Intervista

dodik.jpg
ad min15:48 | 16/10/2019

Anëtari serb i presidencës së Bosnje e Hercegovinës, Milorad Dodik, në një intervistë ekzluzive për ABC News u shpreh i bindur se Bosnja nuk do të mbijetojë. Ai theksoi se republika serbe mund t’i bashkohet Serbisë pas precedentit të krijuar nga Kosova.

Idro Seferi – ABC News: A është Bosnja një problem i pazgjidhur për ju?

Dodik: Bosnja dhe Hercegovina për vetë faktin që është konstituuar vetëm pas luftës, është problem i pazgjidhur. Unë nuk jam aventurier dhe nuk bëj asnjë plan timin të bazuar në ndonjë luftë. Por, gjithsesi e bazoj në politikat e mia. Unë jam njeri që ka qenë në krye të qeverisë së Republikës Serbe dhe jam hequr nga ky post me disa veprime të bashkësisë ndërkombëtare. Bashkësi e cila solli një qeveri tjetër në Republikën Serbe. Por pesë vjet më vonë me mbështetje mbi 50 për qind jam votuar dhe jam kthyer në vitin 2006, dhe deri më sot fitojmë në të gjitha zgjedhjet; këtu tek ne zgjedhjet bëhen ҫdo dy vjet dhe asnjë herë nuk kemi humbur. Kjo tregon se politika ime është e bazuar drejtpërdrejt në mbështetjen e njerëzve dhe unë nuk manipuloj me këtë. Njerëzit e dinë mirë që ajo që u them në fushatë qëndron edhe jashtë saj. Dhe, nuk mund të lejojmë të ndodhë që sa herë të shohim një amerikan apo britanik, të tmerrohemi. Nuk duhet të jetë ashtu dhe ata duhet të na frikësohen ne, kur të vijnë këtu. Kjo jo në kuptimin që do tu ndodhë ndonjë gjë fizikisht, por që ta dinë që kemi qëndrim të qartë për këtë. Kam dëgjuar shpesh nga administrata amerikane të më kenë thënë se ky është interes kombëtar i SHBA dhe unë u përgjigjem që ky nuk është interesi im kombëtar. Ata më thonë, se nuk u intereson kjo dhe unë u them që as mua nuk më interesojnë gjërat e tyre. Këtu I bie të jem unë i keqi, natyrisht kur ata kanë shumë më shumë fuqi se sa unë.

Idro Seferi – ABC News: Ekziston mundësia që Republika Serbe të shkëputet, t’i bashkohet Serbisë, të shpallni pavarësinë në rast të ҫfarëdo ndryshimi në Ballkan?

Dodik: Po natyrisht, përse jo? Përse është e lejuar që të krijohet stereotip që Kosova mund të jetë në një perceptim të Perëndimit shtet, kurse Republika Serbe nuk mund të jetë? Kur, pothuajse kushtet janë të ngjashme. Kam lexuar diku një deklaratë të Kreford, ai ka qenë ambasador në Bosnje dhe Hercegovinë dhe pas asaj ka qenë në vitet 2000 ambasador në Beograd. Kur ka dalë në pension ka folur, pasi si ambasador ka punuar nën urdhra. Në një tubim në Budapest, pas daljes në pension, ka treguar se si bashkësia ndërkombëtare është e padrejtë, pasi në kushte gati të njëjta si në Kosovë, ku thuhet se shqiptarët ose shqiptari, nuk mund të jetojnë së bashku me serbët pasi historikisht nuk tolerohen, luftojnë, vriten, bëjnë kampe, dhunojnë gratë etj. Por bashkësia ndërkombëtare thotë Kosova mund të shkëputet dhe ka të drejtë. Por, siҫ thotë ambasadori, në Bosnje dhe Hercegovinë, thonë se serbët dhe myslimanët nuk munden të jetojnë bashkë, në histori kanë qenë në konflikte të vazhdueshme, në anë të kundërta të historisë, luftojnë, gjithmonë në luftë kanë qenë në anë të kundërta, kanë bërë krime njëri ndaj tjetrit, kanë bërë kampe, dhunuar gra, kanë vrarë fëmijë dhe bashkësia ndërkombëtare thotë duhet të heshtni dhe të rrini bashkë. Këtë e thotë ai. Unë konsideroj se kemi të drejtë në bazë të preambulës së Kombeve të Bashkuara, e cila thotë se populli ka të drejtë në vetëvendosje. Ndoshta nuk duhet të dëshmoj që populli serb ka karakteristika të popullit. Besoj se populli serb do të ketë rastin që të deklarohet për këtë. Elita politike boshnjake gabon, pasi nuk lejon dhe nuk jep kurrfarë garancie për serbët, që të ndihen mirë në Bosnje dhe Hercegovinë. Gjithҫka që ata duan është t’ia imponojnë mendimin e tyre Republikës Serbe dhe serbëve; dhe gjasme të hakmerren ndaj serbëve, të cilët kanë mbrojtur shtëpitë e tyre, familjet. Ata që kanë kryer krime le të përgjigjen, por është e pamundur që për krimet ndaj serbëve të mos përgjigjet askush. Ky fakt edhe më shumë e rëndon Bosnje dhe Hercegovinën, edhe më shumë e ndan,  dhe më shumë largon mundësinë që ajo të mbijetojë./abcnews.al

klajda-gjosha-1280x721.jpg
nev ila19:06 | 15/10/2019

E ftuar në studion e ABC News me gazetaren Juli Xhokaxhi mbrëmjen e sotme ka qenë Klajda Gjosha. Gjosha ka folur në lidhje me negociatat dhe procesin e Shqipërisë drejt integrimit. Sipas saj, qeveria shqiptare ka patur një mangësi të theksuar në përmbushjen e kushteve që i janë vendosur.

Gjithashtu Gjosha tha se, opozita ka ofruar zgjidhjen e saj për krizën politike, dhe se është e gatshme të ulet, e të diskutojë me mazhorancën pa kushte për reformën zgjedhore. Ajo theksoi se Europa nuk është çështje dashurie siç e quan kryeministri por një çështje detyrimesh dhe përgjegjësish.

Pjesë nga intervista në studio me Klajda Gjoshën: 

Juli Xhokaxhi: Sa gjasa ka që Macron të ndryshojë mendje?

Klajda Gjosha: Shpresoj që këtë herë të mos përsëritet situata e vitit 2016 ku vendet nuk arritën të dalin në një vendim të përbashkët sepse ky do të ishte precedenti i dytë, në atë kohë nuk arritën në një vendim të përbashkët për shkak të Turqisë ndërsa tani me sa duket molla e sherrit është pikërisht Shqipëria më pak Maqedonia e Veriut. Vendet e tjera janë për pro dhe për një ndarje të kësaj dysheje që shkon drejt procesit të integrimit megjithatë do të uroja që Shqipëria të mos kthehet edhe në një pengese për Maqedoninë e Veriut.

Juli Xhokaxhi: Sa gjasa ka të shkojë drejt një divorci të Shqipërisë dhe Maqedoninë e Veriut në vendimin përfundimtar?

Klajda Gjosha: Franca e ka kërkuar me kohë këtë dhe kjo nuk do të ishte mirë për Shqipërinë sepse do na çonte shumë vite pas dhe do ti shtonte rrugëtimit tonë vështirësi të pafundme por ndoshta edhe vite të gjata në këtë proces. Duket shumë e vështirë që Franca të heqë dorë. Është e para herë që shkohet me rekomandim pozitiv dhe aty përballesh me kushte të vendeve anëtare gjë e cila nuk ka ndodhur asnjë herë sepse vendet anëtare kanë marrë gjithmonë një vendim politik. Pra i gjithë procesi teknik ka kaluar përmes Komisionit evropian dhe vendimi ka qenë më pas politik. Vendet anëtare janë duke u kthyer më teknike se vetë komisioni evropian.

Juli Xhokaxhi: Kryeministri Rama sot ka thënë që negociatat janë çështje e brendshme e BE dhe jo se Shqipëria nuk ka arritur të plotësojë kushtet dhe kriteret. Një pjesë e zyrtarëve të lartë kanë thënë se Shqipëria ka ende shumë për të bërë. Kë duhet të besojmë ?

Klajda Gjosha: Patjetër që BE ka problematika të saj sepse ka të bëjë me vetë reformimin e BE por kjo nuk i pengon vendet si shqipëria që të ecin përpara me proceset në bazë të meritave. Diskutimet më të mëdha kanë të bëjnë me kushtet, kriteret dhe standardet, Shqipëria ka patur një mangësi të theksuar në plotësimin e kushteve. Fakti që në 2018 Shqipërisë iu vendosën kushte iu dha edhe një datë, dhe institucionet tona në momentin që duhet të vendoseshin në një punë kolosale dhe në vend që mazhoranca ti shtrinte dorën opozitës, për të vazhduar të përmbushte kushtet nuk bëri asgjë. Asgjë nuk u bë për përmbushjen e këtyre kushteve. Bundestagu gjerman ka qenë i prerë, deri në plotësimin e kushteve të vendosura nuk ka një datë të çeljes së negociatave.

Juli Xhokaxhi: Si është e mundur që Bundestagu gjerman jep një PO me kushte të fuqishme, dhe ministri i jashtëm gjerman jep sot një parantezë të tillë?

Klajda Gjosha: Mos harrojmë se edhe ministri jashtëm vjen nga një parti politike. Bundestagu gjerman është mbi kancelarinë. Është e qartë që Shqipëria do të ketë kushte për këtë çështje.

Juli Xhokaxhi: Ka një element që vlen të përmendet, Maqedonia e Veriut iu kërkua marrëveshja për ndryshimin e emrit me Greqinë, Shqipërisë i është kërkuar reforma në drejtësi, sa rrezikon BE në këtë moment që të zhgënjejë pritshmëritë e qytetarëve?

Klajda Gjosha: Nuk është e njëjta gjë të ndryshosh emrin dhe të firmosësh një marrëveshje e cila ka qenë historike për Maqedoninë e Veriut ndërsa Shqipëria ka kosto, thoni ju, por ka kosto për mirë për të përmirësuar një sistem. Shpresa te ajo reformë ka qenë shumë e madhe. Janë dy çështje të ndryshme. Tashmë vendet anëtare duan të shohin edhe implementimin e reformave. Shqipëria ka patur gjithmonë ligje të mira por zbatimi i tyre ka patur probleme.

Juli Xhokaxhi: Sot ka qenë kryeministri italian Giuseppe Conte në Shqipëri i cili ka shprehur mbështetjen e Italisë në lidhje me hapjen e negociatave. Sa vlen një aleat si Italia?

Klajda Gjosha: Italia ka qenë gjithmonë mbështetëse. Italia është një vend që ndahet në kufi me Shqipërinë dhe i intereson stabiliteti ekonomik dhe politik i Shqipërisë sepse qytetarët shqiptarë që largohen drejt Italisë nuk janë mirë për të. Italia di të bëj mirë kalkulimet e saj.

Juli Xhokaxhi: Si funksionon çështja e vetos?

Klajda Gjosha: Do të mjaftonte vetëm Franca kundër, dhe do të thotë një JO e prerë për çeljen e negociatave me Shqipërinë.

Juli Xhokaxhi: Si do të reflektoje politika shqiptare ndaj një PO-je apo një JO-je nga BE?

Klajda Gjosha: Përgjegjësi për procesin e integrimit kanë të gjitha palët, por ekzekutivi është ai që vepron ndaj këtyre proceseve. Ne kemi ofruar një zgjidhje, e cila e pranon të ulet me mazhorancën e të diskutojmë në lidhje me reformën zgjedhore. Ndaj përgjegjësia është shumë me e madhe e qeverisë. Për sa kohë kryeministri e konsideron procesin e integrimit si një çështje dashurie nuk do kemi asnjëherë asnjë rezultat. Evropa është proces përgjegjësie dhe detyrimesh./abcnews.al

BISEDE-NE-STUDIO-DERVISHAJ.mpg_snapshot_09.07-1280x720.jpg
ent ela17:49 | 14/10/2019

Këshilltari Ligjor i Presidentiti Bledar Dervishaj vlerëson raportin përfundimtar të Komisionit të Venecias në lidhje me kërkesën e mazhorancës se kreu i shtetit shkeli kushtetutën me zhdekretimin e datës së zgjedhjeve.

Në këndvështrimin e tij Dervishaj thotë se në asnjë paragraf nuk përmendet termi shkelje e kushtetutës nga ana e presidentit as në nivelin e ulët, as të rëndë.

“Në asnjë paragraf nuk përmendet termi shkelje e kushtetutës nga ana e Presidentit, as në nivelin e ulët, as të rëndë. Edhe konstatimi i tejkalimit të kompetencave u hoq në draftin përfundimtar.

Është praktikë pune që ekspertët pasi mbledhin faktet nga çdo institucion hartojnë një raport.

Kërkesa erdhi për një ndihmë imediate. Ky opinion u kërkua me procedurë të përshpejtuar. Ata pranojnë që faktet nuk përbëjnë kusht”.

Sipas tij  interpretimi përfundimtar i mbetet Gjykatës kushtetuese.

“Jurisprudenca jonë kushtetuese thotë që interpretimi përfundimtar i mbetet Gjykatës kushtetuese. kemi të bëjmë me një konflikt institucional kompetencash. Komisioni i Venecias është opinion këshillimor”.

I pyetur për vlefshmërinë e 30 qershorit Dervishaj shprehet se i takon gjykatës kushtetuese të vendosë, por mungesa e saj është një nga shkaqet e krizës.

“Vlefshmëria e 30 qershorit, Komisioni i Venecias është treguar i kujdesshëm për këtë se ka dhe në fakt një kërkesë të depozituar për antikushtuetshmërinë e zgjedhjve dhe për fatin e  tyre do shprehet Gjykata Kushtetuese edhe mungesa e Gjykata Kushtetuese ishte një nga shkaqet e krizës. Kodi Zgjedhor nuk parashikon zgjedhje me një kandidat”. /abcnews.al

 

 

frrok-cupi.jpg
ad min18:10 | 11/10/2019

Çmimi Nobel për austriakun Peter Handke, ithtar i Sllobodan Millosheviçit ka krijuar polemika të mëdha në radhët e shkrimtarëve, por jo vetëm.

Analisti dhe gazetari i njohur Frrok Çupi ka mendimin se të gjitha armiqësitë që shfaqen ndaj Handke sot do të zhduken në të ardhmen. Sipas Çupit, politika ka futur dorë në këtë Çmim Nobel.

“Nuk do doja kurrsesi që një shkrimtar i cili mohon një luftë dhe një sens lufte mes kosovarëve të robtuar prej një pushtimi, prej një dhune Millosheviçiane dhe pjsesë së bombardimeve nuk do doja, por do doja një talent siç është Peter Handke dhe për të zhvilluar pak më tej po ju them se as ABC, as ABC në Amerikë, as kujtimi i Millosheviçit, as armiqësia midis Kosovës dhe Serbisë nuk do të ekzistojnë në kohën që do të ekzistojnë librat e Handke. Librat e Handke janë të pavdekshëm, Aarti është i pavdekshëm, gjithmonë. Kështu që në këtë moment më duket se ka dy çështje, duke bërë atë çfarë do thuhet pas 100 vjetësh.

Pas 100 vjetësh do përmendet Handke, nuk do përmendet pjesa e dytë. Duke shkuar tek kjo unë e shikoj se çfarë po ndodh rreth këtij çmimi Nobel, shikoj se ka futur dorë politika e cila ka mbetur bosh dhe tenton të marrë zvarrë popujt e tyre. Mua më duket se politika është kthyer në pikën më të keqe të Aristotelit. Aristoteli thotë se politika e keqe, që nuk do të mbaj përgjegjësira, i thotë popujve teksa duhet të ngasësh parmendën, duhet të mbash pushkën në krahë dhe vulën në xhep për çdo gjë që do ti duhet shtetit. Populli nuk zgjidh çështjet e artit. Populli zemërohet nëse ti i thua kjo gjë apo ajo gjëja tjetër”, thotë Frrok Çupi.

Së dyti, thotë Çupi, ka ndodhur neuroza e mbrojtjes. Sipas gazetarit, një pjesë e botës e ka pritur shumë mirë Peter Handke. Nga ana tjetër, Çupi thotë se sëbashku me politikanët janë renditur shkrimtarët periferikë dhe militantë të cilët nuk e mbështesin.

“Çështja e dytë që ka nxitur këtë çështje mendoj se është neuroza e mbrojtjes. Në kuptimin që shiko si janë rreshtuar. Bota është ndarë në dysh në raport me Handke. Në Gjermani është pritur me lavdi shumë të madhe. Në Austri është pritur me lavdi shumë të madhe. Ndërsa shkrimtarët periferikë, militantë në të gjithë botën janë vënë në radhën e politikanëve që po sulmojnë artin e këtij shkrimtari, duke shkuar deri tek Salman Rushdie. Ai thotë që nuk e pranon këtë shkrimtar. Salman Rushdie është shkrimtar i madh, por i dalë nga politika, i frustruar nga politika dhe këtu them pse shkojmë tek psikoza e mbrojtjes. Ai dhe shkrimtarë të tjerë të radhitur te politika padyshim që do mbrojnë veten”, tha Çupi./abcnews.al

kastriot-islami.jpg
nev ila18:02 | 10/10/2019

Kryeministri Edi Rama, ai i Maqedonisë, Zoran Zaev dhe Presidenti i Serbisë, Aleksandër Vuçiç miratuan sëbashku këtë të enjte deklaratën bazë në të cilën konfirmohet vullneti për të formuar një union ballkanik.

Ish-ministri i Jashtëm, Kastriot Islami duke komentuar këtë çështje tha se nuk e kupton sa serioze është kjo nismë. Gjatë një interviste në ABC News me gazetaren Juli Xhokaxhi, Islami tha se kjo nuk i takon kryeministrit Rama.

Për më tepër, sipas ish-ministrit, kreu i qeverisë ka ngelur në klasë në lidhje me çeljen e negociatave. Ndërkohë, Islami u tregua i ashpër edhe me letrën e ish-ministreve që ia drejtuar Holandës ku kërkonin të mos bllokohej çelja e negociatave.

“Të pesëmbëdhjetë që i bashkon ata janë pjesë e servilizmit ndaj Edi Ramës”, tha Islami për ministrat.

Kastriot Islami: Edi Ramës nuk i takon kjo gjë sepse Edi Rama nuk i ka bërë detyrat e shtëpisë. Edi Rama ka ngelur në klasë. Nesër është mbledhja e ministrave të Jashtëm, pas një jave është e kryeministrave dhe Edi Rama ka ngelur në klasë. Duke ngelur në klasë kërkon të krijojë idenë që të nxjerrë tetë gratë, tetë kukullat e tij që nuk i njeh asnjëri në shqipëri dhe shkojnë tetë kukullat letër që ia jep Endri Fuga.

Juli Xhokaxhi: Është diskriminim gjinor ky…

Kastriot Islami: Ato janë kukulla.

Juli Xhokaxhi: Kukulla politike, ta sqarojmë.

Kastriot Islami: Kukulla politike se po t’i thoja kukulla do i lavdëroja, por s’janë as kukulla.

Juli Xhokaxhi: Jo për zonjat me këtë gjuhë.

Kastriot Islami: Kukulla politike dhe përveç kukullave politike ka edhe 7 burra që janë kukulla politike, janë manekinë. Të 15 janë manekinë. Të 15-të që i bashkon ata janë pjesë e servilizmit ndaj Edi Ramës. Nuk ka të bëjë kjo me gra e me burra. Mos më kalo tek gratë se kam respekt për gratë.

Juli Xhokaxhi: Të mbetemi tek kjo e Ballkanit që të mos kalojmë. Thjesht për ta sqaruar sepse shpesh përcillet keq në opinion.

Kastriot Islami: Le ta përcjellin, nuk kam hall nga Mero Baze unë se ça do shkruajë. Absolutisht.

Juli Xhokaxhi: Jo emra kolegësh.

Kastriot Islami: Më vjen keq që e ke koleg.

/abcnews.al

INTERVISTA-RAMA-IDRO.mpg_snapshot_03.58-1280x720.jpg
ent ela16:20 | 10/10/2019

Kryeministri Edi Rama flet nga Novi Sadi për marrëdhënien me Serbinë, realitetin e ri në Kosovë dhe sfidat e rajonit por edhe të Shqipërisë. Me shefin e ekzekutivit shqiptar bisedoi gazetari ynë në Beograd Idro Seferi.

Kryeministri ka deklaruar se takimi i Novi Sadit nuk duhet paragjykuar pasi nuk është përjashtues për askënd. Ai ka theksuar se sigurisht që temë me Serbinë është dhe Kosova dhe dialogu. Por, siç ka theksuar nuk ka për qëllim ta anashkaloj. Ai në intervistë ka folur për marrëdhëniet me Albin Kurtin si fitues i zgjedhjeve dhe bisedat që i ka patur me presidentin serb, Alleksandar Vuçiç, me të cilin ka diskutuar për çështjet rajonale.

Rama ka thënë se dialogu është i domosdoshëm për të zgjidhur problemet në Ballkan pasi do të jetë i vështirë një progres pa marrëdhënie të mira bileterale. Ai është shprehur optimist për takimin e Novi Sadit dhe konkretizimin e tij në Ohër. /ABC News Albania 24/7

mesila-doda-1.jpg
ad min17:48 | 09/10/2019

“Ne negociata duke përdorur kazuse të tilla nuk kemi për të bërë. Kemi një mendim tonin lidhur me problemet e sistemit politik, por që të futemi në negociata me dikë që është garanti i kësaj politike që është sot nuk kemi ndërmend të futemi, për arsyen sepse është treguar sa herë që ulemi të dialoguar si politikanë gjendemi përpara një personi që e keqpërdor edhe dialogun politik”.

Kështu u shpreh sekretarja e Përgjithshme e PDIU-së, Mesila Doda, pasi u pyet nëse reforma zgjedhore po përdoret për të ulur palët politike në tavolinë. Gjatë një bisede në studion e ABC News, me gazetaren Juli Xhokaxhi, ajo u shpreh se problemi në Shqipëri nuk është me sistemin zgjedhor, por me vullnetin politik.

“Nuk dua t’i hyj çështjes në vetvete, por dua të kuptojmë këtë. Po me këtë sistem janë bërë disa zgjedhje me të cilat OSBE thoshte që janë arritur standarde shumë të mira. Kësaj radhe nuk u arritën standardet dhe kjo do të thotë që nuk është çështje e sistemit, është çështje e vullnetit politik. Nëse nuk ka vullnet banditë do të jenë më shumë herën tjetër.

Nuk do të kemi përmirësim të klimës politike, nuk do të kemi përmirësim të sistemi politik. Do kemi problemin tjetër që do votojnë njerëzit, por nuk do të votohen partitë. Do kemi një shifër akoma më të madhe dhe një rrëmujë akoma më të madhe. Pra le të themi që në thelb nuk kam asnjë probleme për sistemin, të gjitha sistemet janë të pranueshme në demokraci. Në rastin tonë nuk është çështje sistemi, por mentaliteti dhe duhet të ndahet njëherë e mirë krimi nga politikanët”, tha Mesila Doda, sipas të cilës sa herë që Rama ka qenë në krye, zgjedhjet kanë qenë të shkatërruara./abcnews.al

mesila-doda.jpg
ent ela17:23 | 09/10/2019

Sekretatrja e përgjithshme e  PDIU- së Mesila Doda ka bërë akuza të forta për kryeminsitrin Edi Rama sa i takon çështjes çame. E ftuar në studon e ABC News, Doda akuzon kryeministrin Rama se e ka shitur dhe keqpërdorur çështjen çame.

Rama e ka keqpërdoruar çështjen çame. E kemi parë kur dikur ngrinte zërin ën mbrojtej të çështjes çame, por e kemi parë sesi e ka shitur dhe ka harruar çështjen çame, ka arritur deri aty sa të heqë nga librat e historisë së çështjes çame. Do keni shkresa pas ca ditës për çështjen çame. Flitet për diçka shumë të rëndë”. /abcnews.al

arben-malaj123.jpg
ad min19:32 | 08/10/2019

Banka Botërore ndryshoi parashikimet për rritjen ekonomike të Shqipërisë për vitin 2019. Në konferencën ku u paraqit Raporti Ekonomik Rajonal për Ballkanin Perëndimor, Banka Botërore korrigjoi treguesit duke thënë se ekonomia shqiptare do të rritet me 2.9 për qind nga 3.8 për qind që kishin parashikuar në fillim të këtij viti.

Eksperti i ekonomisë dhe i financave, Arben Malaj, tha këtë të martë se rënia me 1% e rritjes ekonomike nuk është lajm shqetësues. Gjatë një interviste për ABC News, ai theksoi se vendi është i varura nga burimet energjetike dhe për këtë arsye duhen gjetur mënyra të tjera konkurruese për të rritur ekonominë.

Rënia me 1% e rritjes ekonomike është lajm jo i mirë, por jo shqetësues, në kuptimin që jo ndonjë gjë e madhe ka ndodhur. Duhet të theksojmë se kjo ulje është kryesisht për rënien e prodhimit të energjisë. Nuk mund justifikohemi më që jemi kaq të varur nga shiu. Një vend kur bën një strategji afatgjatë mendon si të ushqejë më mirë rritjen ekonomike. Ne kemi historikisht varësi nga burimet energjetike, por duhet të gjejmë sektorë të tjerë ku jemi më konkurrues dhe nuk na lenë ne në mëshirë të fatit. Rritja më e madhe  është e rëndësishme në dy aspekte. Së pari rrit të ardhurat në duar që marrin njerëzit dhe e dyta na zvogëlon distancën me vendet e tjera të BE-së dhe pastaj në mënyrë graduale me vendet tradicionale të BE-së. Ky mesazh i BB, parashikimi që bën në vijim mendoj se ka nevojë për disa reforma thelbësore në ekonomi dhe vonesa në këto reforma krijojnë shqetësime”, tha Malaj.

Për këtë ai mori në shembull studimin e FMN-së në Bosnjë në lidhje me kompanitë publike.

“Nga një rishikim kritik i FMN-së, po të menaxhoheshin me kujdes rritja arrinte në 3.5. Unë mendoj që po të menaxhohen në Shqipëri rritja mund të jetë 1.5, pra ja nga e nxorrëm një burim”, tha Malaj./abcnews.al

edit-harxhi.jpg
ent ela19:47 | 07/10/2019

“Ajo që ndodhi dje në Kosovë nuk është thjesht ndryshimi i sistemit dhe kastës politike. Ishte një largim i Kosovës nga sistemi i kalbur. Ka rëndësi ajo që ndodhi dhe mënyra qytetare e zhvillimit të zgjedhjeve”.

Kështu u shpreh në studion e Mbrëmje në ABC News ish zv/ministrja e jashtme Edith Harxhi, e cila theksoi se pa te qytetarët e Kosovës përgjegjësi, shpresë dhe optimizëm.

“Ajo qytetari që nuk krahasohet me asnjë vend të Evropës Lindore. Ata dukeshin dje skandinavë. Përgjegjësia e qytetaria për të shkuar në qendrat e votimit. Kishte një optimizëm të brendshëm. Shihja që qytetarët kishin marrë përsipër një ndryshim dhe VV ndoshta nuk e ka pritur që do ishte e para. Ajo që dua të theksoj është që jam prekur shumë nga mënyra si Kosova i ka zhvilluar këto zgjedhje. Kurti e Osmani këto dy prurje të reja që po sfidonin”.

Sipas saj mënyra e zhvillimit të zgjedhjeve në Kosovë duhet marrë shembull.

“Jo vetëm ne duhet të marrim shembull, por është e disata herë që Kosova, shqiptarëve iu bën një nder shumë të madh. Ata shpesh na zbardhin faqen për kaq vjet sa kemi bashkë”.

Ish numri dy i diplomacisë shqiptare vlerëson Albin Kurtin dhe Vjosa Osmanin, tek të cilët qytetarët e Kosovës panë shpresë dhe ndryshim

“Kjo votë është ndëshkuese dhe shpresë e ndryshim, dhe ndryshimin, qytetarët e Kosovës e kanë parë te këto dy fytyra, kundër stanjacionit dhe njerëzve që përdorën luftën.

Të dy kanë marrëdhënie të mira me njëri-tjetrin. Kemi të bëjmë me një model që fatkeqësisht kosova e vazhdon që prej viti 2000, një model hibrid që Kosova nuk po arrin pas këtyre 20 viteve të krijojë modelet ideologjike dhe ajo ka shumë nevojë të formësohet ideologjikisht. Natyrisht që VV dhe LDK do shkojnë drejtë kësaj për interesin e qytetarëve të Kosovës. Duhet të kemi parasysh që LDK do e ketë të vështirë që të puqë programet me VV. VV  është forcë e majtë, Kurti ka thënë që unë gjithçka mund të ndryshoj, por jo ideologjinë time të majtë”.

/abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono