Aktualitet

KRONIKE-DENAJ-NE-FIER.mpg_snapshot_00.21-1280x720.jpg
ent ela12:26 | 15/09/2019

Qeveria do të fillojë testimin e kasave të reja fiskale në muajin tetor. Ministrja Denaj u takua me biznesmenë në Fier, për tu konsultuar mbi ligjin e ri, duke thënë se ky lloj raportimi direkt për cdo shitje, do të ulë informalitetin dhe do të ndihmojë integrimin evropian.

Kasat e reja fiskale që raportojnë cdo shitje në kohë reale pranë serverit të tatimeve do të fillojnë të testohen në muajin tetor. Anila Denaj, ministre për Financat dhe Ekonominë u takua me biznesmenë në Fier, për tu konsultuar për këtë sistem të ri.

“Pse doli e nevojshme mbledhja e informacionit? Së pari, doli e nevojshme sepse këto janë sisteme që progresojnë në çdo vend të botës, jo vetëm në Shqipëri. Përpara pesë vjetësh, i gjithë sistemi i marrjes së informacionit ishte në një standard, sot është në një standard tjetër dhe teknologjia e mundëson për më tepër, marrjen e këtij standardi”, sqaroi Ministrja.

Projektligji ende nuk është kaluar në parlament dhe aktualisht po konsultohet me grupet e interesit.

“Është një proces më i qëndrueshëm në luftën kundër informalitetit dhe nuk janë inspektimet objektivi ynë afatgjatë për të luftuar informalitetin.Objektivi kryesor është që ne këtë projekt ta kemi dhe si një parakusht për procesin e integrimit në Bashkimin Europian. Pse? Sepse sisteme të përditësuara me teknologjinë, por jo vetëm, edhe me mendësinë e analizës dhe luftës kundër informalitetit, duhet të jenë në të njëjtën mendësi që është ajo e vendeveeuropiane”, theksoi znj. Denaj.

Vendosja e detyruar e këtyre kasave të reja që raportojnë cdo shitje në kohë reale, është parashikuar të nisë në 1 janar. Kasat fiskale  aktuale që kanë bizneset, raportojnë shitjet totale vetëm në fund të ditës, kur mbyllet aktiviteti. Kritikët kanë ngritur shqetësimin se detyrimi për tu pajisur me kasa të reja, mund të shkaktojë kosto për bizneset. /ABC News Albania 24/7

WhatsApp-Video-2019-09-15-at-11.25.50.mp4_snapshot_00.01-1280x720.jpg
ent ela12:04 | 15/09/2019

Një 47 vjeçar ka rënë në prangat e Policisë pasi drejtonte automjetin në gjendje të dehur dhe kryente manovra të rrezikshme në rrugë.

47-vjeçari me iniciale A. H. u raportua nga qytetarët pasi kryente manovra të rrezikshme në rrugë duke rrezikur jetën e këmbësorëve dhe të drejtuesve të auomjeteve. Ai drejtonte mjetin në gjendje të dehur nga Mjull Bathore për në autostradë në Unazë të Madhe, ku edhe u arrestua.

Në tentativë për t’u larguar ai goditi edhe makinën e Policisë Rrugore duke rrezikur jetën e punonjësve të policisë, por u arrestua në flagrancë.

Gjatë testit të alkoolit, shoferi rezultoi në gjendje të dehur në masën 1.31 mg/l. /abcnews/al

 

70314741_2495614457168949_2078568518323798016_n.jpg
ent ela11:45 | 15/09/2019

Baristi nga Kosova, Jetmir Maliqi, krijon vepra të mirëfillta arti në filxhanët e kafesë, të cilat i shërben për klientët e tij prej 22 vitesh. Vepra e tij më e fundit janë portrete me kokrrat e kafesë. 

Ka 22 vjet që merret më këtë zanat. Kafja e përgatitur nga baristi Jetmir  Maliqi është një art në vete.

Ai njihet ndryshe edhe si “piktori i kafes”, pasi që me shumë mjeshtri përgatit kafe me figura të ndryshme.

Ndonëse konsiderohet si më i miri në Ballkan, Maliqi e ka të pamundur t’i ndjekë të gjitha festivalet e artit të kafesë.

Thotë se nuk ka përkrahje nga sponsorët e kafesë siç ndodh në gjithë botën, dhe për më tepër shpesh ka munguar në këto festivale edhe për shkak të pamundësisë për t’u pajisur me vizë.

Konsideron se profesioni i tij nuk vlerësohet shumë në Kosovë, andaj është edhe duke shqyrtuar ofertat e fundit që i kanë ardhur nga vende të ndryshme të botës.

Së fundmi Maliqi ka kaluar në një tjetër nivel. Ai ka filluar të bëjë portrete me kokrra kafeje.

Maliqi e ka mahnitur edhe futbollistin shqiptar nga Gjilani, Xherdan Shaqiri i cili portretin e tij të punuar nga Maliqi e ka postuar në instagram. /ABC News Albania 24/7

aksident-rruga-e-kombit.mp4_snapshot_00.11-1280x720.jpg
ent ela11:20 | 15/09/2019

Një vajzë 13 vjeçe ka humbur jetën në një aksident tragjik në Rrugën e Kombit në vendin e quajtur “fshati Gëziq. Ajo ishte duke udhëtuar me babain e saj 44 vjeçar i cili humbi kontrollin e makinës dhe u përplas me trafikndarësen. Vajza humbi jetën në vend, kurse prindi i saj ndodhet në spital në gjendje të rëndë. Siç edhe shikoni nga pamjet trafikndarësja ka depërtuar tej për tej makinën. Nuk dihen ende shkaqet e kësaj ngjarjeje, por sipas policisë dyshohet se makina ka humbur kontrollin për shkak të shpejtësisë. /abcnews.al

71476705_916616952030996_6742560104475787264_n-1280x853.jpg
ent ela11:13 | 15/09/2019

Zona e “Astirit” në kryeqytet nuk do të vuajë më problemin e furnizimit me ujë të pijshëm.  Kryebashkiaku Erion Veliaj tha se një linjë e dedikuar nga impianti i Bovillës do të sjellë ujë direkt në këtë zone. Ndërkaq, ai u bëri thirrje qytetarëve të mos blejnë ujë të pakontrolluar nga autobotet private.

Banorët e Zonës së Astirit në kryeqytet nuk do të vuajë më problemin e furnizimit me ujë të pijshëm. Këtë lajm e njoftoi kryetari i Bashkisë Tiranë, Erion Veliaj i cili gjatë inspektimit të punimeve në këtë zonë u bëri thirrje qytetarëve të mos blejnë ujë të pakontrolluar në autobotet private, pasi është jashtë çdo standardi.

Mos blini ujë të pakontrolluar nga autobotet private, të cilët abuzojnë duke e shitur ujin e marrë për vaditje apo prodhim industrial, si ujë të pijshëm. Këtë thirrje u bëri qytetarëve kryebashkiaku i Tiranës, Erion Veliaj gjatë inspektimit të rrjetit të ri të ujësjellësit në zonën e Astirit

“Kemi patur një problem me qytetarët që, për inerci apo fiksimin e tyre, blejnë ujë nga botet, nga makina të improvizuara e shitës informalë. Uji, që dikush e blen për vaditje, për fonderi që ftohin metale ose prodhim industrial, dhe pastaj fshehurazi e shet nëpër lagje, kërkon bashkëpunim nga banorët. Mania, fiksimi, nostalgjia për të blerë ujë, që medemek është marrë te burimi, është i rremë. Analizat na tregojnë se uji i ujësjellësit që është i klorinuar, që ka pësuar gjithë trajtimin kimik, është uji i saktë për t’u përdorur”.

Veliaj dhe lajmin e mirë për të gjithë banorët e zonës së Astirit në kryeqytet nuk do të vuajë më problemin e furnizimit me ujë të pijshëm, pasi UKT ka ndërtuar në kohë rekord një linjë të dedikuar që sjell ujë direkt nga impianti i Bovillës, për të furnizuar zonën e Astirit

“Është punuar gjithë verën pa pushim. Kur shumica e Tiranës, përfshirë edhe politikën, ishte me pushime, ne kemi punuar për të sjellë, në kohë rekord, një linjë të dedikuar nga impianti i filtrimit të Bovillës, që është në anën tjetër të lumit të Tiranës, 10 km në tre lote, për të furnizuar me ujë gjithë zonën e Astirit, e cila është ndërtuar mbi puse, me leje të dhëna nga ish-Komuna e Farkës, një zonë e ndërtuar me gropa septike. Pra, për dikë që erdhi në Tiranën e viteve ’90-2000 dhe bleu shtëpi me 300 euro metri katror, përgjigjja e pyetjes pse shtëpia ishte kaq e lirë, është se s’kishte rrjet ujësjellësi dhe kanalizimesh”.

Bashkia e Tiranës gjithashtu po vijon punën për ndërtimin e rrjetit të ri të kanalizimeve në Rrugën e Elbasanit, ku nuk ishte vënë dorë që në vitet 1940, investimi i cili do të shpëtoje nga përmbytjet zonën nga Fakulteti Ekonomik deri tek zona përballë me Fakultetin Filologjik. /abcnews.al

XHACKA-NE-FARKE.mpg_snapshot_00.02-1280x720.jpg
ent ela10:54 | 15/09/2019

Efektivët e Policisë Ushtarake u kanë ofruar ndihmë për nisjen e shkollës disa prej nxënësve të shkollës 9-vjeçare “Farkë e Vogël”, familjet e të cilëve i kanë të pakta mundësitë ekonomike.

Në prag të fillimit të vitit të ri mësimor, efektivët e Policisë Ushtarake janë kujdesur që tu ofrojnë ndihmë disa prej nxënësve të shkollës 9-vjeçare “Farkë e Vogël”, familjet e të cilëve i kanë të pakta mundësitë ekonomike.

Gjatë takimit me nxënësit, prindërit e mësuesit, ministrja Xhaçka vlerësoi nismën e efektivëve  në ndihmë të komunitetit ku ata shërbejnë.

“Unë e them shpesh që ushtarakët mund ta kenë kuletën e vogël, por e kanë zemrën shumë të madhe dhe gjeste të tilla janë pak a shumë si ato që bëjnë prindërit për ju çdo ditë. Nuk ka rëndësi cilat janë kushtet ekonomike apo mundësitë që kemi sepse kur bëhet fjalë për fëmijët, çdo gjë bëhet me vëmendje dhe dashuri të jashtëzakonshme”.

Nxënësit e familjeve në nevojë të shkollës 9-vjeçare “Farkë e Vogël”, vizituan Muzeun e Forcave të Armatosura, ku panë nga afër pajisjet dhe armatimin që ushtarakët shqiptarë kanë përdorur në vite. /ABC news Abania 24/7

policia-kukes-1280x669.jpg
nev ila21:50 | 14/09/2019

Policia e Kukësit ka shoqëruar në komisariat 26 irakianë që kishin mbërritur në këtë qytet gjatë pasdites, me qëllim kalimin në mënyrë ilegale të kufirit Shqipëri-Kosovë, përmes Morinit.

Refugjatët janë 13 burra, 5 gra dhe disa fëmijë të moshës 4 -13 vjeç. Policia  po punon për zbardhjen e mënyrës së mbërritjes së tyre në Kukës.

Sipas policisë së Kukësit, dyshohet se ata janë larguar nga qendra e azilkërkuesve në Tiranë./ABC News Albania 24/7

operacioni-limit-dosja-1.jpg
nev ila21:02 | 14/09/2019

ABC News ka siguruar dosjen e plotë të Prokurorisë për operacionin “Limit”, i cili goditi katër banda kriminale të trafikut ndërkombëtar të drogës, duke çuar pas hekurave 58 trafikantë.

Nga përgjimet e Prokurorisë, pjesë e këtyre bandave, që vepronin si një grup i strukturuar kriminal, rezulton të ketë qenë edhe një grua, me emrin Miranda, e cila është bashkëshortja e Genc Bamllarit, xhaxhait të kreut të një prej bandave, Olgert Bamllarit.

Në bisedën e zhvilluar bashkëshortja e Genc Bamllarit njofton një prej krerëve të këtyre bandave, Olgert Bamllarin, që të mos flasë më, sepse telefonat janë nën përgjim dhe se vetë asaj dhe Gencit i kishin sekuestruar celularin dhe kontrolluar shtëpinë.

Biseda mes Miranda Bamllarit dhe Olgert Bamllarit:

Miranda: Miranda jam

Olgert: E Miranda, çar bën? Si je?

Miranda: Hiç

Miranda: Sapo erdha nga puna dhe!

Olgert: Çarë

Miranda: Dëgjon o dëgjon, përgjohen telefonat tëra e!

Olgert: Hë?

Miranda: Edhe timin e kanë marrë, të Gencit e kanë marrë

Olgert: Po pse?

Miranda: Erdhën brenda, nuk e di. Nga telefonatat gjetën, s’kishte kallëzuar njëri…në drekë erdha.

Olgert: Erdhën në shpi

Miranda: Kontrolluan. Në shpi po…

Duket se në aktivitetin e tyre kriminal, për trafikimin e lëndëve narkotike janë përfshirë edhe familjarë të Olger Bamllarit./abcnews.al

banoret-termeti-qafzez-1280x713.jpg
nev ila18:17 | 14/09/2019

Në Qafëzez ka nisur ndërtimi i shtëpive të dëmtuara nga tërmeti. Por banorët janë të pakënaqur me mënyrën e vlerësimit të dëmeve nga bashkia dhe emergjencat civile. Ata pretendojnë se ndërhyrjet e pjesshme në banesa nuk e shmangin rrezikun nga shembja.

Tre prej shtëpive që u rrënuan nga tërmeti në Qafëzez po ngrihen nga themeli.

Në 20 të tjera, ndërhyrjet do të jenë restauruese. Të pakënaqur me mënyrën e vlerësimit të dëmeve nga komisionet e bashkisë dhe Emergjencave Civile, banorët u mblodhën në qendër të fshatit për të protestuar.

Ata janë të shqetësuar se riparimi i pjesshëm i shtëpive, që kanë pësuar dëme të konsiderueshme, nuk do t’i ktheje ato në të banueshme.

Të prekurit nga tërmeti refuzojnë të hyjnë në shtëpitë, ku gjysma e ambienteve, ku nuk do të vihet dorë, do të jenë sërish në rrezik për tu shembur.

Kanë larguar punëtorët nga shtëpia,si mënyrë për të kundërshtuar zhdëmtimin e pjesshëm të shtëpive,edhe pse nuk kanë asnjë mundësi tjetër strehimi.

Ata që nuk e kanë parë emrin në listat e bashkisë, apo që ju është hequr emri, në fazën finale të përzgjedhjes, pretendojnë se procesi i vlerësimit të dëmeve ka qenë selektiv dhe jo transparent.

Kryebashkiaku i Kolonjës Erjon Isai ka siguruar familjet e prekura nga tërmeti se procesi i riparimit të shtëpive  do të përfundojë në fillim të tetorit.

Ato familje, që nuk kanë provuar ligjërisht pronësinë mbi banesën e dëmtuar,do të përfitojnë bonus qiraje nga bashkia.

Përveç riparimit të banesave të dëmtuara rëndë, është parashikuar dëmshpërblim për 264 shtëpi të tjera, më pak të dëmtuara./ABC News Albania 24/7

vi-ne-shengjin.jpg
G. P.16:05 | 14/09/2019

Gatimet dhe recetat speciale të kuzhinierëve të njohur në Lezhë janë promovuar në një feste të organizuar nga bashkia në bashkëpunim me ministrinë e Turizmit. Gjatë aktivitetit “Vi n’Shëngjin”, vizitorë të shumtë shijuan ushqimin nën ritmet muzikore.

Lezha sfidon me kulinari. Festa “Vi n’Shëngjin” ku u promovuan gatimet tradicionale mblodhi shumë turistë dhe qytetarë. Pamja e shëtitores është e njëjtë si ajo e sezonit veror.

Kuzhinierët jo pak të njohur të Lezhës prezantuan recetat speciale të restoranteve të zonës. Në aktivitete të tilla nuk mund të mungojnë as këngë dhe valle.   Agroturizmi do të jetë një prioritet për bashkinë dhe do marrë vëmendjen e duhur tha Pjerin Ndreu.

Organizime të tilla bëhen në bashkëpunim edhe me Ministrinë e Turizmit për të mbajtur gjallë interesin e vizitorëve duke e shndërruar Lezhën në një destinacion të turizmit kulinar./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono