Kryesore

piro-2.jpg
ger ta19:38 | 27/02/2020

“Nuk më duket se Lulzim Basha po e bën me shpirt mbështetjen  e aksionit të Ilir Metës”. Kështu u shpreh  ministrja e Shtetit për Marrëdhëniet me Parlamentin, në studion e Abc News me Mirela Milorin, teksa komentoi tubimin e 2 marsit të thirrur nga Presidenti Meta.

E pyetur nga gazetarja për pozicionin e Lulzim Bashës në një kohë kur është ulur në tryezë me qeverinë për Reformën Zgjedhore dhe nga ana tjetër mbështet tubimin e Metës, Spiropali tha se Basha ka nisur një kurs të ri opozitar. Sipas saj kryedemokrati është më i arsyeshëm. Ministrja tha se tubimin e 2 marsit e sheh si aksion të izoluar të LSI dhe Metës.

“Është një marrëdhënie skizoide se Lulzim Basha mirë keq ka nisur një kurs të ri opozitar të them të drejtën është i arsyeshëm, edhe për mënyrën si reagon për cështje si koronavirusi, tërmeti, çështje që kanë interes,duket i arsyeshëm, bashkëpunues dhe do të krijojë profilin e një drejtuesi shteti në të ardhmen. Nga ana tjeter ne mendojmë se është nën presionin e jashtëzakonshmë të këtyre heronjve të përhershëm, të Ilir Metës dhe Sali Berishës sepse gjuha e tyre opozitare është krejtësisht ndryshe nga ajo e Lulzim Bashës. Në fakt përçarja më e madhe ekziston në opozitë, por ne nuk kemi ndërmend të ndërhyjmë sepse nuk është puna jonë, le ta gjejnë vetë rrugën. Nuk më duket se Lulzim Basha po e bën me shpirt mbështetjen  e aksionit të Ilir Metës, do ishte absurde të mbështeste një aksion politik që do të fuqizojë Ilir Metën dhe LSI. Unë e shoh si një aksion të izoluar të LSI dhe Metës personalisht”, tha Spiropali. /abcnews.al

spiro-1.jpg
ger ta19:29 | 27/02/2020

Ministrja e Shtetit për Marrëdhëniet me Parlamentin, Elisa Spiropali e ftuar në “Mbrëmjen në Abc” me Mirela Milorin ka komentuar tubimin e 2 marsit të thirrur nga Presidenti Ilir Meta.

Spiropali u shpreh se një protestë të tillë mund ta bëjë Nard Ndoka dhe Dashamir Shehi, por kreu i Shtetit është votuar për të qenë mbi palët.

Sipas saj, kjo është një protestë politike dhe se Meta po shkel Kushtetutën.

“Kjo nuk është politikë. Presidenti i cili është garanti i unitetit të popullit merr përsipër të organizojë një protesë që mund ta bënte edhe Nard Ndoka me Dash Shehin. Atë protestë mund ta bënte çdo lider i një partie të vogël. Por presidenti që i kemi dhënë votën për të qenë mbi palët, bëhet palë kaq hapur. Të tentojë ti marrë vendin Nard Ndokës apo edhe Lulzim  Bashës.Të gjita këto janë alibi për të organizuar një protestë politike. Në asnjë vend të botës nuk mund të kesh Presidentin që të organizojë një protestë kundër qeverisë. Ai po shkel Kushtetutën. Nuk mund ne të pranojmë që yë ke mi një presidnet të tillë”, u shpre ajo.

E pyetur se çfarë do të bëjë maxhoranca me procedurat për shkarkimin e Metës, Spiropali u përgjigj: “Ne do vazhdojmë me prodecura, komisioni është i ngritur. Do sjellë dosjen në seancë plenare dhe me votë do shohim si do shkojë puna e Ilir Metës”.

/abcnews.al

kurti-mallrat.jpg
ger ta18:49 | 27/02/2020

Kryeministri i Kosovës Albin Kurti në një konferencë të jashtëzakonshme  për media ka bërë të ditur se Qeveria e Kosovës do të heqë tarifën 100 për qind ndaj produkteve serbe më 15 mars.

Kurti, është shprehur se taksa do të hiqet më 15 mars të këtij viti, me kushtin që Serbia të heq dorë nga fushata për ç’njohjet e Kosovës. Kryeministri ka theksuar se taksa do të hiqet për një periudhë 90 ditore.

E para, si qeveri e Kosovës do të marrim vendim që nga data 15 mars të hiqet tarifa për lëndën e parë që eksportohet nga Serbia dhe Bosnja e Hercegovinës. E dyta, kërkojmë nga Serbia që të zotohet që do të ndalë fushatën për çnjohjen e Kosovës…. atëherë duke filluar nga data 1 prill, Qeveria e Kosovës do ta heq tërësisht taksën për një periudhe prej 90 ditësh. E treta, kërkojmë nga BE-ja ta vlerësoj lartë vendimin e Qeverisë për heqjen e taksës. E katërta, në rast se Serbia nuk e përfill vullnetin e mirë të Qeverisë së Kosovës dhe për pasojë nuk e pushon fushatën jomiqësore dhe nuk fillon me heqjen e barrierave, atëherë nga data 1 prill, Qeveria e Kosovës do të nis në masën e reciprocitetit. E pesta, në rast se pala serbe nuk reflekton as pas 90 ditësh për heqjen e importit për lëndën e parë, atëherë më 15 qershor Kosova do të vendos për reciprocitetin”, ka thënë Kurti.

Kurti  po ashtu ka bërë të ditur se masa e reciprocitetit do të vendoset pas 15 qershorit.

Rivlerësimi i këtij vendimi varet nga rezultatet që arrihet në objektivat e këtij. Reciprociteti instalohet pas 15 qershorit”, theksoi Kurti.

/abcnews.al

 

fatmiri-kolecaj-vrases.jpg
ger ta18:42 | 27/02/2020

Pas 48 orësh në arrati, autori i dy vrasjeve Fatmir Kolecaj është kthyer në banesën e tij në Zejmen të Lezhës, ku është rrethuar nga policia dhe forcat RENEA. Pas përplasjes me armë i ka dhënë fund jetës duke u vetëvrarë.

Mësohet se Kolecaj në orët e pasdites të së enjtes kur kishte filluar të errësohej përmes pyllit ku mendohet të ketë qëndruar për dy ditë është futur në banesën e tij. Policia dhe RENEA përgjatë gjithë kohës kanë vëzhguar banesën e tij dhe kur ai arriti të hynte në shtëpi i bënë thirrje që të dorëzohej. Por autori i krimit të dyfishtë thirrjes iu përgjigj me zjarr. Ai ka shtënë me armë në drejtim të policisë ku dhe plagosi në këmbë një prej punonjëve të Forcave të Ndërhyrjes së Shpejtë.

Forcat RENEA më pas kanë krijuar një rrethim të dytë dhe i kanë drejtuar një thirrje të dytë që ai të vetëdorëzohej. Me sa duket Kolecaj ka parë që nuk mund të dilte dot nga banesa dhe i ka dhënë fund jetës. Mësohet se në banesën e tij nuk ndodhej askush tjetër. Ndërsa një banor tregon se dëgjuan disa krisma.

Të martën në mbrëmje 47 vjeçari shkoi pranë banesës së ish bashkëshortes së tij Esmeralda Filopati në Koder-Rreshen dhe pas një debati në lidhje me 3 vajzat e tyre vrau ish-gruan dhe vëllain e saj. Mësohet se ai e kishte dhunuar sistematikisht gjatë viteve të martesës dhe ajo e kishte denoncuar. Për këtë shkak ai qëndroi në burg 4 vjet, por para një viti është liruar. Ndërsa ish bashkëshortja kishte urdhër mbrojtje, por Kolecaj jo vetëm që nuk e respektoi por i mori dhe jetën. /abcnews.al

/abcnews.al

anisa.jpg
R D17:37 | 27/02/2020

Nënkryetarja e Bashkisë së Tiranës, Anisa Ruseti i e ftuar në studion e Abc News me gazetarin Endri Xhafo tha se pas prishjes së negociatave me kompaninë “Fusha”, Bashkia do të kërkojnë kredi për të ndërtuar teatrin e ri kombëtar. Ajo tha se kemi qëllim që gjithë procedurat të mbyllen shpejt dhe punimet të nisin brenda vitit 2020, që shënon 100-vjetorin e Tiranës kryeqytet.

E pyetur nga Xhafo se pse dështuan negociatat me kompaninë private për ndërtimin e teatrit me PPP, Ruseti tha se “pas një procesi të gjatë negociimi ku për shtetin ishin 6 zyrtarë dhe 1 artist në tryezë nuk u ra dakord pasi firma kërkonte ta ndërtonte teatrin për afro 7 vite, ndërsa ne kërkuam të ndërtohej për 4 vite. E dyta ne kërkuan që teatri të bëhej me cilësi të lartë dhe teknologji të mirë”.

Sa i përket zhvillimit të pronës private pas teatrit, Ruseti shtoi se “ne deshëm të parin teatrin pastaj operatori të zhvillonte zonën përreth”.

Por pse bashkia nuk e nxori oferten për operatorë të tjerë?

Ruseti: Kur u bë oferta e parë ishte vetëm një operator “Fusha.sh.pk” duke qenë se ne nuk kishim ofertues tjeter nuk ia vlente të humbsim ende kohë me të njëjtin model sepse mund të shtynte edhe 6 apo 7 muaj të tjerë.

E peytur për kullat që do të ndërtoheshin pas teatrit të ri, Ruseti tha se “qytetarët ishin të shqetësuar që të mos prekej prona publike, ndaj ne i kërkuam operatorit që 5 mijë metra katror që ka teatri aktualisht të mbeteshin të pandryshuara. Kjo e ka afektuar planin e operatorit”.

Ndërsa e pyetur nëse bie projekti për kullat tashmë që nuk u arrit marrëveshja me Fushën, n/kryetarja e bashkisë tha se “kullat mbeten një opsion që do të diskutohet por ne për momentin duan që të ndërtojmë teatrin”.

Sa i përket financimeve, Ruseti deklaroi se “projekti për shkak të cilësisë dhe vlerës që do ketë mund të bëhet me kreditim. Ne do të kërkojmë kredi në bankat e nivelit të dytë në vend, por edhe nga BERZH. Ne si bashki kemi financa të shëndetshme për të dalë në treg për kredi dhe presim të marrim kredinë edhe me ndihmën e qeverisë”. N/kryetarja e bashkisë nuk pranoi të japë detaje mbi faturën financiare të këtij projekti. /abcnews.al

gjoba.jpg
Autor E16:28 | 27/02/2020

Ministria e Brendshme ka gati ndryshimet në Kodin Rrugor duke ashpërsuar gjobat ndaj shkelësve. Vërehet se është bërë një kategorizim i gjobave për drejtim të mjetit nën ndikimin e alkoolit.

Tashmë, gjoba do të vendoset në varësi të sasisë së alkoolit të konstatuar në gjak, ku maksimalja shkon deri në heqje të patentës deri në 2 vjet, shoqëruar edhe me 20-40 mijë lekë gjobë.

Po ashtu, Kodi i ri parashikon përshkallëzim të gjobave për drejtim të makinës duke përdorur celularin. Gjoba fillon nga 5 mijë lekë nëse drejton makinën me celularin në dore deri në 15 mijë lekë nëse kapesh duke shkruajtur SMS.

Parashikohet se 3-5 për qind e të ardhurave nga gjobat do të kalojnë në fondin për rritjen e sigurisë rrugore.

Abcnews.al ju sjell të detajuara ndryshimet në Kodin Rrugor si më poshtë:

Testi i Idiotit
Ccdo drejtuesi që kapet duke kryer shkelje të rënda të Kodit Rrugore në mënyrë të përsëritur, atij do ti kryhet një test i posaçëm psikologjik, i cili quhet ndryshe dhe si “Testi i Idiotit”. Pas këtij testi do të përcaktohet nëse personi është apo jo i aftë mendërisht të drejtojë makinën.

Këshillimi
Në rastet kur drejtuesi i makinës kapet me shkelje të lehta, ai do të këshillohet nga polici rrugore. Por, sipas ndryshimeve në Kodin Rrugor, këshillimi do të regjistrohet në emër të përdoruesit të makinës dhe nëse kapet sërish me shkelje brenda vitit, atij i vendoset gjoba maksimale e parashikuar për shkeljen e kryer.

Drejtimi i makinës nën ndikimin e alkoolit
Në çdo rast, kur drejtuesi i makinës kapet me nivele më të larta alkooli në gjak nga kufiri i lejuar nga ora 19:00-06:00 atij do t’i vendoset një gjobë 30 për qind më e lartë.

Gjoba për drejtimin e makinës nën ndikimin e alkoolit ishte nga 5 deri në 15 mijë lekë. Tani, nëse kapet me alkool nga 0.3 g/l deri në 0.5 g/l i hiqet leja nga 3 deri në 6 muaj si edhe vendoset gjobë nga 10 deri në 20 mijë lekë.

Nëse sasia e alkoolit është nga 0.8 g/l deri në 1.5 g/l i hiqet patenta nga 1 deri në 2 vjet dhe vendoset gjobë nga 20 deri 40 mijë lekë.

Nëse kapet me më shumë se 1.5 g/l alkool në gjak, i hiqen të gjitha pikët.

Drejtimi i mjetit duke përdorur celularin
-Nëse kapet me celular në dorë, gjobë 5 mijë lekë
-Duke folur në telefon, gjobë 10 mijë lekë
-Duke shkruajtur SMS, gjobë 15 mijë lekë

Kur shkelja përsëritet tre herë në vit, i hiqen 10 pikë nga patenta dhe i pezullohet leja e drejtimit për 3 muaj.

Sjellja agresive në rrugë
Parashikohet gjobë 10-20 mijë lekë si edhe heqje të 5 pikëve nga patenta për ata që sillen në mënyrë agresive në rrugë duke i bërë presion shoferëve të tjerë me drita, bori, etj.

Parakalimi
Në rastet e parakalimeve të gabuara, gjoba ka qenë nga 1 deri në 3 mijë lekë, kurse tani është bërë 5-10 mijë lekë. Nëse përsëritet brenda vitit, hiqet patenta një muaj.

goldennnnn.jpg
ger ta16:01 | 27/02/2020

Gjykata e Posaçme konfirmon OFL-në dhe SPAK-un, sekuestron kompleksin “Golden” dhe pronat e Hajrajve në Shijak.

Abcnews.al mëson  se “sot u dha vendimi për vendosjen nën sekuestro të pronave te shtetasit Altin Hajri e konkretisht i kompleksit “Golden Resort”, ne Xhafzotaj , Pjezë , Durrës. karburantit “ALT- OIL 2008” dhe i nje vilë dy kateshe në Pjeze Shijak Durres.

Vendimi u dha mbi bazën e nenit 19 të Aktit Normatin nr. 1 datë 31.01.2020 mbi subjekt i ligjit në kuadër të procedimit nr. 475 si i dyshuar për veprat penale të parashikuara nga nenet 139 dhe 333 te KP. Vendimi i është dërguar për ekzekutim Angjensisë po sot dhe për njoftim shtetasit Drejtorit të Pergjithshëm të Policisë, Prokurorisë se Posaçme dhe shtetasit Altin Hajri”.

Kështu gjykata konfirmoi sekuestron që vendosi më herët Operacioni Forca e Ligjit.

Kujtojmë se Altin Hajri është në kërkim, pasi akuzohet për çështjen e Jan Prengës, i cili u mor peng më 17 janar në Kamëz dhe u dërgua në kopleksin “Golden”, ku edhe humbi jetën. Ndërkaq, trupi i Jan Prengës vijon të jetë i zhdukur. /abcnews.al

gjonaj.jpg
Autor E15:54 | 27/02/2020

Ministrja e Drejtësisë, Etilda Gjonaj i është përgjigjur sot publikisht akuzave të Presidentit Meta, sipas të cilave ajo ka bashkëpunuar për “vjedhjen e anëtarit të Gjykatës Kushtetuese që i përket Presidentit”. Madje me këtë akuzë, Meta e ka dërguar Gjonajn në SPAK.

Në një konferencë për shtyp, Gjonaj shpjegoi se si u zgjodh Arta Vorpsi duke theksuar se Presidenti mund të zgjedhë ose një emër nga lista e radhitur nga KED ose me heshtje.

Sipas Gjonajt, Meta nuk u shpreh brenda 30 ditëve duke bërë që Vorpsi, e renditura e para nga KED, të kalojë automatikisht si anëtare e Gjykatës Kushtetuese.

Ministrja theksoi se afati 30 ditor i përcaktuar nga ligji është bërë me qëllim që të mos lejohet bllokimi i emërimeve në Gjykatën Kushtetuese nga vullnete politike.

Ajo u ndal edhe tek akuzat e Metës për botimin në Fletoren Zyrtare të emrit të Arta Vorpsit si anëtare e Gjykatës Kushtetuese. Sipas ministres, nuk ka asnjë ndalesë ligjore për të botuar në Fletoren Zyrtare materiale të shtunën, madje edhe as të dielën.

Deklarata e plotë

Sot jam në këtë komunikim me ju, dhe nëpërmjet jush, përpara opinionit publik, për të shtjelluar me përgjegjësinë time të plotë politike, profesionale e qytetare, një temë që është kthyer në thirrje për protestë nga as më shumë dhe as më pak, po vetë Presidenti i Republikës.

Nuk e kam bërë këtë shtjellim më parë, sepse kam gjykuar që i duhej lënë Presidentit koha dhe hapësira e plotë mediatike për të ezauruar të gjitha seritë e spektaklit të tij politik mbi “grupin armiqësor dhe kriminal” në Ministrinë e Drejtësisë.

Nuk e bëj këtë sqarim sot as për t’iu përgjigjur Presidentit, për morinë e akuzave dhe as për tju përgjigjur fjalëve të padenja që ka lëshuar publikisht në drejtimin tim, personalisht apo përmes zëdhënësve të tij.

Unë u rezervoj të gjithë keqardhjen time për hallin e madh që i motivon në luftën kundër Reformës në Drejtësi, por akuzat ndaj meje nuk jua lehtëson këtë hall.

Presidenti ka krijuar një kauzë fiktive në funksion të betejave të tij politike, që në çdo rast nuk janë në përputhje me përgjegjësitë e tij të larta kushtetuese, si përfaqësues i unitetit të popullit, në momentin e rëndësishëm që po kalon Shqipëria në prag të negociatave.

Deformimet e rënda faktike, juridike dhe logjike të këtij show politik presidencial mbi gjoja rrëmbimin e kompetencave të Presidentit, janë mbresëlenese për këdo që i di faktet.

Për shembull, kujt dhe për çfarë i drejtohet në thirrjen e tij të dëshpëruar zoti President,

mbi zgjedhjen e anetarëve të Gjykatës Kushtetuese, kur sot gjyqtarja e zgjedhur prej tij me një procedurë në kundërshtim me Kushtetutën dhe tërësisht të paligjshme ushtron funksionin si anëtare e GJK?

Dhe pikërisht për një informim korrekt mbi faktet, të kujtdo që dëshiron të dije

si qëndron e vërteta e tërë kësaj orvatje të dëshpëruar kundër Reformës në Drejtësi,

sipas Kushtetutës, ligjit dhe praktikës që po ndërtohet gjatë këtyre viteve, po vijoj si më tej:

Së pari: Presidenti artikulon papushim për të drejtën e tij për të pezulluar numërimin e ditëve të afatit qe i jep ligji kushtetues, për përzgjedhjen e anëtarëve të Gjykatës Kushtetuese.

Pezullimi i një afati prekluziv që as nuk pezullohet dhe as ndryshohet nga institucioni që duhet të veprojë sipas afatit, është një koncept që faktikisht nuk ekziston në asnjë praktikë kushtetuese. Pra juridikisht mund të konsiderohet nonsens dhe logjikisht më së paku një lajthitje ligjore.

Së dyti:

Parashikimet ligjore dhe kushtetuese për përzgjedhjen e anëtarit të GJK nga Presidenti janë shumë të qartë. Sipas parashikimeve të ligjit për Gjykatën Kushtetuese, Presidenti ushtron të drejtën e zgjedhjes së gjyqtarit kushtetues brenda 30 ditëve nga marrja e listës prej Këshillit të Emërimeve ne Drejtësi. Presidenti e ushtron këtë të drejtë në dy forma:

  1. a) ose nëpërmjet dekretit duke zgjedhur një nga tre kandidatët që i ka dërguar KED ose,
  2. b) në mënyrë të heshtur, duke pranuar që kandidati i renditur i pari nga Këshilli i Emërimeve në Drejtësi të konsiderohet i emëruar.

Qëllimi i vendosjes së këtij afati apo mekanizmi zhbllokues ka qenë pikërisht shmangia e bllokimit të zgjedhjes së anëtarit të Gjykatës Kushtetues për shkaqe politike apo teknike.

Kjo ishte edhe një nga risitë e reformës në drejtësi e përkrahur edhe nga Komisioni i Venecias.

Por çfarë ndodhi?

Afati 30 ditor i Presidentit për të zgjedhur anëtarin e Gjykatës Kushtetuese përfundoi dhe Presidenti nuk e e ushtroi të drejtën e tij brenda afatit 30 ditor. Theksoj se ky është një afat prekluziv, pra i pandryshueshëm dhe i pa-pezullueshëm, për shkak se vetë ligji e ka lidhur kalimin e këtij afati me ardhjen e një pasoje. Pra, me kalimin e këtij afati, bëhet automatik emërimi si anëtar i Gjykatës Kushtetues i kandidatit që është renditur i pari.

Për këtë shkak, Arta Vorpsi, që ishte renditur e para nga KED si institucion I pavarur, si institucioni i përbërë nga Prokurorë dhe Gjyqtarë të të gjitha niveleve, konsiderohet e zgjedhur gjyqtare Kushtetuese automatikisht nga ligji (ex lege) me datë 08.11.2019.

Së treti:

Presidenti paraqet papushim një rrëfim me natyrë policeske, lidhur me botimin në Fletoren Zyrtare të zgjedhjes së zonjës Arta Vorpsi si anëtare e Gjykatës Kushtetuese. Bërthama e rrëfimit është thjeshtë dita e shtunë.

Pra fakti se botimi në Fletoren Zyrtare është bërë të shtunën, i ka mjaftuar zotit President të dal në konkluzionin se jemi përpara një konspiracioni armiqësor, përmes të cilit synohet një grusht shteti.

Sinqerisht e kam shumë të vështirë të besoj se Presidenti i Republikës e beson vetë këtë version kaq ekstremist për imagjinatën e çdo njeriu normal, të një konspiracioni me finalitetin e një grushti shteti, i cili provohet me argumentin se ditën e shtunë, grupi armiqësor në Ministrinë e Drejtësisë është vënë në lëvizje duke synuar të përfitojë nga fakti se shteti është pushim.

Sikur Presidenti ose këshilltarët e tij të kishte bërë një kërkim krejt sipërfaqësor në arkivë, do të kishte mësuar se jo vetëm e shtuna po edhe e diela, janë ditë që figurojnë  më parë në Fletoren Zyrtare.

Së katërti:

Si qëndron konkretisht fakti i Botimit në Fletoren Zyrtare i vendimit të KED-se për anëtarin e zgjedhur automatikisht nga ligji?

Presidenti deklaron se “grupi i strukturuar i Ministrisë së Drejtësisë”, ka shkelur ligjin se ka botuar në Fletoren Zyrtare një vendim që s’kishte kompetenca për ta botuar.

Por në fakt është krejt e kundërta:

Pas informacionit që KED i ka dërguar Kuvendit,  ky i fundit i ka përcjellë Ministrisë së Drejtësisë informacionin mbi praktikën e ndjekur nga KED dhe faktin që afati 30 ditor i emërimit të anëtarit të gjykatës Kushtetuese nga Presidenti kishte përfunduar dhe për këtë shkak kandidati i renditur i pari në bazë të vendimit të KED-së, konsiderohej i emëruar ex lege (automatikisht). Pra zonja Arta Vorpsi konsiderohet e zgjedhur automatikisht.

Për sa kohë që është një anëtar I emëruar nga ligji,

Ministria e Drejtësisë i dërgoi Qendrës së Botimeve Zyrtare për publikim vendimin e KED për renditjen e kandidatëve.

Pse Ministria e Drejtësisë?

  1. Neni 4 i ligjit për qendrën e botimeve zyrtare dhe ligjit organik të Ministrisë së Drejtësisë parashikohet se Ministria e Drejtësisë është organi epror i kësaj qendre dhe shërben për rregullimin e veprimtarisë së saj.
  2. Po gjithashtu Ministria e Drejtësisë ashtu si edhe institucionet e saj të varësisë duhet të garantojnë aksesin efektiv për njohjen e legjislacionit dhe ushtrimin e të drejtës për informim të personave fizike dhe juridike, brenda dhe jashtë vendit.
  3. Ministria e Drejtësisë ashtu si dhe çdo organ publik, ka detyrimin të përmbushë me rigorozitet pushtetet që Kushtetuta dhe ligji I kanë dhënë duke u bazuar mbi parimet e ligjshmërisë dhe transparencës në kryerjen e funksionit brenda kufijve dhe në përputhje me qëllimin e dhënë të këtyre kompetencave.
  4. Në një kohë që vendimi I KED-së që bëhet fjalë ka renditur kandidatët për anëtar të Gjykatës Kushtetuese, pavarësisht se nuk reflektohet në nenin 6 të ligjit për botimet zyrtare specifikisht, sipas nenit 3 të po këtij ligji është një akt që nuk mund të përjashtohet nga përkufizimi I “akteve të botueshme”.
  5. Ashtu siç nuk reflektohen të gjitha aktet që për nga natyra e tyre, duhet të jenë të botueshme, përfshirë këtu edhe ky vendim i KED-së apo çdo lloj vendimi tjetër që do të jetë si pasojë e mekanizmit zhbllokues.
  6. Ligji për organet e qeverisjes ka parashikuar detyrimin që KED të botojë menjëherë në faqen e Gjykatës së Lartë, çdo vendim që ai merr, në kohën kur e merr, me qëllim garantimin e transparencës për publikun.

Por në një kohë që vendimi i KED I nënshtrohet mekanizmit zhbllokues pas kalimit të afatit 30 ditor organi i emërtesës, Presidenti, Parlamenti, Gjykata e Lartë për zgjedhjen e anëtarit, ka të njëjtën fuqi ligjore ashtu si dhe dekreti i presidentit, për këtë arsye duhet të ketë edhe të njëjtin formalitet në shpalljen botërisht të tij, që do të thotë botimit në Fletoren Zyrtare.

Së pesti:

Presidenti ka ngritur akuzën se botimi në fletore zyrtare ka sjellë pasoja të rënda.

Cilat janë efektet apo pasojat juridike që ka krijuar publikimi i këtij vendimi në Fletore zyrtare?

As më shumë dhe as më pak, përveç bërja e njohur botërisht në formë të shkruara apo elektronike të këtij vendimi të KED-së pas kalimit të afatit 30 ditor.

Është më shumë rëndësi të mbahet parasysh se botimi në fletoren zyrtare nuk i jep fuqi juridike akteve që botohen në të (përveç akteve që e parashikojnë shprehimisht), por shërben për ti bërë të njohura botërisht ato.

Pra, nuk është botimi që i jep fuqi juridike vendimeve të KED-së

por vetëm i bën me dije publikut aktin që ka sjellë ose do të sjelle pasoja juridike.

Në këtë mënyrë, nëpërmjet botimit në fletoren zyrtare bëhet i njohur botërisht anëtari i emëruar në gjykatën kushtetuese ex lege. Përsa kohë që ligjet e reformës në drejtësi nuk kanë parashikuar procedurën e botimit të akteve që krijojnë efekte juridike nga mekanizmi zhbllokues, rrjedhimisht KED ndodhej në pamundësi për dërgimin për botim të këtij akti.

Pasojat që sjell botimi në fletore zyrtare ashtu siç thashë është vetëm njohja e publikut me vendimin dhe fuqinë juridike të një akti të prodhuar nga vete ligji.

Botimi i këtij vendimi në fletoren zyrtare njëkohësisht garanton trajtimin e njëjtë të të gjithë anëtarëve të zgjedhur të Gjykatës Kushtetuese, pavarësisht se janë zgjedhur nga Presidenti, nga Kuvendi si edhe ato te zgjedhur ex lege, duke garantuar njohjen botërisht të aktit të tyre të emërimit në këtë gjykatë.

Akuza se unë si Ministër Drejtësie apo stafi i Ministrisë së Drejtësisë me veprimet tona kemi kryer shkelje penale është thjesht kulmimi i show-t presidencial (një kulmim mjaft komik do të thosha, po të mos bëhej fjale për Presidentin e Republikës së Shqipërisë)!

Kur botimi në fletore zyrtare nuk ka sjellë as rrëmbimin e kompetencës së Presidentit për gjyqtaren kushtetuese dhe as pasojën për sa kohë ka të bëjë vetëm me njohjen e asaj që ka urdhëruar ligji automatikisht. Mund te konstatohet lehtësisht se e vetmja pasoje është dalja e Presidentit jashtë kornizës ligjore dhe përgjegjësive të tij kushtetuese.

Por meqenëse Presidenti ka dorëzuar kallëzimin penal ndaj meje në SPAK, rezervoj të drejtën të mos jap asnjë koment mbi këtë kallëzim, në respekt të ligjit dhe funksionit të institucioneve të reja të Drejtësisë që kanë dalë nga reforma në drejtësi.

Një informacion të detajuar mbi analizën ligjore dhe faktet do t’u shpërndahet të gjitha mediave.

Faleminderit

korona-7.jpg
Autor E14:44 | 27/02/2020

Ka shkuar në 528 numri të prekurve nga koronavirusi në Itali, ndërsa ka informacione pozitive sa i përket pacientëve të sëmurë.

Mediat italiane raportojnë se deri pak më parë kanë ndërruar jetë 14 persona, kurse 46 të tjerë kanë rekuperuar plotësisht nga sëmundja.

Dita sot nisi me 432 të prekur, por numri u rrit ndjeshëm gjatë orëve të dreskës, kur dolën përgjigjet e analizave të një numri të madh kampionesh të marra sëfundmi.

Virusi është përhapur edhe në pjesë të tjera të Europës, ku gjatë 24 orëve të fundit janë konfirmuar rastet e para në Estoni, Danimarkë dhe Rumani.

Përballë kësaj situate, ku Irani dhe Italia janë ndër vendet që po përhapin më shumë koronavirusin krahas Kinës, Izraeli ka vendosur që të ndalojë futjen e italianëve në territorin e tyre. /abcnews.al

kongresi-ps.jpg
nev ila13:57 | 27/02/2020

Anëtarë dhe votues të PS-së i kanë dërguar Kongresit një kërkesë për mocion për Reformimin e partisë.

Në kërkesën paraqitur Kongresin ata kanë bërë një sërë propozimesh për ndryshime, mes të tjera që dhe mandati i kryetarit të partisë të kufizohet deri në dy.

Sipas mocionit, kreu i PS nuk mund të jetë as president, as kryeministër dhe as kryetar bashkie.

Në këtë kërkesë anëtarët e PS thonë se to të ndërmerren të gjithë nismat ligjore për amendimin  endryshimve që iu bën kushtetutës në 2008, sipas tyrë këto amendime do t ëshmangin cdo përqendrim të pushtetit në një institucion apo individ të vetëm.

Në kërkesë Partia Socialiste përmend edhe faktin e vjedhjes së votave i cili sipas tyre duhet ndëshkuar ligjërisht pavarësisht kohës se kur provohet krimi elektoral dhe pavarësisht statusit politik që mund të kenë personat e përfshirë në këtë.

Në kërkesën e tyre anëtarët e PS theksojnë se bërja publike e kësaj kërkese bëhet me qëllimin që cdokush të ketë mundësinë që të njihet vetë me përmbajtjen e këtij mocioni dhe të përcaktojë lirisht e me bindje të plotë qëndrimin personal ndaj tij.

E shtuna është dita më e rëndësishme e Kongresit 3-ditorë të Partisë Socialiste. Krahas zgjedhjes së anëtarëve të Asamblesë Kombëtare, në këtë Kongres do të votohet dhe për ndryshimet në statut.

Kanë nënshkruar Mocionin:

-Arta Dade,

-Eva Teqja (Allushi),

-Ibrahim Sulaj,

-Irena Beqiraj,

-Luan Zhegu,

-Maqo Lakrori,

-Nazmir Bilani,

-Përparim Bodinaku…

Letra e plotë:

“Letra e personaliteteve të PS drejtuar kryetarit të Partisë

Numri i mandateve partiake të kryetarit, Sekretarit të Përgjithshëm dhe sekretarëve të Partisë Socialiste të Shqipërisë kufizohet deri në dy.

Drejtuar: Përfaqësisë së Kongresit të Partisë Socialiste të Shqipërisë, të dt.29 shkurt, 2020

Lënda: Mocion për Reformimin e Partisë Socialiste të Shqipërisë

– Cilido porositës dhe përfitues i manipulimit dhe vjedhjes së votave në zgjedhjet brenda partisë përjashtohet përgjithmonë nga Partia.

Përshëndetje!

Jemi disa votuese dhe votues të Partisë Socialiste; midis nesh ka edhe anëtare/ë të saj. Përmes kësaj letre dëshirojmë që t’ju njohim me një mocion për reformimin e Partisë Socialiste të Shqipërisë. Mocioni përcakton objektivat kryesorë të reformimit dhe propozon një paketë me 10 ndryshime e plotësime themelore në Programin dhe në Statutin e partisë. Kërkojmë nga ju, paraqitjen e tij për votim në Kongresin e PS, të dt. 29 shkurt 2020.

Kjo letër do të bëhet publike me qëllim që çdo anëtare dhe anëtar i PS, çdo votuese dhe votues i PS, çdo simpatizante e simpatizant i saj, e po ashtu edhe çdo qytetare e qytetar tjetër i Republikës së Shqipërisë, kudo që ndodhet – në vend dhe në emigracion – të ketë mundësinë që të njihet vetë me përmbajtjen e këtij mocioni dhe të përcaktojë lirisht e me bindje të plotë qëndrimin personal ndaj tij. Ne besojmë se shumica do ta mirëkuptojë dhe do ta mbështesë këtë mocion për reformim, pasi reformimi përmirëson Partinë Socialiste e për pasojë përmirëson edhe qeverisjen që i bëhet vendit në emër të saj dhe të votueseve e votuesve të saj.

Mocion për Reformimin e Partisë Socialiste të Shqipërisë

Vazhdimi i misionit politik afatgjatë për të cilin u krijua Partia Socialiste e Shqipërisë në vitin 1991 dhe zgjidhja e problemeve ekonomike, sociale e politike që përjeton vendi ynë në këtë periudhë zhvillimi (përfshirë edhe mbrojtjen nga fatkeqësitë natyrore dhe shërimin e pasojave të tyre), kërkojnë sot një reformim të thellë cilësor të Programit politik dhe të Rregullave të funksionimit të saj.

Objektivat e mocionit

Parti me liri fjale, votim të ndershëm, vendimmarrje dhe drejtim kolegjial.
Parti me integritet, e pakapshme nga korrupsioni dhe krimi i organizuar.
Parti që realizon qeverisje të majtë demokratike, që mbron dhe shërben interesat themelore të shtetasve shqiptarë, kudo që jetojnë dhe punojnë.
Paketa me ndryshime e plotësime në Program dhe në Statut

1.Partia Socialiste e Shqipërisë punon për ndërtimin e një shteti solidar me shtetasit e vet, që garanton me ligj të drejtat dhe liritë themelore të njeriut dhe krijon mundësi materiale për realizimin e tyre, duke filluar nga niveli i domosdoshëm për ushqim, veshje, strehim, shërbim shëndetësor, arsimim, punësim dhe lëvizje të lirë.

2.Përfaqësuesit e Partisë Socialiste të Shqipërisë në institucionet shtetërore legjislativë dhe ekzekutivë, qëndrorë dhe vendorë, janë të detyruar politikisht që të hartojnë e të zbatojnë programe qeverisës me natyrë të majtë demokratike, si dhe të korrigjojnë çdo veprim të mëparshëm qeverisës, që nuk respekton këtë detyrim, pavarësisht se kur është kryer.

3.Partia Socialiste e Shqipërisë dhe grupi i saj parlamentar, do të ndërmarrin nismat e nevojshme ligjore për amendimine ndryshimeve që iu bënë Kushtetutës së Republikës së Shqipërisë në vitin 2008.

4.Amendimet përfshijnë vendosjen e një sistemi zgjedhor që e bën Kuvendin e Shqipërisë më përfaqësues të vullnetit të popullit, fuqizon kontrollin parlamentar të ekzekutivit dhe shmang çdo përqëndrim ”de jure” e ”de facto” të pushtetit shtetëror në një institucion apo individ të vetëm.

5.Partia Socialiste e Shqipërisë mbështet politikisht dhe publikisht veprimtarinë e drejtësisë së reformuar dhe të institucioneve të saj, përfshirë SPAK dhe BKH, për pastrimin e klasës politike drejtuese në pushtet dhe në opozitë nga korrupsioni dhe bashkëpunimi me krimin e organizuar.

Këtu përfshihen:

(a) – Verifikimi sistematik dhe pa asnjë përjashtim i pasurisë së të gjithë personave që kanë kryer, kryejnë ose do të kryejnë funksionet e presidentit të Republikës, kryetarit të Kuvendit, kryeministrit, ministrit, deputetit, kryetarit të bashkisë;

(b)- Konfiskimi i pasurive të tyre të paligjëshme;

(c)- Dënimi sipas ligjit i personit abuzues, pavarësisht funksionit politik që ka patur, që ka aktualisht apo që mund të ketë në të ardhmen.

Partia Socialiste mbështet politikisht dhe publikisht ndëshkimin ligjor, politik dhe publik të manipulimit dhe vjedhjes së votave, që mund t’i bëhet çdo lloj forme të shprehjes së vullnetit të popullit (zgjedhje parlamentare e vendore, referendume,për çështje me interes publik, qëndror dhe vendor).

Ndëshkimi ligjor është i mundshëm pavarësisht kohës se kur provohet krimi elektoral dhe pavarësisht statusit politik të personit apo personave porositës, manipulues dhe vjedhës të votave.

6 .Kandidatët e Partisë Socialiste për deputet, kryetar bashkie dhe këshilltar vendor propozohen nga organizatat socialiste të zonës zgjedhore vendore në të cilën ato veprojnë.

7.Kandidatët zhvillojnë fushatë parazgjedhore në parti e në komunitet dhe përzgjidhen me votim të fshehtë. Forumet partiake drejtuese,që shpallin emrat e kandidatëve zyrtarë të Partisë Socialiste të Shqipërisë në zgjedhjet parlamentare dhe vendore, detyrohen që të respektojnë propozimin e organizatave socialiste.

8.Përndryshe,duhet të argumentojnë mospajtimin e vet me anëtarësinë socialiste të këtyre organizatave dhe të kërkojnë prej tyre rivotim të fshehtë;ky rivotim është vendimtar.

Cilido porositës dhe përfitues i manipulimit dhe vjedhjes së votave në zgjedhjet brenda partisë përjashtohet përgjithmonë nga Partia Socialiste:

(a) -pavarësisht kohës kur e ka dhënë porosinë dhe/ose kur ka përfituar nga manipulimi dhe vjedhja e votës;

(b) – pavarësisht funksionit, që mund të ketë patur ose vazhdon të ketë në parti apo në pushtetin legjislativ dhe ekzekutiv.

8.Funksionet e kryetarit, sekretarit të përgjithshëm dhe sekretarëve të Partisë Socialiste të Shqipërisë janë të papajtueshëm me funksionet e presidentit të Republikës, kryetarit të Kuvendit, kryeministrit, ministrit dhe kryetarit të bashkisë.

9.Numri i mandateve partiake të kryetarit, sekretarit të Përgjithshëm dhe sekretarëve të Partisë Socialiste kufizohet deri në dy.

10.Në Partinë Socialiste njihet e drejta për oponencë kolektive të organizuar në forumet partiake vendimmarrëse qëndrore (Kongres, Asamble Kombëtare, Kryesi), si garanci strukturore për mbrojtjen e demokracisë së brendshme, respektimin e programit politik në qeverisje dhe shtimin e aftësive vetkorrigjuese të partisë. Oponenca kolektive merr formë të organizuar dhe funksionon vetëm pasi platforma e saj të jetë mbështetur me votim të fshehtë nga të paktën 20% e anëtarëve të partisë.

Për të siguruar arritjen e të gjithë objektivave të mocionit, paketa zbatohet e plotë. Kjo paketë është konceptuar si një strukturë unike, e përbërë nga 10 njësi në lidhje logjike mes tyre, që të gjitha të domosdoshme për të arritur reformimin e synuar.

Për këtë arsye, paketa i paraqitet Kongresit për t’u votuar si një e tërë , me “Po” ose “Jo”.

Njësitë 1-5 dhe 6-10 integrohen përkatësisht në Programin dhe në Statutin e partisë. Ky integrim shoqërohet me të gjitha ndryshimet dhe plotësimet e tjera të nevojshme, bazuar në tekstin dhe në frymën e njësive 1-10″.

Vijon../abcnews.al

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono