Provokacija

albatros-rexhaj-1280x751.jpg
ent ela21:50 | 15/02/2019

Shkrimtari Albatros Rexhaj ishte i ftuar në “Provokacija”, ku është shprehu se fetë janë të domosdoshme.

 “Nëse nuk janë të dobishme janë të domosdoshme. Kur të mungon mbështetja prej sistemit, prej shoqërisë dhe është një boshllëk shpirtëror që njerëzit e plotësojnë atë”.

Më tej ai është shprehur se koncepti për fetë në Kosovë është më i konsoliduar sesa në Shqipëri.

“Në Kosovë besimi është më i konsoliduar. Ne nuk e kemi pasur dogmën komuniste të ashpër sikundër ka qenë në Shqipëri. Kur ka një traditë fetare të konsoliduar nuk ka hapësirë për interpretime ektreme. Shqipëria, për mendimin tim është vendi i ekstremeve. Ka një pjesë që është shumë konservative dhe ka pjesë që është është ekstrem liberale. Kosova është pak në ujëra më mesatarë. Si popull si atje e si këtu ne i përqafojmë idetë ekstreme. Në paralelizëm, komunistët më të poshtër në rajon kanë qenë komunistët shqiptarë. E kam fjalën për në rajon, në Ballkan, komunistët më të poshtër kanë qenë komunistët shqiptarë. Ka pasur komunistë edhe në Greqi, edhe në Mal të Zi, në Kroaci, por nuk kanë qenë kaq të ashpër sikundër kanë qenë komunistët shqiptarë. Tani edhe në idetë tjera më ekstreme shqiptarët dalin si më të ashpër. Kjo ka të bëjë me gjenetikën tonë”./abcnews.al

enii-1280x744.jpg
ent ela21:22 | 15/02/2019

Juristja Eni Çobani ka folur për herë të parë për aksidentin, ku makina e saj doli nga rruga në Tropojë. Në studion e emisionit “Provokacija” Çobani ka zbuluar se ka shkuar dhe përfunduar gjyqin, edhe pse ishte shumë e lënduar.

“Sigurish unë nuk kam folur kam hezituar të flas për shumë arsye. E para që jam akoma shumë shpejt dhe kanë kaluar vetëm dy javë. Sigurisht që ju shikoni Enin nga jashtë edhe duket mirë, por ata problematikat e brendshme si emocionale të atij momenti të vështirë janë akoma. Do të duhet pak kohë që ta rikuperosh vetveten. Megjithatë unë e quaj vetën pa e përsëritur dhe sikundër ju e thanë se jam njeri me fat. Sepse në atë pozicion dhe ishin banorët e atij qyteti që ma konfirmuan do ishte shumë e vështirë që të shpëtojë, ose të paktën nuk ka shpëtuar askush. Aty thuhej se kam rënë 24 metra.

Unë po zhvilloja një gjykim atje dhe isha në seancën e fundit dhe me dëshirën e mirë që të mos zvarritej edhe procesi pasi nuk dua të jem unë problematika e moszgjidhjes së një problemi por të jem zgjidhja. Mora rrugën dhe mendova që po e përfundoj, e përfundova në fakt që unë në ato kushte shumë të vështira që nuk është përmendur në fakt dhe po e përmend dhe bëra një gjest ku vajta në gjykatë dhe mbarova gjyqin. Më pas jam kthyer me lëndime shumë të forta drejt Tiranës.

Gjyqi ishte pasi ndodhi aksidenti. Gjest heroik ose jo unë ashtu e ndjeva ta bëj, më sugjeruan në fakt që të mos shkoja, por e ndjeja që duhej të shkoja. Nuk e di janë disa momente që, të them të drejtën e ndjeva se ndoshta Zoti më shpëtoi për atë që vajta. Unë isha shofere e mjetit dhe unë mbaj mend çdo gjë. Unë njihem si shofere e mire dhe ndoshta ka qenë shpejtësia e vogël me të cilën unë po ecja që të na këtë shpëtuar. Unë nuk e kam humbur koshiencën në asnjë moment. Kam qenë koshiente që nga momenti kur kuptova se diçka po ndodhte me mjetin dhe deri në momentin kur përfunduam në përrua”./abcnews.al

spiro-1280x838.jpg
ent ela20:43 | 15/02/2019

Ministrja për Shtetin dhe Marrëdhëniet me Parlamentin, Elisa Spiropali, e ftuar në emisionin “Provokacija”, në ABC News duke folur për protestën e nesërme është shprehu se opozita bën gjithmonë të njëjtë gjë, por pa rezultat. Madje ajo nga fundi i bisedës është shprehur se edhe nëse do e ndanin pushtetin me opozitën, sipas saj nuk ka ndonjë gjë të keqe.

“Në fakt për ta bërë pak më përfshirëse për të mos u dukur që ne kemi barrikada apo ndonjë problem të madh me opozitën që në fakt nuk e kemi, ne do donim shumë që të kishim një opozitë konstruktive. Madje do donim shumë që edhe në zgjedhje… edhe të ndanim pushtetin me  nuk ka asnjë gjë të keqe në kuptim elektoral. Disa bashki mund t’i qeverisin ata disa bashki mund t’i qeverisim ne. Por kështu si po shkon ne e shikojmë shumë të vështirë që opozita ta marrë veten”.

Teksa fliste për protestë ajo tha se opozita nuk do fitojë asgjë nga ai tubim.

“Sigurisht që dy partitë kanë të drejtë të bëjnë protesta. Gjithmonë do këtë arsye për të protestuar. Kanë 4 vjet që bëjnë protesta dhe çdo herë janë gjithmonë e më pak. Është në kufijtë e naivitetit që të bësh gjithmonë të njëjtën gjë dhe të presësh rezultate të ndryshme. Njerëzit nuk janë këtu për të dëgjuar klithma të dëshpëruara. Duan të tregojnë ide se për çfarë do qëndrojnë ata aty, çfarë vizioni kanë këta njerëz. Epo pushtet për pushtet patjetër që kanë qeverinë që kanë zgjedhur me votë. Problemi që u ka dalë përpara është Edi Rama dhe nuk dinë si ta shkulin”.

Më tej Spiropali ka folur për përplasje që pati Edi Paloka dhe Kryeministri Rama, seancën e fundit në Kuvend.

“Nuk e di nëse Kuvendi është i shthurur, por është patjetër i marrë peng. Nuk ka simetri mendoj unë dhe çdo qasje për t’i bërë të gjithë njësoj vetëm shmang mbajtjen e përgjegjësisë. Është një përpjekje e përgjithshme opozitare për të hequr dorë nga format e dialogut, për t’ua kthyer këtyre sjelljeve që minimalisht janë të turpshme dhe maksimalisht janë anti-kombëtare. Imagjinoni kur goditet një Kryeministër, imagjino si mund të ndihet një mjek që mund të përballet me lloj-lloj horri”.

Gjithashtu Spiropali, tha se një grua në politike nuk duhet të viktimizohet.

“Të jesh grua në politikë patjetër që je më vunerabël Ne nuk viktimizohemi sepse e kemi marrë atë përgjegjësi. Mbi raportin me gruan dhe mbi termat seksiste ka një raport në të gjithë politikën në përgjithësi. Këtë duhet ta ndryshojmë dhe kemi bërë disa përpjekje shumë të mira me Kodin e Sjelljes në Kuvend me rregulloren e re që dënon edhe gjuhën diskriminuese kundër grave”.

Ministrja ka folur edhe për rastin e vajzës së përdhunuar në Kavajë ku nuk preferoi të jete detaje nga takimi që kishte pasur me të.

“Po vajzën e kam takuar, por nuk dua të flas për këtë gjë. Ajo ishte e pa rrëzuar dhe shumë inteligjente dhe kam bindjen që ajo vajzë do bëhet dikush. Unë e kam ndjekur nga fillimi në fund dhe jam në kontakt të vazhdueshëm me ta. Patjetër ishte me vullnetin e tyre dhe ata donin të dilnin në të gjitha kamerat për të folur për politikën. U trajtua aq paturpësish nëpër studion televizive dhe këtu biem të gjithë dakord. U përmendën edhe detaje të rastit që asnjëherë nuk duhej të ishin publikuar. Gjyshi më erdhi në zyrën time dhe më kërkoi që të ndalej kjo mizori dhe të bënte një apel. Unë në fakt fola në emër të tij në reagimin e dytë. Ata kërkonin të jepnin një mesazh publik”./abcnews.al

nano-1280x748.jpg
ent ela20:17 | 15/02/2019

Kemi parë më se njëherë Kryeministrin Rama që na ka dhënë lajmin se familjes X, Y apo Z i është meremetuar shtëpia, i është bërë si e re, apo i është ndërtuar nga e para. Rama në raste të tilla është gjithnjë atje, në vendin e ngjarjes, i shoqëruar nga kamerat dhe gazetarët e televizionit më të çuditshëm mbi faqe të dheut, ERTV, të cilët, pasi e kopsitin mirë lajmin, ua përcjellin televizioneve të tjera, përfshirë edhe atyre kombëtare.

Ka diçka që nuk shkon në këtë mes. Madje, ka disa gjëra që nuk shkojnë. Dhe janë gjëra shumë serioze. Ne Ramën e kemi zgjedhur që të bëjë punën e Kryeministrit, dhe me këtë i kemi deleguar të drejtën e detyrën për të harxhuar në mënyrë të mençur e të arsyeshme buxhetin e shtetit, me fjalë të tjera të ardhurat që merren prej taksapaguesve. Dhe t’i harxhosh këto para në mënyrë të mençur e të arsyeshme, do të thotë t’i harxhosh për vepra që u shërbejnë të gjithëve.

Nuk është se kjo kompetencë që i është deleguar i jep atij, si Kryeministër, të drejtën që, me të parë një familje që të këput shpirtin, fap, si me magji, përdëllimin ta shndërrojë në bamirësi. Nëse shihet kështu, atëherë jemi në rastin e keqkuptimit më banal që mund t’i bëhet funksionit të kryeministrit, s’ka gjë se në thelb paratë kanë shkuar për një kauzë të mirë, të drejtë. Të bësh të lumtur një familje është një kauzë e mirë, apo jo? Mirëpo, përsëris, nuk është kjo puna e kryeministrit.

Ky i fundit çdo qindarkë duhet ta harxhojë për një vepër publike, prej së cilës potencialisht, në mos një ditë, një ditë tjetër, përfitojnë të gjithë, dhe vepra të tilla janë shkollat, çerdhet, rrugët, ambulancat, urat, fasilitete të policisë, ushtrisë, administratës, etj, etj. Dhe jo për të nxjerrë nga halli njërin apo tjetrin. Por edhe sikur ky arsyetim që sapo bëra të mos na i mbushte mendjen, edhe sikur të supozonim që Kryeministri bën mirë që u ndodhet pranë njerëzve të tillë në nevojë, prapëseprapë do na lindte ndonjë pyetje: Mbi ç’kriter i zgjedh ai familjet që duhen ndihmuar? Ka Kryeministria ndonjë listë hallexhinjsh, ka Kryeministri ndonjë ekip që i shoshit e i peshon me kujdes hallet e të gjithëve, dhe vetëm pas këtij procesi zgjedhin më të këputurin?

Jo, nuk ka asnjë mundësi ta bësh një shoshitje e një renditje të përpiktë e të drejtë të hallexhinjve të Shqipërisë. Sepse halli hallit nuk i ngjan. Sepse sidoqë të vendosë Kryeministri, edhe sikur të ketë disponimin më të virgjër për t’iu ndodhur pranë më të këputurit, ai në fund nuk do zgjedhë më të këputurin. Familja e zgjedhur do të jetë thjesht një familje fatlume. Bingo!

Vini re: Nuk thashë se ai i zgjedh me kritere politike, nuk thashë se ai po ndihmon vetëm socialistët, nuk e di këtë gjë, madje nuk kam dëgjuar që të jetë dhënë ndonjë provë apo të jetë bërë ndonjë akuzë për këtë, por ky fakt nuk e bën gjestin më të pranueshëm. Gjesti mbetet absurd, arbitrar, paternalist, fyes, shkapërdar, dhe abuziv. Dhe përcaktorin e fundit, ABUZIV, nuk është se e shtova për të zgjatur efektin stilistik të enumeracionit. Jo, është tamam abuziv. Sepse Kryeministri në këtë rast e trajton buxhetin e shtetit si ta kishte qesen e vet.

Dhe abuzimi shtohet kur sheh Kryeministrin që e shet këtë si një ngjarje me rëndësi kombëtare, madje – kjo është ç’është – si një bëmë të madhe të qeverisë e të kryeministrit, si një meritë të madhe të këtyre të fundit. Kryeministri nuk harron asnjëherë të shkojë të përurojë fundin e punimeve, dhe të marrë para kamerave mirënjohjen e hallexhinjve që nuk janë më hallexhinj, që në ndonjë rast shoqërohet me pamje  e vështrime të përlotura, që asnjëherë nuk janë teatrale. Janë lotë të vërtetë. E si të mos jenë?

Do doja t’i bëja një apel kryeministrit: Në keni Perëndi, mos e bëni më këtë gjë! Ngado që t’i vish rreth, është një gjë që nuk duhet bërë. Dhe ju e dini shumë mirë që nuk duhet bërë./abcnews.al

armand-1280x723.jpg
ent ela22:10 | 12/02/2019

Për gazetarin Armand Bajrami, Dritan Dajti ka “nënshtruar gjithë sistemin e drejtësisë”. Në emisionin “Provokacija”, gazetari është shprehur se Dajti arriti të fitojë falë një vendimi të dhënë më 8 Shkurt nga Gjykata e Apelit për Krime të Rënda.

“Vendimi është i çuditshëm në perceptimin popullor. Kjo duhej thënë që në krye të herës se ngjarja e 7 Gushtit 2009 në Durrës pranë pistës “Iliria”, absulutisht që është një ngjarje makabër një ngjarje e përmasave të jashtëzakonshme kriminale. Kemi të bëjmë me 4 policë të vrarë në krye të detyrës. Natyrisht një ngjarje e tillë për autorin e saj meriton ndëshkim shembullor dhe maksimal. Referuar legjislacionit shqiptar është ai i burgimit të përjetshëm. Me këtë çështje,  fitorja e Dritan Dajtit në vendimin e dhënë vetëm pak ditë më parë nga Gjykata e Apelit për Krime të Rënda ishte mbi bazën e legjislacionit të sistemit të drejtësisë që shteti ka.

Dritan Dajti ia doli të nënshtrojë gjithë sistemin e drejtësisë. Ai gjatë gjithë procesit nuk pati avokat mbrojtës dhe gjatë gjithë procesit shfrytëzoi boshllëqet ligjore. Duke pasur para sysh edhe begraundin e tij si një ish-student i drejtësisë ai shfrytëzoi të gjitha hapësirat e mundshme ligjore. Para gjykatës, Dritan Dajti paraqitej pa mbrojtës dhe pa mundësi financiare për të pasur mbrojtje ligjore dhe i kërkonte shtetit dhe gjykatës t’i vendoste një avokat mbrojtës. Avokati kryesisht vinte në sallën e gjyqit dhe për njëmijë e një arsye nuk pranonte ta mbronte Dajtin dhe praktikisht Dajti ishte pa mbrojtje”./abcnews.al

dajtiu-1280x696.jpg
ent ela21:50 | 12/02/2019

Çështja e Dritan Dajtit ndoshta është nga ato rastet që mund të quhet një ngjarje e mirëfilltë hollivudiane. Për gazetarin Armand Bajrami, ngjyrat e personazhit “hollivudian”, Dajti i ka marrë që në vitin 2003 kur u arratis nga Gjykata e Tiranës.

“Ngjyresat e hollivudianit Dritan Dajti i ka marrë që në 2003 nga arratia nga Gjykata e Tiranës. Ka qenë një skenar më shumë sesa për një film hollivudian. Nga salla e gjyqit, nga seanca e radhës që kishte në Gjykatën e Tiranës ka gjetur një pistoletë, e cila ishte vendosur më herët në tualetin e gjykatës dhe ka dalë me armën në dorë dhe madje është përballur me prokurorin e çështjes në korridor dhe ka pasur një të shtënë në ajër në atë moment.

Më pas, Dajti ka dalë nga gjykata dhe ka ikur në një motoçikletë që e priste tek dera e gjykatës dhe ka udhëtuar në sensin e kundër të lëvizjeve në Unazë. Bëhet fjalë për Gjykatën e Tiranës tek godina pranë Lanës dhe është ngjitur në drejtimin e Drejtorisë së Policisë Tiranë, ndërkohë që automjetet e policisë shkonin në një drejtim të kundërt. Që nga ajo kohë ai vazhdoi të jetonte në arrati për disa vite më radhë deri në 2009, ku gjatë operacionit dhe përpjekjes së Policisë së Shtetit për ta arrestuar ndodhi ajo që ndodhi”, tha Bajrami në emisionin “Provokacija”./abcnews.al

agroniii.jpg
G. P.20:59 | 12/02/2019

Zgjedhjet vendore të këtij viti do të mbahen më 30 Qershor. Ende është herët për të folur për kandidatët të cilët do të garojnë. Por Agron Duka në “Provokacija” tregoi nëse do të kandidojë për Bashkinë e Durrësit apo jo.

Ai theksoi se këtë do ta mendonte ta bënte vetëm nëse do të dilte i vetëm dhe jo si kandidat i përbashkët me opozitën.

Agron Duka: Nuk më pëlqen faktikisht të dal si kandidat i përbashkët. Ndoshta nëse do të dal i vetëm është për t’u menduar se në fund të fundit mund të jetë detyrim i grupit shoqëror që të tregojmë dhe ne forcën tonë.

Mustafa Nano: Shanset do jenë më të mëdha nëse do jeni krah opozitës?

Agron Duka: Varet. Thonë që politika është e artit të së pamundurës. Unë edhe mund ta provoj vetëm, kurse në koalicion nuk e kam menduar ndonjëherë të dal. Por ne kemi caktuar grupe pune që po identifikojnë persona që mund të kandidojnë në disa bashki, të cilën do tentojnë të fitojnë./abcnews.al

agron-duka1.jpg
G. P.20:42 | 12/02/2019

Partia Demokratike bëri publike një platformë bashkëpunimi për të gjitha partitë e vogla të opozitës. Mirëpo për Agron Dukën, ajo platformë duhet përmirësuar në përsa i përket Kodit dhe reformës Zgjedhore si dhe bujqësisë përndryshe do të rishikojë marrëdhëniet me opozitën. Deklaratën, kreu i PAA-së e bëri në emisionin “Provokacija”.

“Na ka ardhur një platformë nga PD, ku nuk vihet prioriteti mbi bujqësinë dhe kjo do jetë një nga arsyet, ndoshta përveç asaj që ne e quajmë kryesore reforma zgjedhore e Kodi Zgjedhore, të cilat nëse nuk përmirësohen në këtë platformë bashkëpunimi edhe mund edhe të na ndajnë pavarësisht se jemi në opozitë mund të dalim të ndarë në zgjedhjet e ardhshme. S’ka pakënaqësi. Në një platformë bashkëpunimi duhet të vihet një paragraf i theksuar për bujqësinë dhe si mund të zhvillohet bujqësia në të ardhmen. Nëse kjo nuk bëhet njëlloj si ligji zgjedhor, atëherë ç’mund të presim. Të paktën të na thuhet, të konsultohet me ne, dhe nëse vendosim këto pika atëherë mund të gjykojmë në marrëdhëniet tona në të ardhmen me opozitën. PD bëhet fjala sepse ata e kanë bërë këtë lloj platforme.

Më ka ardhur një shkresë që është publikuar dhe në media, të cilën do e shoh me njerëzit e mi, anëtarët e kryesisë, por që fillimisht siç u mundova t’ju shpreh kam opsionet e mia pasi aty reforma dhe Kodi Zgjedhor nuk përmenden, gjithashtu dhe bujqësia. Nëse do të na realizohen, të paktën teorikisht të jetë e vendosur në këtë lloj platforme ne nuk do të pranojmë që nesër të hyjmë në zgjedhje me PD-në. Por kjo nuk ndryshon asgjë në qëndrimet tona me marrëdhëniet e mazhorancës”, u shpreh Duka.

Megjithatë, kritika mbi këtë platformë për kodin zgjedhor dhe bujqësinë nuk do të thotë refuzim sipas Dukës. Ai theksoi se kjo që paraqet PAA është kundërofertë ndaj platformës së bashkëpunimit të prezantuar nga PD.

“Jo nuk e refuzoj. Unë i jap një kundër-ofertë dhe i them që duhet të shohë Kodin dhe reformën zgjedhore si dhe bujqësinë. Të jenë të parashikuara në këtë platformë bashkëpunimi”, u shpreh Duka./abcnews.al

agron-duka.jpg
G. P.20:26 | 12/02/2019

Opozita ka paralajmëruar një protestë të madhe më 16 Shkurt në kryeqytet. Kreu i Partisë Agrare Ambientaliste, Agron Duka, i ftuar në emisionin “Provokacija deklaroi se do të jetë padyshim në protestë. Ai renditi edhe disa arsye pse do të protestojë.

“Pa dyshim që do jem atje. Kudo që kam pasur rastin në media e kam thënë këtë sepse kam arsye që të jem. Për gjendjen ekonomike, për problematikat si qytetarë shqiptarë sepse jemi në vazhdën e atyre protestave të kohëve të fundit, filluar nga Kukësi, studentët për naftën, bujqësinë e kështu me radhë”, tha Duka.

Ai përjashtoi çdo bashkëpunim të mundshëm për aq kohë sa çështjet që PAA përfaqëson nuk merren parasysh nga qeveria. Duka theksoi në “Provokacija” se kryeministri nuk është pro dialogut.

“Deri në atë moment, kur mendojmë që punët për atë çështje që përfaqësojmë nuk ecin ashtu siç duhet, natyrisht që e përjashtojmë. Dhe e përshëndesim kur ka iniciativa të mira siç është rasti i heqjes së TVSH-së për imputet bujqësore, e cila ka efekt direkt për bujqësinë, por nga ana tjetër bëjnë një gabim që zerojnë efektin pozitiv të kësaj duke kompensuar fermerët nga 20 në 6%.

Është një skemë e tillë, kur grumbulluesi duhet t’ia faturojë ose fermerëve ose konsumatorëve. Në këtë moment ai pozitivitet që sjell heqja e imputeve zerohet nga negativiteti që sjell kjo masë, për të cilën ne kemi bërë vazhdimisht takime. I kemi dërguar dhe një letër kryeministrit, bile duhet të them në studion tënde që nuk është ndonjë tip që dialogon shumë.

Thuhet pse duhet të ngrihemi në protesta, pse duhet ta ngrejmë me forcë, ja pra ne e kemi provu ta ngrejmë dhe me dialog. Kemi bërë takim me fermerët, me biznesin, me grupet e interesit, i kemi dërguar shkresë kryeministrit, zv/kryeministrit dhe ministrave të linjës dhe nuk kemi marrë asnjë përgjigje”, u shpreh Duka./abcnews.al

mustafa-nano.jpg
G. P.20:09 | 12/02/2019

Në monologun e kësaj puntate të emisionit “Provokacija”, moderatori Mustafa Nano u ndal në deklaratën që një basketbollist serb bëri për një gazetën Blic. Nikolla Kaliniç theksonte se çështja e Kosovës duhet lënë mbrapa dhe se serbët duhet të merren vesh me njëri-tjetrin. Megjithatë për Nanon, kjo nuk është ndonjë deklaratë shumë e habitshme pasi shumë njerëz në Serbi e kanë këtë logjikë. Mirëpo për rrezikun që ka ndërmarrë duke e thënë këtë, Kaliniç vlen të vlerësohet.

Mustafa Nano: “Ja një lajm interesant: Basketbollisti serb Nikolla Kaliniç, në një intervistë për gazetën serbe “Blic”, ka thënë mes të tjerave se “mjaft më me Kosovën, le të merremi vesh me shqiptarët dhe le të shohim përpara; lëri të tjerat, por nuk jemi as ata që ne kujtojmë se jemi, sot jemi një pikë e vogël dhe e parëndësishme në hartën e madhe të botës dhe në kundërshtim me ç’thuhet e besohet prej nacionalistëve, nuk jemi një popull qiellor, asnjëherë nuk kemi qenë”.

Siç shihet, nuk është se thotë ndonjë gjë kushedi se çfarë. E megjithatë në Serbi nuk janë të shumtë ata që i mendojnë, e aq më pak, ata që i thonë gjëra të tilla. Dhe është ky fakt që më së shumti e komprometon shoqërinë e sotme serbe: Pafuqia për të menduar, apo frika për të thënë, gjëra kaq të qarta, të kuptueshme, logjike, normale. Në këtë kuptim, basketbollisti Kaliniç meriton të duartrokitet e të përshëndetet. Meriton të përshëndetet që është mendjehapur, që ka guximin për t’iu kundërvënë histerive e paranojave nacionaliste në vendin e vet, e në përgjithësi për të thënë ca të vërteta të thjeshta e bazike që bien keq në veshin e shumicës, në mos në veshin e të tërëve, ndonëse për këtë i duhet të paguajë një kosto. Ka rrezik që të shpallet – ju kujtohet drama e Ibsenit? – “armik i popullit””.

Por Nano u ndal te gazetari Enver Robelli, i cili i ka sjellë në vëmendje shqiptarëve këtë ngjarje. Mirëpo sipas Mustafa Nanon, Robelli në këtë deklaratë thjesht ka pëlqyer faktin që një serb ka denoncuar sojin e tij. Mirëpo, Nano bën një dallim midis veprimit të Kaliniçit dhe rastit të Xhakës e Shaqirit. Sipas tij, rasti i dy shqiptarëve të Zvicrës duhej kritikuar sepse janë dy veprime të ndryshme dhe nuk mund të ekzaltohesh prej të dyjave.

Mustafa Nano: Dhe Enver Robelli ka bërë mirë që ia ka sjellë lexuesit shqiptar këtë ngjarje. Mirëpo unë dyshoj që Robelli të ketë kapur moralin e kësaj fabule. Unë kam frikë se Robellit në këtë mes thjesht i ka pëlqyer fakti, që një serb denoncon sojin e vet. Ndodh shpesh mes nesh kjo gjë, apo jo? Ne kënaqemi pa masë kur marrim vesh se ndonjë serb mban qëndrime kritike ndaj establishmentit politiko-kulturor e ndaj shoqërisë së vendit të vet. Po kështu, edhe kur ndonjë grek është kritik ndaj marrëzive greke. Dhe këtë kënaqësi nuk e provojmë ngaqë na emocionon e vërteta, apo guximi për të thënë të vërtetën, guximi për të lënduar tabú të paprekshme, e në përgjithësi për të denoncuar fiksime e paragjykime kolektive. Jo, jo, ne kënaqemi që një serb apo grek bëhet medemek “antiserb” apo “antigrek”, ne kënaqemi, pasi kjo kritikë, në mendjen tonë, është një gjë që provon bindjen tonë se serbi është i lig, greku është i lig, ja, edhe vetë po e thonë, apo se vetëm shqiptari është i mirë. O sa mirë me qenë shqiptar!

Jam i prirur të besoj që Enver Robelli e ka mirëpritur këtë qëndrim të Kaliniçit bash për këtë arsye. Të ishte ndryshe, ai nuk do të kishte dalë publikisht – sa për të marrë një rast, ë? – për të shprehur ngazëllimin e vet prej gjestit të Xhakës e Shaqirit gjatë ndeshjes Serbi-Zvicër, përkundrazi, do ta kishte kritikuar këtë gjest krejt të pavend e provokativ, do ta kishte kritikuar me po atë disponim antinacionalist, që në këtë rast e ndihmon të pëlqejë Kaliniçin, do ta kishte denoncuar si një teatër që nuk ka fare lidhje me atdhedashurinë e patriotizmin, ose që të jem më konkret, nuk ka fare lidhje me çfarë Robelli ka pëlqyer kaq shumë te Kaliniçi. Veprimi i Kaliniçit nga njëra anë dhe ai i Xhakës e Shaqirit nga ana tjetër bien ndesh me njëri tjetrin. Nuk mund të ekzaltohesh prej të dyve. Mund të ekzaltohesh o prej njërit, o prej tjetrit. Prandaj Robelli, mendoje pak këtë punë”!/abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono