Gjykatësi i Gjykatës së Lartë “ngec” në Vetting, shkarkohet Admir Thanza

10:14 | 17/07/2018

Nuk ka kaluar dot sitën e Vettingut, anëtari i Gjykatës së Lartë, Admir Thanza. Ai u shkarkua sot nga detyra, pasi nga hetimi i kryer ndaj tij rezulton se jo vetëm nuk justifikon pasurinë, por edhe ka fshehur një dënim nga drejtësia italiane për vjedhje të kryer në bashkëpunim.  

Ashtu siç pritej, Komisioni i Pavarur i Kualifikimit largoi gjyqtarin Admir Thanza nga sistemi i drejtësisë. Thanza, i cili ishte pjesë e Gjykatës së Lartë, më herët ka qenë anëtar i Këshillit të Lartë të Drejtësisë dhe i Gjykatës Kushtetuese.

Thanza rezulton se është dënuar me 40 ditë burg dhe 100 mijë lireta gjobë nga Gjykata e Pizas në Itali në vitin 1999 për një vjedhje në supermarket. Detaji i pazakontë u bë publik gjatë seancës dëgjimore të zhvilluar javën e kaluar për llogari të procesit të Vettingut.

Vendimi i fajësisë, në të cilin vuajtja e burgut ishte pezulluar për gjyqtarin, u bë i ditur nga ana e Operacionit Ndërkombëtar të Monitorimit. Sipas KPK-së, gjyqtari Thanza kishte dijeni për këtë dënim të Gjykatës së Pizas, pasi kishte qenë në sallën e gjyqit gjatë shpalljes së tij, por nuk e kishte deklaruar atë në formularin e dekriminalizimit.

Javën e kaluar, gjyqtari në seancën dëgjimore pranoi dënimin, por këmbënguli se nuk e kishte kryer veprën penale për të cilën ishte dënuar, por thjeshtë kishte marrë përsipër një krim të kryer nga një e afërme e tij. Sipas KPK-së, veç dënimit, Thanza nuk kishte deklaruar as një procedim penal të nisur ndaj tij për akuzën e “korrupsionit” nga Prokuroria e Shkodrës dhe të pushuar në Prokurorinë e Përgjithshme nga prokurori Kristaq Beluri në 26 Korrik 2016.

Thanza figuronte problematik edhe në pasurinë e tij. Sipas Inspektoriatit të Lartë të Deklarimit dhe Kontrollit të Pasurive, gjyqtari ka fshehur pasurinë dhe ka bërë deklarim të rremë. I njëjtë ishte edhe rezultati i hetimit të thelluar të KPK që vlerësoi se ka mosjustifikim të shpenzimeve të kryera dhe nga analiza financiare gjatë gjithë karrierës në gjyqësor nga viti 1992 e në vijim Thanza del me bilanc negativ.

Po gjatë javës së kaluar, Prokuroria e Përgjithshme është vënë në lëvizje për rastin e gjyqtarit të Gjykatës së Lartë, Admir Thanza. Drejtoria e Marrëdhënieve Juridiksionale me Jashtë në Prokurorinë e Përgjithshme ka nisur verifikimet ndaj gjyqtarit Admir Thanza për shkelje të ligjit dekriminalizimit. /abcnews.al



Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F




Kontakt

Telefono