zgjedhjet vendore

taulant-balla.png
nev ila14:41 | 02/07/2019

Përmes një statusi në rrjetet sociale, Taulant Balla ka komentuar deklaratat e Presidentit Meta ditën e sotme. Balla shkruan se deklaratat e Presidentit Meta sot, meriotojnë injorim dhe ai si president meriton vetëm shkarkim.

“Presidenti na ka dhënë një provë tjetër shumë bindëse të nevojës për lirimin e zyrës, ku ai ka humbur të drejtën të qëndrojë. Ai tanimë është një subjekt keqardhjeje njerëzore dhe vendosmërie ligjore nga ana jonë.

Ne po presim të votojmë Komisionin Hetimor për shkarkimin e tij dhe do të presim pastaj raportin e Komisionit për të miratuar shkarkimin, të cilin natyrisht do ta shqyrtojë Gjykata Kushtetuese, por deri atëherë jemi të vetëdijshëm se do të kemi një President që si njeri meriton keqardhje, si politikan meriton injorim, si president meriton vetëm shkarkim! Dhe për sjelljen prej gaztori cirku sot dhe gjatë gjithë këtyre kohëve, meriton vetëm përqeshje popullore!”, shkruan Balla./abcnews.al

blerina-gjylameti-1-1280x611.jpg
nev ila22:42 | 01/07/2019

E ftuara në studion e ABC News me gazetaren Mirela Milori, mbrëmjen e sotme ka qenë deputetja e Partisë Socialiste, Blerina Gjylameti. E pyetur nga gazetarja Mirela Milori se si e komentonte raportin paraprak të ODIHR ditën e sotme, në lidhje me zgjedhjet e 30 qershorit, Gjylameti tha se duhet pritur raporti përfundimtar ku do të shihen më qartë edhe problematikat në këto zgjedhje.

Mirela Milori: Odri Glover ka qenë tepër e kujdesshme në këtë raport, por fjalia e parë duket se përmbledh gjithçka, “Zgjedhjet vendore të 30 qershorit, u mbajtën pa e marrë shumë në konsideratë interesin e elektoratit”, cili është komenti juaj?

Blerina Gjylameti: Komenti i parë është që duhet të presim raportin përfundimtar për të patur gjithë problematikat që ka patur gjatë ditës së zgjedhjeve, po ashtu edhe për procesin përgatitor në mënyrë të tillë që të gjitha këto probleme të adresohen. Ajo që për mua vlen, është fakti që prej vitesh tashmë ne kemi një komision të reformës zgjedhore, ku diskutojmë adresimin e rekomandimeve të OSBE/ODIHR-it të zgjedhjeve të fundit në Shqipëri dhe gjithmonë shohim se kemi të njëjtin ngërc që më pas u transmetua edhe në ngërcin e përgjithshëm politik, sikundër është ai i mungesës së opozitës në parlament dhe besoj se do të duhet që ky rezultat zgjedhor dhe një analizë edhe për pjesën se si është mbajtur procesi, po ashtu leximi me shumë kujdes i rekomandimit të OSBE/ODIHR, duhet të na çojë në uljen sëbashku edhe me opozitën, qoftë parlamentare qoftë asaj jashtë parlamentare për të përfunduar njëherë e mirë reformën zgjedhore. Mendoj që është e vetmja mënyrë për të adresuar problematikën.

Mirela Milori: Mendoni se ky raport është goditës për ju dhe për PD?

Blerina Gjylameti: Ka një element që ne do duhet të presim raportin përfundimtar. Ajo që vlen të theksohet është se si reflekton një forcë politike ndaj vëzhguesve të huaj dhe se si atyo adresohen më pas me veprime konkrete. Në rastin që flasim mendoj që një klimë e tejnxehur politike, një muaj gati afërsisht, sjell që edhe faza përgatitore për procesin zgjedhor për ditën e zgjedhjeve, të ishte në një trysni të vazhdueshme, sepse kur shikon se mungon njëra pale dhe nga ky aspekt është pjesa e balancave që mund të ruhet. Po të shikojmë në raport thuhet se Partia Socialiste u angazhua për organizimin e gjithë procesit pavarësisht se pala tjetër vendosi të mos hyjë në proces. Jam e bindur që ne do të ishim shumë herë më të lumtur që ne të kishim Partinë Demokratike, LSI, me përfaqësuesit e tyre për të patur një garë shumë herë më të fortë./abcnews.al

oerd-bylukbashi-1280x853.jpg
nev ila18:21 | 01/07/2019

Ish-deputeti Oerd Bylykbashi ka dalë sot para mediave pas publikimit të raportit paraprak për 30 qershorin nga OSBE/ODIHR.

Bylykbashi tha se ODIHR u tha shqiptarëve se më 30 qershor nuk pati zgjedhje dhe se mungesa e zgjedhjes e ka bërë nul 30 qershorin. Sipas Bylykbashit kjo është deklarata më e ashpër në 28 vjet e OSBE/ODIHR.

“Mosrespektimi i standardeve për zgjedhje demokratike ka detyruar opozitën që të marrë një vendim shumë të fortë, për të mos u futur në zgjedhjet e dekretuara të 30 qershorit dhe më pas të anulluara nga presidenti i republikës.
“Zgjedhjet, më shumë se për këdo tjetër, kanë interes dhe rëndësi për zgjedhësit”. Këtë deklaroi sot ODIHR dhe pikërisht këtë ka deklaruar dhe ka mbështetur fuqimisht edhe Partia Demokratike, gjatë gjithë kësaj periudhe, kur jemi përpjekur për zgjedhje të lira dhe të ndershme. ODIHR u tha shqiptarëve se me 30 qershor nuk pati zgjedhje, ku zgjedhësit shqiptarë të kishin mundësi për të bërë zgjedhje të lira, të ndershme dhe me plot mundësi për ata që t’i përfaqësojnë. Mungesa e zgjedhjes i ka bërë këto zgjedhje nul.
ODIHR u tha shqiptarëve se ata nuk patën mundësi për të zgjedhur dhe se kandidatët e qeverisë nuk kishin rivalë. Pavarësisht kësaj, qeveria vendosi të ecte përpara, duke organizuar një farsë me 30 qershor, pa marrë në konsideratë interesin bazë dhe themelor të zgjedhësve, që është e drejta e tyre për të zgjedhur.
ODIHR deklaroi pa asnjë ekuivok se e vetmja gjykatë për të shqyrtuar dekretet e presidentit të republikës për datën e zgjedhjeve është Gjykata Kushtetuese.
Kapja e plotë e Komisionit Qendror të Zgjedhjeve dhe të gjitha komisioneve zgjedhore nga Partia Socialiste si dhe refuzimi i të drejtës së partive opozitare për të patur anëtarët e tyre në komisione, sipas ODIHR-it dhunoi Kodin Zgjedhor dhe qëllimin e tij për të siguruar balancimin politik të komisioneve zgjedhore, me qëllim garantimin e të drejtave bazë të zgjedhësve.
Kjo është deklarata paraprake më e fortë dhe më e ashpër që ka bërë ndonjëherë në 20 vitet e fundit OSBE/ODIHR-i, duke kritikuar rëndë rolin e qeverisë në shkatërrimin e zgjedhjeve, pasi u pamundësoi zgjedhësve shqiptarë të vendosnin ata vetë për ata që do t’i përfaqësojnë.
Kjo deklaratë e sotme bëri nul të gjitha përpjekjet e Edi Ramës për organizimin e farsës zgjedhore të 30 qershorit. Opozita do të vazhdojë të provojë çdo shkelje që është konstatuar në procesin e votimit të datës 30 qershor dhe do të bëjë të mundur që shqiptarët të kenë mundësi për të zgjedhur në zgjedhje të lira, të ndershme dhe demokratike”, deklaroi Oerd Bylykbashi./abcnews.al

kutite-votimi-1280x721.jpg
nev ila16:41 | 01/07/2019

Në të paktën 15 bashki, sipas të dhënave të KQZ rezultojnë më shumë vota të hedhura sesa numri i qytetarëve votues. ABC News sjell një vëzhgim krahasimor të shifrave zyrtare.

Më shumë vota i rezultojnë Komisionit Qendror të Zgjedhjeve në 1 korrik krahasuar me tabelën e numrit të votueseve që ka publikuar pas mbarimit të procesit zgjedhor në 30 qershor.

Janë të paktën 15 bashki që nuk u përputhen të dhënat e bëra publike nga vetë institucioni që ka të drejtë të certifikojë këto zgjedhje.

Konkretisht:

Në bashkinë Ura Vajgurore, fituesja e vetme e mazhorancës socialiste

Juliana Flamur Memaj (ASE)  ka marrë  7,666  vota sipas informacionit të bërë publik nga komisioni qendror i zgjedhjeve ndërkohë që një ditë më parë u raportua se kanë marrë pjesë 5900 persona në votime.

Diferenca? 1766 votues më shumë

Në Bashkinë e Vaut të Dejës kandidati ii vetëm Mark Ndoc Babani (ASE) i janë numëruar 6,223 vota nga 5166 pjesëmarrës në votime që ka njoftuar komisioni qendror i zgjedhjeve. Veprimet matematikore tregojnë për 1057 fletë votimi më shumë.

Në Bashkinë Lushnjë ku ka fituar përsëri kandidati i vetëm i Aleancës për Shqipërinë Evropiane Fatos Banush Tushe (ASE)  rezultojnë 843 vota më shumë.  28,086 vota tregon Komisionin Qendror i zgjedhjeve këtë të hënë ndërkohë që një ditë më parë raportoi një shifër tjetër 27 243 pjesëmarrës në votime.

Në Bashkinë Malësia e Madhe ku ka fituar socialisti Tonin Marinaj  përballë kandidatit të Bindjes Demokratike Pjerin Spathari rezulton një diferencë prej 665 votash krahasuar me numrin e pjesëmarrjes në votime. 8 265 është shifra në total e votave që janë numëruar të hënën,  Ndërkohë që 7600 persona kanë marrë pjesë në votime të dielën po sipas të dhënave të Komisionit qendror të zgjedhjeve.
Në Bashkinë e Bulqizës dy kandidatët në garë Ilir Shyqyri Balla (BD) 6.73% 543

Lefter Sadik Alla (ASE) 93.27% 7,529  kanë marrë në total 8 072 vota ndonëse në zgjedhje kanë marrë pjesë 7 500 persona. Të gjitha këto shifra janë të krahasueshme në faqen zyrtare të Komisionit Qendror të Zgjedhjeve.

(572 vota më shumë)

Në bashkinë e Divjakës ka fituar Fredi Kokoneshi i koalicionit të mazhorancës.

Në kuti kanë rezultuar 13,513 fletë votimi ndërsa votues kanë qenë 13 mijë, pra 513 më shumë.

Në Memaliaj Gjolek  Guci (ASE) rezulton me 4,206 fletë votimi dhe  4150 votues. (56 më shumë)

Në Bashkinë Belsh Arif Tafani i Aleancës për Shqipërinë Evropiane ka mundur  bindshëm kandidatin e Partisë Komuniste megjithatë shifrat e pjesëmarrjes me fletët e votimit nuk përputhen ndonëse diferenca është e vogël.

6546 flete votimi ne TOTAL

6510 pjesenarres DJE

Diferenca 36 vota me shumë.

Jorgo Goro në Himarë është rizgjedhur kryebashkiakë me 4,209 vota nga

4165 votues. (44 vota më shumë)

Në Bashkinë Vorë Agim Kajmaku i Aleancës për Shqipërinë Evropiane ka marrë 6,208 vota ndërkohë që kanë marrë pjesë 88 votues më pak se ky numër pra 6120.

Tre kandidatët për Bashkinë Selenicë

PELLUMB ISMAIL BINAJ (ASE) 92.47% 5,819

MARILDO ISMAIL HODAJ (BD) 6.37% 401

SHAHIN MUHAMET CELAJ (PKSH) 1.16%  73

morën 6293 vota në total, por pjesëmarrja rezulton të jetë më e vogël, 6200, si rrjedhojë në kutinë e votimit janë 93 vota më shumë.

Në bashkinë Gramsh socialisti Klodian Tace (93.33% 8,471) mund kandidatin e Bindjes Demokratike  Sabri Ibrahimi ( 6.67%  605) . Edhe këtu shifrat nuk përputhen:

9076 raportohet nga KQZ numri në total i votave  ndërsa votues numërohen  8947. Pra 129 fletë votimi më shumë.

Në Korçë ende pa mbaruar numërimi i tre kutive të fundit u vu re diferencë midis votave dhe votuesve. Nga 22 226 vota të llogaritura në total, KQZ-së ka raportuar një ditë më parë 21797 zgjedhës. Diferenca? 429 fletë votimi më shumë.

LEONARD  OLLI (BD) 7.81% 1,736

SOTIRAQ MELKA FILO (ASE) 92.19% 20,490

3 KUTI TE PANUMERUARA

Edhe në Bashkinë Kukës ku fitues është Safet  Gjici (ASE) 83.16%  9,797 përballë  Abedin  Oruci (BD) 16.84% 1,984  shifrat janë kontradiktore ende pa u numëruar 3 kutitë e fundit. 11 781 vota përballë 11598 votuesve.(Diferenca 183 vota me shume)

I njëjti fenomen vihet re edhe në Berat.

PLARENT XHORXHI ALEKSI (I Pavarur) 5.36% 873

PAVLO KOLI SHKARPA (BD) 5.22% 851

ERVIN ZEHNI DEMO (ASE) 89.42% 14,570

16 294 është numri i votave të publikuara nga KQZ, 14 000 numri i pjesëmarrësve. 2 294 rezulton diferenca e këtyre shifrave zyrtare ende pa mbaruar numërimi i 6 kutive të fundit.

Në total përllogaritjet nxjerrin 8 768 votues më shumë në 15 bashkitë ku Komisionit Qendor të Zgjedhjeve i janë vënë përballë shifrat që ai vetë ka bërë publike. Në to nuk janë llogaritur ende numri i fletëve të pavlefshme që në fund do të tregojnë se ky gabim, njerëzor apo jo do të prodhojë një tjetër shifër të pjesëmarrjes së shqiptarëve në zgjedhjet vendore të 30 qershorit./ABC News Albania 24/7

prokuroria-2.jpg
nev ila00:18 | 01/07/2019

Dy persona të arrestuar dhe një procedim pa autor dhe një tjetër procedim në gjendje të lirë, është bilanci i publikuar nga Prokuroria, lidhur me shkeljet e evidentuara gjatë procesit zgjedhor të së dielës. Arrestimi i parë është bërë në Sukth të Durrësit, pasi një 53-vjeçar është futur me kallashnikov në dorë në një qendër votimi dhe ka kërcënuar komisionerët. Ramiz Bakanaçi ka thyer kutinë e votimit e ka marrë materialet zgjedhore duke i hedhur jashtë qendrës së votimit.

I arrestuari i dytë mësohet se është 66-vjecari Astrit Çuçka, i cili ka grisur fletën e votimit në mënyrë demonstrative. Më pas, sipas policisë, ai ka tentuar të marrë vulat e qendrës së votimit e të thyejë kutinë e votimit.

Gjithashtu, sipas informacionit të shpërndarë nga Prokuroria e Përgjithshme, organi i akuzës në Mat ka regjistruar 1 procedim pa autor, për veprën penale të “Shkatërrimit të pronës me eksploziv”, pasi rreth orës 00:30, në njërën nga klasat e shkollës ku ishte caktuar një qendër votimi, është hedhur një sasi e dyshuar si lëndë eksplozive.

Ndërkaq, Prokuroritë e tjera kanë njoftuar se nuk kanë regjistruar procedime penale lidhur me veprat penale që prekin zgjedhjet e lira dhe çdo shkelje që lidhen me zgjedhjet e 30 qershorit.

Gjate paradites, në Shkodër policia ka proceduar penalisht në gjendje të lirë kryetaren e Bashkisë Voltana Ademi për veprën penale “Pengim i zgjedhësit”. Në njoftimin e policisë thuhet se procedimi ka ardhur pasi Ademi, duke ushtruar funksionin si kryetare e Bashkisë Shkodër ka urdhëruar me shkrim punonjësit e kësaj Bashkie që të mbyllin disa qendra votimi në shkolla që administrohen e janë në pronësi të Bashkisë Shkodër.

Nuk ka vonuar reagimi i kryebashkiakes së Shkodrës, e cila përmes një konference për shtyp ka deklaruar se procedimi penal ndaj saj është veprim politik i Edi Ramës./ABC News Albania 24/7

fred-der-1280x715.jpg
nev ila23:33 | 30/06/2019

Nga Komisioni Qendror i Zgjedhjeve, gazetari i ABC News, Ferdinand Dervishi ka raportuar se pas dorëzimit të kutive të votimit, ka filluar numërimi në shumicën e qendrave të votimit në gjithë vendin.

Ndërkohë, në bashkinë e Pustecit kanë dalë rezultatet e para të numërimit të votave. Në dy kuti që janë numëruar deri më tani, është Pali Kolevski i PS që udhëheq me 525 vota, ndërsa Edmond Temelko, kryetari në detyrë i kësaj bashkie, numëron 213 vota. Numërimi i votave në këtë bashki vijon ende.

Përfundon kutia e parë në Këlcyrë. Kandidati  Klement Ndoni i PS-së ka marrë 100 vota, Shkëlqim Muhaj i BD 1 votë, gjithashtu edhe kandidati i Shpresë për Ndryshim, Hazbi Kasaj ka marrë 1 votë.

Në Tiranë është numëruar kutia e parë, ku Erion Veliaj ka marrë 162 vota ndërsa kandidati i Bindjes Demokratike, Arben Skënderi 13 vota.

Në Kolonjë Erion Isai i PS-së kryeson me 183 vota, ndaj Fation Feka i BD-së me 9 vota.

Në Belsh kryeson Arif Tafani i PS me 535 vota, ndaj Jashat Elezit i PKSH me 9 vota.

Në Has, kandiati i PS, i cili kandidonte i vetem, nga 4 kuti te hapura, nga 34 ne total, ka marre 344 vota.

Në Konispol, nga një kuti e numeruar, nga 17 ne total, kandidati i vetem i PS, Shuaip Beqiri, ka marre 191 vota.

Në Lushnje, kandidati i PS, Fatos Tushe, i cili garonte i vetem, ka marre 1896 vota, ndersa jane numeruar 12 kuti nga 161 ne total.

Ne Memaliaj, kandidati i PS Gjolek Guci, i cili nuk ka pasur kundershtare, ka marre 975 vota, ndersa deri me tani jane numeruar 8 kuti nga 33 ne total./abcnews.al

rama-edi-1-1280x707.jpg
nev ila21:14 | 30/06/2019

Me ovacione të shumta nga përkrahësit e PS-së, kryeministri Edi Rama në një dalje para mediave e ka quajtur 30 qershorin moment historik për Shqipërinë.

Rama nga selia rozë  tha se sot fitoi shpresa dhe qytetaria dhe humbi Shqipëria e djeshme “pa din e as imam”.

Të nderuar qytetarë, sot ishte 30 qershori i një Shqipërie që për shumë muaj përjetoi dramën e një përcarje të rëndë politike. Të frymëzuar nxitur dhe organizuar për të ndaluar rrugën e integrimit të popullit shqiptar në familjen e popujve të europës. sot ishte dita e zgjedhjeve që u kulmua e një përplasje historike mes antishtetit dhe shtetit, mes pandëshkueshmërisë dhe ndëshkueshmërisë, mes dhunës së të djeshmes, Shqipërisë së vjetër dhe shqipërisë së drejtë që duam. Sot fitoi e ardhmja fitoi qytetaria fitoi shpresa. Fitoi me të drejtë e me dinjitet Shqipëria e nesërme evropiane, humbi shqipëria e së djeshmes. Ishte fitore e vështirë mbase më e vështira sepse nuk luftuan mes vedit por luftoi vetë sistemi i brishtë demokratikë.  Sot 30 qershori që dukej sikur s’do vinte kurrë po ikën paqësisht. Faleminderit miqve e partnerëve të palëkundur të shqipërisë demokratike. Faleminderit SHBA-ve dhe përfaqësisë së saj në Tiranë, BE-së, faleminderit OSBE-së dhe çdo kujt tjetër dhe përfaqësuesit të nderuar që dhanë një dorë në këtë betejë absurde. Jo vetëm faleminderit por edhe ndjesë kujtdo nga miqtë e huaj që u bënë objekt i sulmeve të halldupëve që na turpëruan të gjithëve. Pas pak hyn një ditë e re që e gjen shqipërinë e çliruar. Dita e re vjen e ngarkuar me sfidën e re që hija e marrëzisë përçarëse ka lënë pas. Shqipëria nuk e meritoi çka pa e ç’dëgjoi këto kohë. Zgjedhësit e këtij vendi nuk e meritonin gjithë atë presion kriminal dhe mizerabël,  nuk e meritonte gjithë atë llum të zi të hedhura në mediat e botës të një qameti që nuk ndodhi. Sot populli foli qartë dhe bukur. Qoftë duke shkuar të votojnë apo jo folën me gjuhën e paqes. Ata kthyen ditën e paralajmëruar të qametit në ditë paqeje. U kry për bukuri me një llaf!

Ne do bëjmë tonën, duke u përulur përpara popullit. duke reflektuar shumë më tepër në nivelin qendror dhe vendor. Ne nuk fituam ndonjë betejë, por luftën e të gjitha zgjedhjeve të të gjithë radhëve. nga sot shqipëria nuk do të shohë më djegie mandatesh dhe fronte armiqësore politike. Kemi bërë punë gabim ndonjërën e kemi bërë edhe keq. njerëzit nga nesër do të jenë me plot të drejtë shumë më pak të duruar”./abcnews.al

KOMANDOT-USHTARAKE-TEK-AMBASADAT.mpg_snapshot_00.03-1280x720.jpg
ent ela14:03 | 29/06/2019

Të gjitha ambasadat janë marrë nën mbrojtje nga ushtria shqiptare. Forcat komando janë vendosur në çdo seli diplomatike dhe do t’i ruajnë ato gjatë kësaj periudhe, kur policia është e fokusuar në procesin zgjedhor.

Nën mbrojtje janë edhe ambasadat që ndodhen jashtë bllokut kryesor tek Rruga e Kavajës.

Kjo është ambasada ruse. Pranë saj mbrohet dhe ambasada zvicerane dhe ajo e Kosovës. Po ashtu edhe selia diplomatike serbe.

Edhe Sali Berisha e nis ditën e tij të punës në prani të komandove ushtarakë, kjo, sepse zyra e tij është ngjitur me ambasadën italiane.

Komandot më të specializuara janë vendosur pranë ambasadës amerikane, por filmimi i tyre nuk lejohet.

Forcat e armatosura ushtarake do të rrinë në mbrotjeje të objekteve me rëndësi të vecantë, deri në mbarimin e procesit zgjedhor, kur policia mund të kthejë forcat e saj në pozicionet e zakonshme.

Gazetare e ABC News: Esiona Konomi

 

ambasada-amerikane-ne-shqiperi-2.jpg
nev ila16:51 | 28/06/2019

Ambasada britanike me anë të  një deklarate në rrjetet sociale shkruan se Mbretëria e Bashkuar beson se qytetarët e Shqipërisë kanë të drejtë të votojnë paqësisht.

“Çdokush në datën 30 qershor duhet të luajë rolin e tij për të siguruar një proces të rregullt dhe të paqtë”, thuhet në deklaratën e saj.

“Çdo formë dhune është e dënueshme dhe e papranueshme. Ne mbështesim misionin e ODIHR për monitorimin e zgjedhjeve. Ne i bëjmë thirrje politikanëve të të gjithë palëve që të ndalojnë retorikën dhe provokimet e të ulen në dialog mes tyre. Vetëm përmes bisedimeve Shqipëria mund të zgjidhë krizën aktuale politike dhe duke u përqendruar në konsolidimin e gjykatës kushtetuese dhe reformës elektorale duke përfshirë në të rekomandimet e mëparshme të ODIHR-it. Mbretëria e bashkuar është e bindur se përpara ligjit janë të gjithë njësoj”, shkruhet në reagimin e Ambasadës Britanike.

Edhe AmbasadaAmerikane ka reaguar në lidhje me zhvillimin  zgjedhjeve në 30 qershor. Ambasada amerikane bën thirrje për paqe dhe proces të rregullt në 30 qershor gjithashtu ajo thekson se Ambasada amerikane do të mështetet te raporti i OSBE/ODIHR për të vlerësuar rregullsinë e votimit.

Ambasada e Shteteve të Bashkuara të Amerikës i bën thirrje të gjithë udhëheqësve politikë, zyrtarëve të qeverisë, agjencive të sigurisë dhe qytetarëve shqiptarë që të sigurohen që zgjedhjet e 30 qershorit të zhvillohen në mënyrë të qetë dhe transparente. Ne nxisim udhëheqësit politikë të refuzojnë çdo dhe të gjitha llojet e dhunës, apo çdo përpjekje për të penguar procesin zgjedhor apo edhe të drejtën e çdo qytetari për të votuar. Dhuna nuk është një mënyrë legjitime e të shprehurit politik. Ata që përfshihen në akte dhune duhen hetuar me të gjithë fuqinë e ligjit. 
Shtetet e Bashkuara do të kenë ekipe vëzhguesish në qendrat e votimit dhe qendrat e numërimit në mbarë Shqipërinë. Ne do të mbështetemi në raportin e OSBE/ODIHR-it për të vlerësuar rregullsinë e votimit.
Ne nxisim udhëheqësit politikë që, pas zgjedhjeve të së dielës, të rikthejnë vëmendjen e tyre në forcimin e institucioneve demokratike shqiptare dhe zbatimin e ligjit, përfshirë edhe ecjen përpara me ngritjen e një Gjykate Kushtetuese të drejtuar nga gjykatës të cilët e kanë kaluar vetingun. Miratimi i reformave zgjedhore dhe zbatimi i reformës në drejtësi janë thelbësore për aspiratat europiane të Shqipërisë dhe për ngritjen e demokracisë së fortë që i shërben të gjithë shqiptarëve”, shkruan në deklaratën e saj Ambasada Amerikane.
/abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono