zgjedhore

ilirjan-celibashi-mirela-1280x607.jpg
nev ila21:17 | 10/07/2019

Mbrëmjen e sotme me Mirela Milorin në studion e ABC News, ka qenë i ftuar në një intervistë ish-kreu i KQZ Ilirjan Celibashi. Celibashi ndau opinionin e tij në lidhje me situatën aktuale politike. Sipas Celibashit, KQZ ka qenë konform ligjit në vendimet e saj, në lidhje me dekretin e presidentit Meta, për anullimin e zgjedhjeve në 30 qershor. Gjithashtu Celibashi theksoi se KQZ, nuk mund të rrijë pas derës së presidentit, duke pritur aktin e radhës në lidhje me procesin zgjedhor. Por Celibashi mendon se presidenti mund edhe të kishte luajtur politikisht me një zgjidhje tjetër përtej asaj të anulimit të zgjedhjeve.

Mirela Milori: A është e mundur hapja e materialeve zgjedhore? A është ligjërisht e mundur dhe në çfarë pozicioni është KQZ?

Ilirjan Celibashi: Kërkesa e bindjes demokratike ndryshon nga ajo e partisë demokratike, ndryshojnë pozitat e tyre nga pikëpamja juridike. PD duke qenë se nuk është subjekt zgjedhor i ka të kufizuara kërkesat e saj. Ndërkohë që Bindja Demokratike është subjekt zgjedhor dhe si i tillë ka të drejta më të pakufizuara kundrejt KQZ për çështje të ndryshme të procesit zgjedhor. Kërkesa që ka bërë PD në lidhje me dokumentacionin zgjedhor të kërkuar mendoj se është një kërkesë e cila ka bazueshmëri ligjore. Me sa kam vërejtur PD ka kërkuar atë pjesë të dokumentacionit zgjedhor që disponohet nga Komisionet e nivelit të qendrës së votimit, të KZAZ-së dhe të KQZ. Këtë dokumentacion këto komisione e disponojnë dhe kanë detyrimin që ta vënë në dispozicion të çdo partie politike që e kërkon. Me sa kam parë bëhet fjalë për kopje të tabelave të rezultatit, kopje të procesverbalit të votimit, akte që kanë të bëjnë me mbylljen e kutive të votimit, procesverbalet e tyre.

Kurse kërkesa e Bindjes Demokratike në lidhje me hapjen e gjithë kutive, të materialeve dhe dokumentacionit zgjedhor nuk e di se sa bazë kjo kërkesë ka por ne këtë nuk e dimë. KQZ është ajo që do ta shqyrtojë. Nga informacionet që kemi nuk mund të themi nëse kërkesa është apo jo e bazuar, ajo çfarë ka rëndësi të thuhet është që çdo kërkesë duhet që minimalisht të mbështetet në një lloj indicie. Kush mund të ishte një lloj indicie në këtë rast? Procesi i numërimit regjistrohet dhe filmohet, marrja e një kopje e konsultimi me përmbajtjen e DVD, mund të japë disa të dhëna që  mund të legjitimojnë kërkesën për të kërkuar hapjen e kutive të votimit dhe të materialeve zgjedhore. Pra duhet një pretekst për këtë. Dokumentacionin e kërkuar që institucioni disponon duhet ta vërë në dispozicion të partive politike. Kërkesa e PD mund të plotësohet nga KQZ për sa i përket dokumentacionit.

Nuk mund të themi nëse kërkesa është apo jo e bazuar. Kërkesa duhet të jetë e bazuar në një indicie, pra duhet një pretekst për të bërë kërkesën.

Mirela Milori: Duke qenë se keni qenë ish kryetar i KQZ, sa komode e ka KQZ të punojë në këtë situatë, në këto zgjedhje të 30 qershorit të cilat janë shumë atipike?

Ilirjan Celibashi: Është punë voluminoze, e vështirë dhe shto këtu sfondin politik padyshim që e komprometon veprimtarinë e KQZ dhe secili është i prirur ta shohë këtë veprimtari sipas interesit të vet. Në këtë situatë të një konfliktualiteti politik gjithkush përpiqet të kapet edhe pas një gjëje që nuk është thelbësore thjesht për të ndërtuar alibinë e vet.

Mirela Milori: KQZ hyri në skenë që kur zoti Meta nxori një mandat për anulimin e zgjedhjeve të 30 qershorit KQZ nuk e pranoi e hodhi poshtë këtë dekret, shkoi në kolegjin zgjedhor edhe atje u rrëzua, si ka qenë qëndrimi i KQZ në lidhje me këtë moment të presidentit Meta?

Ilirjan Celibashi: KQZ në fakt nuk është se shqyrtoi direkt vlefshmërinë ligjore apo kushtetutshmërinë e dekretit të presidentit. KQZ e konsideroi aktin e presidentit, si një akt absolutisht të pavlefshëm, dhe tha se do vazhdonte procesin përgatitor zgjedhor. Vendimet që KQZ mori pasi Presidenti nxori dekretin për anulimin e datës së zgjedhjeve, u bënë objekt i shqyrtimit nga Kolegji Zgjedhor. Kolegji Zgjedhor e konsideroi vendimin e KQZ të ligjshëm, gjë që do të thotë se dekreti i presidentit ka qenë i paligjshëm. Nuk është se KQZ u shpreh mbi ligjshmërinë e dekretit direkt por vazhdoi me procesin e vendimmarrjes duke injoruar dekretin./abcnews.al

 

balla-analiza-1280x714.jpg
nev ila13:54 | 07/07/2019

Nga Elbasani, nënkryetari i Partisë Socialiste Taulant Balla bëri një analizë të zgjedhjeve të 30 qershorit, në të cilat, sipas tij janë arritur rezultate më të mira se në zgjedhjet e kaluara. Balla tha se 4 vitet ardhshme bashkitë do të fokusohen kryesisht në zhvillimin e zinave të thella.

1 javë pas zgjedhjeve të 30 qershorit, nënkryetari i Partisë Socialiste Taulant Balla, përcolli mesazhin se duhet punuart fort për të ecur përpara. Gjatë një takimi me elektoratin dhe strukturat vendore në Elbasan, Balla garantoi se do të respektohet vota e cdo qytetari.

“Elbasani dhe gjithë Shqipëria, pas 30 Qershorit kanë garantuar se nuk do të ketë më parti politike që do të bojkotojnë zgjedhjet, nuk do të ketë më parti politike që do të bojkotojnë parlamentin dhe do të djegin mandatet dhe kjo tashmë është e sigurt. Po ashtu është e rëndësishme që çdo qytetari ju garantua e drejta për të votuar, e drejta për të zgjedhur dhe për t’u zgjedhur”, tha Balla.

Balla theksoi nga Elbasani, se në 4 vitet e ardhshme Bashkitë do të kenë në fokus edhe zonat e thella rurale

“Ky katër vjeçar do të ketë në fokus të vet rrethinat, më së shumti zonat e thella për të cilat kemi shumë detyrime dhe deri tani nuk kemi pasur mundësi të bëjmë sa duhet. Por një gjë është e sigurt, ne jemi modeli më i mirë i qeverisjes vendore dhe qëndrore”, tha ai.

Balla bëri edhe analizën e zgjedhjeve në Bashkinë e Peqinit dhe të Prrenjasit ku u evidentuan rezultatet shumë herë më të mira sipas tij se në vitin 2017, duke forcuar bazat e PS-së në çdo bashki./ABC News Albania 24/7

zgjedhje-2-1280x714.jpg
Sej rie12:20 | 27/06/2019

Në qarkun e Lezhës mbërritën sot materialet zgjedhore, të cilat u vendosen në  KZAZ-të 12,13 dhe 14.

Gjithçka ka shkuar qetësisht dhe policia kishte marre masat e sigurisë. Pasi janë tërhequr materialet, në dyert e KZAZ-ve  shkuan policet bashkiake të Lezhës, që kërkojnë lirimin e ambienteve. Por ata nuk ane lejuar  të hyjnë brenda.

Edhe në Kukës mbërritën materialet zgjedhore.  Përkohësisht ato u vendosen pranë KZAZ-së 11 në godinën e prefekturës, e cila prej një jave ruhet me polici. Gjatë transportit dhe vendosjes së materialeve zgjedhore aty nuk pati probleme.  Megjithëse ende nuk është bërë e qartë vendndodhja e qendrave të votimit transporti i tyre nga KZAZ-ve drejt tyre do të kryhet të shtunën në mbrëmje./ABC News Albania 24/7

kzaz-1-1280x723.jpg
Sej rie14:00 | 25/06/2019

Në disa rrethe kanë mbërritur materialet zgjedhore për 30 Qershorin.  Nga KQZ-ja për në KZAZ-të deri tani fletët e votimit janë shpërndarë në qytetin e Vlorës, Fierit, Krujës dhe Elbasanit, Gjirokastrës, Korçës dhe Lushnjës.  Ndërkohë qe pritet të shpërndahen në të gjitha qendrat e KZAZ-ve në qarqet e vendit. Procesi transportimit të bazës materiale zgjedhore logjistike për t’u shpërndarë nga KQZ në çdo KZAZ po kryhet në bashkëpunim me Ministrinë e Mbrojtjes. Në Shqipëri kanë ardhur 3 606 815 flete votimi. Pak ditë më parë në Bashkitë e opozitës, u sulmuan dhe u dogjën zyrat ku ishin vendosur KZAZ-të. Për këto ngjarje pati dhe të arrestuar./ABC News Albania 24/7

kukws.jpg
nev ila13:24 | 19/06/2019

Pas dy orë përplasje dhe tension midis simpatizantëve të PD, policisë bashkiake dhe forcave të rendit, materialet u tërhoqën nga ambientet e KZAZ në palestrën e gjimnazit “Havzi Nela” në Kukës .

Vendimi u mor nga policia e Shtetit e cila beri dhe zhvendosjen e tyre. Me herët pati përplasje të fortë me policinë e rendit, e cila herë pas here ka përdorur gazin lotsjellës.

Një kamion i bashkisë theu  derën e KZAZ dhe protestuesit i vunë zjarrin.

Dy punonjës bashkiak u lënduan.  Në Kukës pritet të ketë shoqërime te persona që nxitën dhunën gjatë protestës për lirimin e ambienteve të KZAZ.

zhgjedhjet-1280x725.jpg
Sej rie16:45 | 26/05/2019

Në Greqi krahas zgjedhjeve për Parlamentin Europian po votohet edhe për pushtetin lokal. Në të dyja proceset ajo që bie në sy është prania e disa dhjetëra kandidatëve shqiptarë në listat e votimit, ndërkohë që shqiptarët me të drejtë vote janë rreth 100 mijë.

Greqia po voton sot për Parlamentin Europian, por edhe për pushtetin lokal. Për komunitetin shqiptar në Greqi këto zgjedhje konsiderohen si një moment mjaft i rëndësishëm, për faktin se me listat e partive kandidojnë shumë shqiptarë.

 “Rreth 10 milionë qytetarë grekë votojnë në zgjedhjet e sotme, që këtu janë të katërfishta: për Parlamentin Evropian, administratat rajonale, bashkitë e në mjaft zona, edhe për komunat. Në më shumë se 39.000 qendrat e votimit, procesi ka filluar normalisht në ora 07,00 të mëngjesit të sotëm”.

Sipas ministrisë së brendshme, në disa qendra votimi pati vonesa në paraqitjen e komisionerëve, por ky konsiderohet një fenomen i zakonshëm.

 “Zgjedhjet e sotme konsiderohen një moment krucial për komunitetin shqiptar në Greqi. Janë më shumë se 30 kandidatë shqiptarë, që kandidojnë në lista të partive dhe koalicioneve vendore, duke pretenduar një vend në parlamentin evropian, në këshillat bashkiakë apo këshillat e administratave rajonale. Përfshirja e tyre shpjegohet me faktin se më shumë se 100 mijë qytetarë shqiptarë që morën vitet e fundit nënshtetësinë greke, ushtrojnë sot për herë të parë këtu, të drejtën e votës”.

Kutitë e votimit do të mbyllen në ora 19,00 dhe menjëherë do të publikohen rezultatet e exit poll-sit të përbashkët që kanë marrë përsipër 5 televizione private. Ndërkaq, një parashikim i saktë i rezultatit do të mund të publikohet rreth orës 22 të mbrëmjes./ABC News Albania 24/7

reforma-zgjedhore-1280x714.jpg
Sej rie16:59 | 24/04/2019

Kuvendi ndryshon formulën për Komisionin e Reformës Zgjedhore. Mazhoranca dhe opozita e re kanë vendosur që ky komision të bëhet me 10 anëtarë, 5 nga mazhoranca 4 nga grupimet opozitare në parlament dhe një nga Partia Demokratike e cila e ka refuzuar.

Ishin 18 por do të jenë vetëm 10 anëtarët e komisionit të reformës zgjedhore. Ndryshimet u dakordësuan midis mazhorancës dhe opozitës parlamentare. Partia Socialiste do të përfaqësohet me Damian Gjiknurin, i cili do të jetë edhe bashkëkryetar, Blerina Gjylametin, Bashkim Finon, Klotilda Ferhati dhe Alket Hyseni.

Anëtarët  nga grupimi demokrat parlamentar do të jenë Rudina Hajari dhe Andi Përmeti. Ky i fundit është edhe një prej themelueseve të Partisë Bindja Demokratike që do të betohet si deputet në seancën plenare të së enjtes.

Ralf Gjoni dhe Nimet Musai janë anëtarë që përfaqësojnë grupimin e pavarur të deputetëve. Një vend bosh i është lënë vëzhguesit të Partisë Demokratike ndonëse nga selia blu e kanë refuzuar.

Mazhoranca dhe opozita parlamentare janë fokusuar në ndërhyrjet e menjëhershme në Kodin Zgjedhor për të cilat presin të gjejnë gjuhën e përbashkët siç kanë bërë deri më sot.

Këtë të enjte ndryshimet e formulës së re të Komisionit të Reformës Zgjedhore do të kalojnë për miratim së bashku me kërkesën e kryetarit të grupit parlamentar socialist që afati i komisionit të jetë deri në datë 28 Nëntor./abcnews.al

maqedoni-2-1280x717.jpg
Sej rie18:00 | 19/04/2019

Kandidatët për president në Maqedoninë e Veriut kanë dhënë mesazhet e fundit përpara se në vend të hyjë në fuqi heshtja zgjedhore. Ai shqiptar, Blerim Reka e ka vënë theksin tek koncepti i Republikës; Siljanovska e opozitës ka akuzuar qeverinë për korrupsion; ndërsa kandidati i koalicionit qeverisës ka paralajmëruar elektoratin se vota për VMRO-në është kthim pas.

Kandidati presidencial Blerim Reka, që mbështetet nga opozita shqiptare në tubimin e fundit në Tetovë, kërkoi që votuesit në mënyrë masive të votojnë pa marrë parasysh se cilës parti i përkasin.

Blerim Reka, kandidat i opozitës shqiptare:  “Edhe ju të BDI, të PDSH, të Alternativës dhe të gjithë qytetarët që besojnë në konceptin e republikës…”

Kandidatja e opozitës maqedonase Gordana Siljanovska gjatë gjithë fushatës ka drejtuar akuza në adresë të qeverisë, siç është shprehur, për krime, nepotizëm dhe korrupsion. Ajo premtoi ndalimin e migrimit por edhe varfërisë.

Biljana Siljanovska, kandidate e VMRO-DPMNE-së: “Do të bëj gjithçka, madje edhe nga buxheti modest i Presidentit, gjënë e parë që do ta bëj, do të ndajë mjete për të varfrit”.

Kandidati që përkrahet nga koalicioni qeveritar Stevo Pendarovski u bëri thirrje qytetarëve se me votën e tyre kanë mundësi të vulosin ndryshimet.

Stevo Pendarovski, kandidat i koalicionit qeveritar:  “Mund të votoni për Siljanovskën, por me këtë votoni për Gruevskin dhe Mickoskin dhe votoni për kthim parapa, për ndasi të reja dhe izolim. Ose të votoni për mua që t’i përkrahni politikat e paqes, unitetit, stabilitetit dhe mirëqenies ekonomike”.

Në përfundim të fushatës së raundit të parë, në Komisionin Shtetëror të Zgjedhjeve shefat e shtabeve zgjedhore të tre kandidatëve presidencial kanë bërë thirrje që zgjedhjet  e së dielës të zhvillohen  në atmosferë demokratike e evropiane./abcnews.al

Gjiknuri-1280x702.jpg
G. P.18:18 | 02/04/2019

Partia Socialiste i ka dërguar një kërkesë Kuvendit për të shtyrë afatet e punimeve të Komisionit të Reformës Zgjedhore deri në datën 5 Maj. Arsyet e hartimit të kësaj kërkese i bën publike kryetari i Komisionit të Reformës Zgjedhore Damian Gjiknuri i cili sqaron gjithashtu se zgjedhjet e 30 Qershorit do të zhvillohen me Kodin e vjetër Zgjedhor.

Edhe pse thonë se nuk u intereson nëse hyn apo jo në zgjedhje opozita, një ftesë për tu ulur në tryezë ia kanë dërguar. Nëpërmjet një kërkesë drejtuar kryetarit të Kuvendit, Partia Socialiste kërkon shtyrjen e afatit të punimeve të Komisionit të Reformës Zgjedhore deri në 5 Maj. Pranë Komisionit të caktohet në cilësinë e vëzhguesit edhe përfaqësuesi i Partisë Demokratike.

Kjo kërkesë do të miratohet në seancën parlamentare të së mërkurës.

“Do të bëjmë një amendim për t’i krijuar një mundësi Partisë Demokratike për të vëzhguar. Pavarësisht se janë jashtë kuvendit kanë një dritare të hapur, me të gjitha të drejtat që ka opozita në parim, me të drejtën e propozimit dhe kundërshtimit. Në çdo kohë që PD vendos të ulet në tavolinë për të kërkuar ndryshime në Kodin Zgjedhor dhe PD e ka atë hapësirë”.  

Ndryshimet në kodin zgjedhor duket se nuk do të jenë gati për zgjedhjet e 30 Qershorit.

“Në zgjedhjet e 30 Qershorit do të hyjmë me këtë kod zgjedhor. Reforma zgjedhore do të jetë e vlefshme vetëm për zgjedhjet e ardhshme parlamentare. Koha nuk premton që të ndryshohen rregullat e lojës tani. Reforma Zgjedhore është e vlefshme për zgjedhjet e ardhshme parlamentare”.

Damian Gjiknuri është propozuar që të marrë postin e bashkëkryetarit të komisionit për reformën zgjedhore ndërsa ajo që ia la vendin, Blerina Gjylamenti të jetë në funksionin e anëtarit./abcnews.al

maqedoni-1280x698.jpg
ent ela19:27 | 01/04/2019

Në Maqedoni ka nisur fushata për zgjedhjet presidenciale, që do të jetë një sfidë mes kandidatëve favoritë Gordana Siljanovska dhe Stevo Pendarovski. Kandidatja e opozitës do të lobojë për nevojat e politikës së brendshme, ndërsa ai i mazhorancës për përfitimet nga politika e jashtme.

“Drejtësi për Maqedoninë, atdheu thërret” është sllogani i kandidates së VMRO-DPMNE-së Gordana Siljanovska – Davkova. Ajo thotë se fushata do të ketë dy anë – atë qytetare, dhe tjetra që do të përfaqësojë partinë që mbështeti kandidimin e saj. Siljanovska më tepër është e fokusuar në politikën e brendshme. Nga ekologjia, ndotja e deri te identiteti dhe standardi jetësor. Nga ana tjetër kandidati i shumicës Stevo Pendarovski më tepër i përkushtohet politikës së jashtme dhe perspektivës që happen nga kjo politikë.

Siljanovska sulmon Marrëveshjen e Prespës, derisa Pendarovski vlerëson se ajo i hap perspektivat evropiane Maqedonisë. Motoja e fushatës së tij është “Bashkë përpara”. Kandidati që mbështetet nga ASH-ja dhe BESA, me moton “Reka për Republikën” thotë se ofron koncept për kthimin e republikanizmit dhe republikës. Ai thotë se vendi shumë shpejt do të jetë pjesë e NATO-s, por për BE duhen reforma të thella.

Siljanovska dhe Pendarovski gjatë fushatës do të kenë katër duele televizive. I pari është caktuar më 4 Prill. Zgjedhjet do të mbahen në dy rrethe zgjedhore më 21 Prill dhe 5 Maj. Në rrethin e dytë kalojnë dy kandidatët me më shumë vota, nëse në zgjedhje dalin mbi 40 për qind e trupit të përgjithshëm votues. Të drejtën e votës do të kenë rreth 1.8 milion persona./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono