zgjedhje

dashamir-shehi.jpg
G. P.23:15 | 12/06/2019

Presidenti i Republikës ka nisur konsultimet me partitë politike për përcaktimin e datës së re të zgjedhjeve vendore. Të parët në zyrën e kreut të shtetit ishin partitë e grupimit të djathtë, të parat që kishin kërkuar shtyrjen e datës së zgjedhjeve. Pas takimit Dashamir Shehi tha se nuk është folur për një datë konkrete.

Janë të njëjtët që i kërkuan shtyrjen e zgjedhjeve.

Tani presidenti i ka thirrur të konsultohet me ta për datën e re të zgjedhjeve vendore.  Partia Republikane, Lëvizja për Zhvillim Kombëtar, Partia Demokristiane, Partia Basshkimi i të Drejtave të Njeriut dhe Partia Agrare Ambientaliste iu drejtuan zyrës së kreut të shtetit në orën 19 të pasdites së të mërkurës.

Pas afro 40 minutash dolën të buzëqeshur si në takimin e 30 prillit. Këtë të mërkurë i thanë së pari faleminderit kreut të shtetit. Mazhoranca këmbëngul në mbajtjen e zgjedhjeve më 30 Qershor, ndërsa një javë më parë kreu i republikanëve kishte kërkuar shtyrjen e datës së zgjedhjeve me 6 muaj. Për Dashamir Shehin është ende herët për t’u përcaktuar data.

Opozitarët jashtë parlamentit presin një reagim pozitiv edhe nga mazhoranca. Në të kundërt e pashmangshmja mund të ndodhë sipas tyre.

Pas Grupimit të Qendrës së Djathtë, presidenti Ilir Meta ka pritur edhe kreun e Demokracisë Sociale Paskal Milo. I kontaktuar nga ABC News, Milo tha se ka ndarë me presidentin shqetësimin për krizën politike ku ndodhet vendi e se zgjedhjet duhet të jenë gjithëpërfshirëse.

Partia Demokracia Sociale bëhet aleati i parë i Socialistëve, i regjistruar për zgjedhjet e 30 Qershorit që shprehet i hapur për shtyrjen e datës së zgjedhjeve. Presidenti Meta  do të zhvillojë konsultime për një datë të re zgjedhjesh edhe me PD e LSI, ndërkohë që PS vazhon të përsërisë se zgjedhjet vendore do të zhvillohen në 30 Qershor./ABC News Albania 24/7

dashmir-shehi.jpg
G. P.19:55 | 12/06/2019

Aleatët e Partisë Demokratike zhvilluan pasditen e kësaj të mërkure në ambientet e Presidencës një takim me kreun e shtetit Ilir Meta. Temë kryesore e diskutimit ishte data e re e zgjedhjeve pas çdekretimit të 30 Qershorit.

Në përfundim të takimit, kreu i LZHK-së, Dashamir Shehi deklaroi se Grupi i Qendrës së Djathtë mendon se dita e re e zgjedhjeve do të dalë nga një marrëveshje e re politike për të pasur zgjedhje të lira dhe të ndershme.

Ai e konsideroi takimin me Presidentin shumë pozitiv. Megjithatë theksoi se në takimin e sotëm Grupi i Qendrës së Djathtë shkoi pa një propozim për datën e re të zgjedhjeve.

“Ne gjykojmë që aksioni opozitar nuk mund të reduktohet e ditës së zgjedhjeve, duhet të gjykojmë se dita e zgjedhjeve duhet të jetë si derivat i një analize tjetër, Çfarë duhet të bëjmë deri ditën e zgjedhjeve për t’i bërë zgjedhjet e pranueshme siç duhet të jenë nga pikëpamja e pretendimeve tona.

Ne gjykojmë se sot se dita e zgjedhjeve do të derivojë nga mundësia e një marrëveshje të madhe politike nga të me gjithë mend merren në konsideratë pretendimet opozitare për të pasur zgjedhje të lira dhe të ndershme. Përtej kësaj ne e konsiderojmë shumë pozitiv. Për sot gjykojmë se është bërë një hap i vogël, por në drejtimin e duhur.

Ne gjykojmë se data e zgjedhjeve nuk mund të jetë një dëshirë, do të dalë vetvetiu nga marrëveshjet politike, nga sipërmarrjet që do merren. Nëse data e zgjedhjeve është thjesht arsye për të fituar kohë kuptohet që kjo nuk i mjafton opozitës

Ne erdhëm pas asnjë propozim sot. Nuk besoj se edhe Presidenti na thirri për të pasur një propozim konkret. Meta do i presë të gjitha palët, të cilët nga pikëpamja mund të kenë peshë më të madhe. Ne afruam mundësitë që kemi sot. E falënderuam që e zgjidhi problemin e kohës, nëse pjesa tjetër nuk ka luajtur mendsh fare që të vazhdojnë me pretendimin e datës 30. Si fillim është një hap i vogël dhe i rëndësishëm”, tha Shehi.

Ndërkohë gazetarja e ABC News, Yllka Kamenica, raportoi se nga dita e nesërme pritet një takim me kreun e PD-së, Lulzim Basha dhe përfaqësues të LSI-së.

“Që nga dita e nesërme është një takim i pritshëm me kryetarin e Partisë Demokratike, ndoshta jo me zonjën Kryemadhi pasi në takimet e shkuara është zoti Luan Rama që ka përfaqësuar patrin LSI. Nga Partia socialiste duket e konfirmuar dhe me zë dhe figurë nga vetë kryeministri ata nuk do marrin pjesë por do vazhdojnë axhendën e tyre elektorale”, tha gazetarja./abcnews.al

 

mustafa-nanoo.jpg
G. P.20:52 | 11/06/2019

Të gabuar e quan Mustafa Nano dekretin e Presidentit Meta që anulon zgjedhjet e 30 Qershorit. Gjatë emisionit “Provokacija”, gazetari e konsideroi këtë gjest si një prej atyre që përplasjen civile e mbartin si qëllim.

“Presidenti i Republikës ka nxjerrë një dekret nëpërmjet së cilit ka provokuar një diskutim të madh kombëtar. Është një dekret nëpërmjet të cilit, ai anulon dekretin e parë mbi mbajtjen e zgjedhjeve në 30 Qershor. Sipas meje, ky është një vendim tërësisht i gabuar. Madje, madje më duket qëllimisht i gabuar. Është një prej atyre gjesteve që përplasjen civile nuk është se e sjellin si pasojë, por e mbartin si qëllim. Ky është qëndrimi im lidhur me vendimin e Presidentit”, tha Nano.

Nga ana tjetër, edhe pse mendon se duhet tentuar shkarkimi i Metës, kjo është gjë e pamundur. Shkak sipas tij është Kushtetuta.

“Lind pyetja duhet shkarkuar Presidenti? Sipas meje do duhej tentuar shkarkimi i tij, por mund të shkarkohet? Është e pamundur të shkarkohet. Ne do kemi president Ilir Metën, sepse pavarësisht nga vendimi që do merret në parlament dhe ndoshta votat aty mund të gjenden, në fund fare, sipas Kushtetutës së Republikës së Shqipërisë do duhej që vendimi i Parlamentit t’i jepej OK i Gjykatës Kushtetuese, e cila nuk ekziston. Ky problem më duket i zgjidhur dhe gjithë përpjekja e mazhorancës për të krijuar një aksion parlamentar apo politik për të shkarkuar Presidentin e Republikës më duket i kotë, më duken të humbura”, tha Nano.

Sipas Nanos, zgjedhjet mund të bëhen edhe nëse mungon opozita duke pasur parasysh rrethanat, sepse demokracia nuk e nënkupton garën si detyrim për pjesëmarrje, por si të drejtë për pjesëmarrje.

“Lind pyetja tjetër. Si i bëhet me zgjedhjet në këto rrethana? Do bëhen zgjedhjet? Duhet të bëhen zgjedhjet? Unë këtë nuk e di. Unë pres që të flasin konstitucionalistët, njerëzit që janë të dijshëm në këtë fushë dhe ata po flasin, për fat të keq janë të ndarë mbi bazën e pozicioneve të tyre politike dhe në këtë kuptim nuk e di se çfarë do ndodhë. Nuk më pëlqejnë disa njerëz, kolegë të mia apo intelektualë të tjerë që tani janë kapur pas vendimit të Presidentit dhe thonë që në këto rrethana nuk mund të bëhen zgjedhjet. Kanë hequr dorë nga teza e parë, nga fakti që deri para këtij momenti ishin kapur te principi sipas të cilit nuk ka zgjedhje pa opozitën. Unë bëj pjesë te ata njerëz që mendoj se zgjedhje pa opozitën mund të bëhen. Janë një situatë qesharake, janë një situatë absurde, por në rrethanat që opozita merr vendimin për të mos u futur për arsyet e veta, zgjedhjet duhen mbajtur sepse janë detyrim kushtetues. Demokracia nuk e nënkupton garën si detyrim për pjesëmarrje, e nënkupton garën si e drejtë për pjesëmarrje.

Kolegët e mi që kanë mbajtur këtë qëndrim nuk më kanë pëlqyer edhe për një arsye tjetër. Më saktë për qëndrimin që kanë mbajtur lidhur me tre gjëra, që mua më duken të rënda dhe që unë kam menduar gjithmonë që shqiptarët duhet të kishin një konsensus të përbashkët lidhur me qëndrimin që duhej mbajtur ndaj: 1. Djegies së mandateve 2. Bojkotimit të zgjedhjeve 3. Kërcënimeve dhe kanosjeve që i janë bërë vendim me përplasjen civile. Në këto tre momente, pavarësisht kritikave që kemi me mazhorancën, me Edi Ramën, janë tre gjeste që i venë minat sistemit tonë që kemi zgjedhur të jetojmë. Për mua ky qëndrim është qëndrim destruktiv. Unë kurrë në jetën time nuk kam parë qëndrime të tilla kaq destruktive”, tha analisti./abcnews.al

juncker-1280x853.jpg
G. P.20:19 | 11/06/2019

Çdo shtyrje e zgjedhjeve lokale dëmton perspektivën europiane të Shqipërisë. Ka qenë ky mesazhi që i ka përcjellë klasës politike shqiptare presidenti i Komisionit Europian, Jean Claude Juncker. Pasi ka pritur në një takim kryeministrin Edi Rama, Juncker ka deklaruar se Shqipëria është gati për hapjen e negociatave të anëtarësimit dhe se do të punohet për të bindur vendet skeptike.

Presidenti i Komisionit Europian, Jean Claude Juncker ka deklaruar se një shtyrje e mundshme e zgjedhjeve lokale në Shqipëri do të dëmtonte perspektivën europiane të vendit. Në një konferencë të përbashkët për shtyp me kryeministrin Edi Rama në Bruksel, Juncker ka nënvizuar se të gjitha palët politike në Shqipëri duhet të angazhohen për zgjidhjen e krizës, me qëllim mbajtjen e zgjedhjeve demokratike.

“Njerëzit nuk duhet të pengohen që të ushtrohet e drejta e tyre demokratike. Nuk mund të bllokosh vullnetin e qytetarëve. Ndaj mendoj se zgjedhjet duhet të zhvillohen, ndryshe do të shtyhet më tej perspektiva europiane e Shqipërisë”, tha Juncker.

Juncker ka nënvizuar se personalisht mbështet hapjen e negociatave për Shqipërinë, pasi sipas tij vendi i ka plotësuar kërkesat e Unionit sa i takon reformës në drejtësi, luftës kundër korrupsionit dhe krimit të organizuar.

“Shqipëria është gati për hapin tjetër, ndaj dhe kemi përsëritur propozimin tonë për Këshillin Europian për hapjen e negociatave. Janë disa pengesa që duhen kaluar, por më duhet të ritheksoj se ne u kemi bërë disa kërkesa autoriteteve shqiptare, të cilat i kanë realizuar ato. Ndaj unë nuk them jo për hapjen e negociatave. Jam në favor të hapjes së negociatave për Shqipërinë sa më shpejt sepse ajo i ka plotësuar kërkesat”, tha ai.

Presidenti i Komisionit Europian është shprehur i vetëdijshëm se në radhët e BE-së ka vende skeptike, por ka shtuar se bindja e tyre nuk është një mision i pamundur.

“Nuk është mision i pamundur. Ne duhet t’u shpjegojmë atyre se më së shumti për arsye të brendshme dhe jo europiane mendojmë se negociatat me Shqipërinë duhet të hapen në muajt e ardhshëm. Nuk po i referohem këtu qershorit, sepse ka reforma që duhet të miratohen dhe shumë sesione parlamentare dhe mund të jetë më vonë, por bindja ime është se duhet të jemi të qartë si kristali se negociatat duhet të hapen”, theksoi ai.

Nga ana e tij, kryeministri Edi Rama ka nënvizuar se, zgjedhjet lokale në Shqipëri do të mbahen sipas parashikimeve, duke marrë parasysh se një shtyrje e tyre mund të dëmtojë të ardhmen europiane të vendit.

“Situata në Shqipëri është një çështje e brendshme që duhet të zgjidhet nga institucionet shqiptare, por që ka të bëjë edhe me të ardhmen europiane, ndaj zgjedhjet duhet të mbahen, askush nuk duhet të pengohet të marrë pjesë në to, sikurse kushdo është i lirë për të mos marrë pjesë në to”, tha kryeministri.

Sa i takon integrimit, Rama ka theksuar se, ka ardhur koha që Europa të bëjë atë që shqiptarët presin prej saj, pasi sipas tij, qeveria shqiptare i ka kryer detyrat.

“Të njohë meritën tonë dhe të hapë bisedimet e anëtarësimit, që është veçse një kapitull i ri që do të kërkojë përpjekje, kohë dhe durim”.

Në vijim, si Rama edhe Juncker kanë refuzuar të komentojnë lëvizjet dhe deklaratat e fundit të presidentit të Shqipërisë, Ilir Meta. Kreu i Komisionit Europian ka thënë se nuk do të ndërhyjë në një debat të brendshëm, por ka përsëritur se nëse nuk zhvillohen zgjedhjet do të dëmtohet perspektiva europiane e Shqipërisë. Ndërkohë, duke iu përgjigjur interesit të mediave serbe lidhur me deklaratat e tij për bashkimin shqiptar, Rama është përgjigjur:

 “Ëndërroj diçka të madhe, por ajo është një Europë e madhe…”

edi-rama-2-1280x750.jpg
G. P.17:50 | 11/06/2019

“Zgjedhjet do të bëhen në 30 Qershor”.

Ky ishte reagimi i shkurtër i Kryeministrit Rama nga rrjetet sociale pas deklaratave të Presidentit të Republikës Ilir Meta. Ky i fundit mbajti një konferencë për mediat këtë të martë.

Ai theksoi se “Me bindje të plotë dhe të palëkundur dhe me përgjegjësinë e Kryetarit të Këshillit të Sigurisë Kombëtare, mora vendimin e duhur për të shmangur një konflikt civil në vend dhe për të shpëtuar demokracinë dhe të ardhmen europiane të vendit”./abcnews.al

 

ilir-metaaa.jpg
G. P.17:15 | 11/06/2019

Presidenti Meta dhe Kryeministri Rama kanë pasur disa dreka sëbashku. Këtë e konfirmoi kreu i qeverisë gjatë konferencës për mediat të martën, ku tha se drekën e fundit sëbashku e kishin pasur përpara 10 ditësh sëbashku.

Në këtë mënyrë, Meta sqaroi se pse kreu i qeverisë ishte në dijeni të vendimit të tij për çdekretimin e datës së zgjedhjeve. Gjithashtu Meta ka theksuar se ka tentuar që të takojë Ruçin për të shtyrë datën e zgjedhjeve, por kryetari i Kuvendi ka qenë në një udhëtim drejt Tepelenës.

“Nga e dinte zoti Rama? Kemi patur një drekë sekrete. Kemi pasur disa, por e fundit në Pallatin e Brigadave para 10 ditësh besoj, ku kemi biseduar dhe ku ai e di shumë mirë dhe e ka ditur gjithmonë se sa i shqetësuar jam unë për këtë situatë dhe për tejkalimin e saj. I takonte atij si Kryeministër që të kërkonte një shtyrje të arsyeshme, një datë tjetër për zgjedhje vendore. Ju e dini që unë që në 24 maj publikisht kam shprehur gatishmërinë time për t’i shërbyer një zgjidhjeje pas dakordësimit të palëve për të shfuqizuar datën 30 Qershor dhe për të gjetur zgjidhjen për një datë tjetër. Për fat të keq kjo kërkesë e imja, kjo nxitje e imja për dialog nuk ka funksionuar dhe dy-tre ditë përpara se të merrej ky vendim, Rama ka qenë në një emision televiziv dhe e ka bërë të ditur në mënyrë të qartë se pala e tij nuk e vë në diskutim datën 30 Qershor. Nuk kam bërë ndonjë tentativë për të komunikuar me Ramën atë ditë, sepse ai më ka nderuar dhe ka vizituar në vendin e origjinës sime, Skraparin dhe ka qenë në Berat për të marrë pjesë në mitingut që zhvillohej në të njëjtën kohë me atë të opozitës në Tiranë. E vërteta është që kam bërë një përpjekje për të takuar Ruçin. Ai ka qenë duke udhëtuar drejt Tepelenës. Kjo është e gjithë historia pse zoti Rama nuk ka qenë i surprizuar për këtë vendim. Unë jam i surprizuar nga reagimi i tij pas këtij vendimi. Megjithatë ka kohë të reflektojë”, tha Meta.

Ndërkohë sipas Metës, kryetari i opozitës, Lulzim Basha është vënë në dijeni të vendimit për çdekretimin e zgjedhjeve disa momente përpara fillimit të protestës së 8 kombëtare të opozitës.

“Basha nuk e ka ditur, e ka marrë vesh këtë vendim disa momente përpara fillimit të mitingut përmes një telefonate nëpërmjet sekretarisë telefonike, ku i është kërkuar që të ndërpritet mitingu në çdo moment që do ketë një manifestim dhune, natyrisht duke i bërë të ditur faktin që do bëhet publik dekretin për të shfuqizuar zgjedhjet në mënyrë që të çtensionohej manifestimi i grupeve të caktuara dhe që të përfundonte sa më shpejt ai manifestim”, tha Presidenti./abcnews.al

meta1.jpg
G. P.16:55 | 11/06/2019

Presidenti i Republikës, Ilir Meta ka sqaruar këtë të martë gjatë një konference tpër mediat se pse e mori vendimin për çdekretimin e datës së zgjedhjeve pak kohë para fillimit të protestës së tetë kombëtare të opozitës.

Sipas tij ka pasur informacione se situata në 8 Qershor mund të shfrytëzohej nga grupe të interesit brenda dhe jashtë vendit për akte të cilat mund të dëmtonin rendin dhe stabilitetin në vend. Sipas Metës, vendimi u mor pas bisedave me drejtues të agjencive ligjzbatuese në vend dhe partnerëve seriozë të Shqipërisë.

“Ky vendim nuk bëhet për të plotësuar tekat e opozitës. Përkundrazi. Opozita ka çështje mjaft të drejta që i ngre dhe që unë i kam përkrahur dhe në pozita të tjera, por edhe më parë, si e dini ju, në pozitën e kryetarit të Kuvendit, si kryetar i një partie në koalicion me Partinë Socialiste. Unë nuk jam këtu për të ndihmuar tekat e opozitës, por as kurrsesi për të toleruar që Shqipëria përveç datave mjaft problematike që ka në historinë esaj që nga 2 Prilli, 26 Maji apo më pas 28 Maji, që nga 21 Janari të ishte dhe 30 Qershori. Vendimi im është marrë me përgjegjësi të plotë për arsye sepse në bazë të gjithë të të dhënave, jo për shkak të vullnetit të drejtuesve të dy palëve, por për shkak të grupeve të interesave të caktuara jashtë dhe brenda vendit, situata në 8 Qershor në mënyrë të drejtpërdrejtë dhe në vijimësi mund të shfrytëzohej për akte të cilat do të dëmtonin rëndë stabilitetin, rendin publik dhe do u jepnin mundësi dy palëve për të fajësuar njëra tjetër dhe pp kështu faji ngelet jetim dhe pasojat i vuajnë qytetarët e Shqipërisë. Ky është një vendim i marrë në bazë të informacioneve të besueshme edhe me drejtues të agjencive ligjzbatues këtu, por edhe të partnerëve serioze dhe mjaft të interesuar jo vetëm për stabilitetin këtu për edhe kredibilitetin e faktorit shqiptar”, tha Meta./abcnews.al

tsipras-800x445.jpg
G. P.23:59 | 10/06/2019

Presidenti i Greqisë ka pranuar kërkesën e kryeministrit Aleksis Tsipras, duke bërë që vendi të shkojë zyrtarisht në zgjedhje të parakohshme. Shkak për këtë lëvizje u bë paraqitja e dobët e partisë në pushtet, Syriza, në zgjedhjet lokale dhe ato euro-parlamentare.

Kryeministri grek Aleksis Tsipras shkoi të hënën pasdite te presidenti i Republikës, prej të cilit kërkoi shpërndarjen e parlamentit dhe shpalljen e zgjedhjeve të përgjithshme, për të rinovuar, siç tha, “mandatin popullor”.

Tsipras e argumentoi kërkesën e tij me faktin se nga zgjedhjet europiane në fund të muajit të kaluar janë krijuar kushtet për një fushatë elektorale të tejzgjatur, që do të shkonte deri në tetor, kur përfundon normalisht mandati i qeverisë Tsipras.

Sipas kryeministrit, kjo do të krijonte një risk për ekonominë, duke vënë në rrezik “sakrificat dhe mundin e popullit grek”. Presidenti i Republikës është përgjigjur se e pranon kërkesën dhe se do të nisë proçedurat përkatëse. Zgjedhjet do të mbahen të dielën e parë të muajit të ardhshëm, pra më 7 Korrik.

Stand up – Dekreti presidencial për shpërndarjen e trupës ligjvënëse dhe shpalljen e zgjedhjeve të parakohshme pritet të afishohet tashmë, siç është tradita, në portën kryesore të godinës së parlamentit.

Pas kësaj, kryeministri Tsipras do të shkojë në një veprimtari të posaçme për të prezantuar programin elektorale të SYRIZA-s, duke dhënë dhe shenjën e startimit të fushatës elektorale për zgjedhjet e parakohshme.

Mandati i qeverisë Tsipras përfundon zyrtarisht në muajin tetor. Por kryeministri grek u detyrua ta përshpejtonte ballafaqimin elektoral pas humbjes së thellë në zgjedhjet europiane dhe ato administrative nga Demokracia e Re e opozitës./abcnews.al

LAjcak-1.jpg
G. P.23:08 | 10/06/2019

Kryetari i radhës i OSBE-së, Ministri i Jashtëm dhe për Çështjet Evropiane i Sllovakisë, Miroslav Lajčák, shprehu sot shqetësimin e tij lidhur me zhvillimet më të fundit në Shqipëri. Në një postim në rrjetet sociale, prezenca e OSBE-së në Shqipëri, thekson se këto zhvillime mund të thellojnë më tej krizën politike dhe të çojnë në ndalimin e funksionimit të institucioneve shtetërore.

Kryetari i radhës u bëri thirrje udhëheqësve politikë të tregojnë vetëpërmbajtje dhe të respektojnë legjislacionin në fuqi, si edhe rolet kushtetuese të institucioneve demokratike përkatëse.

“Ai theksoi pritshmërinë e tij se udhëheqësit do të veprojnë në përputhje me parimet demokratike dhe do të respektojnë të drejtën e qytetarëve për të votuar për përfaqësuesit e tyre, brenda kufijve kohorë të vendosur nga kuadri ligjor shqiptar”, thuhet më tej në deklaratën e OSBE-së.

Ndërkohë në fund Lajčák, shpreh besimin e tij se Shqipëria është e aftë ta trajtojë vetë situatën, brenda kornizës së saj kushtetuese dhe ligjore, dhe se do të gjejë një zgjidhje, e cila do t’i mundësojë vendit të përqendrohet në sfidat e rëndësishme për qytetarët e Shqipërisë./abcnews.al

debatiii-1280x720.jpg
G. P.21:30 | 10/06/2019

Dekreti i firmosur sot nga Presidenti Ilir Meta ishte tema që u diskutua në televizionin ABC News gjatë emisionit “Byro Politike” të Juli Xhokaxhi. Të ftuar ishin deputeti i Partisë Socialiste Alket Hyseni dhe juristi Jordan Daci, të cilët patën një debat rreth kushtetueshmërisë së vendimit të Presidentit Meta.

Sipas Dacit, vendimi i sotëm i Presidentit është i bazuar në Kushtetutë. Por të kundërtën mendon deputeti Hyseni pasi sipas tij, Meta ka të drejtën për të caktuar datën e zgjedhjeve dhe jo për ta zhbërë atë.

Jordan Daci: Rasti konkret sigurisht që neni 92 e përcakton shprehimisht që vetëm ai ka të drejtë ta bëjë dhe kjo është një e drejtë ekskluzive që nuk e ndan me asnjë institucion tjetër. Vijmë tek kjo tjetra nëse E drejta për të caktuar, a kalon te e drejta për të ç’caktuar. Normalisht e drejta e Presidentit në rastin konkret është absolute, esenciale dhe materiale.  Nuk ka logjikë të njohësh të drejtën për ta caktuar dhe të mos i njohësh të drejtën për ta revokuar ndërkohë që kjo është një praktikë e bërë dy-tre herë më përpara. Elementi tjetër për sa i përket kushtetueshmërisë, duhet të kemi parasysh që presidenti e kshite gjithë komoditetin që ta caktonte periudhën e dytë zgjedhore. Mendoj se Presidenti ishte i qartë për sa i përket arsyetimit. Ai e lidhi me parimin e balancimit dhe ndarjes së pushteteve. Është fakt që Kushtetuta e Shqipërisë nuk ka më as pushtete dhe as balancim dhe ndarje pushtetesh. E ka humbur këtë. Është fakt që Republika e Shqipërisë është tashmë republikë moniste, ndërkohë që Kushtetuta jonë nuk parashikon një gjë të tillë. Është fakt që padyshim që mund të hajë diskutim fakti që ishin të lejuar ose jo për zgjedhje. Presidenti nuk u mor me faktorët. Ndoshta und të ishte marrë edhe me opozitën sa i përket vlerësimit të qëndrimeve të tij. Ne e shikojmë çështjen nga pikëpamja juridike. Të jem i sinqertë këto ditë po dëgjoj disa argumente të cilat janë fyese për një njeri të zakonshëm dhe jo më për një avokat që pretendon të njohë Kushtetutën. Rasti konkret ka bazë të pastër, por duhet të kuptjmë siç duhet Kushtetutën dhe mënyrën si funksionon shteti i së drejtës. Neni 92 thekson që presidenti cakton datën e zgjedhjeve.

Alket Hyseni: Cakton në gjuhën shqipe është cakton nuk është zhbën.

Jordan Daci: Çdo të thotë ta caktosh nuk ke të drejtë ta zhbësh? Dy herët e tjera pse nuk e bëri?

Alket Hyseni: Me që se ndihesh i fyer nga argumente, po ta shpjegoj unë.

Jordan Daci: Nuk e kisha për juve personalisht. Si mos të jesh i fyer kur KQZ shfuqizon dekretin e Presidentit.

Alket Hyseni: Caktimi është kompetencë e përcaktuar dhe ka një parim bazë të Kushtetutës.

Jordan Daci: E keni lexuar debatin kushtetuese se kur është hartuar. Zoti Majko ka qenë bashkëhartues.

Alket Hyseni: Dëgjova një argumentim tuajin që s’është organ administrativ, por do ftoj të lexoni vendimin e Gjykatës Kushtetuese.

Jordan Daci: Ai është vendim i Kolegjit.

Alket Hyseni: Mos bëni autogola se ju të djathtët bëni autogol. Kolegji është i Gjykatës Kushtetuese.

Jordan Daci: Nuk mund të abuzojmë me shkencën.

Alket Hyseni: Fjala caktim është e përcaktuar qartë. Do të thotë që vetëm e përcakton dhe nëntë muaj para. Rastet e precedentëve janë krejt të ndryshme. Mos iu referoni precedentëve krejt të ndryshme për të argumentuar paligjshmërinë dhe anti-kushtetueshmërinë e tij. Më gjej një rast që ka pasur anulim të zgjedhjeve. Ka pasur shtyrje të zgjedhjeve. Në gjykimin tim ka interpretim, por aty ka pasur vullnetin e të gjithë aktorëve politik, të shprehur me shkrim.

Jordan Daci: Presidenti nuk është honorifik. Ajo që thatë ju është krejtësisht e pabazë. Të thuash ka rol honorifik është gjëja më e pasens. Ne kemi të njëjtë me presidentin italian dhe kroat.

Juli Xhokaxhi: Mund t’ju lexoj një paragraf.

Jordan Daci: E mbaj mend përmendësh. Është vendimi 150 i vitit 2017. I partisë Forca Rinia.

Juli Xhokaxhi: Është akt administrativ individual, e konsideron akt administrativ individual dhe nuk ka kompetencë gjykata Kushtetuese për ta shqyrtuar, por Gjykata Administrative.

Jordan Daci: Ka tre probleme. Nuk flitet për pajtueshmërinë e dekretit me Kushtetuetën siç pretendohet sot.

Alket Hyseni: Ke shkruajtur dhjetë faqe sot që nuk është akt administrativ,

Jordan Daci: do shkruaj dhe 15 të tjera sepse nuk është gjykatë, është Kolegji. Është vendim i Kolegjit, i cili nuk ka vendosur kalimin.

Alket Hyseni: Gjykata Kushtetuese ka deklaruar moskompetencë.

Jordan Daci: Pse ikën nga Vettingu ata tre anëtarët e Gjykatës Kushtetuese?

Alket Hyseni: Kjo nuk ka lidhje fare, kjo ka lidhje me ju. Kjo ka lidhje siç ikën ata duhet të ikin dhe liderët tuaj.

Jordan Daci: Unë nuk kam lider, ti je politik.

Alket Hyseni: Më politik se edhe vetë Lul Basha, por s’ka gjë është e drejta jote, demokraci është dhe të respektoj.

Jordan Daci: Nuk është e vërtetë.

Juli Xhokaxhi: Në këtë studio ka mbrojtur edhe akte që kanë të bëjnë me të majtën.

Jordan Daci: Unë kam mbrojtur edhe Ramën, edhe ju kur keni pasur të drejtë./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono