Javë fantastike për disa nga futbollistët e kombëtares

23:29 | 11/02/2019

Disa prej futbollistëve të kombëtares shqiptare ishin protagonistë kryesore në fundjavën e kaluar me skuadrat e tyre respektive. Bekim Balaj, Ardian Ismajli, Myrto Uzuni dhe Ermir Lenjani gjetën rrugën e rrjetës.

Javë fantastike ajo që sapo lamë pas për disa prej futbollistëve të kombëtares shqiptare që shkëlqyen me klubet e tyre respektive. Mbrojtësi i kuqezinjve, Ardian Ismajli, i cili luan për fanellën e Hajdukut të Splitit në Kroaci, realizoi golin e parë në fitoren përballë Lokomotivës së Zagrebit. Mbrojtësi realizoi me kokë në fundin e pjesës së parë. Tek Hajduku në këtë takim luajti ndeshjen e parë si titullar edhe shqiptari tjetër, Françesko Tahiraj, duke zhvilluar një paraqitje dinjitoze. Tek Lokomotiva e Zagrebit u aktivizua Myrto Uzuni madje realizoi golin e barazimit në fillimin e pjesës së dytë.

Lenjani shkëlqen në Zvicër tek Sion. 29-vjeçari kuqezi vendosi baraspeshën në minutën e 25 në sfidën që Sion luajti në shtëpi ndaj Luganos së Armando Sadikut, i cili u aktiviuza vetëm në 15 minutat e fundit. Mbrojtësi anësor përfitoi nga një devijim i portierit kundërshtar duke realizuar me portën e boshatisur. Ky ishte goli i tretë në këtë sezon për Lenjanin. Tek Sion u aktivizua edhe Burim Kukeli që u rikthye në fushat e lojës pas një viti. Ai luajti vetëm 18 minuta në barazimin 2-2 ndaj Luganos.

Rej Manaj luajti për 65 minuta në fitoren që Albacete arriti ndaj Mallorcas 2-0. Një paraqitje pozitive per lushnjarin që konfirmon dhe një herë tjetër se po kalon një formë të mirë me skuadrën kryesuese në ligën e dyte spanjolle. 90 minuta u aktivizua mesfushori Ledian Memushaj tek skuadra e Peskarës në barazimin që këta të fundit e arritën në transfertën e Foxhias. Memushaj luajti një ndeshje të mirë, por nuk mundi të vendoste fatet e takimit. Një pike që e mban skuadren e Peskarës në vendin e 4 në Serinë B.

Megrim Mavraj u aktivizua si titullar tek Ingolshtad në barazimin pa gola ndaj Erzgebirge. Mbrojtësi i kombëtares është mjaft i rëndësishëm për skuadrën gjermane që vazhdon të mos pësojë gola edhe pse ndodhet në vendin e parafundit në renditje. Keidi Bare luajti për 60 minuta në barazimin që Malaga arriti në shtëpi ndaj Las Palmas. Mesfushorit i anulohet një asist për pozicion të parregull. Më pas detyrohet të lërë fushën e lojës pas kartonit të dytë të verdhë dhe do të jetë një mungesë e rëndësishme për skuadrën në ndeshjen e radhës.

Etrit Berisha një titullar i padiskutueshëm në radhët e skuadrës së Atalantës edhe në fitoren 2-1 përballë Spal. Mund të bënte më mirë në rastin e pësimit të golit të parë, por ishte një siguri për minutat e tjera të lojës. Bekim Balaj gjeti rrugën e rrjetës në miqësoren ku skuadra  e tij Akhmat Grozni humbi ndaj koreano jugorëve të Sjuon Bluings. Balaj ngushtoi diferencën në humbjen 2-1. Ky ishte goli i tretë në këto miqësore për shtatlartin e kombëtares kuqezi./abcnews.al


Lini koment

E-maili nuk do te publikohet. Duhen plotesuar *


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F




Kontakt

Telefono