Provokacija

fjodora-fjora-1280x839.jpg
nev ila23:52 | 24/01/2020

Gazetarja Fjodora Fjora ka qenë e ftuar mbrëmjen e sotme në “Provokacija” me Mustafa Nanon. Ajo ndau mendimin e saj në lidhje me mentalitetin e dhunshëm që sipas saj kanë meshkujt shqiptar.

Gazetarja Fjora tha se ka patur edhe mikesha të saj që kanë qenë të dhunuara dhe disa prej tyre i janë nënshtruar dhunës.

Shoqëria shqiptare sipas saj ka mungesë kulture pasi përdorimin e dhunës e shohin si zgjidhje të problemeve.

Pjesë nga biseda në studio:

Fjodora Fjora: Kam punuar që 16 vjeç, kam punuar dhe si  kamarjere, si asistent kamarjere. Kishim emigruar me familjen në Greqi dhe nga nevoja më duhet të punoja. Po edhe në tiranë kam punuar shitëse. Mendoj që puna nuk është asnjëherë turp, ndërsa sot për disa puna është turp dhe nuk e di arsyen se përse të rinjtë e sotëm nuk duan as të dëgjojnë, as të punojnë, dhe as të kulturohen, që është problemi më i madh. Mendoj që thelbi i gjithë bisedës dhe problemet që kemi ne si shoqëri duke marrë shkas edhe nga ngjarjet e fundit, kur vritet një femër, ose një femër dhunon një fëmijë në mënyrë çnjerëzore është mungesa e thellë dhe e madhe e kulturës që ne kemi si komb.

Mustafa Nano: Jemi më të dhunshëm se sa vendet e tjera, e shohim dhunën si mjetin më të parë për zgjidhjen e problemit.

Fjodora Fjora: Mënyra si i jemi afruar ne edukimit është përmes dhunës. Merre zorrën dhe fute në banjo. Fëmijëria jonë e brezave që kanë kaluar nuk kanë qenë të karakterizuar nga kjo; futi një shpullë që ti vijë mendja në vend. Sikur kemi dëshirë ta bëjmë dhunën pjesë të edukimit tonë dhe për fat të keq po vazhdon. Jemi kthyer në qenie që justifikon dhunën dhe më e keqja nuk e luftojmë atë. Këtu ka një mungesë të madhe besimi, në Amerikë apo në vende të tjera kudo në botë, kur shohin dikë që dhunohet në rrugë thërrasin menjëherë policinë, këtu tek ne është e tmerrshme.

Mustafa Nano: Këtë që thua e ke parë vetë apo e keni nga të dëgjuarat?

Fjodora Fjora: Drejtpërdrejtë nuk i kam parë. Por kam mikesha të miat që kanë qenë pre e dhunës, nga ana e bashkëshortëve kryesisht sepse ata e konsiderojnë si pronë të vetën gruan, në këtë shoqërinë tonë, për fat të keq nuk e heq njeri nga mendja nuk e kanë pronë. Mikesha të miat në fakt kanë vuajtur në heshtje, unë personalisht nuk jam gjendur në të tilla situata, nuk e kam provuar nën lëkurë. Unë mendoj që jam kundra kësaj mënyre sjelljeje por ka të bëjë edhe me faktin se njeriu edhe e zgjedh diçka të tillë.

Mustafa Nano: Ju po thoni mikesha tuajat, çdo të thotë?

Fjodora Fjora: Do të thotë që kanë qenë mikeshat të miat, vajza të kulturuara, me punë të mira që kanë qenë të dhunuara.

Mustafa Nano: Ju i kuptoni këto vajza?

Fjodora Fjora: Jo nuk i kuptoj por di të them që për fat të keq femrat e pranojnë shumë dhunën në Shqipëri. Di që është rritur nr i  madh i divorceve në Shqipëri./abcnews.al

aristotel-spiro-1280x712.jpg
nev ila23:23 | 24/01/2020

Gjuhëtari Aristotel Spiro ishte i ftuar në “Provokacija” me Mustafa Nanon.

Një akademik i njohur për fushën e gjuhësisë i cili nuk pati asnjë dilemë të deklaronte se ishte një greko-shqiptar krenar dhe gjithnjë e thoshte me krenari që i përkiste të dy vendeve.

Si studiues i gjuhësisë ai tha se emocioni nacional nuk përbën asnjë problem për të dhe në këtë fushë edhe kolegë të tjerë janë mendje hapur si ai.

Pjesë nga biseda në studio:   

Mustafa Nano: Ju jeni studiues shqiptar apo grek?

Aristotel Spiro: Jam greko-shqiptar jam i formuar në Shqipëri, i perfeksionuar në Greqi, kam një dialog të hapur me të gjithë studiuesit vëllezër kudo në botë.

Mustafa Nano: Për një shkencëtar, emocioni nacional është handikap, i bëhet pengesë?

Aristotel Spiro: Besoj se po, bëhet shumë pengesë e madhe kudo, në studimet shoqërore sidomos bëhet një pengesë shumë serioze. Një studiues duhet të jetë mendje hapur, të mos ketë frikë të ketë një studim problematik.

Mustafa Nano: Natyra e pazakontë identitet, ky është një problem apo avantazh për ju?

Aristotel Spiro: E quaj si avantazh. Kam përvojat e mia në Shqipëri, këtu kam lindur dhe mund të kuptoj mentalitetin shqiptar më mirë se sa një grek apo amerikan, duke e kuptuar këtë mentalitet bëhem dhe unë pjesë e këtij identiteti. Nuk më vjen turp të them që kam një komponent shqiptar shumë të fortë.

Mustafa Nano: A e keni të lehtë të integroheni në qarqet akademike shqiptare? Ju jeni edhe pa punë sot sepse e keni zgjedhur ju këtë apo nuk gjeni hapësira?

Aristotel Spiro: Është një periudhë pauze, nuk kam kërkuar, dua të shlodhem pak .

Mustafa Nano: E mendoni të lehtë integrimin në botën akademike shqiptare?

Aristotel Spiro: Po e mendoj shumë të lehtë, kam patur edhe ftesa por mua më ka dëmtuar dicka personale në jetën time, kur mbarova doktoratën në vitin 2000 në Athinë, kërkoja të punoja në universitetin e Athinës ku kisha mbaruar doktoratën, mirëpo nuk kishte një vend pune atje dhe kur i thashë një mikut tim se çfarë të bëja, më tha që të bëja ose akademikun ose biznesmenin. Atëherë u detyrova të hap një biznes personal në Athinë i cili ka lidhje me tekstet, kam marrë me përkthime. Ishte një punë që vajti shumë mirë mirëpo ka krijuar këtë problemin që çdo ditë të re të jem i pavarur të mos kem asnjë shef mbi kokë./abcnews.al

neritan-licaj-1280x743.jpg
nev ila22:53 | 24/01/2020

I ftuar mbrëmjen e sotme në “Provokacija” me Mustafa Nanon ishte i ftuar aktori Neritan Liçaj. Aktori foli për filmin e shumëpërfolur këto ditë në media, “Gjirokastra”. Filmi më i ri i aktorit Liçaj bën fjalë për fatet e njerëzve që kanë përjetuar sistemin e asaj kohe.

Liçaj sqaroi se roli i tij në film dhe filmi nuk kishte të bënte aspak me jetën e Enver Hoxhës ashtu siç është aluduar.

Liçaj gjithashtu sqaroi se filmi duhet të shihet njëherë dhe pastaj të gjykohet pasi është krijuar për të një perceptim i gabuar për shkak të tematikës së ndjeshme që trajton ky film.

Pjesë nga biseda në studio:

Mustafa Nano: Bëhet fjalë për filmin “Gjirokastra”, kanë lindur diskutimet përpara se filmi të dalë, është gjë normale që të diskutohet përpara se filmi të dalë?

Neritan Liçaj: Po është normale, varet nga tema që trajtojnë filmat. Nuk është vetëm fenomen shqiptar. Kjo ndodh edhe në botë, si psh. filmi “Pasioni i Krishtit”, për të cilin pati një debat të madh që përpara se të dalë sepse është një temë e ndjeshme. Zakonisht kur janë tema të ndjeshme ndodh kjo.

Mustafa Nano: Në këtë film luani rolin e Enver Hoxhës, ky ka qenë lajmi. Të vjen pak keq për të tjerët se kanë ngelur pak në hije duke qenë se është bërë film për Enver Hoxhën.

Neritan Liçaj: Në njëfarë mënyre kjo pritej. Megjithatë për të qenë korrekt, nuk është film për jetën e Enver hoxhës dua ta sqaroj këtë sepse është krijuar një perceptim i gabuar sikur është bërë film për jetën e Enverit. Nuk është e tillë absolutisht. Prandaj do të bëja një lutje me shumë përulësi dhe dashamirësi të gjithë këtyre zërave që të përmbahen, të shohin njëherë filmin dhe të mos hamendësojnë përpara sepse akoma ka ndjeshmëri shumë të mëdhaja ky komb nga figura e Hoxhës dhe sistemi që ai krijoi. Mos harrojmë që janë jetë të tëra  njerëzish të shkatërruara nga dhuna e atij sistemi. Të mos aludohet pa parë njëherë filmin sepse filmi ka të bëjë me fate njerëzish, nuk ka të bëjë fare me jetën e Hoxhës, shumë përulësisht e kërkoj që të mos nxitohen. Nuk mund të flasë askush pa parë njëherë produktin artistik.

Mustafa Nano: Kur do e shohim filmin?

Neritan Liçaj: Nuk dihet saktë, sepse është në fazën përfundimtare.

Mustafa Nano: E keni idenë çfarë filmi do të dalë?

Neritan Liçaj: Sigurisht, i njoh skenarin, prandaj them që nuk duhet nxituar, duhet kërkuar informacion më saktë. E kuptoj që portaleve u intereson një titull pak provokativ që të tërheqë klikime etj. por jo kur bëhet fjalë për ndjeshmëri të tilla, që janë ende të freskëta, sepse aty tejkalohet masa.

Mustafa Nano: Keni urrejtje për diktatorin Hoxha, keni një perceptim personal për të?

Neritan Liçaj: Sigurisht, por është tepër personal. Dhe unë kam qenë i lënduar nga ai sistem, dhe detyrimisht jam i prekur. Nuk i takon Neritanit që të përkufizojë këtë gjë./abcnews.al

mustafa-nano-1-1280x647.jpg
nev ila22:15 | 24/01/2020

Përpara disa ditësh u bënë 9 vjet nga dita ku në bulevardin qendror të Tiranës u vranë 4 vetë të pafajshëm, të paarmatosur, të parrezikshëm.

Sa herë që vjen data 21 janar, debati lidhur me përgjegjësitë mbi atë ngjarje mbi atë që ndodhi atë ditë, del gjithmonë gjithnjë një bandill, del gjithmonë një karafil i cili përsëri të njëjtën gjë sureale e të çuditshme.

Pak a shumë thotë që; u vranë vërtet 4 vetë atë ditë por fajin e ka edhe ai që i çoi protestuesit përpara kryeministrisë.

Po e përsëris, pretendimi i tyre është që ka faj edhe ai që i çoi protestuesit përpara kryeministrisë, a thua se kryeministria apo vendi përpara kryeministrisë ishte një thertore, apo është akoma një thertore dhe njerëzit që shkojnë atje janë dele që shkojnë për tu futur në thikë.

Kjo është një nga gjërat më të çmendura që mund të dëgjoj veshi. Për mua është një qëndrim, ose idiot ose i poshtër, ose të dyja bashkë. Të dyja bashkë nuk qëndrojnë se si rregull kush është idiot nuk është i poshtër dhe anasjelltas, kush është i poshtër nuk është i idiot.

Por pse e thonë këtë? E thonë këtë sepse duan shumë që Edi Ramën ta bëjnë edhe vrasës. Edi Rama është çdo gjë tjetër e kësaj bote, por vrasës nuk është.

Ai ka bërë çdo gjë tjetër që kanë bërë edhe paraardhësit e tij madje në disa rrethana ka bërë edhe gjëra që ndonjë paraardhës nuk i ka bërë, por vrasje nuk ka bërë, për fat të mirë ai nuk ka vrarë.

Lidhur me pretendimin në fjalë, me pohimin që thotë se, fajin e ka ai që i çoi protestuesit përpara kryeministrisë, absurditeti i kësaj fraze del edhe nga një fakt shumë i thjeshtë, kjo frazë nuk ka kuptim sepse po të kishte kuptim do ishin vrarë njerëz edhe përpara datës 21 janar ë vitit 2011.

Do ishin vrarë njerëz edhe pas kësaj date. Në vitin e shkuar, për javë të tëra u zhvilluan disa protesta të opozitës ku secila prej tyre ishte e ngjashme me atë të 21 janarit 2011.

Secila prej atyre protestave u parapri nga kanosje të tipit nuk kemi çfarë të bëjmë, protestën e drejton populli, ne nuk jemi më përgjegjës, populli do ti tërheqë zvarrë ata që drejtojnë vendin, pra protestat u paraprinë nga kanosje të tilla,  tamam siç ndodhi në 21 janar. Protestat e vitit të kaluar për javë të tëra ishin të dhunshme, pati njerëz të lënduar.

Pra ishin protesta identike por nuk pati të vrarë, dhe kjo ishte diferenca esenciale kjo ishte gjëja që dallonte protestën e 21 janarit me protestat e zhvilluara vitin e kaluar. Pra nuk pati viktima.

Viktima  nuk pati sepse autoritetet këtë herë nuk e kanë çuar kurrë në mendje që mund të shtinin mbi trupa njerëzish, arsyeja është shumë e thjeshtë, autoritetet këtë radhë më shumë ishin të merakosur që të mbronin jetën e protestuesve se sa të mbronin jetën e atyre që nuk ishin protestues. Kjo pra është arsyeja kryesore që nuk pati viktima.

Pse ndodhi ajo që ndodhi në 21 janar?

Sipas meje, ndodhi ajo që ndodhi, sepse në zyrën e kryeministrit, ishte një vrasës psikopat, sepse në zyrën e kryeministrit ishte një njeri i cili kur i shkoi një ambasador apo një njeri i huaj i rëndësishëm, kur i shkoi një partner i huaj ndërkombëtar, 2 apo 3 ditë përpara se të ndodhte protesta e 21 janarit, dhe i kërkoi që ai si Kryeministër i vendit të Shqipërisë, të bënte kujdes gjatë datës 21 janar, duke qenë se pritej një protestë e fortë, përgjigja e tij ishte shokuese, skandaloze, ishte e ndyrë, ishte ndyrësisht e ndyrë, ai i tha atij të huajit që ti thoshte Edi Ramës që:

“Po preke gjënë më të vogël, do jenë 5 snajper, në të 4 anët dhe unë do jem nga dritarja dhe në mënyrë absolute do goditet, vetëm po nuk e çpoi plumbi”

Ky është shpjegimi i datës 21 janar i vitit 2011. Kështu që pyetja nuk duhet bërë, kush ishte ai apo kush ishin ata që çuan protestuesit përpara kryeministrisë.

Pyetja duhet bërë kush ishin ata që në zyrën e kryeministrit çuan një zuzar të tillë, që flet për snajperë, për plumba dhe flet për mundësinë që edhe ai vetë do qëllonte në një rrethanë të tillë.

Ky monolog është për të gjithë ata që akoma vazhdojnë të mendojnë në mënyrë idiotike se ka faj edhe ai që i çoi njerëzit, protestuesit, të protestonin përpara kryeministrisë, ky ishte monologu im për sonte./abcnews.al   

belina-Budini-1280x729.jpg
nev ila22:36 | 21/01/2020

Belina Budini, Dekane e Shkencave të Komunikimit në UET, ishte e ftuar mbrëmjen e sotme në emisionin Provokacija me Mustafa Nanon.

Budini bëri një rezyme të përgjithshme se çfarë ka përfshirë në librin e saj më të fundit të cilin e ka quajtur “ Ndikuesit” ose “Influencers”.

Budini tha se ky libër ka përmbledhur intervista të disa prej gazetarëve të njohur në vend, të cilët i kanë dhënë në disa prej forumeve universitare.

Në përzgjedhjen e intervistave të gazetarëve, profesoresha e Shkencave të Komunikimit, ka patur parasysh faktorë të influencës, të ndikimit dhe protagonizmit të lartë publik që gazetarët kanë.

Po ashtu Prof. Budini tha se gazetarët ishin më interesantë, në intervistat e realizuara në versionin e folur, se sa në atë të shkruar.

E pyetur nga gazetari Mustafa Nano se cilët nga gazetarët do të veçonte për stilin e të shkruarit, profesoresha u përgjigj se ka disa të preferuar.

Në fakt po flisja për tekstin. Teksti mund të jetë i shkruar, por edhe i folur, por për dinamika të tjera si psh, të performancës televizive, të natyrës, të ritmit etj, mendoj që ka shumë të mirë, dhe ju keni rivalë në këtë aspekt”, tha Budini.

Sipas Budinit disa prej analistëve dhe gazetarëve në Shqipëri janë influentë dhe ndikues për publikun, madje duke cituar dhe gazetarin Andi Bejtja, Budini tha:

“Ndikimi që kam konsideruar në librin tim është ai mbi politikanët, institucionet. Binomi që kam shqyrtuar aty është media-politikë, pra gazetarë-politikanë. Përballë politikanëve, gazetarët janë shpesh në një rrjetë marrëdhëniesh të dyanshme, të tipit ndikues dhe ndërveprues me njëri-tjetrin. Po të citoja Andi Bejtjan ai është kritik në këtë aspekt, ai thotë që ka gazetarë që punojnë për të fshehur çështje me dinamika të caktuara, pra bëjnë një temë e cila nuk është temë dite duke shmangur vëmendjen e çështjeve kryesore”, tha ajo. /abcnews.al

bejko.jpg
ger ta22:23 | 21/01/2020

Poeti Sadik Bejko ishte i ftuar në “Provokacija” me Mustafa Nanon. Mes të tjerash Bejko u ndal edhe tek viti 1972, në festivalin efamshmë të 11-të. Bejko si autori i teksteve të tre këngëve të atij festivali, u dënua, duke u larguar nga Tirana dhe punoi në minierë.

Poeti rrëfen periudhën kur iu desh që të bëjë një punë të vështirë fiizke, ndërsa thekson se arriti ta përballojë.

“Ajo ka qenë një periudhë shumë e gjatë, një periudhë vetekontrolli dhe vetë-izolimi që ishe i detyruar ta bëjë. Atëherë kishte shumë inskenime, ishte shumë lehtë për ta futur një njeri në burg. Nëse kjo ishte faza e parë për tu futur në burg, unë mendova se këtë fazë e kalova.

Kishte një gjë, unë nga një njeri i shkollës në Tiranë vete të punoj tani një punë të rëndë, atë të minatorit. Kur e përballova këtë punë pas n jë muaji e pashë që unë mund ta bëjë këtë. Pastaj e pata më të lehtë në jetë, se në mimierë është ligji i të fortit dhe unë u rendita te të fortit. Kjo më jepte një siguri që nuk do kisha nevoja tu lutesha njerëzve nesër. E pashë që kjo është miniera dhe mendova se ky do jetë edhe burgu nesër’, tha ai.

Teksa kalvari për Sadik Bejkon fillon pikërisht nga ato tekste këngësh, ai shprehet se liberalizmin në muzikë e aprovoi vetë Enver Hoxha, por më pas u tërhoq. Sipas tij mundet që kjo të ketë qenë askohohe një kurth, por nuk përjashton edhe rrethanat ndërkombëtare në politikën e asaj kohe.

“Mori një goditje politike. Një këngë ta zëmë si ajo që ka marrë çmin e parë është kënduar edhe disa herë tani mbrapa.

Kjo u bë me udhëzim, ishte Todi Lubonja që ishte drejtor i përgjithshëm i televizionit. U bënë ndryshime, në galerinë e arteve pati vepra të guximshme për kohën. U bë një festival i rinisë, i çliruar nga propaganda. Viti 71-72 ishte një lëshim në të gjitha fushat e artit, edhe këtu u lëshua. Me udhëzim është bërë festivali. Ka qenë një bisedë e Agim Meros me Enver Hoxhën në ato vite që i thotë shiko se mendojmë se të rinjtë duhet të dëgjojnë këngën e perëndimit dhe të lexojnë librat. Le të hyjë muzika e perëndimit që është e pëlqyeshme. Enver Hoxha pargatiti atë që quhet liberalizëm në fushat e artit.

U fut në ’72 ishte me urdhër nga lart që të futej kjo muzikë. Po të lexosh në mbretëritë e mëdha, gjithmnë këta mbretërit kanë bërë sikur kanë mbyllur sytë, pa të afrohen këta liberalët dhe ta marrin pushtetin njëherë dhe pastaj sa i kanë marrë i kanë kapur liberalët dhe i kanë futur në burg. Kanë bërë lojra të tilla, kurthe. Mundet të qe një kurth, mundet që qe një tjetër arsye sepse në 71 u takua Nikson me Maocedunin dhe menjëherë aty ngriu politika shqiptare. Ishin rrethanat ndërkombëtare që ndikuan që Enver Hoxha të bënte një kthesë. Ka qenë një 10 vjeçar që vendi ishte në një luftë të brendshme”, tha Bejko./abcnews.al

kumbaro.jpg
ger ta21:45 | 21/01/2020

Festivali “Sanremo” në Itali, që pritet të mbahet në ditët e para të shkurtit, është shoqëruar me mjaft polemika.

Shkak për këtë është bërë deklarata seksiste e prezantuesit të njohur, Amadeus. Ky i fundit duke prezantuar të fejuarën e Valentino Rosit, tha se e kishte zgjedhur si partnere në prezantin për faktin se “është e bukur dhe qendron një hap pas një burri të madh”.

Kjo deklaratë ka irrituar ish ministren e Kulturës, Mirela Kumbaro, e cila bëri thirrje për ta bojkotuar “Sanremon”.

Për të folur për këtë, Kumbaro ishte e ftuar në emisionin  “Provokacija” me Mustafa Nanon.

Sipas saj, e tmerron fakti që Amadeus i cilëson ato vajza si objekte.

“Mua as nuk më shkon ndërme të gjykoj “Sanremon”. Nuk kam ndonjë problem, unë thjeshtë nuk e ndjek më. Nuk kam kohë t’i ndjek festivalet e gjata. Por nuk është ky shqetësimi im, unë as nuk e gjykoj dhe nuk na takon të gjykojmë një festival italian. Të them të drejtën unë nuk jam shprehur as për festivalet që organizohen në Shqipëri të karakterit të këngës së lehtë, nuk jam profesioniste e asaj fushe, jam një spektatore modeste.

Nga ana tjetër nuk bëj gjykim as për këtë zotërinë që nuk e njoh fare. Mua më shokoi deklarata dhe do më shokonte njësoj sikur të ishte bërë në Itali, sikur të ishte bërë në Shqipëri.

Më tmerron fakti që se si mundet sot, në një nivel në shkallë të tillë në dritat e skenës të ketë kurajon dhe të mos ketë asnjë lloj sensibiliteti, apo autocensure dhe të cilësojë disa zonja që i ka përzgjedhur ky si një gjel vetëm sepse janë të bukura dhe këtu kam gjithë respektin për bukurinë si një cilësi njerëzore, natyrore.

Mua më trondit fakti që ky tipi i konsideron këto si objekte, madje si objekte të vetat”, shprehet Kumabro, teksa shton se ky seksizëm është akoma më i fortë në Shqipëri.

“Ajo që mua më tmerron është se ky seksizëm është akoma më i fortë në Shqipëri, është më shumë më i dhunshëm, më i egër. Nga këto deklarata vazhdon ngulitet mentaliteti i burrave por edhe grave të paemancipuara”, tha ajo./abcnews.al

mustafa-nano.jpg
ger ta21:14 | 21/01/2020

“Bild” na ka borxh një shpjegim”. Kështu u shpreh në monologun e tij në “Provokacija” Mustafa Nano.

Moderatori iu referua artikullit të gazetës prestigjoze gjermane për çështjen e lobimit rus. Teksa Nano i cilëson “broçkulla kolosale”, mes të tjerash në shkrim thuhej se Lulzim Basha ka lobuar me rusët për të penguar procesin e integrimit të vendit. Ndërkohë, pa kaluar shumë orë, artikulli u fshi.

Pikërisht përë këtë veprim, Nano shprehet se gazeta duhet të japë një shpjegim, mbi arsyet që e çuan të ndërmarrë një gjë të tillë.

Unë mendoj se “Bild” duhet ta shpjegojë këtë gjë në mos, reputacioni i vet vihet në dyshim të paktën tek shqiptarët të cilët kanë jetuar gjithmonë me idenë se mediat e rëndësishme europiane janë të rëndësishme edhe për faktin që kanë një marrëdhënie të caktuar me të vërtetën”, shprehet Nano mes të tjerash.

Monologu i Mustafa Nanos në ‘Provokacija”:  

Këto ditë shqiptarët kanë dëgjuar të flitet për gazetën gjermane “Bild”, e cila është një gazetë shumë e rëndësishme, madje është më e rëndësishme në termat e tirazhit. Ka dekada që është gazeta më e rëndësishme në Europë. Ka shitur gjithë kohën miliona kopje edhe sot kur interneti ka bërë punën e vet dhe ka afektuar gjithë botën tjetër të medias në versionin print. Gazeta “Bild” mbahet akoma në këto nivele, shet miliona kopje, arsyeja është e thjeshtë, është një gazetë tabloid, me fjalë të tjera bulevardeske që është e fokusuar tek lajmet sensasionale, tek thashethemet. Dhe këto thashetheme jepen në një gjuhë të shkujdesur, është e fokusuar gjithashtu tek seksizmi. Pra janë që ndjellin vëmendje. Shkruhet në këtë gazetë edhe për gjëra serioze, por shkruhet nga një këndshikimi i veçantë dhe shkruhet siç e thashë me një gjuhë të shkujdesur. Që shkruhet për gjëra të rëndësishme duket edhe te fotografia që unë kam zgjedhur që është portreti i Angela Merkelit.

Në këtë kuadër gazeta “Bild” ka publikuar një shkrim për Shqipërinë, më saktë Partinë Demokratike të Shqipërisë dhe për Luzlim Bashën, i cili sipas gazetës Bild, që i referohet gazetës “Mother Jones” ka paguar shumë të mëdha parash me synimin për të sabotuar procesin e integrimit të Shqipërisë në BE dhe duke lidhur në këtë funksion aleanca të çuditshme thotë “Bild” me qasje ruse anti-shqiptare.

Sipas meje kjo është një gjepurë kolosale. Është e vërtetë që Lulzim Basha ka paguar qindra mijëra euro, më saktë dollarë. Ka paguar saktësisht 675 mijë dollar, kjo është një gjë e provuar, e pranuar edhe nga vetë Lulzim Basha dhe ai akoma ka nevojë të shpjegohet për këtë gjë. Duhet të na thotë se cili është burimi i këtyre parave. Por këto para janë paguar dhe janë harxhuar në mënyrën që Lulzim Basha t’i garantonte vetes një lloj afirmimi ndërkombëtar. Ishte koha kur opozita ishte si e izoluar, kishte braktisur institucionet dhe Lulzim Basha kishte nevojë për një akses pak më shumë në arenën ndërkombëtare sepse të gjithë ndërkombëtarët në atë periudhë mbështesnin qeverinë në aksionin e vet politik dhe ishin kundër opozitës.

Ky është shpjegimi i asaj pagese dhe në këtë kuptim unë përsëris, pretendimi i gazetës “Bild” që këto para janë paguar për të sabotuar integrimin e Shqipërisë në BE, apo janë paguar ngaqë Lulzim Basha është pro rusëve. Janë broçkulla kolosale. Bild e ka bërë këtë shkrim dhe deri këtu nuk ka ndonjë gjë të keqe, është një shkrim i gabuar, por shkrimet e gabuara bëhen në të gjitha gazetat. Problemi nuk është ky, problemi u verifikua të nesërmen e ditës që ky shkrim u publikua sepse të nesërmen e asaj dite shkrimi në fjalë mungonte, ishte hequr në mënyrën më të çuditshme në mënyrën më skandaloze.

Është një gjë që mendoni se ndodh vetëm në Shqipëri, por ja bën vaki edhe me gazetat e rëndësishme të Europës. Ne “Bild” na ka borxh një shpjegim. Në fakt këtë shpjegima ua ka borxh edhe lexuesve të vet gjermanë. Por duke qenë se në këtë shkrim flitet për Shqipërinë na ka borxh një shpegim, duhet të na thotë pse ai shkrim është hequr. Mund të jetë hequr ndoshta se aty thuhen të pavërteta dhe drejtuesit e “Bild” ndoshta janë bindur se aty thuhen të pavërteta. Mirëpo në një rrethanë të tillë “Bild” do bënte atë që bëjnë gazetat serioze në botë. Do bënte një përgënjshtrim, nuk turpërohej, përkundrazi shpëtonte faqen e vet të zezë. Këtë përgënjeshtrim Bild nuk e ka bërë. Atëherë çfarë ka ndodhur? Ka shumë shqiptarë që mendja u shkon se “Bild” është paguar për ta hequr atë shkrim. Kjo në fakt është një paranojë shqiptare, madje edhe e shpifur shqiptare. Ne e kemi demostruar se në rrethana të ngjashme mendja na shkon te korrupsioni i personazheve, siç kemi bërë me ambasadorët këtu apo edhe me personazhe të tjerë. Apo siç është bërë gjatë gjithë këtyre muajve me tezën se të gjithë  ndërkombëtarët janë blerë nga kryeministri i Shqipërisë. Megjithatë shqiptarët kanë të drejtë ta mendojnë këtë për sa kohë qe “Bild” nuk ka vendosur të japë shpjegimet e veta.

Unë mendoj se “Bild” duhet ta shpjegojë këtë gjë në mos, reputacioni i vet vihet në dyshim të paktën tek shqiptarët të cilët kanë jetuar gjithmonë me idenë se mediat e rëndësishme europiane janë të rëndësishme edhe për faktin që kanë një marrëdhënie të caktuar me të vërtetën./abcnews.al

 

nanao-1280x832.jpg
R D00:14 | 18/01/2020

Mustafa Nano në monologun e tij për këtë javë në “Provokacija” është tallur me konspiracionin e avokat Ngjelës për marrëveshjen “Rama-Basha” dhe goditjen që mund t’ju vijë atyre nga SPAK-u.

“Provokacian për sonte po e nis me një kuiz, me një gjëegjëzë. Kam zgjedhur një pasazh nga shkrimi i dikujt, është analizë politike ku thuhen gjëra shumë shumë, shumë të mençura ,veçanerisht që të godasin”, u shpreh ai.

*Ndiqni Monologun e plotë në video

hoxhaaa.png
R D22:43 | 17/01/2020

Gazetari investigativ Artan Hoxha tha se vrasja e Tropojës është “vrasje me mesazh”. Pra ata që kanë kryer krimin kanë dashur të çojnë mesazh diku. “Guxim Gjyriçi që u vra kishte 20 vite rresht që jetonte i patrazuar në Tropojë. U vra duke ecur me duar në xhepa pasi kishte mbyllur lokalin e tij. Para ngjarjes, jeta ishte krejt normale madje shumë të rinj janë kthyer nga emigracioni për të jetuar atje. Pas ngjarjes qyteti ishte i trazuar. Unë pashë se sa binte nata njerëzit hynin brenda”, tha Hoxha në emisionin e Mustafa Nanos, “Provokacija”.

Artan Hoxha e lidh këtë vrasje me ngjarjet e tmerrshme që kanë ndodhur në Tropojë 15-20 vite më parë. Për këtë ai solli edhe një herë në vemendje historinë.

“Gjuriçi është një nga viktimat e ciklit të vrasjeve të Tropojës. E dinin të gjithë e dinte dhe Berisha se Azem Hajdarin e vrau Fatmir Haklaj, ndërsa doli e tha se e vrau Fatos Nano. Berisha vete në 1997 kishte thënë ‘e dua Shkëlqim Hakjan gjallë a vdekur’. Dhe ky njeri u vra i pari. Aty nisi historia e serialit të përgjakshëm të Tropojës me disa të vrarë, sepse ata mendonin se ka gisht Azem Hajdari dhe u hakmorën. PS sapo erdhi në pushtet emëroi shef komisariati Fatmir Hakjan, më pas Berisha nuk shkoi dot në Tropojë për 13 vjet me radhë. Askush nuk dha drejtësi për “dosjen Tropoja” aty ka shumë të vrarë të pafajshëm. Aty ka një dëshmor Jonuz Hyko, shef policie që u vra me dajën e vet tek dera e shtëpisë. Pas këtyre ngjarje (1997-2005) me dhjetëra viktima dhe lagje të braktisura, ra qetësia. Ndërsa vrasja e fundit është e rëndë dhe pa motiv. E vetmja gjë është se vëllai i tij (viktimës) ka qenë shok me Fatmir Haklajn. Jeton në Amerikë është shtetas amerikan me shumë biznese, i vetmi që kishte shpëtuar nga zinxhiri i vrasjeve. Nëse ata reagojnë situata del jashtë kontrollit. Kështu nisi në 1998…”, u shpreh Artan Hoxha.


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono