zgjidhje

ilir-meta.jpg
G. P.14:11 | 01/08/2019

Presidenti i Republikës, Ilir Meta, doli në një konferencë për mediat këtë të enjte. Ai ritheksoi se zgjedhjet e ligjshme dhe kushtetuese janë më 13 Tetor, ndërsa ato të 30 Qershorit tha se nuk kanë qenë të ligjshme.

Meta u bëri thirrje të gjitha palëve të marrin përgjegjësitë e veta dhe të arrijnë një marrëveshje politike për zgjidhjen e krizës politike në vend sa më parë në mënyrë që vendit t’i hapen negociatat në muajin Tetor.

Ndër të tjera, kreu i shtetit tregoi dy hapat për zgjidhjen e krizës politike.

“Nuk besoj në zgjidhjet e shpejta dhe ëndërrimtare, zgjidhje të shpejta brenda një dite, por kjo mund të zgjidhet, dhe hapi i parë është zbatimi i dekretit të Presidentit për zgjedhje lokale më 13 Tetor, dhe hapi i dytë është prapë kërkesa e Presidentit për zgjedhje presidenciale më 13 Tetor”, tha Meta./abcnews.al

klgj-1280x714.jpg
nev ila20:58 | 23/07/2019

Këshilli i lartë Gjyqësor ka gjetur zgjidhjen për zhbllokimin e Gjykatës së Lartë.

Në mbledhjen e kësaj të marte, u vendos që shqyrtimi i çështjeve të bëhet nga gjyqtarë të gjykatave të Apelit, të cilët duhet të kenë jo më pak se 13 vite eksperiencë pune, e të kenë kaluar vettingun.

Kjo zgjidhje e KLGJ është një nga tre opsionet që misioni EURALIUS sugjeroi për të bërë funksionale Gjykatën e Lartë. Sipas ekspertëve evropianë, ky opsion duhej të ishte masa e fundit që duhej ndërmarrë vetëm në raste të veçanta.

Në Gjykatën e Lartë ka shkuar në 32 mijë numri i dosjeve në pritje, ndërsa ka disa çështje ekstradimi të cilave nëse u kalojnë afatet, rrezikojnë lirimin e personave që presin ekstradimin e zgjidhja e KLGJ ka patur parasysh këtë situatë delikate.

Aktualisht Gjykata e Lartë ka mbetur vetëm me 2 gjyqtarë, nga 19 që duhet të ketë. Për 3 kandidatë jo gjyqtarë ka nisur verifikimi, ndërsa për kandidatët gjyqtarë duhet të përfundojë procesi i vettingut në të dyja shkallët. Cka do thotë se bazuar në këtë proces, ngritja e Gjykatës së Lartë do kërkojë edhe disa muaj./ABC News Albania 24/7

celibashi-1280x609.jpg
nev ila21:44 | 10/07/2019

I ftuar në Mbrëmje ABC me Mirela Milorin ish-kreu i KQZ Ilirjan Celibashi ndau opinionin e tij në lidhje me situatën aktuale politike në vend. I pyetur nga gazetarja MIrela Milori nëse ekzistonte mundësia që KQZ të kishte një vendim tjetër në lidhje me dekretin e presidentit për anulimin e zgjedhjeve në 30 qershor, Celibashi tha se vendimi i KQZ ishte konform ligjit. Sipas Celibashit, Presidenti mund të kishte përdorur një taktikë tjetër politike, për të justifikuar shtyrjen e zgjedhjeve, me anë të dekretit presidencial.

Mirela Milori: A mund të kishte KQZ një vendim tjetër për dekretin e presidentit?

Ilirjan Celibashi: Pavarësisht se kjo çështje e ka ndarë Shqipërinë dhe juristët, por për opinionin tim, bindjen time, vendimi i KQZ  për të vazhduar me procesin përgatitor zgjedhor, ishte një akt apo veprim, në përputhje me ato detyrime që kodi zgjedhor i ngarkon KQZ. Është një veprimtari e ligjshme dhe vjen në respekt të Kodit Zgjedhor. Dua të theksoj diçka: KQZ ka vetëm një moment kur rri pas derës së presidentit të republikës, dhe ky moment është pritja e dekretimit të datës së zgjedhjeve . Momenti kur presidenti i republikës e dekreton datën e zgjedhjeve, pra ja jep komisionit qendror të zgjedhjeve, KQZ nuk ka më asnjë arsye ligjore për të ndenjur pas derës së presidentit, duke menduar që, prit se mos presidenti mund të anulojë datën e zgjedhjeve, sepse nuk ekziston kjo mundësi. KQZ nuk ka asnjë obligim, të rri më sy e veshë nga dera e presidentit, për të pritur se çfarë do bëj më tej presidenti, lidhur me procesin zgjedhor. Ka mbaruar punë Presidenti i Republikës me procesin zgjedhor në momentin që ka dekretuar datën e zgjedhjeve.

Mirela Milori: A do të kishte vend për një interpretim tjetër nëse në dekretin e anulimit të datës së zgjedhjeve në 30 qershor do të kishte një datë e re e zgjedhjeve lokale, a do e fuste në një spirale tjetër juridike situatën?

Ilirjan Celibashi: Në thelb do të ishte njësoj, kushtetutshmëria e këtij akti do të ishte njësoj sikurse është edhe sot. Jo-kushtetutshmëria e aktit të anulimit të datës së zgjedhjeve, apo edhe ajo e caktimit të një date tjetër zgjedhjesh me një dekret të veçantë. Por ndoshta nga pikëpamja pragmatike dhe politike, mund të ishte një zgjidhje që mund ta justifikonte deri diku aktin e presidentit, sepse do të thoshte që: unë e kam të drejtën të caktoj datën e zgjedhjeve sepse gabova me atë datë, kushtetuese është kjo tjetra. Mund edhe të luante me këtë zgjidhje por kjo ishte zgjedhja e tij./abcnews.al

 

arian-cani.jpg
G. P.21:06 | 11/06/2019

Sipas gazetarit Arian Çani, duke marrë parasysh krizën aktuale në Shqipëri nuk do të ketë ndonjëherë zgjidhje. Gjatë emisionit “Provokacija” të Mustafa Nanos, ai theksoi se njerëzit publikë që kanë hapësira në media të mos i bëjnë njerëzit që të ëndërrojnë më kot.

“Nuk ka zgjidhje. Mendimi im është që nuk do ketë zgjidhje asnjëherë. Mirë është që ne që të paktën kemi një foltore, një mundësi nga një ekran i caktuar siç është Klan apo ABC-ja mirë është që aq sa mundemi, me aq sa na dëgjojnë ata që na kanë xhan, apo që na kanë inat, mos t’i bëjmë kot të ëndërrojmë. Nuk do ketë zgjidhje. Kjo nuk është pesimiste ta thuash”, tha Çani.

Sipas moderatorit të emisionit “Zonë e lirë”, vendi ynë nuk është një vend me demokraci të konsoliduar. Çani theksoi se zgjedhjet dhe votat respektohen më shumë në vendet tona fqinje. Sipas tij bëhet fjalë për luftë për pushtet, ku dikush do humbasë.

“Sepse nuk jemi në një vend me demokraci të konsoliduar. Jemi në një vend hibrid. Në një vend hibrid. Në një vend që nuk është as diktaturë, por nuk është as demokraci. Deri në momentin, kur ne jemi dakord që zgjedhje në këtë vend nuk janë bërë kurrë të rregullta, gjithmonë tjetri paragjykohet thotë që “i ke vjedhur” i ke vjedhur”, çdo bisedë tjetër pas këtij momenti është e kotë. Pra si të thuash duhet ta heqim këtë lloj hipokrizie. Ne jemi një vend ku zgjedhjet dhe vota nuk respektohet. Ndërkohë që vota respektohet shumë mirë në Maqedoni, në Kosovë, në Mal të Zi. Vetëm tek ne vazhdon të ndodhë që fituesi të paragjykohet dhe me të drejtë sepse faktet, interpretimi i tyre, janë të mjaftueshme që të na bëjnë të besojmë se nuk ka palë të drejta dhe palë të gabuara. Është luftë për pushtet dhe unë them që kjo luftë do të vazhdojë dhe patjetër që dikush do humbasë nga kjo luftë. S’mund të vazhdohet me këtë histori  që të bëhet luftë dhe të gjitha palët të dalin të fituara”, tha Arian Çani.  /abcnews.al

ilir-meta123.jpg
G. P.11:08 | 24/05/2019

Kreu i Shtetit Ilir Meta ka deklaruar se është i gatshëm të rishikojë dekretin presidencial që ka përcaktuar datën 30 qershor për zhvillimin e zgjedhjeve vendore. Përmes një reagimi Meta ka theksuar se për zgjidhjen e krizës është i gatshëm të sakrifikojë edhe mandatin e tij.

“Presidenti cakton datën e zgjedhjeve për Kuvendit, për organet e pushtetit vendor dhe për zhvillimin e referendumeve”

Është kjo pika kushtetuese e referuar nga presidenti Meta si bazë ligjore e zgjidhjes që ai ofron nga karrigia e kreut të shtetit për krizën politike në vend.

“Në këtë kuadër, shpreh gadishmërinë time institucionale, që në përputhje me kompetencën që më jep shkronja “gj” e nenit 92 të Kushtetutës, të rishikoj Dekretin për caktimin e datës së zgjedhjeve vendore dhe të dekretoj një datë tjetër për zhvillimin e tyre, në përputhje me vullnetin e shprehur të palëve politike”.

Për këtë përsërit deklaratën e pak muajve më parë.

“Mbetem i gatshëm që për një zgjidhje që i shërben interesit më të mire, stabilitetit dhe demokracisë së vendit; të vendos në dispozicion edhe mandatin tim si President i Republikës, nëse palët e gjykojnë edhe këtë element si të rëndësishëm për një zgjidhje gjithëpërfshirëse, që do t’u jepte qyetetarëve shqiptarë të drejtën për të zgjedhur edhe Presidentin me votën e tyre të lirë”.

Garantimi i rendit kushtetues, sigurisë publike, stabilitetit të vendit dhe i zgjedhjeve demokratike, të lira dhe të ndershme janë parime kushtetuese që mbizotërojnë mbi çdo aspekt tjetër formal, përfshirë këtu rishikimin e datës së zgjedhjeve. – deklaroi Meta duke i bërë thirrje palëve të ndalojnë retorikat si reflektim i sinqertë ndaj apelit të Parlamentit Gjerman, i shprehur i gatshëm për ndërmjetësimin e dialogut mes palëve.

/ABC News Albania 24/7

 

pranga-1.jpg
G. P.08:15 | 21/05/2019

Observatori i Shoqërisë Civile Kundër Krimit të Organizuar: “Ballkani ka ende punë për të bërë. Sidomos kur vjen fjala tek lufta kundër krimit të organizuar në rajon, i cili ndryshe nga politika bën bashkë të gjithë grupet kriminale, pa dallim kombësie”.

Observatori i Shoqërisë Civile Kundër Krimit të Organizuar në Evropën Juglindore, si pjesë e Iniciativës Globale Kundër Krimit të Organizuar Ndërkombëtar, publikoi të hënën (20.05) në Vjenë raportin me të dhënat e mbledhura nga 20 ekspertë dhe gazetarë vendas nga shoqëria civile në Shqipëri, Bosnjë Hercegovinë, Kosovë, Mali i Zi, Maqedonia e Veriut, dhe në Serbi. Me temën “Zonat problematike të krimit të organizuar në vendet e Ballkanit Perëndimor”, raporti ka si qëllim forcimin e rolit të shoqërisë civile në luftën kundër krimit të organizuar dhe korrupsionit. Ai përmban të dhëna të detajuara mbi qytetet kryesore, zonat bregdetare, pikat kufitare ose nyjet kyçe që janë më të predispozuara për t’u përdorur nga trafikantët e drogës, armëve, qenieve njerëzore, cigareve dhe të tjera veprimtarive kriminale që kryhen në Ballkan.

Harta e zonave problematike të rajonit

Raporti evidenton se krimi i organizuar i përzgjedh vendet ku vepron. Së pari, është pozicioni gjeografik i favorshëm. Ballkani ka vendndodhje strategjike për grupet kriminale që e përdorin atë si tranzit, për të kaluar më pas në tregun e madh dhe fitimprurës të Evropës. Më pas renditet qeverisja e dobët dhe e korruptuar si dhe ekonomia e dobët.

“Janë rreth 40 zona problematike që kemi identifikuar. Janë vende si Durrësi në Shqipëri, për shembull, ose Bar në Malin e Zi. Ballkani është kthyer në një portë të madhe për kokainën që futet nga Amerika e Jugut dhe këto dy qytete janë parë si pika kyçe për hyrjen e kokainës në rajon. Një tjetër zonë është pika kufitare ndërmjet Malit të Zi dhe Kosovës që quhet Kulla, ku vërehet një numër në rritje i aktiviteteve kriminale, duke nisur nga trafiku i drogës apo kontrabanda e cigareve ndërmjet këtyre dy vendeve. Një tjetër zonë problematike është në pikat kufitare mes Malit të Zi dhe Bosnje-Hercegovinës, dhe aty kryesisht kalon kanabisi që vjen nga Shqipëria. Është shumë e lehtë të trafikosh kanabis nga njëri shtet tek tjetri sepse nuk ka shumë kontroll policor dhe nga ana tjetër policitë nuk janë të pajisura me teknologjitë më të fundit që mund t’u mundësojnë gjurmimin e drogave. Gjithashtu është i pranishëm edhe korrupsioni në radhët e forcave policore dhe një pjesë e konsiderueshme e lehtësirave që u krijohen këtyre veprimtarive kriminale mundësohen edhe nga korrupsioni. Jo vetëm korrupsioni nga policët kufitarë por edhe në instancat më të larta” – i tha Deutsche ëelle-s Fatjona Mejdini, koordinatore në terren e Ballkanit Perëndimor për Iniciativën Globale.

Rivalë në politikë, bashkëpunëtorë në trafiqe

“Përveç zonave problematike ne kemi evidentuar edhe pika që i kemi quajtur zonat më vulnerable rajonale dhe e tillë është veriu i Kosovës. Ajo është një zonë gri ku kryhen të gjithë llojet e kontrabandës dhe grupet kriminale shqiptare me ato serbe kanë një bashkëpunim shumë të ngushtë. Veriu i Kosovës është vendi ku krimit nuk i intereson aspak etnia. Ne shohim politikanë dhe qeveri të Ballkanit që nuk bashkëpunojnë pikërisht për çështje të kombësisë dhe etnisë dhe nga ana tjetër kemi krimin që nuk ka pengesa të tilla për të bashkëpunuar me njëri-tjetrin” – thekson koordinatorja Mejdini për DW.

“Karburanti është malli që kalon më shpesh kontrabandë, nga veriu në jug. Më pas vijnë materialet e ndërtimit, ilaçet, makinat, cigaret, ushqime, pije, dhe mallra të tjera. Llogaritet se nga këto aktivitete të paligjshme buxheti i Kosovës humbet çdo javë rreth 750,000 euro nga tarifa doganore të pambledhura. Një pjesë e mirë e këtyre mallrave nuk qëndrojnë në pjesën veriore me popullsi serbe, por transportohen për në jug në zona të Kosovës me popullsi shqiptare. Kjo tregon edhe njëherë se kur vjen puna tek rrjetet e kontrabandës, kriminelët bashkëpunojnë me njëri-tjetrin pavarësisht dasive etnike, apo ndarjeve gjeografike e administrative” – thuhet në raport.

A ka zgjidhje?

Raporti nënvizon, se “ndërtimi i mureve dhe mbyllja e kufijve nuk është zgjidhje afatgjatë e problemeve, të cilët mund të krijojnë më shumë stimuj për aktivitete kriminale. As injorimi apo minimizimi i problemit nuk është zgjidhje. Në këtë mënyrë vetëm sa i jepet më shumë pushtet elitave të korruptuara, çimentohen praktika të padrejta, stimulohet largimi i trurit, shtohet paqëndrueshmëria, dhe largohen investitorët e huaj. Në mënyrë paradoksale, ata politikanë që luajnë rolin e nacionalistit të flaktë shpesh janë përgjegjës për dobësimin nga brenda të sovranitetit të shtetit, dhe janë të gatshëm të venë në rrezik interesat kombëtare për përfitime personale – shpesh duke bërë pazare të fshehta me “armikun,” apo edhe me shtete të huaja”.

Sipas Mjedinit, “bashkëpunimi është zgjidhja më e mirë. Përfshirja më e gjerë e shoqërisë civile, të cilën nuk e shohim shumë të angazhuar në luftën kundër krimit të organizuar. Deri tani, kjo luftë është parë si një luftë që duhet bërë vetëm nga organet ligjzbatuese dhe ky koncept është shumë larg asaj çka duhet bërë”./DW

hila.jpg
G. P.20:43 | 14/05/2019

Që prej ditës kur deputetët dogjën mandatet opozita ka qenë në protesta. Mirëpo me anë të tyre, sipas gazetarit Dritan Hila, opozita ka arritur vetëm të mobilizojë mbështetësit e saj. I ftuar në emisionin “Provokacija” nga Mustafa Nano, Hila theksoi se pavarësisht se sondazhet kanë dhënë një lloj epërsie, Partia Demokratike nuk e kalon PS-në.

“Protesta ia ka dalë që të galvanizojë që të mobilizojë mbështetësit e opozitës. Edhe nga sondazhet e hapura dhe të fshehta e kemi parë që mbështetësit e opozitës janë rritur nga 350 mijë në 450 mijë. Nuk mendoj që ia ka dalë të galvanizojë edhe elektoratin gri, i cili në një farë mënyre vendos agën, shigjetën e balancës dhe nuk është demoralizuar elektorati i PS që vazhdon dhe qëndron në kuota 700 e ca mijë vota. Ne e dimë që pushteti bie kur ai që qeveris nuk ka më vullnetin që të mbajë pushtetin dhe ndjekësit e tij janë të demoralizuar. Këtë nuk e shoh akoma te PS dhe duke qenë se është ende partia më e madhe ka një lloj sigurie nëse shkon në zgjedhje. Të gjitha sondazhet pavarësisht se japin një lloj epërsie të opozitës nuk arrijnë të kalojnë në diferencë me PS-në në atë marzhin e gabimit që ka çdo sondazh. Edhe në 2017 me të tillë marzh gabimi Rama mori 74 deputetë”, tha Hila.

Mosgjetja e një zgjidhje të kësaj krize politike ka shqetësuar shumë njerëz, madje duke e lidhur edhe me krizat e mëparshme politike që ka kaluar vendi ynë. Sipas Dritan Hilës, një nga dramat më të mëdha të Shqipërisë ka qenë viti ’97. Sipas tij, “kur Berisha është në mes të turmës, atëherë fillon dhe paniku i madh jo vetëm i shqiptarëve, por edhe i ndërkombëtarëve sepse është aktori kryesor në ’97”.

Mirëpo, gazetari i njohur nuk beson që do të përsëritet e njëjta ngjarje për shkak edhe të Aleancës Euro-Atlantike ku bëjmë pjesë.

“1997 ishte dramë e madhe. Biles kur Berisha është në mes të turmës, atëherë fillon dhe paniku i madh jo vetëm i shqiptarëve, por edhe i ndërkombëtarëve sepse është aktori kryesor në ’97. Në ’97 ishte një ngjarje që vetëm në Afrikë mund të ndodhë. Nuk mund të ndodhë në vendet e Europës. Bie pushteti, hapen depot e ushtrisë, shthuret policia, shthuret ushtria, bandat vendosin postblloqe. Është një situatë që ne që e kemi përjetuar nuk do ua uronim as hasmit. Është një situatë që ka ndodhur në Afrikë.

Nuk do përsëritet sepse me kalimin e viteve jemi vend i NATO-s dhe pavarësisht zakonshmërisë që ka kjo shprehje NATO nuk do lejojë që pesë politikanë të papjekur ta bëjnë aleancën më të fuqishme të botës ta detyrojë të bjerë trupa për ta ruajtur paqen në një vend anëtar të saj. Pra në një eksportuese paqe të kthehet në një mbajtëse rregulli brenda radhëve të saj, pse pesë kacaflaqë shqiptarë që kanë 30 vjet që nuk duan të largohen nga politika duan ta përmbysin prapë kusinë”, tha Hila./abcnews.al

vucicc.jpg
G. P.09:51 | 30/04/2019

Presidenti i Serbisë, Aleksandër Vuçiç, duke folur para gazetarëve, pas përfundimit të Samitit në Berlin, tha se nuk ka asnjë lëvizje të re nga ky samit. Vuçiç konfirmoi se një takim tjetër i ngjashëm do të mbahet më 1 Korrik, më ftesë të presidentit francez Macron.

“Fjala e fundit e samitit të Berlinit ishte që të vazhdojnë bisedimet në një format të ngushtë me ndërmjetësimin e Bashkimit Evropian, Gjermanisë dhe Francës, në mënyrë që të gjendet një zgjidhje për të vazhduar dialogun”, ka deklaruar Vuçiç.

Ai ka shtuar se gjatë diskutimeve të djeshme nuk ka pasur asgjë përfundimtare dhe nuk është votuar për asgjë. Presidenti serb falënderoi liderët europianë Merkel dhe Macron, duke thënë se ishin shumë racionale, seriozë dhe të përgjegjshëm.

Vuçiç sqaroi se Serbia nuk kishte kushte në këtë takim për rifillimin e dialogut me Kosovën, përveç heqjes së taksës 100% për mallrat serbe, të vendosur që në Nëntor 2018 nga qeveria e Prishtinës./ABC News Albania

Dacic-Lavrov-1280x724.jpg
nev ila16:15 | 17/04/2019

Rusia ka përsëritur se do të vazhdojë të influencojë në dialogun Kosovë-Serbi dhe se do të mbështesë atë zgjidhje që së pari i shkon për shtat Beogradit.

Ministri i Jashtëm rus, Sergei Lavrov ka rikonfirmuar rolin e Kremlinit në mbështetje të Serbisë në dialogun me Kosovën. Pas një takimi me ministrin e Jashtëm serb Ivica Daçiç në Moskë, Lavrov ka theksuar se Rusia vijon t’i referohet rezolutës 12-44 të Këshillit të Sigurimit sa i takon Kosovës dhe të mbështesë integritetin territorial të Serbisë.

“Në këtë kontekst ne do të kontribuojmë në çdo mënyrë të mundshme për gjetjen e zgjidhjes. Por çfarë zgjidhjeje konkrete mund të mbështesë Rusia? Ne e kemi theksuar vazhdimisht se do të pranojmë çdo zgjidhje që i përshtatet Serbisë. Pikë”, ka thënë Lavrov.

Nga ana tjetër, ministri serb Daçiç ka nënvizuar se në takimin me homologun Lavrov u bisedua edhe për takimin e ardhshëm mes presidentit rus Vladimir Putin dhe atij serb Aleksandar Vuçiç.

Takimi do të zhvillohet në kuadër të forumit “Brezi dhe Rruga”, i cili mbahet më 25 deri më 27 prill në Kinë.

“Serbia nuk është në gjendje të mbrojë interesat e vendit pa ndihmën e Rusisë”, ka deklaruar Daçiç.

Ai ka shtuar se Serbia nuk do të ndërmarrë asnjë veprim për zgjidhjen e çështjes së Kosovës pa u konsultuar me Rusinë./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono