zinedine zidane

Zidane-2.png
Igli Nikolli09:49 | 21/10/2019

Reali i Madridit e ka humbur durimin me Zinedine Zidane. Trajneri francez rrezikon seriozisht shkarkimin. Nga Spanja vjen skenari i bujshëm për stolin e “Los Blancos”.

El Mundo Deportivo raporton se ndeshja e mesjavës kundër Galatasarayt do të përcaktojë fatin e Zidane. Humbja kundër Mallorcës në kampionat e ka tërbuar presidentin Perez.

“Merengues” do të zbresin nesër në fushë për Champions League. Në Stamboll nuk ka alternativa përveç fitores. Reali numëron vetëm një pikë në dy javët e para dhe nuk falen gabimet kundër ekipit të Fatih Terim.

Nëse Reali nuk fiton në kryeqytetin turk, Zidanen e pret shkarkimi dhe në vendin e tij pritet të ulet Jose Mourinho. Portugezi ka drejtuar klubin spanjoll gjatë viteve 2010-2013 dhe mbetet i preferuari i Florentino Perez. /abcnews.al

Zidane-1.png
Igli Nikolli11:58 | 20/10/2019

Real Madrid pësoi humbjen e parë në kampionat kundër Mallorcës. Ekipi i Zidane humbi 1-0 në ishull dhe i dorëzoi vendin e parë Barcelonës. Pavarësisht mungesave të shumta, loja e dobët e “Los Blancos” nuk justifikohet.

Trajneri francez i bën thirrje lojtarëve të reagojnë. Një paraqitje e tillë është e papranueshme dhe ekipi duhet të tregojë vazhdimësi në lojë e rezultate.

Problemi më i madh është që duhet të tregojmë çdo tre ditë që jemi të fortë. Po hasim vështirësi dhe nuk po arrijmë ta tregojmë forcën tonë. Kemi nevojë për vazhdimësi dhe duhet të tregojmë në fushë që jemi një ekip i madh. Nuk mund të luajmë më si kundër Mallorcës.

Nuk po them që jam i shqetësuar, nuk më pëlqen ta përdor një fjalë të tillë, thjeshtë kemi nevojë për vazhdimësi. Duhet të luajmë me intensitet dhe nuk e bëmë diçka të tillë kundër Mallorcës“, përfundon trajneri i Realit. /abcnews.al

zidane.jpg
Vladimir Prenga08:40 | 10/10/2019

Manchester United ka bërë bllokadë për Paul Pogba dhe Real Madrid është lodhur. Klubi anglez as që ka pranuar të bisedoje për shitjen e mesfushorit francez, i cili në fakt edhe po paraqitet dobët në këtë fillim sezoni. Spanjollët nga ana tjetër duan një mesfushor qendre dhe po shohin për zgjidhje të tjera.

Një ditë më parë u raportua se objektivi është Fabian Ruiz i Napolit, që vlerësohet më shumë se 60 milionë euro. Tashmë nga Spanjë lajmi është se Reali synon të marrë që në janar mesfushorin e Tottenham, Christian Eriksen. Këtij të fundit në qershor i përfundon kontrata dhe londinezëve u ka shkuar dëm mundi për ta bindur danezin të rinovojë.

Marca raporton se presidenti Daniel Levy u ka kërkuar njerëzve të tij të besuar të gjejnë ndonjë ofertë për mesfushorin. Kështu Tottenhami do të ishte gati ta shiste Eriksen në janar, për të mos i ikur me parametra zero.

Reali nga ana tjetër është i kujdesshëm dhe nuk e kontakton lojtarin para janarit. Rregullat e FIFA-s për transferimet janë të qarta. Gjithashtu te Reali e kanë të qartë se duhet të përforcohen në janar. Eriksen shikohet lojtari që i sjell skuadrës së tyre cilësitë që u mungojnë, edhe pse trajneri Zidane preferon më shumë Paul Pogba. /abcnews.al

Casillas-Zidane.jpg
Igli Nikolli21:40 | 23/09/2019

E ardhmja e Zinedine Zidane në stolin e Real Madrid është në dyshim dhe emrat e Mourinhos dhe Allegrit e “kërcënojnë” francezin. Fitorja kundër Sevillas në transfertë ka rikthyer sadopak qetësinë në kampin e “Los Blancos” dhe Zidane mund të qëndrojë i qetë për momentin.

Në lidhje me kritikat e shumta kundrejt trajnerit të Realit ka folur edhe Iker Casillas. Portieri i mirënjohur ka dalë në mbështetje të trajnerit dhe zbulon shkakun e kësaj krize të Realit.

“Zidane është më i miri. Disa e kritikojnë, por askush nuk mund të vërë në dyshim aftësitë e tij. Nuk mund të diskutohet pankina e Zidane. Mund të flasim për një menaxhim të keq të klubit për faktin që varet ende nga disa lojtarë ekspertë, të cilët janë ngopur nga sukseset e arritura. Të rinjtë në ekip nuk janë e ardhmja e afërt. Nesër do të kenë shanset e tyre por sot, jo”, komenton Iker Casillas në rrjetet sociale. /abcnews.al

Zidane-1.jpg
Igli Nikolli19:57 | 23/09/2019

Një gol i Karim Benzema në mesin e pjesës së dytë i dhuroi fitoren Realit të Madridit në një transfertë të vështirë si ajo e Sevillas. “Los Blancos” nuk fitonin në “Ramon Sanchez Pizjuan” prej 4 vitesh dhe tani ndajnë kreun me Athletic Bilbaon me nga 11 pikë.

Një fitore qetësie për Zinedine Zidane. Trajneri francez kishte përfunduar në qendër të kritikave, diçka që eviton ta bëjë pas fitores së mbrëmjes së kaluar. 47-vjeçari ndihet i lumtur dhe ka një dedikim të veçantë për trepikëshin e arritur në fushën e Sevillës.

“Jam shumë i lumtur dhe kjo fitore na dhuroi një kënaqësi të madhe. Ka patur shumë diskutime gjatë kësaj kohe, por nuk ka rëndësi të madhe kjo pjesë. Rëndësi ka fakti që kemi zhvilluar një ndeshje me nivel të lartë gjatë 90 minutave në një fushë të vështirë, kundër një ekipi që po luan një futboll shumë të mirë. Jemi të lumtur dhe komplimentoj djemtë për paraqitjen dhe fitoren e arritur, të gjithëve edhe atyre që nuk kanë luajtur. Kjo ishte një fitore skuadre”, komentoi ZInedine Zidane. /abcnews.al

Zidan-Real.jpg
Igli Nikolli15:04 | 21/09/2019

Real Madrid do të përballet nesër në mbrëmje me Sevillën. “Los Blancos” nuk ftojnë në fushën e andaluzianëve prej katër vitesh dhe nesër do tentojnë ta bëjnë diçka të tillë. Për t’i dhënë fund ecurisë negative dhe formës së keqe që po kalojnë 13 herë kampionët e Evropës.

Pozitat e Zinedine Zidane janë lëkundur shumë dhe e ardhmja e francezit në stolin e Realit është në rrezik. Francezi nuk kërkon të fshihet dhe shpreson të mposhtë kryesuesit e Sevillës.

Zidane flet për situatën e vështirë dhe tregon rrugën e duhur për t’u rikthyer te fitoret dhe suksesi.

KUNDËRSHTARI – “Nesër do të luajmë në një fushë të vështirë. Sevilla është në vend të parë, por ne duam të bëjmë një ndeshje të mirë. Jemi të gjithë gati për këtë përballje dhe duam të fitojmë kundër tyre.”

SITUATA – “Ndihem i fortë për të vazhduar përpara. Nuk më interesojnë fjalët që fliten, më interesojnë vetëm bisedat me lojtarët e mi. Ndihem i fortë dhe do të vazhdoj punën deri në momentin e fundit. E di vështirësinë që ekziston këtu, pasi te Reali nuk pranohen dy ndeshje të gabuara.”

KRITIKAT – “Nuk jam i surprizuar. Kjo është jeta. Kemi hasur edhe më parë vështirësi për të fituar. Ky klub ka kaluar momente shumë delikate. Nuk ka rëndësi ajo çfarë thuhet jashtë, e kemi forcën për ta kaluar këtë moment të vështirë. Duhet t’i rikthehemi lojës së bukur dhe duhet të përmirësohemi. Këtu jemi fokusuar dhe do ia dalim të gjithë së bashku.”

MURINJO – “Nuk më shqetëson aspak. Kjo është situata dhe nuk mund të fshihemi. Kur gjërat nuk ecin mirë, bëhen ndryshime. Është e vështirë, por ky është realiteti.”

I PENDUAR PëR RIKTHIMIN? – “Është e vështirë të flasësh për diçka të tillë në një moment të vështirë. Vendosa të rikthehesha te Reali për shkak të projektit të ri të klubit. Kur fiton është gjithçka e lehtë, ndërsa tani ndodhemi në një moment tjetër. Duhet të qëndrojmë të bashkuar, vetëm kështu ia dalim.”/abcnews.al

skysports-gareth-bale-real-madrid_4726592-1280x720.jpg
Vladimir Prenga11:30 | 20/09/2019

Shumë zhurmë rreth Realit të Madridit dhe të ardhmes së trajnerit Zinedine Zidane. Që tani në Spanjë kanë nisur të qarkullojnë zërat për alternativat e mundshme që mund të zënë vendin e francezit, gjithmonë nëse presidenti Florentino Perez vendos ta largojë. Në mes është edhe një klauzolë, që i kushton Realit 75 milionë euro nëse e largon Zidane.

ALTERNATIVAT – Një nga emrat e parë që nisi të qarkullojë është i Jose Mourinho. Portugezi është lakuar shpesh për një rikthim te spanjollët. Sërish shikohet si opsion për Realin e Madridit. Një tjetër kandidaturë e fortë është ajo e Massimiliano Allegrit.

Italiani është lidhur me një kalim te Reali edhe më parë dhe sipas “Marca” është një alternativë që ka shumë shanse për të drejtuar klubin e financuar nga Florentino Perez. Emra të tjerë që qarkullojnë janë ato të Raul Gonzales dhe Xabi Alonso, dy ish-lojtarë të spikatur me klubin spanjoll. /abcnews.al

zidane.jpg
Vladimir Prenga10:00 | 20/09/2019

Zinedin Zidane është në hall, pasi skuadra e tij po pëson shumë këtë periudhë. Trajneri francez kërkon të gjejë balancën e skuadrës së tij, që në 5 ndeshjet e fundit ka pësuar 9 gola. Mesatarisht 1.8 gola për ndeshje, një shifër shumë e lartë. Sidomos kur flitet për Realin e Madridit.

Madrilenët pësuan tre herë në sfidën ndaj PSG dhe Zidane po mendon të heqë dorë nga moduli 4-2-3-1. Eden Hazard është një lojtar që nuk i bën detyruar mbrojtëse dhe kjo i shkakton probleme skuadrës spanjolle kur belgu është në krah të sulmit.

Zgjidhja që po mendohet është kalimi në modulin 4-4-2, me Hazard të pozicionuar pas Benzema në sulm. Mungesta në mesfushë janë disa: Isco, Valverde dhe Modric. Në këto kushte, në qendër do të luajë dyshja Kroos-Casemiro.

Lucas Vasquez pritet të luajë në të djathtë të mesfushës, ndërkohë që ka dilema për linjën e majtë. James dhe Bale janë dy alternativat kryesore, por shanse ka edhe Vinicius. Ky i fundit më pak. E sigurt duket që Zidane do të ndryshojë modul, pasi ndaj Sevilla i pret një ndeshje shumë e vështirë në kampionat. /abcnews.al

madrid-1280x836.jpg
G. P.14:30 | 31/07/2019

Kriza e Realit u thellua edhe më shumë pas humbjes ndaj Tottenham-it. Trajneri Zidane u shpreh optimist, por mediat patën kritika të ashpra për skuadrën madrilene.

U desh një dhuratë për të vendosur ndeshjen, por ky nuk ishte ngushëllim. Nuk ka rastësi në humbjet e Realit, me madrilenët që pësuan disfatën e radhës ndaj Tottenhem-it në Kupën AUDI.

Eliminim në gjysmëfinale pas rezultatit 0-1, dhe dëshpërim i thellë i tifozëve për lojën e ish-kampionëve të trefishtë radhazi të Europës. Harry Kane shënoi golin e vetëm të sfidës në “Allianz Arena”, por anglezët mund të kishin realizuar shumë më tepër nëse në ndihmë të Realit të mos kishte ardhur Kejlor Navas.

I quajtur portier rezervë, ai u bë shpëtimtar, ndërsa rivali i tij për portën, Thibaut Curtois, është i dëmtuar. Kjo ndaj Tottenham-it, erdhi pas dështimeve ndaj Bajernit e sidomos kundër Atletikos, dhe pas një barazimi të vështirë me Arsenalin, në periudhën përgatitore të verës.

Gjithsesi, trajneri Zidane doli kundër rrymës me fjalët pas ndeshjes.

“Tifozët nuk duhet të jenë të shqetësuar, – ishin fjalët ngushëlluese të francezit, – unë jam gjithnjë pozitiv. E di se gjendja është e vështirë, pasi mbyllëm keq kampionatin e kaluar, dhe nisëm keq përgatitjet këtë sezon, por unë kam në dorë një skuadër të madhe. Kemi nevojë thjesht të fitojmë një ndeshje, na mungon vetëm kjo. Ndaj Tottenham-it ishim më mirë se në ndeshjet e tjera, edhe pse humbja nuk I pëlqen askujt”.

Gjithsesi, nuk është ky mendimi i mediave të Madridit. Gazeta “AS” titullon “Kejlor dhe asgjë më shumë”, duke theksuar se ishte portieri që shpëtoi ekipin nga një humbje më e thellë.

“Madridi vazhdon pa futboll, dhe pa gola, Marcelo i dhuroi fitoren Tottenham-it”, – ishte komenti i mëtejshëm i “AS”-it. Gazeta “Marka” shkruan: “Alarm i kuq tek Reali i Madridit, klubi i bardhë po kalon një nga krizat më të këqija të rezultateve që mbahet mend”.

Zidane nuk deshi të komentonte për të ardhmen e Gareth Bale-t apo të James Rodrigezit, duke theksuar se do të mendonte për lojtarët që kishte në dispozicion. Pritet që Zidane ta izolojë Bale-n, edhe nëse ky mbetet në Madrid, ndërsa e ardhmja e kolumbianit mbetet e paqartë./ABC News Albania 24/7

zidane.jpg
G. P.17:14 | 14/07/2019

Zinedine Zidane mban zi për vdekjen e vëllait 54-vjeçar. Reali i ka dhënë leje pa limit trajnerit të tij, por francezi ka premtuar se do të kthehet pas një jave.

Arsyeja kishte qenë e fortë që u largua nga grumbullimi i madrilenëve në Kanada. Zinedine Zidane, trajneri i Realit, në krah të së shoqes, u kthye në Europë ku mori pjesë në ceremoninë e vdekjes së vëllait të tij, Faridit, që u shua në moshën 54-vjeçare.

I diagnostikuar me kancer, ai nuk mundi të mbijetonte, ndërsa përpara seancës stërvitore në Montreal, skuadra “merenges” mbajti një minutë heshtje në nderim të trajnerit të saj, dhe vëllait të tij.

Zidane mori leje një ditë më parë, dhe po ashtu edhe djali i tij, Luka Zidane u lejua nga klubi i tij i ri, Racing Santander, pasi ata morën mesazhin se Faridi ishte në gjendje kritike.

Burime brenda Madridit tregojnë se Zidane ka leje të mungojë aq sa të dëshirojë, sepse klubi ka ndërmend ta respektojë deri në fund, por vetë trajneri ka deklaruar se do të kthehet për një javë.

Ndoshta, edhe familja e tij, me origjinë nga Algjeria, mund të ketë traditën e “të shtatave”, si në Shqipëri, për të nderuar të vdekurin. Njeriu i stolit është tepër i rëndësishëm për madrilenët, edhe gjatë fazës përgatitore, pasi tani hidhen bazat për një sezon në kërkim të trofeve.

Reali dëshiron të bëjë të harrohet edicioni i shkuar, kur mbeti pa asnjë titull, diçka që i ndodh rrallë, ndërsa do të synojë dy arritjet e mëdha, La Ligën në Spanjë dhe Ligën e Kampionëve./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono