Zoran Zaev

zoran-zaev.jpg
ger ta17:11 | 14/11/2019

Kryeministri maqedonas  Zoran Zaev tha të enjten se Maqedonia e Veriut bashkëpunon me Rusinë, Kinën dhe Lindjen e Mesme, por nuk ka alternativë tjetër për ne përveç NATO-s dhe BE-së.  Zaev i bëri komentet në shënimin e 25 vjetorit të marrëdhënieve diplomatike mes Maqedonisë së Veriut dhe Federatës Ruse.

Kryeministri maqedonas Zoran Zaev tha të enjten në një konferencë shtypi pas shënimit të 25 vjetorit të marrëdhënieve diplomatike mes Maqedonisë së Veriut dhe Federatës Ruse, se vendi i tij mbetet i hapur për bashkëpunim sa më të thellë ekonomik me federatën Ruse dhe me shtetet tjera, mirëpo Maqedonia e Veriut nuk kërkon alternativë tjetër përpos BE-së dhe NATO-s.

“Alternativë tjetër përpos NATO-s dhe BE-së nuk ekziston. Këtë na e ka thënë populli ynë, rreth 80 për qind e qytetarëve tanë janë për integrim të Maqedonisë sës Veriut në NATO dhe BE. Është interes i yni, siç është interes edhe i vendeve të BE-së dhe NATO-s. të bashkëpunojmë me pjesën tjetër të botës. Ne bashkëpunojmë me Rusinë me Kinën edhe me Lindjen e Mesme si dhe me shumë shtete aziatike, siç janë India dhe shumë shtete tjera, për shkak se kjo sjellë prosperitet direkt për popullatën tonë. Por gjithmonë theksojmë se  nuk ka alternativë tjetër për ne përveç NATO-s dhe BE-së”./abcnews.al

karadaku-samiti-mirela-1280x602.jpg
nev ila20:33 | 11/11/2019

Në studio me Mirela Milorin kanë komentuar iniciativën e Aleksandër Vuçiç, Edi Rama dhe Zoran Zaev për “mini-schengenin ballkanik”, gazetarët: Linda Karadaku, Seladin Xhezairi dhe Idro Seferi.

Gazetari i  Klan Maqedonisë, Seladin Xhezairi, tha se ideja e minischengenit ballkanik në Maqedoninë e Veriut është përshëndetur në të shumtën e rasteve. Sipas Xhezairit, Zaev nuk hezitoi të theksonte se do të ketë një ballkan të ri, të përparuar i cili do të përshpejtojë tentativat për tu bërë pjesë e familjes evropiane. Por gjithashtu zëra kundër ka patur edhe në qarqe jo politike.

Ky samit ballkanik, sipas Xhezairit, e ka lënë një shije të hidhur për sa i përket mungesës së Kosovës. Madje thuhet se mund të përsëritet historia mes Shqipërisë dhe Kosovës, si zhvillimet e pasluftës së dytë botërore.

Ndërsa në Serbi, sipas gazetarit Idro Seferi, është pritur përgjithësisht pozitivisht por gjithashtu ka patur edhe kritika. Analistët në Serbi kanë thënë se ky projekt nuk do të shkojë deri në fund pa praninë e Malit të Zi, Bosnje Hercegovinës por sidomos Kosovës. Sipas Seferit, që kjo iniciativë e 3 liderëve të funksionojë dhe të ketë sukses, duhej me patjetër prania e Kosovës.

Për gazetaren e ABC News, Linda Karadiku kjo iniciativë, për “minischengenin” ballkanik, dukej një përpjeke e sforcuar, në një moment të gabuar.

Djalli qëndron tek detajet” thotë Karadaku. “Dakord nëse do të ketë lëvizje të lirë të njerëzve, por si do të bëhet ajo? A kalohet dot me kartë identiteti nga Shqipëria, në Kosovë dhe në Serbi? Natyrisht që jo“, tha Karadiku.

“Gjithsesi atmosfera në këtë samit për “minischengenin ballkanik” ishte e çuditshme”, tha më tej Karadaku.

“Vuçiç dhe Rama shfaqeshin shpesh herë shumë nervoz. Kjo është një marrëveshje mes 3 njerëzve sepse nuk kemi një marrëveshje brenda vendeve përkatëse, sipas ligjeve apo ratifikimeve, janë gjëra të mëdha që kërkojnë konsensus. Që të ketë rezultat, ky samit duhet të kishte praninë e Kosovës. Mungesa e Kosovës, nuk është çështje procedure dhe as protokolli. Mungesa e Kosovës e hedh në ajër këtë projekt. Ajo që duhet të jetë e qartë në të dy anët e kufirit është që Shqipëria nuk ka kufij me Serbinë por me Kosovën”, komentoi Karadaku.

Sipas Karadakut, të mirat materiale nuk mund të kalojnë në marrëveshje mes 3 njerëzve.

“Kjo bëhet në mënyrë institucionale dhe të shkruar, dhe kjo nuk është rruga e duhur”, tha ajo./abcnews.al

75.jpg
in a19:06 | 10/11/2019

Deklarata e cila u mbajt në Ohër me iniciativë të kryeministrave, Zoran Zaev, Edi Rama dhe presidentit serb Aleksandër Vuçiç, pritet që të sjellë vendime konkrete sa i përket, lëvizjes së lirë të mallrave dhe kapitalit. Gjithashtu  21-dhjetori përcaktohet si data e takimit të ardhshëm që do të mbahet në Durrës. Liderët e gjashtë vendeve të Ballkanit Perëndimor ftohen që t’i bashkohen kësaj iniciative, me qëllim të integrimin sa më të shpejtë të rajonit në BE.

Pritet që liria e lëvizjes të sjellë më shumë efekte dhe të rrisë konkurrencën në të gjithë rajonin. Bëhët e ditur se është dakorduar që të vendoset sistemi i cili do të mundësojë udhëtime vetëm me letërnjoftime, leje të përbashkët të punës që do të lejojë njerëzve të punojnë në të tri vendet pa procedura plotësuese.

Kompanitë e këtyre tri vendeve nuk do të duhet të shqetësohen për fuqinë punëtore, për shkak se do të kenë mundësi që ti kyçin në të tria vendet, pa procedura shtesë.

Lëvizja e lirë dhe e shpejtë e mallrave do të inkurajohet përmes vendosjes së orarit të punës 24 orë për të gjithë shërbimet inspektuese, u theksua gjatë takimit.

Gjithashtu synohet njohja e ndërjeslltë e kualifikimeve profesionale në kuadër të vendeve anëtare të iniciativës, si dhe nxitja e këmbimit të studentëve dhe fillimi i projekteve të përbashkëta për hulumtime dhe zhvillim.

Para përfundimit të vitit, siç planifikohet Serbia dhe Shqipëria do të vendosin mundësinë që qytetarët të udhëtojnë vetëm me letënjoftime. Serbia, Shqipëria dhe Maqedonia e Veriut, planifikojnë të përforcojnë bashkëpunimin në fushën e krimit dhe terrorizmit përmes bashkëpunimit në fushën e migrimit dhe ndihmës së shpejtë.

Tre vendet pritet që të miratojnë rregulla në shumë fusha duke synuar përmirësimin e bashkëpunimit, me qëllim që kjo iniciativë të shndërrohet në iniciativën më të rëndësishme politike në shekullin 21. Një pikë e rëndësishme, siç thuhet është se, që nga momenti që BE-ja ndërpreu procesin e zgjerimit, SHBA-të kanë përkrahur iniciativën për bashkëpunim më të afërt të rajonit, që mbetet e hapur të për të gjitha vendet./abcnews.al

zoran-zaev-1280x698.jpg
ger ta13:16 | 07/11/2019

Kryeministri i Maqedonisë së Veriut Zoran Zaev tha se partia e tij socialdemokrate LSDM, kërkon ndryshimin e modelit zgjedhor para zgjedhjeve të 12 prillit të vitit të ardhshëm.

Zaev u tha gazetarëve në Shkup se partia e tij, edhe në programin e vet zgjedhor, ka deklaruar se angazhohet për zgjedhje më një njësi zgjedhore dhe vazhdon ti ruajë këto qëndrime.

Zaev tha se shpreson që të ketë konsensus që vendi të ketë vetëm një njësi zgjedhore, megjithatë theksoi se në çdo rast, deputetët e tij do të votojnë për ndryshimin e modelit zgjedhor.

“Shpresoj që të ketë konsensus. Kjo është pjesë e programit tonë zgjedhor, dhe jo vetëm kaq, po ne besojmë në të. Do të fitojë demokracia, shteti. Nëse shkohet në votim për këtë në parlament, shpresojmë se do të jetë me konsensus, nëse nuk arrihet konsensus, social-demokratët do të votojnë për ndryshimin e modelit zgjedhor“, ka thënë Zaev./abcnews.al

albin-kurtiiiii.jpg
nev ila17:51 | 04/11/2019

Lideri i Lëvizjes Vetëvendosje Albin Kurti u takua të hënën në Shkup me kryeministrin e Maqedonisë së Veriut, Zoran Zaev. Takimi u konfirmua nga vetë Kurti në një postim në Facebook, ku ai tha se kishte biseduar me kryeministrin Zaev lidhur me situatën politike në të dy vendet, marrëdhëniet midis shteteve në Ballkan dhe çështjet e integrimit evropian.

“Sot në Shkup takova kryeministrin e Maqedonisë së Veriut, z. Zoran Zaev, me bashkëpunëtorët e tij. I shoqëruar nga anëtarët e kryesisë, znj. Fitore Pacolli-Dalipi dhe z. Liburn Aliu, biseduam për situatën politike në dy vendet tona, mundësitë e bashkërendimit të ndërsjelltë, raportet midis shteteve në Ballkan dhe çështjet e integrimit evropian”, ka shkruar Kurti në Facebook./abcnews.al

zoran-zaev-1280x698.jpg
ad min12:27 | 31/10/2019

Kryeministri maqedonas Zoran Zaev kërkoi falje të mërkurën, duke thënë se nuk ka dashur të ofendojë njeri, por ka dashur të thotë se do të ketë luftë për shtetin. Ndërkohë, kryetari I opozitës Hristijan Mickovski, ka theksuar se dera është e hapur për partitë shqiptare dhe janë të gatshëm për të biseduar edhe për koalicion parazgjedhor me partitë shqiptare dhe partitë e etniteteve të tjera në vend.

Kryeministri maqedonas Zoran Zaev kërkoi falje të mërkurën ndërkohë që fliste në një tribunë në Prilep, për dorëzimin e pushtetit tek opozita.

“Nëse dikë e kam lënduar i kërkoj falje. Doja të isha i menjëhershëm. Doja të dërgoja një mesazh se nuk do të ishte e lehtë të dorëzohej pushteti, dhe pas 11 vitesh shkatërrim, përsëri të kthehen dhe të shkatërrojnë shtetin.  Na falni, kemi marrë vendime të guximshme, por nuk është e lehtë edhe për ne. Do të luftojmë deri në fund. Detyra jonë është të sigurojmë të ardhmen. Unë nuk kam dashur të ofendoj, dhe nëse dikush është i ofenduar, kërkoj falje, por kam dashur të them se do të ketë një luftë për shtetin”.

Zaev ka thënë se lideri i VMRO-DPMNE, Hristijan Mickovski nuk duhet të gënjehet nëse mendon se do të vijë në pushtet pas zgjedhjeve të parakohshme parlamentare vitin e ardhshëm. Por Mickovski nga ana tjetër, u bëri ofertë për bashkëpunim partive shqiptare.

“Dera jonë është e hapur për partitë shqiptare dhe jemi të gatshëm për të biseduar edhe për koalicion parazgjedhor me partitë shqiptare dhe partitë e etniteteve të tjera në vend.”

Kreu i VMRO-DPMNE-së tha se nuk ka asnjë preferencë konkrete ose përjashtim nga partitë shqiptare dhe theksoi se nëse nuk arrihet marrëveshje para zgjedhjeve, atëherë do të jetë i gatshëm të ulet me të gjitha partitë shqiptare pas zgjedhjeve nëse i fitojnë ato.

Ndërkohë, kryetari i Kuvendit Talat Xhaferi ka paralajmëruar se do të shpërbëjë Dhomën ligjvënëse më 11 shkurt duke hapur dilemën nëse vendi do të ketë Parlament funksional që të ratifikohet Protokolli për anëtarësim në NATO. Xhaferi tha se nuk ekziston mundësia që të thirret Kuvendi nëse ka nevojë të ratifikohet Protokolli për anëtarësim në NATO dhe për këtë, do të duhet të pritet parlamenti i ri.

Por kryeministri Zaev dhe kreu i opozitës maqedonase Mickovski kanë thënë se edhe nëse Kuvendi shpërbëhet, ai përsëri duhet të mblidhet për ratifikimin. Protokolli për anëtarësim në NATO duhet të ratifikohet në Parlamentin e Maqedonisë së Veriut pasi ratifikimi të kalojë në Parlamentet e vendeve anëtare të Aleancës.

Deri tani, Protokollin e kanë ratifikuar 26 shtete, ndërsa mbetet edhe Franca, Holanda dhe Spanja. Në Spanjë pritet ratifikimi të kalojë në dhjetor kur dhe do të konstituohet Parlamenti spanjoll./ABC News Albania

DAVID-SASSOLI-NE-TIRANE-1280x720.jpg
ad min13:57 | 30/10/2019

Pas refuzimit të negociatave nga Këshilli Europian për Shqipërinë dhe Maqedoninë e Veriut, Presidenti i Parlamentit Europian, David Sassoli do të vizitojë Tiranën dhe Shkupin. Sasoli është shprehur se kjo vizitë ka rëndësi të madhe, dhe se do të ketë në thelb inkurajimin e këtyre 2 vendeve për vijimin e reformave.

Presidenti i Parlamentit Europian, David Sassoli do të vizitojë Shkupin dhe Tiranën, për të përçuar një mesazh inkurajimi për qytetarët e Maqedonisë së Veriut dhe Shqipërisë pas mungesës së vendimit të Këshilit Europian për hapjen e negociatave të anëtarësimit me dy vendet.

“Vizita në Maqedoninë e Veriut, dhe shumë shpejt më pas edhe në Shqipëri, ka një rëndësi të lartë për mua personalisht në këtë moment. Ne e dimë që popullsia në të dy vendet është zhgënjyer shumë nga dështimi i Këshillit Europian për të rënë dakord për hapjen e negociatave për shkak të vetos së disa shteteve anëtare. Ne e kuptojmë dhe e ndajmë këtë zhgënjim. Shqipëria dhe Maqedonia e Veriut kanë zbatuar reformat që ne kërkuam prej tyre dhe tani meritojnë të shpërblehen për përpjekjet e tyre të jashtëzakonshme”, shprehet Sassoli në një komunikatë shtypi.

Presidenti Sassoli inkurajon qeverinë maqedonase dhe atë shqiptare për të vazhduar rrugët e tyre të reformave, pasi pavarësisht shtyrjes së vendimit, kjo kohë nuk do jetë kohë e harxhuar. Reformat e kryera në rrugën e anëtarësimit të plotë në BE janë në interesin më të mirë të vendeve dhe qytetarëve të tyre, dhe nga to përfitojnë para së gjithash brezi i ri që meriton një të ardhme më të mirë .Ai i bën thirrje qytetarëve dhe veçanërisht brezit të ri të mos humbin shpresën dhe të qëndrojnë në rrugën evropiane,

Me një shumicë të madhe votash, Parlamenti Evropian ka ritheksuar mbështetjen e tij të plotë për hapjen e negociatave të anëtarësimit me Maqedoninë e Veriut dhe Shqipërinë një javë më parë. “Ne nuk do të heshtim por do nxisim shtetet e BE të marrin një vendim unanim në favor të negociatave në takimin e ardhshëm” ka deklaruar ai.

Gjatë vizitës së tij në Shkup, presidenti David Sassoli do të takohet me Kryeministrin e Maqedonisë së Veriut, z. Zoran Zaev, si dhe presidentin Stevo Pendarovski. Ai gjithashtu do të zhvillojë bisedime me drejtuesit e partive politike parlamentare, kryetarin e Asamblesë së Maqedonisë së Veriut, Talat Xhaferi dhe do t’i drejtohet Parlamentit.  Presidenti i Parlamentit Evropian, David Sassoli, do të udhëtojë për në Maqedoninë e Veriut  në 4 dhe 5 nëntor, ndërkohë që udhëtim në Shqipëri është planifikuar për 2 dhe 3 Dhjetor./ABC News Albania

zoran-zaev123.jpg
ad min16:24 | 29/10/2019

Kryeministri Italian Xhuzepe Konte është takuar në romë me homologun e tij nga Maqedonia e Veriut Zoran Zaev. Konte u shpreh në fund të takimit se e kishte shumë të vështirë të kuptonte arsyet konkrete për moshapjen e negociatave për anëtarësimin e Shkupit në Bashkimin Europian.

“Maqedonia e Veriut është anëtari i 31 i NATO. Shkupi meriton të anëtarësohet në Bashkimin Europian, negociatat nisën që në vitin 2005. Nuk i kuptojmë arsyet konkrete për mos hapjen e negociatave. Dhe kjo vlen dhe për Shqipërinë.”

Është kjo deklarata e kryeministrit Italian Xhuzepe Konte në përfundim të takimit në Romë me kryeministrin e Maqedonisë së Veriut Zoran Zaev. Konte më tej shtoi se mos hapja e negociatave për të dyja vendet ishte një gabim i rëndë historik i cili duhet rregulluar shumë shpejt. Shkupi ka firmosur traktate me Greqinë dhe Bullgarinë, theksoi Konte.

Kreu i ekzekutivit Italian premtoi se Italia do të vazhdojë betejën në selinë europiane për hapjen e negociatave me Shqipërinë dhe Bashkimin Europian. Sipas tij integrimi europian është rruga e vetme. Për sa i përket marrëdhënieve dy palëshe mes Italisë dhe Maqedonisë së Veriut, Konte u shpreh se Italia është partneri i pestë tregtar i Maqedonisë së Veriut, me një ndër shkëmbim prej 614 milionë eurosh në vit. Ai i tha Zaev se Italia dhe italianët do e mbështesin gjithnjë Maqedoninë e Veriut.

Nga ana e tij kryeministri i Maqedonisë së Veriut Zaev falenderoi Italinë për mbështetjen për sa i përket hapjes së negociatave për anëtarësimin në Bashkimin Europian. Ai tha se i gjithë Bashkimi Europian ishte keqardhur për mos hapjen e negociatave dhe njëzëri e cilësuan si një gabim historik. Por Zaev shtoi se ky gabim mund të korrigjohet dhe se Shkupi është gati për bashkëpunim.

“Dëshirojmë të përmirësojmë marrëdhëniet me vendet fqinjë dhe ta bëjmë vendin tonë modern. Dëshirojmë të krijojmë të gjitha kushtet për të qenë anëtar të Bashkimit europian ashtu si na kërkojnë 85 për qind e qytetarëve tanë,” përfundoi Zaev./ABC News Albania

basha-rama-.jpg
ad min14:16 | 26/10/2019

Vendimi për zgjedhje të parakohshme në Maqedoninë e Veriut pas refuzimit nga BE për hapjen e negociatave ka trazuar politikën në Tiranë. A do ndjekë Shqipëria njëlloj e refuzuar modelin e fqinjit tonë ? Përtej deklaratave publike, Edi Rama dhe Lulzim Basha kanë nisur bashkëpunimin për reformën zgjedhore. Dritëhijet e kësaj panorame na sjell këtë javë Mimoza Kociu me Politika në ABC News.

Zgjedhjet e parakohshme, strategjia politike e MV pas refuzimit të BE për të hapur bisedimet e antarësimit, trazoi aktorët politikë në Shqipëri. Nuk ka një dakordësim të paktën publik për këtë model, por çka po bashkon Edi Ramën e Lulzim Bashën, duket interesi për reformën zgjedhore, pra rishikimi i rregullave të lojës për zgjedhje, të zakonshme apo të parakohshme.

Po çfarë ndodhi javën politike që lamë pas?

Lëvizja e Km Zaev e mbështetur nga të gjitha partitë politike, për të cuar MV në zgjedhje të parakohshme, pas JO-së për hapjen e negociatave, solli ethe politike në Tiranë. I pari Lulzim Basha, u kujtua se mund të kërkonte të njëjtën gjë nga Edi Rama.

Pas refuzimit të KE, ishte Gjermania, mbështetësja kryesore e çeljes së negociatave për Shqipërinë dhe Maqedoninë e Veriut, që përmes një mesazhi nxitës, kërkoi që reformat të mos ndalen. Përmes nënkryetarit të grupit parlamentar të shumicës, Vadeful dhe raporterit për Shqipërinë, në të njëjtin grup Shmid, Gjermania dha sinjalin se do këmbëngulë që hapja e negociatave të bëhet për dy vendet, sipas vendimit të miratuar në Bundestag.

Edi Rama e nisi të hënën jo në zyrën kryeministrore, por në selinë e partisë socialiste që drejton. çfarë e kishte nxitur vallë atë lëvizje që në nisje të javës? Pas tre orësh u bë i ditur vendimi i marrë: kryesia e PS nuk i njihte asnjë përgjegjësi qeverisë për mos hapjen e negociatave. Kryesia mbështeste Km, se nuk kishte asnjë arsye për të shkuar në zgjedhje të parakohshme si RMV, por vetë socialistët do përballen me një proces për të zgjedhur krerët e 61 degëve, në të 61 bashkitë që i morën në 30 qershor, si asnjë forcë politike në tre dekada demokraci. A kishte patur zëra që mendonin ndryshe në kryesi? Cili është qëndrimi i PS, për refuzimin për hapjen e negociatave? Përgjigjet mbeten brenda mureve ku u mbajt mbledhja tre orëshe, ndërsa qëndrimin se nuk kishte asnjë përgjegjësi si Kryeministër, Edi Rama ia besoi vec vetes, për t’ia përcjellë publikut.

Nëse këtë moment politik delikat mund ta tejkalojë me forcën e numrave në kuvend dhe peshën institucionale, KM e ka të qartë, se për 9 kushtet e Bundestagut, nuk e ka atë lloj fuqie. E ka nisur me reformën zgjedhore, një nga dy kushtet e para, që i mundëson uljen në një tryezë ndërqeveritare. Plotësimi i tyre e con drejt 7 kushteve të tjera, përmbushja e të cilave i mundëson Shqipërisë hapjen zyrtare të negociatave, me dy kapitujt e parë 23 e 24.

Dukshëm Edi Rama po përpiqet të ketë vetë kontrollin e përmbushjes së atyre kushteve. Kjo shpjegon edhe mungesën e një platforme, që do përfshinte edhe opozitën politike. Atë që e quan fazë të parë të reformës zgjedhore e ka planifikuar ta miratojë brenda vitit, pa asnjë pengesë, edhe pa opozitën politike e atë parlamentare, i sigurt se mund të shkojë përtej 80 votave, që ka arritur të ketë në kuvend.

Por lëvizja e Zaev kishte sjellë ethe edhe nga kampi opozitar. 3 ditë pas vendimit te Keshillit Europian për të mos hapur bisedimet e anëtarësimit me Shqipërinë dhe Maqedoninë e Veriut, Lulzim Basha artikulon më qartë idenë e zgjedhjeve të parakohshme, tashmë pa kërkesën e hershme të qeverisë tranzitore. Pak orë pas atyre deklaratave mblodhi aleatët në seli për t’i përkthyer në strategji. Pas mbledhjes Monika Kryemadhi foli për protesta, nëse mazhoranca nuk reagon.

Këto lëvizje të të hënës, u pasuan me një komunikim virtual mes Ramës e Bashës për përgjegjësitë e negociatave. Kërkesës së Bashës se si përgjegjës Rama duhej ta conte vendin në zgjedhje të parakohshme, Kryeministri u përgjigj me një fragment nga mesazhi i Donald Tusk pas vendimit të BE, ku thuhej se dy vendet nuk kishin përgjegjësi. Basha iu përgjigj në tuiter se shqiptarët janë të lodhur me justifikimet e KM për dështimet e mosmbajtjen e përgjegjësive dhe solli citate mesazhesh nga Merkel e Macron. Përballja virtuale nuk u ndal aty. Rama e vijoi lojën e Basha i shkoi pas, deri kur mbaruan mesazhet e liderëve europianë.

Por përgjegjësia për mos hapjen e negociatave dhe modeli që dha Zaev ishte gjatë gjithë javës kryetemë e çdo bisede e debati televiziv, njëlloj si në rrjetet sociale, e jo vetëm në Shqipëri. Der Spiegel një nga revistat gjermane informative me tirazh të lartë në Europë, analizonte në një artikull të posaçëm vendimin e BE, si shkelje premtimi që i kishte bërë Shqipërisë dhe MV për hapjen e negociatave. E ndërsa për Shkupin e konsideronte një befasi e vërtetë “jo”-në pas përmbushjes së kushtit për ndryshimin e emrit, për Tiranën analiza pranonte arsyetimin se ka ende probleme të mëdha për të zgjidhur, sidomos me mafien e drogës. Një konstatim që Lulzim Basha e gjeti si pjesë e denoncimeve të opozitës.

Njëlloj edhe krerët e grupeve politike në PE, që e konsideruan të gabuar mos hapjen e bisedimeve të anëtarësimit me Shqipërinë dhe Maqedoninë e Veriut. Qëndrimet u materializuan në një rezolutë, që mori mbështetjen e 412 eurodeputetëve, ku refuzimi ndaj Shqipërisë e Maqedonisë së Veriut konsiderohej gabim strategjik. Rezoluta e Parlamentit Europian apelon për një vendimmarrje të shpejtë për hapjen e negociatave për dy vendet, ndërsa shpreh gatishmërinë e PE për ndryshimin e metodologjisë së procesit të zgjerimit, sipas propozimit të Macron.

Në Tiranë, c’ka në fillim javë u duk si tension i ri politik, u orientua drejt bashkëpunimit, edhe pse në distancë. Reforma zgjedhore një nga dy kushtet e para të Bundestagut, duket se ka vëmendjen si të Ramës ashtu edhe të Bashës. Socialistët përgatitën një draft të parë me ekspertët e tyre, që u paraqit në komisionin e reformës zgjedhore, të enjten e javës politike që lamë pas. Paralelisht opozita diskutoi një draft të vetin, në një tryezë në nivel teknik në selinë blu, me përfaqësues të të gjitha partive aleate. Duket se opozita do bëjë pjesën e vet në përmbushje të atij kushti.

Madje drejtuesi politik i tryezës zgjedhore të opozitës, saktëson se pse reforma duhet bërë mes PS e opozitës politike. Njëlloj si më herët, socialistët duken mjaft të kënaqur të kenë kontributin e opozitës politike, madje Gjiknuri tregon edhe mënyra sui generis të këtij bashkëpunimi. Ka një detaj në draftin e socialistëve, që tingëllon si përmbushje e pjesshme e kërkesës së opozitës për qeveri teknike 6 muaj para zgjedhjeve. Janë ndryshimet në nenin 4 që i japin të drejtë KQZ-së të anulojë aktivitet e qeverisë apo bashkive gjatë fushatës elektorale, nëse konstaton se veprimtaria e tyre mund të përbëjë keqpërdorim të burimeve shtetërore.

Pikërisht këtë e evidentoi Gjinknuri. Por përtej qëndrimit të opozitës parlamentare, Edi Rama e di mirë se rëndësi të pazëvendësueshme ka perceptimi publik, dhe akti i Zaev mbetet i freskët. Një telefonatë me Merkel të enjten ishte mundësia për të fituar terren në perceptimin publik. E shfrytëzoi më së miri, ndërsa efekti në nivel personal i asaj telefonate, i lexohej tek shpallja si tuiter i ditës i lajmit që vetë kishte ndarë. Ajo telefonatë i shërbeu si argument edhe në studion e Blendi Fevziut, për të thënë se marrëdhënia e tij me kancelaren Merkel nuk kishte ndryshuar. Përballë skepticizmit që hasi në debat, KM theu edhe rregullin që vetë përsërit atë të konfidencialitetit, dhe ndau një detaj tejet të rëndësishëm nga biseda kokë me kokë me Merkel më 13 shtator në kancelarinë gjermane.

Por c’ka Kryeministri nuk thotë është se homologu i tij Zaev, e kishte marrë telefonatën nga Merkel 6 ditë më herët, menjëherë pas vendimit të KE. Sidoqoftë edhe 6 ditë me vonesë, për Ramën ajo telefonatë mbetet e çmuar, pasi presionit të brendshëm pas JO-së për hapjen e negociatave, i vuri përballë ndërkombëtarët që thotë se e mbështesin. Pavarësisht gjithckaje, c‘ka nuk ka ndryshuar për KM është leximi i krizës politike. Në rezolutën e Bundestagut, përkrah 9 kushteve, thuhet se zgjidhja e krizës politike lidhet me ecurinë e negociatave, por Rama nuk e pranon pjesën e vet.

E pavarësisht deklaratave, në fund të ditës si Edi Rama ashtu edhe Lulzim Basha e kanë kuptuar se në raundin më të parë të Këshillit Europian, do jetë pozicioni gjerman ai që do dominojë. Pas protagonizmit me veton që vuri për Shqipërinë e MV, edhe Presidenti francez Macron është dakordësuar me konkluzionin e publikuar të Samitit, se “Këshilli Evropian do t’i rikthehet çështjes së zgjerimit përpara samitit BE-Ballkani Perëndimor në Zagreb në maj 2020.”

Para samitit të Zagrebit drita jeshile për MV e Shqipërinë mund të hapet pikërisht sipas propozimit gjerman, që ka gjetur mbështetje edhe tek vendet skeptike. Por Shqipëria duhet të bëjë pjesën e saj dhe si Rama ashtu edhe Basha i kanë marrë mesazhet e kësaj pritshmërie. Finalizimi i reformës zgjedhore do jetë një test i pjekurisë së palëve për të tejkaluar krizën politike. Ndërsa grupi i dytë i kushteve gjermane, parashikon që në pikën e parë, zbatimin e reformës zgjedhore të miratuar, një sinjal se zgjedhjet e parakohshme nuk janë tabu.  /abcnews.al

zoran-zaev-e1546608513506.jpg
ad min13:20 | 26/10/2019

Përfaqësues të LSDM, partia e kryeministrit të Maqedonisë së Veriut Zoran Zaev, kanë filluar aktivitetet partiake në zonat e banuara nga shqiptarët ndërkohë që analistë dhe komentues në Maqedoninë e Veriut thonë se grupimi i shqiptarëve në radhët e LSDM-së po shndërrohet në opozitë të vërtetë të partive shqiptare, të pozitës dhe opozitës. LSDM mendohet se në zgjedhjet e fundit parlamentare ka fituar afër 1/3 e votave të përgjithshme të qytetarëve shqiptarë në këtë vend.

Duket se Lidhja Social Demokrate e Maqedonisë, e kryeministrit Zoran Zaev, edhe në zgjedhjet e ardhshme parlamentare të 12 prillit, do të synojë votën shqiptare. Përfaqësues të kësaj partie tashmë kanë filluar aktivitetet partiake në zonat e banuara nga shqiptarët. Nënkryetari i LSDM-së, Muhamet Zekiri vizituan të premten në mbrëmje, së bashku me ministrin Oliver Spasovski, banorët e fshatit Mateç të komunës së Likovës.

Zekiri tha se kishin biseduar me banorët lidhur me projektet e realizuara nga qeveria dhe problemet me te cilet ballafaqohen qytetarët. Disa netë më parë LSDM-ja pati takime edhe me qytetarët e Tetovës, ku kërkoi hapur mbështetjen e shqiptarëve. Kostandin Kostandinov u foli qytetarëve për Tetovën e bashkuar, të gjithë së bashku maqedonas, shqiptarë, turq, vlleh, boshnjakë dhe të tjerë, me një qëllim, për të ndjekur rrugën e duhur.

Në zgjedhjet e kaluara parlamentare, LSDM-ja morri një numër të madh të votave shqiptare, ndërsa në zgjedhjet lokale fitoi Komunën e Haracinës. Po kështu, në zgjedhjen e Presidentit Stevo Pendarovski, votat e shqiptarëve bënë diferencën.

Analistë dhe komentues në Maqedoni thonë se grupimi i shqiptarëve në radhët e LSDM-së po shndërrohet në opozitë të vërtetë të partive shqiptare, të pozitës dhe opozitës dhe ndërkohë po forcohet krahu i shqiptarëve në LSDM, e cila në zgjedhjet e fundit parlamentare mendohet se ka fituar afër 1/3 e votave të përgjithshme të qytetarëve shqiptarë në Maqedoninë e Veriut. Megjithatë, nuk janë dhënë ndonjëherë shifra zyrtare sesa ishte vota e shqiptarëve të Maqedonisë së Veriut  në favor të LSDM-së së Zoran Zaev./ABC News Albania


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono