zgjedhjet

maqedonia-qeveria.jpg
nev ila17:27 | 26/01/2020

Teksa në Maqedoninë e Veriut pritet të fillojë së shpejti fushata elektorale për zgjedhjet e parakohëshme, mediat në Shkup raportojnë se prej disa muajsh numri i konkurseve për punësim është rritur ndjeshem.

Shtimi i punësimeve ka qenë praktikë e zakonshme në prag të çdo fushate zgjedhore. Por kreu i qeverisë teknike shprehet se në situatën aktuale nuk bëhet fjalë për punësime.

Kryeministri teknik i Maqedonisë së Veriut, Oliver Spasovski thotë se numri i lartë i konkurseve për punësim në muajt e fundit  nuk ka të bëjë me zgjedhjet e 12 prillit.

Kryeministri deklaroi se gjatë periudhës së fundit nuk është rritur numri i punësimeve por shpallen konkurse në bazë të nevojave të institucioneve.

“Ju e dini që deri në shpërndarjen e Kuvendit, deri në shpalljen e zgjedhjeve, punësime në institucione mund të bëhen dhe nuk ka asgjë kontestuese këtu. Nuk ka rritje të numrit të konkurseve dhe personave që punësohen në këtë moment. Nga momenti kur ligji nuk do të lejojë punësime të reja, sigurisht që çdo institucion duhet të mbajë përgjegjësi, të mos e bëjë këtë, që të mos e dëmtojmë procesin zgjedhor dhe të mos e shkelim Kodin zgjedhor. Kështu që kjo nuk është aspak e lidhur me zgjedhjet”.

Kryeministri Spasovski tha numri më i madh i konkurseve për punësim në këtë periudhë ka të bëjë me angazhimin me kontratë të mësimdhënësve në gjysmën ne dytë të vitit shkollor.

Megjithatë, Alsat raportoi se që nga fillimi i tetorit, numri i konkurseve për punësim është rritur me 60% në krahasim me muajt tjerë të vitit. Shtimi i punësimeve ka qenë praktikë e zakonshme në prag të çdo cikli zgjedhor.

Ndërkohë, qeveria ka paraqitur një plan operativ për punësim për vitin 2020 për realizimin e të cilit parashikohen 1.4 miliard denarë për subvencionim e mikrobizneseve, trajnime për të papunët dhe subvencionimin e pagave.

Ai pritet të përfshijë rreth 12 mijë persona. Me këtë plan për vitin 2020 qeveria beson se do të krijohen 1 mijë e 900 vende të reja pune.

“Kjo masë është e Qeverisë, këtu është Kryeministri, zëvendëskryeministrja, persona që kanë punuar në sjelljen e planit operativ për vitin 2020 i cili kërkonte analizë në gjashtë muajt e kaluar” , tha Mila Carovska, zëvendëskryeministre për çështje ekonomike.

Plani operativ për punësim do të përfshijë trajnime dhe mbikualifikime për të papunët e regjistruar në Agjencinë për punësim./abcnews.al

isa-mustafa-1280x704.jpg
nev ila14:16 | 17/01/2020

Deputetja e Vetëvendosjes Arbërie Nagavci paralajmëroi të premten se në Kosovë mund të ketë zgjedhje të reja. Nagavci tha për mediat në Kosovë se nëse nuk arrihet zbatimi i vullnetit të qytetarëve, atëherë prapë do të kthehen te qytetarët.

“Nëse për arsye që nuk varen prej nesh nuk arrihet implementimi i vullnetit të qytetarëve duhet të kthehemi të qytetarët”, tha ajo.

Vetëvendosje refuzoi të enjten përmes një letre ofertën e LDK-së. Kryetari i kësaj partie Albin Kurti tha se kërkesa për largimin e kryetarit të Kuvendit, Glauk Konjufca është qasje jodemokratike.

Kryetari i LDK-së, Isa Mustafa tha se nuk e konsideron letrën përgjigje zyrtare.

Mustafa tha të enjten në mbrëmje në një intervistë për mediat në Kosovë se posti i kryetarit të Kuvendit t’i takojë partisë së tij ndërsa presidenti nuk do të jetë i LDK-së, por i Kosovës.

Mustafa tha në intervistën dhënë për RTK se nëse Vetëvendosje ka kryeministrin dhe ministrat, atëherë LDK duhet të ketë kryeparlamentin ndërsa për presidentin tha se nuk do të jetë president i LDK-së, por president i Kosovës.

“Unë vetë e kam ditur që më ka rrëzuar vetëvendosje. Nuk do kishte mundur kurrë Vetëvendosje ta fitonte Prishtinën po të mos kishte pasur mbështetjen e PDK-së. Unë personalisht e kam vullnetin që të bëhet marrëveshja. Nëqoftëse nuk mundemi ta bëjmë, do të thotë duhet të lëshojmë rrugë, të lëshojmë hapësirë,” tha ai.

Vetëvendosje dhe LDK nuk janë takuar më dhe tashmë edhe ofertat po bëhen me letra dhe zarfa, të cilat po refuzohen nga palët./abcnews.al

mimoza-kusari-lila.jpg
nev ila21:36 | 10/01/2020

Deputetja e Grupit Parlamentar të Vetëvendosjes Mimoza Kusari Lila, ka thënë për mediat në Kosovë se LDK nuk duket e interesuar për koalicion me Albin Kurtin.

Sipas saj, kjo bindje krijohet nga kërkesat e kësaj partie për postin e presidentit dhe kryeparlamentarit.

Deputetja e grupit parlamentar të vetëvendosjes, Mimoza Kusari-Lila, e cila është edhe kryetare e Alertnativës, than ë një intervistë për mediat në Kosovë se tani është moment i fundit kritik dhe final që Kosova të ketë qeverinë e re.

“Është e qartë se në vazhdimësi procesin e kanë përcjellë kërkesë të ndryshme në raport me postet të larta shtetërore dhe këto kanë ardhur siç janë bërë publike nga LDK-ja, fillimisht me postin e Presidentit dhe tash për këtë të fundit. Nuk kemi informata të konfirmuara por nëse flasim për kthimin në pikën zero të postit të Kryeparlamentarit, atëherë me të vërtetë fitohet bindja se mundohen të gjinden arsye për mos të ndodhë një koalicion i përbashkët mes LDK-së dhe VV-së. Përkundër kësaj që ka ndodhur deri më tani besoj që është momenti i fundit final dhe shumë kritik që Kosova të ketë qeverinë e sa të re dhe kjo qeveri të fillojë sa më parë punën me reforma dhe vendimet të cilat janë shumë të pritura dhe në bazë të cilave edhe janë fituar zgjedhjet e 6 tetorit”, tha Kusari Lila.

Kusari-Lila e quajti zgjedhjen e Glauk Konjufcës kryetar Kuvendi, urgjencë dhe jo lojë të Vetëvendosjes dhe shtoi se Albin Kurti i ka ofruar këtë post LDK-së deri më datën 24 dhjetor, kur edhe u mbajt seanca konstituive, por LDK-ja nuk kishte kthyer përgjigje pozitive dhe ishte vendosur të votohej Kryeparlamentari.

 “Si mund të ndryshohet mendimi brenda dy-tri javësh dhe të kërkohet zhbërja e një procesi ku ata kanë votuar në masë. Unë besoj se posti i kryetarit të Kuvendit duhet të konsiderohet si çështje e mbyllur, njëjtë sikurse edhe diskutimet pastaj të vazhdojnë prej asaj pike ose edhe të trajtohen në format të ri por me një synim të qartë që duhet të arrihet marrëveshja”, tha ajo./abcnews.al

kurti-mustafa1.jpg
nev ila21:05 | 09/01/2020

Më pak se dy orë ka zgjatur takimit ndërmjet liderëve të LVV-së dhe LDK-së, të cilët as në ditën e tretë  me gjasë nuk arritën të merren vesh.

Megjithëse në takimin e djeshëm, të dy subjektet shfaqën shenja optimiste, kjo gjë nuk ndodhi.

Pas takimit asnjëri nga liderët e këtyre dy partive politike nuk kanë folur për media. Madje as zëdhënësit e tyre nuk kanë njoftuar asgjë duke lënë kështu mediat në mjegull.

Asnjë takim i ri nuk është caktuar, ndërkohë që nuk dihet se cili do të jetë epilogu i përpjekjes treditore.

Ndërkohë ka kaluar tashmë afati 48 orësh i caktuar nga presidenti që Lëvizja Vetëvendosje duhet të dërgonte emrin e të mandatuarit.

Ndonëse burime nga zyra e presidentit bëjnë me dije se ditëve në vazhdim, nëse nuk ka marrëveshje, ai do të ndërmarrë veprimet e tij konform kushtetutës, ish kryetari i Gjykatës Kushtetuese Enver Hasani ka thënë se fituesi i zgjedhjeve është ai që e përcakton dinamikën e zgjedhjes së qeverisë e jo presidenti.

Kanë kaluar më shumë se tre muaj që kur janë mbajtur zgjedhjet në Kosovë. LVV e LDK ende nuk kanë gjetur një formulë të përbashkët për bashkëqeverisje./abcnews.al

edi-rama-zgjedhjet-1280x565.jpg
nev ila22:48 | 04/01/2020

Kryeministri Edi Rama gjatë intervistës së tij të parë për vitin 2020, në emisionin Java në RTSH tha se nuk mbante një ditar, megjithatë ka të shënjuar në kujtesën e tij disa ngjarje të rëndësishme të vitit që lamë pas, të vështira, të hidhura e momente të lumtura.

Çasti më i vështirë për të është ora 4 e mëngjesit e datës 26 nëntor, ku tërmeti shkatërrues goditi Shqipërinë.

Ngjarja më e bukur për kryeministrin është ditëlindja e djalit të tij, Zahos, në përvjetorin e tij të pestë.

Më e keqja në 2019-ën ishte nata e mbledhjes së Këshilli Evropian, kur u nda fati për Shqipërinë dhe mos çeljen e negociatave për anëtarësim në Bashkimin Evropian.

A ka marrë një mesazh që e ka tronditur, që e ka lënë pa gjumë? Rama përgjigjet:

“Kam marrë kaq shumë mesazhe në telefon saqë në përgjithësi janë ndikim i drejtpërdrejt në pagjumësinë time se e kam këtë zakon që dua t’i përgjigjem të gjithëve“.

Personazhi i vitit sipas tij është Ermal Mamaqi dhe për këtë arsyeja është qe realizoi një nga ëndrrat e tij, të aktronte.

“Zgjedh Ermal Mamaqin, se më ka bërë aktor tek filmi ‘I Love Tropoja’. Duke qenë se më dha mundësinë të heq edhe një merak timin të luaja në një film për mua është personazhi i vitit që kaloi“, tha Rama.

Në emisionin “Java” në RTSH, shefi i qeverisë ndau edhe një urim për gazetarët:

“Të shpifin sa më pak, nuk kam asnjë armiqësi, me shtypin kam pamundësinë që të sillem si politikan, sepse vij nga një kohë kur kam milituar në radhët e shtypit të lirë, dhe e ndjej si të pamundur të më sfidojnë në atë fushë, duke më treguar edhe arat shpesh herë, përmes broçkullave. Kam bërë paqe të plotë”.

Kryeministri Rama është pyetur për citimet e tij nga librat e shenjtë, edhe për pamjen e tij të jashtme, nëse mendonte se i ngjante rilindësve, kryeministri tha:

“Librat e shenjtë kanë qenë një nga pikat e referimit kur ne lexonim dhe i qarkullonim ilegalisht. Për sa i përket mjekrës nuk kam dhënë asnjë përgjigje për anën time të jashtme, kështu që pyesni mjekrën time. Është një çështje individuale dhe duhet të mbyllet. Jam duke bërë edhe opinga të cilat janë komode shumë të mira”.

I pyetur se nëse mendonte se do shkonte drejt zgjedhjeve të 2021 me opinga, kryeministri tha:

Po me opinga do shkoj”./abcnews.al

lideret.jpg
in a09:39 | 14/12/2019

Boris Johnson ka rezultuar fitues në zgjedhjet legjislative që u zhvilluan në Britani.

Liderit botërorë kanë shprehur urimet e tyre për fitoren e kryeministrit britanik Boris Johnson. Kancelarja gjermane Angela Merkel, e përshkroi fitoren e Johnson në zgjedhje si një fitore të jashtëzakonshme.

“Pres me padurim të punoj me ju për miqësinë dhe bashkëpunimin e fortë midis kombeve tona,” deklaroi Merkel.

Ndërkohë Presidenti amerikan Donald Trump përmes një postimi në Twitter shprehu urimet e tij: “Urime Boris Johnson-it për fitoren e tij të madhe!”. Gjithashtu, presidenti francez Emmanuel Macron deklaroi në Bruksel se fitorja Johnson-it ishte një moment qartësimi për Brexit-in.

Kryeministri irlandez Leo Varadkar dhe kryeministri italian Giuseppe Conte gjithashtu uruan Johnson-in nga Brukseli.

“Mund të rrisim bashkëpunimin për përfitim të ndërsjellë mes Italisë dhe Britanisë së Madhe. Urime”, deklaroi Conte.

Nuk ka munguar edhe reagimi nga Matteo Salvini, ish-ministri i Brendshëm italian dhe drejtuesi i partisë së ekstremit të djathtë  “Liga”, uroi gjithashtu Johnson-in për fitoren përmes një postimi në Twitter./abcnews.al

rumani.jpg
in a14:35 | 25/11/2019

Në Rumani presidenti në detyrë, konservatori pro europian Klaus Johanis, fitoi bindshëm në balotazhin e të dielës në kuadër të zgjedhjeve presidenciale në vend. Ai mori një mandat të dytë pesë vjeçar pas fitores në vitin 2014. Sipas rezultateve të publikuara ai ka marrë rreth 67 për qind të votave, dyfishin e votave të marra nga rivalja e tij, ish-kryeministrja socialdemokrate, Viorika Dansila, e cila rezultoi me 33 për qind të votave.

Një fitore e padiskutueshme e cila njëkohësisht tejkaloi çdo parashikim e madje me një rezultat më të thellë se ai i raundit të parë të zgjedhjeve.

Në fjalën e tij të parë Johanis u shpreh se kjo ishte një fitore e Rumanisë moderne, europiane dhe normale. Sipas tij rumunët ishin heronjtë e këtyre ditëve, pasi ishin të shumtë ata që dolën në votime dhe kjo ishte gjëja më e rëndësishme. Kreu i shtetit rumun njëkohësisht e vlerësoi këtë si një humbje të pastër për socialdemokratët në vend./abcnews.al

votat-kosove-1280x713.jpg
nev ila15:31 | 20/11/2019

Prokuroria e Shtetit në Kosovë ka ngritur akt-akuza ndaj 18 personave që kryen vepra penale gjatë ditës së zgjedhjeve në Kosovë.  Ata akuzohen për cënim të lirisë të votuesve, parandalim të ushtrimit të së drejtës për të votuar dhe cënim të fshehtësisë së votimit.

Prokuroria e shtetit në Kosovë ka ngritur 14 aktakuza ndaj 18 personave në të gjitha rajonet e Kosovës në lidhje me shkelje të ligjit gjatë procesit zgjedhor të 6 tetorit.

Zëdhënësi Ekrem Lutfiu i tha medias në ata akuzohen për cënim të përcaktimit të lirë të votuesve, parandalim të ushtrimit të së drejtës për të votuar dhe cënim të fshehtësisë së votimit.

Shumica e akt-akuzave janë ngritur në Gjakovë. Lutfiu tha se Prokuroria po heton edhe zarfat e ardhura nga Serbia, nga të cilët, disa janë marrë si provë materiale për t’u dërguar për ekzaminim më të detajuar.

Përfaqësues nga shoqëria civile kërkojnë që ata që bëjnë shkelje gjatë procesit zgjedhor të marrin dënime maksimale nga drejtësia. Betim Musliu nga Instituti i Kosovës për Drejtësi tha se politika e dënimeve jo të përshtatshme, ka ndikuar që komisionerët të vazhdojnë të manipulojnë me vota edhe në zgjedhjet e 6 tetorit.

Sipas tij deri tani asnjëherë nuk janë dënuar ata që i kanë nxitur komisionerët që të bëjnë vepra penale gjatë zgjedhjeve, qoftë liderët e partive politike apo edhe sponzorizuesit e fushatave zgjedhore të tyre.

Në zgjedhjet e parakohshme parlamentare të vitit 2017 Prokuroria e Shtetit kishte ngritur gjithsej 23 kallëzime penale për keqpërdorim në zgjedhje ku u përfshinë 27 persona./abcnews.al

TELEMMGLPICT000216717430_transDKGDQpemwFDOZcDYGh2bvgabHNDKKjNFhT9njmcUO7U-1280x800.jpeg
nev ila10:54 | 20/11/2019

Më 12 dhjetor Britania e Madhe shkon në zgjedhje të parakohshme, por që në fakt konsiderohet më shumë si një referendum i dytë për Brexit. Debati i parë televiziv mes dy rivalëve kryesorë, kryeministrit Xhonson dhe laburistit Korbib. Sondazhet e fundit tregojnë një rritje të mbështetjes për Korbib.

Zgjedhjet e përgjithshme në Britaninë e Madhe në fakt konsiderohen si një referendum i dytë për Brexit. Në debatin televiziv mes kryeministrit Boris Xhonson dhe liderit laburist Xhetemi Korbin, për zgjedhjet e 12 dhjetorit në Mbretërinë e Bashkuar u diskutua vetëm për një gjë: daljen e vendit nga Bashkimi Europian.

Xhonson mbrojti me cdo argument marrëveshjen e tij ndërsa Korbin tha se do të rinegocionte një marrëveshje të re me Bashkimin Europian dhe do të rivendosë sërish në duart e britanikëve një referendum për Brexit.

Xhonson u shpreh se nëse Londra merr atë që do nga Brexit, vendi do të dalë i paprekur – Angli, Skoci, Uells, Irlandë e veriut – dhe se ka një ndryshim të madh mes asaj që ai propozon dhe qëndrimit të Korbin i cili ende nuk thotë se në cilën anë do të bëjë fushatën elektorale.

Por ky i fundit këmbënguli në idetë e tij duke thënë se Brenda tre muajsh do të rinegociojë një propozim të besueshëm për daljen e vendit nga BE, dhe Brenda gjashtë muajsh do të mbahet një referendum i dytë. Pasi sipas tij do të jetë populli britanik që do të vendosë për daljen nga Bashkimi europian.

Në fund të dy kanë shtrënguar duart, ndërsa mediat britanike raportojnë se Korbin është rritur ndejshëm në sondazhe. Pas një ore debate, sondazhet treguan se publiku mbështeste 51% Xhohnson dhe 49% Korbin.

Ndërkohë janë parashikuar debate të tjera televizive para zgjedhjeve, si ai 60 dhjketorit sërish me Xhonson dhe Korbin. Ndërsa në fund do të ketë një debat mes të gjithë liderëve dhe ata të partive të vogla./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono