Greqi, flakë në Gadishullin e Eubesë, shkrumbohet parku pyjor

17:45 | 13/08/2019

Autoritetet në Greqi vijojnë betejën me zjarret që kanë përfshirë zona të ndryshme të vendit. Më problematike situata paraqitet në gadishullin e Eubesë, ku po shkrumbohet një masiv pyjor dhe në rajonin e Peloponezit.

Greqia po përballet të martën me vatra të shumta zjarresh, në zona të ndryshme të vendit. Zjarri më i madh ka shpërthyer në orët e para pas mesnate në gadishullin e Eubesë. Ndër të tjera po digjet një park pyjor që është përfshirë në programin evropian Natura, për mbrojtjen e florës dhe faunës. Fuqia e zjarrit është e tillë, saqë retë e tymit kanë mbërritur deri në kryeqytetin Athinë.

Në mesditë, dy fshatra pranë vatrës së zjarrit u evakuan me urdhër të shërbimit të mbrojtjes civile. Puna e zjarrfikësve është mjaft e vështirë për shkak të terrenit të thyer, por edhe erërave që e kanë shtuar fuqinë tyre. Dy zjarre të tjera, në rajonin e Tebës dhe në zonën e Pogonit, pranë kufirit me Shqipërinë, ende nuk po vihen nën kontroll.

Në zonën e Atikës, autoritetet kanë ndaluar qarkullimin e automjeteve dhe të njerëzve në zonat pyjore dhe ato bregdetare të pyllëzuara, ku ka rrezikshmëri më të lartë zjarri për të martën dhe ditët e ardhshme.

Që prej disa ditësh Greqia po ndeshet me një valë zjarresh, disa prej të cilëve kanë qenë shkatërrues. Në rajonin e Peloponezit u dogj 25 për qind e sipërfaqes së ishullit Elafonisos, ndërkohë që shumica e turistëve vendas e të huaj janë larguar tashmë. Niveli i shkatërrimit në Elafonisos dallohet qartë edhe në fotografinë nga sateliti Centinel që publikoi rrjeti evropian Kopernikus./ABC News Albnia 24/7



Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F




Kontakt

Telefono