Emisione

petrit-ago.jpg
G. P.22:08 | 12/07/2019

Biznesmeni në fushën e agro-industrisë, Petrit Ago, ishte i ftuar këtë të premte në emisionin “Provokacija” në ABC News. Ai deklaroi se prej 30 vitesh vëmendja e qeverive në këtë sektor ka qenë shumë e vogël.

Ndër të tjera biznesmeni tha se shteti duhet ta ndihmojë këtë sektor me financime korrekte. Kjo për shkak se subvencionet në agro-industri sipas Agos janë mikroskopike dhe lidhen me interesa të ngushta partiake.

“Shteti duhet të ndërhyjë me financime, por me financime korrekte. Jo me financime që s’kanë lidhje dhe nuk çojnë përpara këtë sektor, por që lidhet me interesat e ngushta partiake, të ta them copë që lidhet me marrjen e votave. Mbarojnë punë me votat në këtë sektor dhe kujtohen 2 muaj, tre muaj përpara se të vijë. Subvencionet në të sektor janë mikroskopike, të mos them zero.

Kjo është në shumë forma, por konkretisht është me ato pak financime që bën shteti nëpërmjet AZHBR-së. Paratë që qeveria akordon për subvencion në këta sektorë nuk adresohen ose nuk iu jepen atyre që iu takojnë. Ose nuk saktësohet mirë se ku do të jepen këto subvencione. Këto i jepen fermerëve që kanë një licencë fermeri. Këta i përzgjedh Agjencia e Zhvillimit Bujqësor Rural. Për hir të së vërtetës unë kam parë në një nuancë që ka tentativë për t’u shkëputur nga një lloj koncepti, por që edhe këta nuk dalin dot për arsyen që paratë që adresohen në këtë sektor janë mikroskopik”, tha Ago./abcnews.al

mirela-bogdani-1280x722.jpg
nev ila21:16 | 12/07/2019

E ftuara në mbrëmjen e sotme të emisionit “Provokacija” me gazetarin Mustafa Nano ka qenë Anëtarja e Këshillit Bashkiak Mirela Bogdani. Bogdani ka shprehur qëndrimin e saj lidhur me lirinë e cdo individi në shqipëri, se sa i dukshëm dhe sa shprehet. Sipas Bogdanit njerëzit e lirë po kalojnë në një minorancë të frikshme pasi njerëzit kanë frikë të komentojnë dhe të mbajnë qëndrimet e tyre të lira, lidhur sidomos me politikën shqiptare. Bogdani gjithashtu komentoi zgjedhjet e 30 qershorit, dhe qëndrimet e KQZ. Ajo tha se sjelljet e qeverisjes shqiptare lidhur me këtë situatë ishin të një neodiktature ku produktivitetin e saj e mat me numrin e pëlqimeve dhe komenteve në rrjetet sociale.

“Njerëzit e lirë po kalojnë në një minorancë të frikshme, për sa i përket lirisë së mendimit apo së fjalës etj. Këtë e shoh në fobinë e madhe të njerëzve për tu shprehur në lidhje me çdo gjë që ka të bëjë me qeverisjen apo me stablishmentin politik. Kjo gjë është aq e dukshme sidomos më median sociale. Unë e kam parë vetë që, nëse unë botoj një status në Facebook, me natyrë politike, me kritikë apo me qëndrimin tim lidhur me një situatë të caktuar, ka shumë pak njerëz që reagojnë dhe shoh një numër minimal komentesh apo pëlqimesh. Kur i takoj në rrugë, më thonë se: “i pëlqejmë shumë statuset që bën por nuk na e mban të shkruajmë sepse monitorohemi”. Flas për të gjithë ata që janë të punësuar në administratën shtetërore shqiptare. Pra ka arritur një paradoks dhe për mua është tamam një neodiktaturë, sepse të monitorosh punonjësit e tu të administratës, se si e kanë sjelljen e tij…., përpara ca kohësh doli dhe një ish zv/ Ministër i Arsimit ku tha se në mbledhjen e qeverisë, produkti më kryesor i saj, ishte që kryeministri kërkonte me grafik sa pëlqime ka, e kuptoni se ku ka arritur produktiviteti i një qeverisjeje? Unë di gjithashtu, që në ministri të caktuara, mbledhin të rinj e të reja, ku puna e tyre është të monitorojnë të gjithë punonjësit, se çfarë qëndrimi kanë ndaj statuseve të caktuara, sidomos me titullarin. Kështu që në këtë kuptim, liria është një gjë e madhe që e dëshiron çdo njeri por jo çdo njeri mund ta ketë, pse? Sepse liria vjen me një kosto shumë të madhe. Ajo fillon me kosto financiare, kosto  materiale, sociale etj. Të jesh i lirë në Shqipëri, sot, nuk duhet të kesh lidhje me shtetin shqiptar por edhe me biznesin privat, sepse edhe aty ta gjejnë anën etj, etj. Unë jam një njeri i lirë dhe fatkeqësisht jam një nga njerëzit shumë të pakët që po kalojnë në minorancë të frikshme në këtë vend. Unë jam e lirë se nuk kam lidhje me shtetin shqiptar, nuk jam e punësuar nga shteti shqiptar. Për sa i përket zgjedhjeve të 30 qershorit, kam qenë vetë te shkolla Avni Rustemi, dhe qëllimi i opozitës nuk ishte për rezultatin por për çështjen e numrit, e nivelit të pjesëmarrjes. Jam kurioze për qendrën ku isha, ku u mbajtën shënim njerëzit si numër, edhe para dy ditësh kam kontrolluar faqen e KQZ, për të parë se a kanë nxjerrë numrin, se sa vetë kanë votuar në këtë qendër votimi, dhe fakti është që nuk kanë dalë akoma. Në gjithë zgjedhjet e tjera kanë dale, vetëm në këto zgjedhje nuk kanë dalë akoma. Kjo ishte një arsye që grupet e opozitës shkuan në qendrat e votimit për të mbajtur shënim numrin e votuesve. Unë mund ta them që tani sa kanë qenë te shkolla “Avni Rustemi”, dhe jam kurioze të dëgjoj se sa do nxjerrë KQZ. Pra ky ka qenë misioni kryesor Dua të them që me analizën e pas zgjedhjeve, ajo që më ka ardhur jashtëzakonisht keq, është për presionin e ushtruar ndaj administratës, duke filluar që nga kontrolli i gishtave. Dhe rezultati në këto zgjedhje ishin 2 gjëra: Në këto zgjedhje doli një numër rekord i fletëve të pavlefshme dhe mbushja e kutive me fletë votimi tepër. Hapja e disa kutive në Lezhë më duket se është në vijim të farsës, për të thënë që: “ja shikoni po i hapim”. Jam e sigurtë që ato kuti do dalin mirë, pra siç do KQZ dhe partia në pushtet. Pyetja ime është, pse nuk e bënë me partinë që kërkoi e para këtë gjë siç ishte Bindja Demokratike por u hapën për këtë? Pra ka standard të dyfishtë, domethënë një teatër i radhës”, tha Bogdani.

Por si qëndron problemi me demokracinë e brendshme të partive? Në diskutimin e saj me gazetarin Mustafa Nano, Mirela Bogdani shpjegoi se, sipas saj të gjithë partitë e tranzicionit shqiptar kishin shumë probleme lidhur me demokracinë e brendshme./abcnews.al

mark-marku-1.jpg
G. P.20:34 | 12/07/2019

Analisti Mark Marku deklaroi këtë të premte se të gjitha shfaqjet dhe veprimet e Ramës të çojnë drejt diktaturës. Marku ishte i ftuar në emisionin “Provokacija”, ku tregoi edhe disa disa shenja të diktaturës ditët e sotme.

Mustafa Nano: Unë mendoj që Rama është një problem për vendin siç e beson dhe ti besoj. Ajo që ka ndërtuar Rama është diçka që nuk shkon, ka probleme, mirëpo Mark Marku dhe shumë të tjerë shpeshherë e paraqesin këtë që ka ndërtuar Rama si diktaturë. Mua këtu më kërcet pak. Më duket si një lloj teprimi që edhe lufta ndaj Ramës fillon dhe zhvleftësohet kur thua “Rama diktator”.

Mark Marku: Unë nuk mendoj që do shkojmë në diktaturë që të jemi të qartë sepse është e pamundur për kushtet, për kohën etj. Por të gjitha shfaqjet dhe veprimet e Ramës të çojnë drejt kësaj. Diktaturat dhe regjimet vendosen sipas rrethanave shoqërore, kanë specifika të ndryshme, nuk është diktaturë klasike. Jam dakord, në diktaturë nuk do isha sot se do vinin të më arrestonin këtu në studio, por ato që quhen diktatura moderne janë shumë më të kamufluara sidomos në një rend ku kryesisht është i prirur drejt demokracisë. Ku e gjykoj pse ka disa shenja të forta të diktaturës ose të derives totalitare? E para ka shkatërruar parimet e ekonomisë së tregut. Nuk ka konkurrentë, paratë shkojnë në mënyrë të projektuar tek 6,7, 8 vetë. Diktaturat godasin kryesisht konkurrencat ekonomike. Vendosin monopole, bëjnë arbitraritete. Kjo është shenja e parë. Ka çuar në eliminimin e të gjitha institucioneve që bëjnë atë balancën e pushtetit. Kjo është diktaturë, sepse demokracia kjo është, një institucion e pengon tjetrin. Rama e ka shumë problem që më pengon ky që të bëj këtë. Gjithë këtë sistem Rama ka shkuar duke e zhdukur pak nga pak dhe ka arrit në një parlament qesharak, që e kontrollon totalisht vetë, me bashki që i kontrollon vetë./ABC News Albania 24/7

astrit-patozi-1-1280x608.jpg
nev ila20:33 | 11/07/2019

Mbrëmjen e sotme në ABC News me gazetaren Mirela Milori, ka qenë i ftuar Koordinatori i partisë “Bindja Demokratike”, Astrit Patozi. Duke ndarë opinionin e tij në lidhje me procesin zgjedhor, Patozi tha se “Bindja Demokratike” ka të dhëna për deformim të votës, ai gjithashtu tha se KQZ e goditi që në fillim partinë e tij, duke mos e lejuar të garonte në të gjithë vendin, e për pasojë solli penalizmin e saj. Më tej Patozi deklaroi se do ta ndjekin çështjen e hapjes së kutive edhe më tej, pasi hapja e tyre do të përmbyste rezultatin që është pasqyruar. Për Patozin, zgjedhje të tilla ku të numërojnë militantët e partisë nuk duhet të ketë.

“Shqiptarët nuk patën mundësi të dëgjojnë zërin e bindjes demokratike. Ne kemi të dhëna por nuk kemi prova për deformim të votës. KQZ na goditi që në fillim sepse nuk na la të garonim në të 61 bashkitë. Ne na ndodhi që u penalizuam nga KQZ me dominancë socialiste dhe KZAZ 100 % socialiste, nuk u lejuam të kandidojmë në gjithë territorin, na sulmuan kandidatët të cilët u tërhoqën edhe nga gara dhe na u morën votat në tavolinë. Ne kërkuam të ishim të pranishëm në numërimin e votave dhe nuk u lejuam”, deklaroi Patozi.

Mirela Milori: Si do të veproni më tej?

Astrit Patozi: Ne respektojmë bindjen dhe vullnetin tonë dhe zgjedhësve që atë ditë na u përgjigjën në kulmin e një trysnie politike në kushte ekstreme. U ushtrua trysni mbi zgjedhësin shqiptar dhe kjo i bezdisi njerëzit, padyshim dhe e dëmtoi praninë tonë. Ne për qeverinë ishim të padëshirueshëm në zgjedhje. Ne jemi të detyruar që ta ndjekim këtë çështje por nuk kam shumë besim. Ne kemi të drejtën ta kërkojmë hapjen e kutive.

Mirela Milori: Pritshmëritë tuaja a i arritët?

Astrit Patozi: Jo sepse rezultati ynë u coptua që në hyrje, gjatë fushatës dhe në numërim pra në të gjithë procesin. Edi Rama nëse nuk hap kutitë, atëherë duhet ta pranojë që kutitë brenda janë krejt ndryshe nga cfarë janë shënuar. Mund ta bëjnë provë vetëm me një zonë zgjedhore, mjafton që 1 mostër të hapet dhe ne jemi të bindur që rezultati përmbyset dhe kjo e bën procesin edhe më të shëmtuar.

Mirela Milori: E prisnit këtë sjellje nga qeveria e Ramës?

Astrit Patozi: Jo nuk e prisnim në fillim, mendonim që edhe ata kishin interes për praninë tonë, por ata me sa duket kishin ankthin e pjesëmarrjes etj. Zgjedhje në Shqipëri ku të numërojnë militantët e partisë nuk duhet të ketë më kurrë sepse ne nuk do dalim nga kjo spirale./abcnews.al

astrit-patozii.jpg
G. P.20:31 | 11/07/2019

Astrit Patozi komentoi deklaratat e ish-kryeministrit Sali Berisha, i cili disa ditë më parë tha se e vetmja zgjidhje për situatën aktuale është kryengritja popullore me 51 format e mosbindjes civile.

Gjatë rubrikës “Mbrëmje ABC” me Mirela Milorin këtë të enjte, koordinatori i Bindjes Demokratike tha se ajo deklaratë është si serum për militantët dhe që nuk zgjidh asgjë.

Mirela Milori: Zoti Berisha ndërkohë thotë që vazhdon me të njëjtin ritëm kërkesa e njerëzve për mosbindje civile.

Astrit Patozi: Është patetike dhe është një lloj serumi që i jepet militantëve për të mbajtur shpirtin gjallë, por them që nuk zgjidh asgjë. Pse? Palët përpiqen që Shqipërinë ta mbajnë bardhezi. Qeveria thotë që ne kemi bërë më të mirën, kurse opozita thotë që kjo është një skëterrë ku nuk jetohet, ose duhet të ikë Edi Rama ose të largohemi fare nga Shqipëria. Në fakt Shqipëria ka ngjyrat e veta.

Nuk është as bardh, as zi, por që palët i mbajnë në skalionet e tyre të mbledhura është problem i opozitës. Opozita ka nevojë që të marrë shqiptarët që nuk besojnë qorrazi tek partitë se vetëm opozita e ka detyrimin që ti bindë ata që të rrëzojmë qeverinë sepse vetëm nuk ia del dot kurrë dhe sidomos në kushtet e një opozite të djathtë, e cila ka edhe atë rezervuarin fillestar të votës deficitar në raport me palën tjetër. PD duhet të kalojë ylberin për të marrë elektoratin gri. Pala tjetër është më e relaksuar duke ruajtur thjesht militantët e vet. Në rast se do jetë ndeshje fiton gjithmonë qeveria, por sidomos kur është e majtë që është e dyfishtë”./abcnews.al

astrit-patozi.jpg
G. P.20:02 | 11/07/2019

Koordinatori i Bindjes Demokratike, Astrit Patozi ishte i ftuar këtë të enjte në rubrikën “Mbrëmje ABC” përballë gazetares Mirela Milori. Ai u pyet se si mund të largohet Edi Rama nga pushteti dhe për këtë tha se ka vetëm një mënyrë.

“Përveç se me zgjedhje me ça mënyre tjetër do largohet. Rama ka dy rrugë për t’u larguar, ose do ikë vetë që po të kishte këtë lloj koshience që nuk e ka. Ai ka vetëm një mënyrë që të ikë me votë. Në çastin që ti përgatit për arsyet e tua që janë për të ruajtur pozicionin e kryetarit në parti apo për të shtyrë në kohë një rezultat që ti beson se nuk është ai që pret se tre humbje radhazi nuk durohen, edhe sigurisht që këto e prishën fare ekuilibrin dhe jemi sot në një situatë gati qesharake. Kur njëra palë nuk lëviz dot nga obeziteti, nga mbipushteti dhe pala tjetër nuk çohet në këmbë se nuk ka fare pushtet. Përgjegjësi të madhe ka vetë se e ka lëshuar vetë, pa luftë”, tha Patozi.

Ndër të tjera, ish-deputeti i PD-së tha se kryeministri Rama mund të rrëzohet edhe në zgjedhjet e vitit 2021, por nëse opozita reflekton, kjo mund të ndodhë edhe më parë. Ai theksoi se Bindja është e hapur për bashkëveprim ndëropozitar. Kur u pyet nga gazetarja Mirela Milori nëse do të bashkëpunonte me PD-në, Patozi tha se nuk përjashton askënd që ka platformën dhe bindjet e përbashkëta me të.

“Ne bashkëpunojmë me çdo parti opozitare dhe unë nuk mund të përjashtoj askënd. Sigurisht që ne duhet të kemi një lloj platformë dhe duhet të kemi bindje të përbashkëta. Kur unë shikoj se këtu kërkohet sërish pazar, unë nuk mund të afrohem. Pse them që Edi Rama ka përgjegjësi për ikjen e opozitës. E di si thoshte ai që nuk ka më Lulzim Basha siç kishte para dy vjetësh, nuk ka më pazar që të dhashë ça deshe para dy vjetësh e të tjera me radhë. Kjo është përgjegjësi e madhe dhe është pranim në vetë të parë i kësaj përgjegjësie sepse e paske bërë njëherë, ia paske lejuar vetes që ta bësh njëherë dhe nuk e bën më herë tjetër. Po ajo hera e parë çfarë është? Është zvarritje 2 vjet e Shqipërisë sepse ti e bëre pazarin me idenë që ta nxirrje vendin nga kriza por e fute më thellë për dy vjet. Unë them që qeveritë ndonjëherë rrëzohen edhe kur janë të mira. Pse? Për shkak të konsumit të viteve. Ka plot qeveri në Europë që qeverisin mirë por rrëzohen se u vjen koha dhe mërziten njerëzit, jo më një qeveri e keqe që nuk u rrëzoka kurrë se qenka i pathyeshëm Edi Rama. Një opozitë e fortë, energjike dhe e strukturuar, por mbi të gjitha një opozitë që ka moralin me vete, që di t’i drejtohet njerëzve dhe që nuk mund të ketë komplekset që ka treguar sot opozita që iku nga zgjedhjet mund ta përballi dhe mund ta mundë më shpejt Edi Ramën”, tha Patozi.  /abcnews.al

astrtrit-patozi-mirela-1280x610.jpg
nev ila19:57 | 11/07/2019

Astrit Patozi ka qenë i ftuari i Mbrëmje ABC me gazetaren Mirela Milori mbrëmjen e sotme. Patozi foli për shkarkimin e Presidentit të Republikës, zgjedhjet e 30 qershorit dhe se çfarë qëndrimi do të mbajë “Bindja Demokratike” në vazhdim, në lidhje me këto çështje të politikës aktuale shqiptare. Për Patozin gjithë procesi për ngritjen e komisionit hetimor për shkarkimin e presidentit Meta ishte i neveritshëm, pasi shkallët e konfliktit që kanë dy institucionet më të rëndësishme të shtetit, retorika që ato përdorin, përveç se kanë thelluar krizën politike, ato ndodhen edhe në një marrëzi politike.

“Ndjej neveri për këtë. Ne jemi në një krizë politike e cila nuk është zgjidhur nga 30 qershori. Shpresoj që Gushti dhe Shtatori të sjellë një lloj qetësie të gjithë personazheve por edhe të gjithë politikës në përgjithësi”, tha Patozi.

I pyetur nga gazetarja Mirela Milori për marrëdhënien që “Bindja Demokratike” ka me KQZ, e cila ka hedhur poshtë kërkesën e saj për hapjen e materialeve zgjedhore, Patozi u shpreh se:

Dua të sqaroj diçka, ne ankimimin tonë nuk e kemi bërë për rezultatin tonë. Pas gjithë kësaj situatë dramatike, rezultati i “Bindjes Demokratike” nuk ka shumë vlerë për publikun dhe as për ne. Ne e kemi bërë për një lloj detyrimi ndaj publikut shqiptar, edhe ndaj votuesve tanë për të bërë një lloj transparence, për t’i treguar publikut që këto ishin zgjedhje të këqija, të cunguara që u shoqëruan me deformim të votës, sëmundje e lashtë e politikës tashmë në Shqipëri. Ne duam t’i tregojmë shqiptarëve, publikut që zgjedhje si këto mos paçim, qofshin të fundit, ky ishte qëllimi kryesor”, deklaroi Patozi./abcnews.al

eglantina-gjermeni.jpg
G. P.18:46 | 11/07/2019

Komisioni Hetimor parlamentar për shkarkimin e Presidentit Ilir Meta zhvilloi sot mbledhjen e saj të parë. Deputetja e Partisë Socialiste, Eglantina Gjermeni, deklaroi nga studio e ABC News se mazhoranca ka vullnet ta çojë deri në fund këtë proces. Sipas saj, mazhoranca do që të nxjerrë mësime nga kjo çështje që lidhen me faktin se Kushtetuta është e paprekshme dhe duhet zbatuar nga të gjithë.

“Mendoj që fakti që një grup deputetësh firmosën dhe më pas u ngrit një Komision Hetimor, u votua nga pjesa më e madhe e deputetëve, mendoj që tregon një vullnet për t’i shkuar deri në fund këtij procesi faktit që është shkelur apo jo Kushtetuta. Faktit që me çdekretimin e datës së zgjedhjeve vendore dhe me dekretimin e një date tjetër siç ishte 13 Tetori, të gjitha këto të shikohen në kontekstin e Kushtetutës, në kontekstin e përgjegjësive që ka Presidenti, detyrave që ka ai, çfarë i lejon dhe nuk i lejon Kushtetuta. Ju e thatë që ndodh për herë të parë. Këtë vit kemi shumë gjëra për herë të parë, kemi djegie mandatesh për herë të parë, kemi mosmarrje pjesë në zgjedhje, kemi çdekretim të zgjedhjeve në mes të fushatës. Mendoj që i gjithë vullneti politik i mazhorancës dhe jo vetëm është që ky proces të shkojë deri në fund dhe të nxjerrë mësime për faktin që nëse flasim për një kuadër institucional, ligjor, për Kushtetutën, të gjitha këto janë të paprekshme dhe duhen zbatuar nga të gjithë”, tha Gjermeni.

Ky është komisioni i parë hetimor që ngrihet më qëllim shkarkimin e Presidentit të Republikës. Ulsi Manja dhe Alban Zeneli do të drejtojnë punën hetimore, ndërsa sekretare komisioni do të jetë Klotilda Ferhati. Në mbledhjen tjetër komisioni do të miratojë rregulloren e punës dhe planin hetimor./abcnews.al

gjermeni.jpg
G. P.18:29 | 11/07/2019

Partia Socialiste pritet të mbledhë Asamblenë në fund të muajit Korrik. Deputetja Eglantina Gjermeni tregoi në ABC News se çfarë pritet të diskutohet në atë mbledhje.

Ajo tha se kjo gjë është praktikë pune e PS-së, ku bëhet një analizë mbi procesin zgjedhor dhe duke e krahasuar atë me zgjedhjet e tjera në mënyrë që selia rozë të përmirësohet në të ardhmen.

Mirela Milori: Në fund të muajit Korrik do të mblidhet Asambleja e PS-së, duket se nuk do të keni pushim këtë muaj. Pritet të ketë ndryshime? Do të bëhet analizë thotë zoti Rama në fjalën e 30 Qershorit. Priten ndryshime, priten riqarkullime apo si do të jetë kjo analizë?

Eglantina Gjermeni: Është praktikë pune e PS dhe e strukturave në bazë të zgjedhjeve, rezultatit që kemi marrë i kemi filluar analizat në nivel bashkie, duke marrë me përgjegjësi pjesëmarrjen në votime, duke parë me përgjegjësi votat e pavlefshme dhe duke parë në çdo njesi vendore për të parë si ishte pjesëmarrja, çfarë problematikash kishte dhe çfarë mund të përmirësojmë punën për 2021-shin. Kjo është një praktikë punë që të paktën për 10 vite që kam në politikë kështu pas çdo zgjedhjeve. Para datës së zgjedhjeve kemi mbledhje intensive kryesie, asambleje por sidomos me organizatat kudo nëpër njësitë administrative është përgjegjësi e gjithsecilit. Besoj se do të jetë një reflektim, përmbledhje e të gjithë  analizave që do bëjnë në nivel vendor, krahasimore me zgjedhjet e 2017-s, me zgjedhjet e 2015-s në nivel kombëtar, por edhe në nivel vendor duke i parë bashkitë njëra mbi tjetrën. Mendoj se do jetë një diskutim i hapur, nuk është si kryesi të jemi mbledhur akoma për të vendosur axhendën, por kjo do jetë çështja kryesore.

Për sa i përket axhendës për mbledhjen e Asamblesë, Gjermeni tha se kryesia e PS-së pritet ta vendosë javën e ardhshme./abcnews.al

celibashi-ilirjan-1280x615.jpg
nev ila22:44 | 10/07/2019

Ilirjan Celibashi mbrëmjen e sotme në Mbrëmje ABC, me gazetaren Mirela Milori, ka dhënë mendimin dhe versionin e tij për depolitizimin e administratës zgjedhore. Celibashi e sheh të domosdoshme depolitizimin e institucionit të KQZ.

Mirela Milori: Zoti Rama tha në parlament përpara disa ditësh se këto janë zgjedhjet e fundit që administrata zgjedhore është e politizuar, jo vetëm KQZ por edhe administrata do të depolitizohet. Sa reale është kjo?

Ilirjan Celibashi: Në fakt edhe ODHIR në raportet e fundit ka rekomanduar që të shihet mundësia për të patur një administratë të depolitizuar në Shqipëri. Mendoj se jemi shumë herët duke marrë në konsideratë situatën dhe kushtet politike në vend që ne të kemi një administratë të depolitizuar. Unë mbështes fuqimisht këtë rekomandim të ODHIR dhe e shoh si tepër të dobishme që të paktën institucioni i KQZ të depolitizohet. Pra propozimet për anëtarë të KQZ të mos vijnë nga anëtarë të partive politike por të ndërtojnë ost ë shfrytëzojnë një mekanizëm ekzistues i cili na çon të kandidatë që nuk vijnë nga zyrat e partive politike. Kjo është një gjë që mund të funksionojë. Ne kemi dy struktura që i supozojmë jashtë ndikimit partiak dhe jo aq shumë të ndikuara politikisht sikurse janë KLGJ dhe KLP. Kjo zgjidhje mund të na çonte në pasjen e një KQZ-je me anëtarë të cilët nuk vijnë nga zyrat e partive politike. Pra për KQZ duhet dhe mund të bëhet depolitizomi i administratës. Kam mbështetur vazhdimisht idenë, që KQZ mund të përfaqësohej qoftë edhe nga një individ, i zgjedhur me konsensus të të gjitha forcave politike ashtu sikurse është edhe në Kanada, ku që prej vitit 1926 ka patur vetëm 6 kryetarë të Komisionit qendror të zgjedhjeve, të cilët janë larguar nga detyra vetëm kur kanë dhënë dorëheqjen por në të gjitha rastet janë zgjedhur me konsensus të të gjithë palëve. Për sa i përket administratës së nivelit të dytë dhe të tretë në komisionet e qendrave të votimit mendoj që nuk është e dobishme që partitë politike të jenë jashtë procesit. Partitë politike të vazhdojnë të jenë kontribuese në administrimin  procesit zgjedhor por jo me këto të drejta të pakufizuara që ato kanë, sikurse është ajo që mund ta heqin një komisioner kur të duan dhe të emërojnë kur të duan.

I pyetur nga gazetarja Mirela Milori se nëse ishte më e lehtë puna si kryetrar i KQZ, në kohën kur Celibashi ishte kryetar, apo nëse është më e lehtë tani puna në këtë institucion, Celibashi tha se opozita e asaj kohe ka qenë tepër e ashpër e agresive me KQZ ndërsa theksoi se sjellja e qeverisë kur kryeministër ishte Fatos Nano kundrejt KQZ së kohës, ishte model.

Mirela Milori: Nëse do të ishit tani Kryetar i Komisionit Zgjedhor është më e lehtë tani apo ishte më e lehtë atëherë?

Ilirjan Celibashi: Vështirë ta them por me bindje them që në atë kohë presioni politik i palëve ishte shume i ashpër. Qasja e opozitës së kohës kur unë kam qenë kryetar i KQZ ka qenë tepër agresive, shpesh herë duke tejkaluar dhe normat më minimale të qytetarisë. por për meritë të të gjithë anëtarëve të KQZ ja kemi dalë ta fitojmë pak nga pak besimin dhe të opozitës së kohës. në zgjedhjet e 2005 opozita dhe pse jashtë dëshirës së vet u detyrua ta pranonte që veprimtaria e KQZ ishte profesionale, e pavarur dhe transparente. Ndoshta edhe formula e përbërjes së KQZ në atë kohë jepte një lirshmëri më të madhe dhe anëtarëve për të qenë më të baraslarguar nga forcat politike. Dua te them edhe një të vërtetë të madhe: Ka munguar presioni i qeverisë së kohës mbi institucionin e KQZ, edhe mbi mua si kryetar i KQZ. Pas kaq viteve them që sjellja e qeverisë së kohës, në atë kohë ka qenë Fatos Nano kryeministër, ishte model në pikëpamje të raportit me institucionin e KQZ. Ka patur momente të vështira të vendimmarrjes sic ka qenë cështja e kandidatëve të pavarur e cila ka qenë një vendimmarrje e vështirë për KQZ e asaj kohe./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono