepej përgjigje dilemës se mes Vorpsit e Xhaferllarit, kjo e fundit ishte anëtarja e re e GJK, pasi kishte bërë betimin tek presidenti.

“Gjykata Kushtetuese si një institucion i pavarur, duke zbatuar Kushtetutën dhe ligjin e saj organik dhe legjislacionin në fuqi, si dhe praktikat administrative të ndjekura ndër vite, me qëllim sigurimin e kushteve normale për mbarëvajtjen dhe mirëfunksionimin e veprimtarisë së saj, është duke ndërmarrë të gjitha hapat e nevojshme administrative formale për fillimin e detyrës së tri anëtarëve të rinj, pas betimit të tyre para Presidentit të Republikës”.

Të ishte vallë kjo pritshmëri arsyeja shtyrjes nga presidenti të konferencës së tij për media? Ta kishte qetësuar ai vendim kreun e shtetit, që nuk foli më për shpërndarje të parlamentit? A i kishte ndryshuar objektin e asaj, që ishte njoftuar si konferencë e jashtëzakonshme për shtyp, ai qëndrim i GJK? Në daljen e tij Ilir Meta njoftoi se të hënën do depozitonte padi penale për kreun e KED për shpërdorim detyre dhe përvetësim të titullit apo detyrës shtetërore. Energji të pamata që mori procesi i qartë kushtetues i ngritjes së GJK kontrastoi javën politike që lamë pas, me pamjet e përplasjes së banorëve të Unazës së re me policinë, gjatë aksionit të IKMT për prishjen e 38 ndërtimeve. Gaz lotsjellës, lëndime nga dy palët dhe rritja e numrit të procedimeve penale për banorët në protestë prej një viti, kontrastuan me impenjimin e policisë për të negociuar vetëdorëzimin e kujt me vendim gjykate në mungesë, duhej të arrestonin, ish kryebashkiakun e Vorës.

Po aq fort kontrastoi edhe konstatimi zyrtar i FMN që e rendit Shqipërinë të 102 në botë, e ndër të fundit në rajon, sa i perket te ardhurave per fryme me 5.37 dollare.

“Pasqyra ekonomike globale, tetor 2019, tregon se të ardhurat e pritshme për frymë të shqiptarëve për këtë vit janë 5.37 dollarë. Nivel i ngjashëm ky me Irakun, Libanin, Libinë etj. Sai përket të ardhurave më të ulëta ndër shtetet europiane na e kalon Kosova me 4.44 dollarë për frymë e Moldavia që mban vendin e 128. Më të pasurit në rajon janë fqinjët e Malit të Zi. Të ardhurat e tyre për frymë janë 62% më të larta se të shqiptarëve, 8.703 dollarë. Pas tyre renditen serbët me 7.39 dollarë për frymë dhe Maqedonia e Veriut me 6.096 dollarë për frymë.

Situata nuk duket se do përmirësohet, të paktën sipas oponencës që i bën buxhetit të qeverisë për 2020, ish ministri i financave.

Një panoramë edhe më shqetësuese solli javën politike që lamë pas, Istituti i statistikave, sipas të cilit popullsia e Shqipërisë po tkurret me ritme të shpejta. Përveç emigracionit, shtesa natyrore e popullsisë po bie, me rënien e nr të lindjeve. Kështu në 3 mujorin e tretë të këtij viti, shtesa natyrore e popullsisë ra më 17.1%

Interesant është se kjo panoramë nuk nxit asnjë lloj iniciative apo rezolute, edhe pse është periudha e diskutimeve për buxhetin e vitit të ardhshëm. Prej dy javësh tashmë KM shfaqet shumë rrallë në publik, e kryesisht për evente politike. Nga ana tjetër Lulzim Basha po e vijon me takime me bizneset rrugëtimin e tij nëpër shqipëri, me fokus programin ekonomik, por pa saktësuar se mendon se mund të shkojë në zgjedhje për të ardhur më pas në pushtet e zbatuar ato premtime. Sali Berisha që i tërhoqi vëmendjen javën politike që lamë pas, duke kujtuar se reforma zgjedhore është kusht jo vetëm për mazhorancën edhe për opozitën.

Gjithsesi fokusi mbeti tek përplasja e fortë institucionale e politike për anëtarët e rinj të Gjykatës Kushtetuese. A ishin vallë akrobacitë e palëve, ilustrim i matjes së forcave për të patur të zgjedhurit e vet, edhe në gjykatën më të lartë të vendit? Taulant Balla e pati një akuzë direkte për Ilir Metën, në seancën ku deputetët votuan për dy emrat e vetëm, që u ishin vënë përpara.

A janë këto lëvizje përpjekje për të patur kontrollin mbi Gjykatën Kushtetuese përmes të emëruarve? Koha ka treguar se jo pak emra edhe në institucionet e reja të drejtësisë, janë të lidhur me mazhorancën qeverisëse. /abcnews.al

 

meta.jpeg
in a15:25 | 16/11/2019

Presidenti i Republikës, Ilir Meta pas përplasjeve për shpërndarjen e Parlamentit ka bërë lëvizjen e radhës.

“Abcnews” mëson se Presidenti i ka dërguar një letër 9 partive që u larguan nga Parlamenti, të cilave u kërkon takim urgjent për “situatën dramatike” që është krijuar në vend. Presidenti Meta, ka ftuar kreun e opozitës së bashkuar, Lulzim Basha, dhe të gjithë kryetarët e partive të opozitës jashtë parlamentare, në një takim.

Meta i kërkon Bashës dhe gjithë opozitës jo parlamentare të shkojë në takim sa më shpejt, mundësisht brenda datës 20 nëntor 2019.

“Nisur nga situata dramatike në të cilën ndodhet vendi dhe pasojat e saj të paparashikueshme ju ftoj juve dhe të gjithë kryetarët e Partive të Opozitës së Bashkuar në një takim,në një kohë sa më të shpejtë, mundësisht përpara ditës së mërkurë, datë 20.11.2019. Ju lutem nëpërmjet Kabinetit tuaj saktësimin e ditës dhe orës së përshtatshme të takimit, për ju dhe për kryetarët e partive të tjera”, shkruan Meta.

/abcnews.al

/abcnews.al

meta-1.jpg
ent ela14:40 | 16/11/2019

Presidenca ka konfirmuar edhe njëherë kallëzimin penal që do të dorëzohet të hënën në Prokurori, për kreun e Këshillit të Emërimeve në Drejtësi, Ardian Dvorani. Zëdhënësi i Presidentit Meta tha do të publikohet edhe një VIDEO përvëluese që implikon kreun e KED-së ndaj  emërimit të Arta Vorpsit në Gjykatën Kushtetuese. Nga ana tjetër, Meta do të thërrasë në takim kryetarët e partive opozitare që braktisën parlamentin.

Të hënën, Presidenca njofton se do të depozitojë kallëzimin ndaj kreun e Këshillit të Emërimeve në Drejtësi, Ardian Dvorani, të cilin e akuzon për shkelje të Kushtetutës lidhur me zgjedhjen e Arta Vorpsit si gjyqtare në Kushtetuese. Zëdhënësi i Presidentit, konfirmon se do të publikohet dhe një video e cila do të provojë përfshirjen në këtë shkelje edhe të zyrtarëve të tjerë.

 “Kjo VIDEO me prova të pakundërshtueshme, do zbulojë fytyrën e vërtetë të një individi të papërgjegjshëm, i cili guxoi në mënyrë të tmerrshme kriminale t’i përvetësojë kompetencat kushtetuese Presidentit të Republikës, që as noterja e nderuar znj.Miranda Xhemalçe nuk pranoi ta bënte, pasi e dinte shumë mirë se betimi me dorën mbi Kushtetutë bëhet vetëm në Institucionin e Presidentit të Republikës dhe askund tjetër”.

Presidenca njofton se kjo video po përgatitet edhe në disa gjuhë të tjera europiane, në mënyrë që të gjithë partnerët ndërkombëtarë, të mos mashtrohen më.

Po ashtu, presidenca ka njoftuar se krahas duelit me KED-në, Meta po punon edhe me opozitën.

Presidenti Meta do të kërkojë takim me të gjithë kryetarët e Partive Parlamentare që braktisën Kuvendin në shkurt 2019, “për të diskutuar lidhur me situatën dramatike ku ndodhet vendi. Padyshim do të ketë edhe të tjera inisiativa, vendime dhe takime shumë të rëndësishme”,-thuhet në njoftim!

4866700_1151_rapine.jpg
ent ela14:34 | 16/11/2019

Policia italiane ka goditur një bandë shqiptare që ishte e specializuar në fushën e vjedhjeve dhe plaçkitjeve të vilave në Italinë qendrore dhe veriore. Operacioni “Massa San Giuliano” çoi në pranga  6 persona, ndërsa 9 të tjerë do hetohen në gjendje të lirë.

Masat paraprake, të lëshuara nga Prokuroria pranë Gjykatës së Spoletos, në bashkëpunim me magjistraturën hetuese të Umbrias dhe atë të Romës, u kryen në zonat e Ponte di Nona dhe Tor Bella Monaca, ku organizata kriminale kishte bazat operacionale.

Mediat italiane bëjnë të ditur se të arrestuarit dhe nën hetim janë të gjithë me origjinë nga Shqipëria. Ata hynin në aksion sidomos gjatë orëve të mbrëmjes dhe të natës dhe nga Roma spostoheshin në qytetet e qendrës dhe të veriut të Italisë për të kryer grabitjet e shumta.

Krimet kryheshin edhe kur njerëzit ishin në shtëpi dhe në disa raste, përveç parave dhe sendeve të çmuara, hajdutët vidhnin edhe çelësat e makinave, të cilat më pas i përdornin për të lëvizur dhe për të kryer vjedhjet pasuese.

Dhjetëra vjedhje nga grupi në provincat e Frosinones, Ravennas, Perugias, Bolognas, Modenas dhe Reggio Emilias. Sipas hetuesve, banda kishte lidhje edhe me grupe të ndryshme që veprojnë në qytete të tjera në Itali, si Milano, Venecia, Vicenza dhe Ascoli.

Për këtë grup, oficerët e komisariatit Aurelio filluan të hetojnë rreth një vit më parë, kur disa nga personat e arrestuar sot u kapën duke operuar me “një ndërrim makine” pasi kishin kryer një vjedhje në Komunat e Trevignano dhe Braçiano. Në atë episod të dyshuarit arritën të shpëtojnë.

Me ndihmën e përgjimeve dhe ndjekjen në të gjithë territorin, u verifikua ekzistenca e një grupi të strukturuar të profesionistëve të vërtetë, të cilët mburreshin se fitonin vetëm në një dimër në Itali më shumë se një milion euro.

Për të shpëtuar nga policia dhe për të shmangur zbulimin ose ndjekjen, gjithnjë merrnin masa, duke përfshirë pezullimin e veprimtarive kriminale dhe kthimin në vendin e origjinës për të qetësuar ujërat.

Në dy raste, kriminelët të zbuluar nga Forcat e Policisë, goditën pikat e kontrollit në Perugia dhe Frosinone, duke bërë që agjentët të karamboloheshin dhe të shkatërronin makinat.

Makinat e vjedhura, të gjitha me cilindrat të madh fshiheshin më pas në vende më të distancuara nga kryeqyteti, siç është parkimi i një spitali ose në garazhe private. Me bashkëpunimin e një rrjeti të dendur mbështetësish, fshiheshin në terrene të ndryshme sendet e vjedhura, dritat, skanerët, celularët e kompletuar me karta, si dhe pajisjet për kryerjen e vjedhjes.

Për të përgatitur goditjet, grupi përdorte celularë ‘citofonë’, pra me një trafik jashtëzakonisht të kufizuar, kryesisht të regjistruar tek qytetarët kinezë që banojnë në provincën e Napolit.

Hetimet çuan në sekuestrimin e dhjetra makinave “Audi” të vjedhura dhe të sendeve me vlerë të mëdha të vjedhura (orë Rolex, Cartier, Guçi dhe marka të tjera prestigjioze, shumë bizhuteri ari, diamante dhe xhevahire të tjera të çmuara), si dhe çanta dhe objekte me vlerë që u përdorën nga partneret e të arrestuarve.

T.N. 26 vjeç, G.E., 29 vjeç dhe N.E. 24 vjeç, janë disa nga të akuzuarit të gjithë shqiptarë.

Pak orë para operacionit, grupi kishte kryer një vjedhje në një qendër të vogël të Frosinones dhe ishin larguar duke vjedhur një “Volkswagen Golf”.

Pasi hynë në banesa policia gjeti edhe persona të tjerë për të cilët ishte dhënë urdhri i arrestit: N.A. , 24 vjeç, (një nga grabitësit kryesorë); N.M. edhe A.M. respektivisht 34 dhe 31 vjeç  të cilët ndodheshin në territorin italian pavarësisht se kishin marrë ekspuls.

Po hetohen në gjendje të lirë 9 persona të tjerë, mes tyre 2 gra që megjithëse me një rol të vogël kanë bashkëpunuar në krimet e mëparshme. abcnews.al

 

hajdari1.jpg
ent ela14:01 | 16/11/2019

Kryetarja e opzoitës së re parlamentare i ka kërkuar presidenti Ilir Meta që të ndalë urgjentisht lojën e vjetër politike, e cila ka vënë në shënjestër institucionet e drejtësisë me qëllim deligjitimimin e tyre.

Në një postim në rrjetet sociale Hajdari shprehet se ka ardhur koha që kjo të marrë fund, pasi vendit nuk i duhen burra të fortë para kamerave, por institucione të forta.

Postimi i plotë i Hajdarit

I kërkova Kryetarit të Shtetit, Presidentit të Republikës, dhe në vazhdim do ia kërkoj edhe Kryeministrit e të gjithë faktorëve politikë, që të ndalin urgjentisht lojën e vjetër dhe të shëmtuar politike e cila ka vënë në shënjestër institucionet e drejtësisë me qëllim deligjitimimin e tyre.

Për 29 vite me radhë, kjo klasë politike i ka dobësuar e deligjitimuar qëllimisht institucionet, në mënyrë që i vetmi autoritet në vend të ishin kryetarët e dy apo tre partive. Prandaj për 29 vite Shqipëria ka parë shumë krim dhe aspak ndëshkim.

Ka ardhur koha që kjo të marrë fund.

Vendi, sot më shumë se kurrë, ka nevojë jo për burra që hiqen si të fortë para kamerave, por për institucione të forta të cilat japin drejtësi për të gjithë, të varfër apo të pasur, me apo pa pushtet.

Ka ardhur koha që vendin ta qeverisin institucionet, ligji dhe kushtetuta. /abcnews.al

agim-kajmaku-kqz.jpg
ent ela13:43 | 16/11/2019

Kajmaku ka apeluar nga arratia masën e sigurisë arrest me burg në mungesë të dhënë nga gjykata e shkallës së parë Tiranë, në një kohë kur Prokuroria dhe policia vijojnë kërkimet për ish-kreun e Bashkisë së Vorës. Ai  cili arriti të shpëtonte prangosjes, pasi u njoftua në kohë nga radhët e sistemit të drejtësisë.

“Abcnews” ka zbardhur dosjen e ish-kryebashkiakut të Vorës Agim Kajmaku, i cili prej disa ditësh vazhdon të jetë në arrati. Në dosjen e prokurorisë thuhet se Kajmaku ka fallsifikuar datën e shkarkimit të dy nënkryetarëve të bashkisë dhe në vend të tyre ka emëruar shefin e kabinetit të tij Gent Picari. Sipas organit të akuzës këto urdhra nuk janë bërë me datë 31,10.2019, por në datë 01.11.2019.

Kajmaku ka apeluar nga arratia masën e sigurisë arrest me burg, në një kohë kur Prokuroria dhe policia vijojnë kërkimet për ish-kreun e Bashkisë së Vorës. Ai arriti t’i shpëtonte prangosjes, pasi u njoftua në kohë nga radhët e sistemit të drejtësisë.

Të gjitha pikat e kalimit kufitar, portet dhe aeroporti janë njoftuar për ndalimin e menjëhershëm të Agim Kajmakut nëse do të konstatohet në kufi. Si masë ekstreme Gjykata ka kërkuar që ti sekuestrohet pasaporta.

Ish-kryebashkiaku i Vorës akuzohet për tre akuza; “Shpërdorimi detyre”, “Falsifikim të formularëve” si dhe “Ushtrim i funksioneve pas dhënies fund të detyrës”.

Ndërkohë gazetarja Glidona Daci ka mësuar se është sekuestruar celulari i nënkryetarit të bashkisë Vorë të emëruar nga Agim Kajmaku Gentian Picari, i cili ka bërë kërkesë për t’i rikthyer telefonin../abcnews.al

 

policia-aksion-1280x712.jpg
ent ela13:32 | 16/11/2019

Dy të rinj që shpërndanin lëndë narkotike kanë rënë në prangat e Policisë në dy operacione të ndryshme. Policia njofton se ka sekuestruar 42 doza me lëndë narkotike kokainë e kanabis, lekë dhe euro të përfituara nga shitja e lëndës narkotike në doza.

Operacionet policore u kryen nga Seksioni për Hetimin e Narkotikëve, në bashkëpunim me Forcën e Posaçme “Shqiponjat”.

Njoftimi i Policisë

Në kuadër të operacionit “Mapo” u arrestua në flagrancë shtetasi: A. Xh., 24 vjeç, banues në Tiranë. Ky shtetas u kap në flagrancë në rrugën “Hamdi Cenoimeri” me doza lënde të dyshuar narkotike kokainë. Në vijim shërbimet e policisë kanë ushtruar kontroll në banesën e këtij shtetasi ku i janë gjetur doza të tjera me lëndë të dyshuar narkotike kokainë e kanabis. Policia i sekuestroi këtij shtetasi në cilësinë e provës materiale: 3 doza me lëndë të dyshuar narkotike kokainë; 31 doza me lëndë të dyshuar narkotike kanabis dhe 1 aparat celular.

Po gjatë orëve të fundit, u zhvillua operacioni “Shigjeta 3”, në kuadër të të cilit u arrestua shtetasi: G. L., 21 vjeç, banues në Rrëshen. Gjatë kontrollit të ushtruar në mjetin me të cilin ky shtetas po lëvizte, policia gjeti 8 doza me lëndë të dyshuar narkotike kokainë. Këtij shtetasi iu sekuestruan në cilësinë e provës materiale: 8 doza me lëndë të dyshuar narkotike kokainë, një mjet, një aparat celular, 34 400 lekë të reja dhe 315 euro (të dyshuara të përfituara nga shitja e dozave me lëndë narkotike).

Materialet procedurale iu referuan për veprime të mëtejshme Prokurorisë së Rrethit Gjyqësor Tiranë për veprën penale “Prodhim dhe shitje lëndësh narkotike” në ngarkim të shtetasve të lartpërmendur. /abcnews.al

ef8947f7-1a2c-433d-adf5-8a840b4d606c-1280x853.jpg
ent ela12:44 | 16/11/2019

Për kryedemokratin Lulzim Basha, Rama e ka jetike kapjen e institucioneve. Nga Devolli, Basha akuzon Ramën se ashtu siç paracakton tenderat, paracakton edhe gjyqtarët e Gjykatës Kushtetuese, pa garë.

“Njësoj siç paracakton tenderat, paracakton edhe gjyqtarët e Gjykatës Kushtetuese, pa garë, ata që do Ardian Dvorani, simboli i korrupsionit dhe i kapjes së shtetit, vegla dhe masha e Edi Ramës që nuk do të lërë institucion pa kapur sepse ai e ka jetike t’i kapë institucionet.

Nëqoftëse institucionet funksionojnë i pari që duhet të shkojë për ndjekje penale, për dhjetëra vepra penale është Edi Rama dhe gjysma e kabinetit dhe ish-kabinetit të tij qeveritar.

Prandaj ai e ka jetike të kapë drejtësinë, të bllokojë reformën në drejtësi, prandaj ai cakton si kukulla prokurorë, gjyqtarë, Gjykatë Kushtetuese. Paligjshmëria dhe padrejtësia prodhojnë vetëm varfëri dhe mjerim. Zgjidhja e vetme janë zgjedhjet dhe kthimi i legjitimitetit të parlamentit”.

Kryedemokrati ju tha fermerëve se as vitin e ardhshëm, qeveria nuk do t’i mbështesë ata. Basha shton se oligrakët janë ata që do të fitojnë sërish. SINK Parate tek oligrarket.

Demokratët propozojnë një skemë të ngjashme me Kosovën, ku fermerët dorëzojnë prodhimin, dhe kostoja e prodhimit ju mbulohet nga shteti.

Nga Devolli, Basha u ndal edhe tek debati për Gjykatën Kushtetuese, duke u rreshtuar përkrah Ilir Metës. Prej ditësh, Basha ka nisur një tur në Shqipëri, duke u takuar me të rinjtë, aktorët e turizmit, fermerët dhe bizneset./abcnews.al

 

KRONIKE-ZGJEDHJET-NE-PS.mpg_snapshot_01.06-1280x720.jpg
ent ela12:35 | 16/11/2019

Partia Socialiste zgjodhi sot anëtarët e Kongresit kombëtar. Në proces u eksperimentua vota elektronike dhe ajo me postë, dy prej sfidave që po përpunon dhe reforma zgjedhore për zgjedhjet parlamentare. Vetë Rama që votoi përmes makinerisë, tha se kjo metodë mund të aplikohet.

 “Ne kemi përgatitur një proces të tërë para zgjedhjeve vendore për të qenë të gatshëm t’i përgjigjemi pozitivisht një kërkese për votimin elektronik, na ka rezultuara i mundshëm për ta shtrirë në Shqipëri duhet ta kishim pilotuar në zgjedhje të shkuara. Është votim offline mekanik dhe i papenetrueshëm nga forcat e errëta”.

Veç 706 anëtarëve që do të zgjidhen me këtë proces votimi, Kongresit të partisë Socialiste do ti shtohen automatikisht deputetët, kryetarët e bashkve, kryetarët e degëve, dhe ministrat. /abcnews.al

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono