Itali, formimi i qeverisë në dorë të Presidentit Mattarella


18:44 | 17/04/2018

Dy ditët e ardhshme pritet të jenë vendimtare për Italinë, për krijimin e qeverisë së re. Lëvizja e radhës do t’i takojë presidentit Mattarella, të cilit do t’i duhet të mandatojë një kryeministër paraprak për të zgjidhur ngërçin paszgjedhor.

Në misionin e vështirë për formimin e qeverisë së re të Italisë, lëvizja e ardhshme i takon presidentit Sergio Mattarella. Të mërkurën dhe të enjten kreut të shtetit do t’i duhet të vendosë se kujt do t’i japë mandatin paraprak të kryeministrit për të zgjidhur ngërçin e krijimit të mazhorancës së re. Sipas raportimeve të së përditshmes “La Repubblica”, emrat në tryezën e presidentit janë katër: Elisabetta Alberti Casellati, Matteo Salvini, Luigi Di Maio dhe Roberto Fico. Përparësi pritet t’i jepet qendrës së djathtë, nisur nga fakti se më i mundshëm duket opsioni për një ekzekutiv të përbërë nga Lëvizja 5 Yjet dhe i gjithë koalicioni rival, i përbërë nga Liga e Veriut, Forza Italia dhe Vëllezërit e Italisë. Këto të fundit së bashku kanë marrë më shumë vota nga të gjithë, 37 për qind, në zgjedhjet e 4 marsit të kaluar. Për këtë arsye, e para që do të thirret për një detyrë paraprake mund të jetë kryetarja e Senatit. Elisabetta Alberti Casellatit, eksponente e partisë së ish-kryeministrit Berlusconi, do t’i takojë detyra për të shqyrtuar shanset për një marrëveshje mes 5 Yjeve dhe qendrës së djathtë. Caktimi i Matteo Salvinit për detyrën në fjalë, për Mattarellën përbën më shumë se një kontradiktë të thjeshtë. Kjo, për shkak të qëndrimeve pro-ruse të shprehura nga lideri i Ligës në lidhje me krizën siriane, të cilat po krijojnë shqetësime tek aleatët euro-atlantikë të Italisë. Gjithashtu, mbështetja e Salvinit për presidentin Vladimir Putin bie ndesh me prirjet diplomatike të Lëvizjes 5 Yjet, që i ka shprehur besnikëri pozicionimit të NATO-s. /abcnews.al



Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono