zinedine zidane

zidane.jpg
G. P.17:14 | 14/07/2019

Zinedine Zidane mban zi për vdekjen e vëllait 54-vjeçar. Reali i ka dhënë leje pa limit trajnerit të tij, por francezi ka premtuar se do të kthehet pas një jave.

Arsyeja kishte qenë e fortë që u largua nga grumbullimi i madrilenëve në Kanada. Zinedine Zidane, trajneri i Realit, në krah të së shoqes, u kthye në Europë ku mori pjesë në ceremoninë e vdekjes së vëllait të tij, Faridit, që u shua në moshën 54-vjeçare.

I diagnostikuar me kancer, ai nuk mundi të mbijetonte, ndërsa përpara seancës stërvitore në Montreal, skuadra “merenges” mbajti një minutë heshtje në nderim të trajnerit të saj, dhe vëllait të tij.

Zidane mori leje një ditë më parë, dhe po ashtu edhe djali i tij, Luka Zidane u lejua nga klubi i tij i ri, Racing Santander, pasi ata morën mesazhin se Faridi ishte në gjendje kritike.

Burime brenda Madridit tregojnë se Zidane ka leje të mungojë aq sa të dëshirojë, sepse klubi ka ndërmend ta respektojë deri në fund, por vetë trajneri ka deklaruar se do të kthehet për një javë.

Ndoshta, edhe familja e tij, me origjinë nga Algjeria, mund të ketë traditën e “të shtatave”, si në Shqipëri, për të nderuar të vdekurin. Njeriu i stolit është tepër i rëndësishëm për madrilenët, edhe gjatë fazës përgatitore, pasi tani hidhen bazat për një sezon në kërkim të trofeve.

Reali dëshiron të bëjë të harrohet edicioni i shkuar, kur mbeti pa asnjë titull, diçka që i ndodh rrallë, ndërsa do të synojë dy arritjet e mëdha, La Ligën në Spanjë dhe Ligën e Kampionëve./ABC News Albania 24/7

rb.jpg
G. P.18:02 | 19/05/2019

Reali mbylli me humbje sezonin më negativ të shekullit të 21-të. Skuadra e Zidanit u mposht nga Betisi në Madrid, ndërsa ka dyshime të mëdha për edicionin e ardhshëm

Më në fund, përfundoi. Një vit i tmerrshëm, “anus horribilis”, u mbyll për klubin më të madh të botës në futboll, Realin e Madridit, dhe përfundoi ashtu siç e meritonte. Me humbje, madje brenda në “Santiago Bernabeu”, i mposhtur nga Betisi, 0-2.

Me Championsin të siguruar prej kohësh, por pa asnjë trofe të rëndësishëm për të luftuar, Reali thjesht nuk ishte vetvetja, edhe pse prej muajsh drejtohet nga një emër I madh si Zinedine Zidane.

Nuk është se nuk pati emra të shquar në fushë. Kejlor Navas, Marcelo, Carvajal, Modriç, Benzema apo Vinicius mund të mjaftonin për të shmangur turpin e radhës, veçse, siç tha Zidane më pas, problem ishte motivimi.

Loren Moron dhe Jese shënuan pas pushimit për Betisin, me trajnerin Kike Setien që arriti të fitonte edhe në “Bernabeu”, pasi ia doli në “Kamp Nou”.

Me 68 pikë në 38 ndeshje, me vetëm 63 gola të shënuara dhe plot 46 të pësuar, skuadra madrilene i dha fund sezonit më të keq të shekullit të 21-të, dhe njërit nga negativët në gjithë historinë e tij.

“Nuk është se nuk deshëm ta fitonim ndeshjen, – tha trajneri pas humbjes, – nuk ishim në gjendje që të fitonim, është çështje motivimi. Gjëja më e mirë që ndodhi është që sezoni përfundoi dhe mund të mendojmë për të ardhmen. Duhet ta pranojmë këtë edicion kështu siç ndodhi, madje do të na ndihmojë në vazhdim. Gjithsesi, jam i bindur se do të ndryshojmë dhe do të ngrihemi”.

Pyetja është e thjeshtë, e drejtpërdrejtë dhe që të tremb: A do të ketë reagim të shpejtë, sepse vetëm kështu e do tradita e klubit, dhe tifozët e tij të paduruar? E sigurt është që do të ketë ndryshime të mëdha, me mjaft lojtarë të larguar dhe me përforcime të rëndësishme, por kjo nuk garanton sukses që sezonin e ardhshëm./ABC News Albania 24/7

zidane.jpg
G. P.22:45 | 12/03/2019

Zinedin Zidane ka plane të mëdha për Realin, ndërsa u rikthye si trajner. Francezi synon të afrojë yje të mëdhenj në “Santiago Bernabeu”.

Nëse kishte diçka që pritej më pak në këtë botë, ishte ky kthim, më pak se 10 muaj pas dorëheqjes! Jeta, gjithsesi, ka të papritura dhe tashmë Zinedine Zidane është trajneri i ri i Realit, me një mision besohet më të vështirë sesa të parin. Herën e parë, presidenti Florentino Perez zgjodhi disa fjalë të menduara mirë për ta paraqitur, duke i thënë se “zgjodha Zinedin Zidanin, për të cilin fjala e pamundur nuk ekziston”.

Perezi nuk i përsëriti këto fjalë, por lumturia e tij ishte shumë e madhe tani sesa atëherë. Përse Reali u kthye tek dashuria e vjetër, dhe përse kaq shpejt?

E qartë, që në maj, pati një largim pa u marrë vesh mes palëve, dhe ikja e Zidanit, pas fitores së tretë radhazi të Championsit, ishte e papritur për vetë presidentin. Ai u përpoq ta bindte, por nuk ia doli, dhe trajneri ishte i qartë në konferencën për shtyp, kur tha se “dikush mund të ketë mendim tjetër, por mua nuk më dukej e sigurt se do të vazhdonim të fitonim”.

Perez synoi një vit pa blerje të mëdha, edhe pas ikjes së Ronaldos, me shpresën për të marrë më pas Nejmarin apo Mbapenë, por dështoi. Presidenti madrilen pranoi disfatën, dhe iu lut Zidanit për rikthimin.

U deshën vetëm dy telefonata, që francezi të bindej, ndërsa ai vetë e kishte lënë portën hapur, kur majin e kaluar tha “kjo, ndoshta nuk është një lamtumirë, por një mirupafshim për një herë tjetër”.

Zidan pranoi, siç e pohoi edhe vetë, për dashurinë që ka për klubin dhe presidentin, por tani fillon më e vështira. Francezi trashëgon një skuadër të shkatërruar pas disfave me Barcelonën dhe katastrofës me Ajaksin në Champions. Për të nisur një epokë të re suksesesh duhen blerje të mëdha, dhe në krye të listës janë disa emra.

Eden Hazard i Çelsit cilësohet si objektivi numër 1 i trajnerit. Mesfushori i Çelsit mund të kushtojë mbi 100 milionë euro, por Zidan e cilëso të domosdoshëm. Tifozët duan edhe një sulmues të madh, dhe Perez gjithnjë ka menduar për Nejmarin apo Mbapenë.

Cilin mund të marrë Reali?

Presidenti tha me shaka se “Zidan mund të bëjë diçka për Mbapenë sepse është francez, por unë i dua që të dy”. Gjithsesi, Mbape për momentin vlerësohet si më i mundshëm, edhe pse do të duhej të shpenzoheshin rreth 200 milionë euro për t’ia dalë. Pritet që ky sezon t’i shërbejë Zidanit si përgatitje për edicionin e ardhshëm, sepse Reali e ka thuajse të pamundur të fitojë trofe./abcnews.al

zidane.jpg
G. P.23:20 | 13/11/2018

Trajneri francez Zinedine Zidane mund të vazhdojë karrierën në kampionatin gjerman. Sipas mediave spanjolle, ish-tekniku i Real Madrid ka përfunduar në shënjestrën e drejtuesve të skuadrës së Bayern Munich të cilët e shohin se pasuesin e teknikut kroat Niko Kovaç.

Problemet e skuadrës së Bayern-it në sezonin aktual nuk kanë fund. Kampionët në fuqi të Gjermanise pozicionohen ne vendin e 5-të në renditjen e përgjithshme në kuotën e 20 pikëve. Bavarezët e shohin veten 7 pikë larg vendit të parë që mbahet nga rivalët e përbetuar të Borussia Dortmund.

Ndeshja e fundit e Bayern-it ishte pikërisht ndaj verdhezinjve ku u mposhtën me shifrat e thella 3-2. Kjo shkaktoi një lëkundje të madhe për kreun e pankinës se bavarezëve pasi diferenca me vendin e parë u thellua ndjeshëm.

Problemet e Kovaç nuk janë të lidhura vetëm me rezultatet, por edhe me marrëdhëniet me lojtarët. Të ashtuquajturit senatorët e Bayern-it Roben-Riberi-Humels dhe Myller kanë kërkuar nga krerët më të larte të klubit, shkarkimin e trajnerit 47-vjeçar.

Teknikat e stërvitjes që ndjek Kovaç janë konsideruar të papërshtatshme nga lojtarët themelorë të skuadrës. Situata alarmante pritet të sjellë shkarkimin e Kovaç, por fillimisht duhet gjetur pasuesi i tij. Sipas mediave spanjolle, drejtuesit e e Bayern-it po punojnë në fshehtësi për të gjetur gjuhën e përbashkët me ish-trajnerin e Realit, Zinedine Zidane.

46-vjeçari nuk ka një kontratë aktive me ndonjë skuadër dhe kjo përkthehet si një avantazh për bavarezët. Francezi është i lidhur ngushtë me një kalim të Manchester United si pauses i Mourinhos apo në rolin drejtues te skuadra e Juventusit, por ende nuk ka asgjë zyrtare.

Bayerni do të ishte një opsion i mirë për Zidane, por edhe një sfidë delikate pasi do të kishte përpara një pengesë të madhe për të kapërcyer. /abcnews.al

zinedine-zidane-man-united.jpg
G. P.17:56 | 24/08/2018

Manchester United mund të ketë një trajner të ri. Jose Mourinho është në pozita shumë të vështira, dhe atë mund ta zëvendësojë një emër i madh.

Nuk dihet edhe sa kohë mund të rezistojë.

Jose Mourinho parashikohet të kalojë një vjeshtë të vështirë tek Manchester United, madje që tani po flitet për një pasardhës. Pretenduesi i ri i stolit nuk është më sekret, mediat kanë zbuluar emrin e Zinedine Zidane.

Ish-trajneri i Realit, jo vetëm është menduar si njeriu më i përshtatshëm për të zënë vendin e Mourinhos, por mediat thonë se ai është dakord. Pozitat e trajnerit portugez janë tronditur ndjeshëm kohët e fundit, për shkak të mossuksesit sportiv, por edhe të konfliktit me zv. Shefin ekzekutiv të klubit, Ed Uduord.

Murinjo është shprehur i zemëruar me mungesën e përforcineve, duke fajësuar drejtuesit, por nga Uduord nuk ka ardhur asnjë lëshim.

Për më tepër, besohet se drejtuesi i lartë vlerësohet lart nga pronarët, pasi ka meritën kryesore që Junajtid sot vlen rreth 3.5 miliardë euro, dhe që të ardhurat vjetore janë afërsisht 700 milionë euro.

Për Mourinhon, ky është sezoni i tretë në “Old Traford” dhe ai nuk ka mundur të fitojë Premier Ligën, as Ligën e Kampionëve, dhe duket e vështirë që ta bëjë edhe këtë vit. Në të kundërt, Zidane, u largua si hero nga Reali i Madridit.

Trajneri francez, ish-futbollist i madh, fitoi tri herë radhazi Championsin, ndërsa papritur dha dorëheqje pak ditë pas triumfit të fundit, në muajin Maj të këtij viti./abcnews.al

zidane.jpg
G. P.13:22 | 31/05/2018

Zinedin Zidane largohet nga Reali i Madridit. Legjenda franceze shkaktoi një të papritur të madhe duke njoftuar vendimin vetëm pak ditë pas fitores së Championsit.

Me shumë gjasë, dorëheqja më troditëse e të gjitha kohëve.

Zinedin Zidane nuk është më trajner i Realit të Madridit.

Legjenda franceze shkaktoi një tërmet të vërtetë botën e futbollit duke deklaruar largimin vetëm pak ditë pas fitores së Ligës së Kampionëve për herë të tretë radhazi.

Zidane doli në konferencë për shtyp në krah të presidentit të klubit, Florentino Perez, dhe qartësoi gjithçka.

Zinedine Zidane: “Kam vendosur të mos vazhdoj vitin tjetër si trajner i Ral Madrid. Kam folur me presidentin dhe i kam shpjeguar ato që mendoja, ndërsa mendoj se është momenti i duhur për të gjithë për t’u marrë ky vendim. Në radhë të parë është momenti i duhur për mua, pastaj për ekipin dhe publikun. E di që është një moment i rrallë, or është momenti i rëndësishëm. Mendoj se ky ekip ka nevojë të fitojë dhe që ta bëjë këtë duhet të ndryshojë. Pas tre vitesh duhet motivim tjetër dhe metodë tjetër pune”.

Perez, që mesa duket ishte vënë në dijeni që më përpara për atë që do të ndodhte, u duk tepër i dëshpëruar.

Florentino Perez: “Për mua ky ka qenë një vendim krejt i papritur. Është jje vendim i dëshpëruar. Zidane e di që unë gjithmonë kam dashur që ai të qëndrojë këtu”.

Lajmet janë që Zidan u takua që të mërkurën me presidentin Perez, dhe më pas vendosi të dilte në konfercën e shtypit për të deklaruar dorëheqjen.

Ekziston mundësia që ai të bisedojë me Federatën Franceze për të marrë drejtimin e kombëtares pas Kupës së Botës.

Gjithsesi, besohet se Zidan u largua pasi nuk kishte besim se mund të vazhdonte të fitonte me këtë ekip.

Suksesi në Champions u arrit me shumë fat, ndërsa në kampionat, Reali u turpërua këtë sezon nga Barcelona.

Ish-ylli i madh i Francës, u shpall tri herë kampion i Europës, fitoi një titull kampion në Spanjë, si dhe dy herë Superkupën e Europës dhe Kupën e Botës për klubet.

Ai fitoi 104 nga 149 ndeshjet në stolin madrilen.

Arsen Venger dhe Antonio Conte janë favoritë sipas kompanive të basteve, për të zëvendësuar francezin në stolin e klubit më të madh të botës, ndonëse në listë është edhe trajneri i Totenhemit, Maurisio Poçetino.

Pasiguria është e madhe tek tifozët e Realit për të ardhmen e skuadrës së tyre, tani që Zidane u largua, ndërsa pritet të iket edhe Cristiano Ronaldo./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono