vrasja

g-hoxha.jpg
ger ta08:13 | 17/01/2020

Gazetari i Abc News Artan Hoxha publikoi videon ekskluzive të vrasjes së Guxim Gjuriçit, në Tropojë.

Hoxha i cili ka vizituar vendin ku ndodhi krimi, tha se  në vendngjarje kishte ende gjurmë gjaku. Sipas gazetarit autori i është afruar Gjuriçit nga pas, dhe e ka qëlluar me breshëri. Mbi trupin  viktimës janë gjetur 13 predha, të gjitha në shpinë, çka tregon se është qëlluar nga pas.

Ajo që kam vënë re në skenën e krimit, aty kishte ende gjurmë gjaku, në momentin që tregohet me shigjetë. Madje një nga predhat ishte ngulur në beton, ishte në vendin e ngjarjes akoma. Afrimi i tij ka ardhur nga mbrapa makinës dhe e ka gjetur pas shpine viktimën, duke qenë se fizikisht Guximi ishte i fuqishëm është qëlluar disa herë në drejtim të tij, është hedhur i gjithë karikatori. Autori e ka bërë këtë gjë për të mos pritur edicionet e lajmeve mbijetoi apo jo, por për ta marrë pagesën.

Ky është lokali, kjo është pjesa e pasme e makinës, është pozicioni nga ka ardhur autori, nga mbrapa dhe ka qëlluar viktimën aty. Janë ende gjurmët e gjakut. Shenjat e bardha kanë ngelur nga rikoshetat e predhave. Aty po ta shikoni fillimisht, viktima do të jetë përkulur sepse kishte gjurmë gjaku. Ka një predhë në pjesën e përparme në kofanon e makinës, pastaj ka tre predha të tjera në lartësi shumë të madhe, të cilat të linin dyshime se një armë tjetër ka kryqëzuar zjarrin, por ende nuk ka dalë përgjigjia e laboratorit kriminalistik për të thënë se sa armë kanë qëlluar në vendin e krimit dhe në distancë 30-40 metra nga pozicioni ku është vrarë viktima kemi predha të tjera. Janë dy predha në pjesën e poshtme, të cilat kanë shpjegim në gjuajtje horizontale të qitëst. Por një predhë në pjesnë e sipërme, të cilën nuk e shpjegonin dot ekspertët që ishin atu. Pra predhat ishin te farmacia, në pjesën e sipërme të karburantit dhe predhat e tjera janë në tokë. Pra tre predha te karburanti, tre te farmacia, një në kofanon e makinës, dhe të tjerat në tokë. Fuqia e armës, pjesa më e madhe e tyre kanë qenë edhe tejshpuese.

Viktima ka 13 predha në trup, madje është qëlluar edhe gjatë kohës që ka qenë në këmbë, por edhe në kur ka rënë në tokë, i ka të gjithë plumbat pas shpine. Nuk është e vërtetë që ka folur vrasësi me viktimën, askushnuk e ka dëgjuar. Autorët, apo autori ka patur edhe një avantazh tjetër, ka pasur një erë shumë të fortë. Zakonisht kur ka erë i zbut zhurmat e armëve dhe për më tepër kur ka erë të fortë. Për më tepër kjo ka bërë të ketë dyshime nëse është përdorur silensiator, prandaj njerëzit nuk i kanë dëgjuar të shtënat, por ka qenë era e fortë që ka bërë që banorët të mos dëgjojnë të shtënat. Viktima është gjetur pas 40 minutash nga nipi i vet, spitali është shumë afër, ndoshta kjo ka qenë edhe një ndër arsyet që ai është qëlluar aq shumë. Ai ka shkuar në spital me jetën e humbur. Një nga dëshmitarët ka thënë se ka kujtuar që ishte një i dehur që ishte shytrirë, se ndodhej se ishte mes makinës dhe karriges së lokalit. Më vonë kur ka shkuar njeriu i vet ka njoftuar policinë. Ky 40 minutëshi i humbur  u ka dhënë kohë autorëve të largohen nga skena e krimit. Dyshimet e deritanishme janë edhe nga mënyra se si ka ndodhur edhe nga mjetet”, u shpreh gazetari Hoxha./abcnews.al

 

lamallarui.jpg
nev ila15:03 | 16/01/2020

I ftuar ditën e sotme në studion e ABC News me gazetaren Juli Xhokaxhi ka qenë i ftuar zv/ministri i Brendshëm Besfort Lamallari. Lamallari foli për paketën kundër krimit të organizuar, dhe vrasjet e bujshme të ndodhura në vend.

Lamallari tha se Policia e Shtetit ka avancuar në lidhje me kapacitet e saj për zbulueshmërinë e krimeve të rënda në vend.

Pjesë nga biseda:

Besfort Lamallari: Ajo që është e rëndësishme është që vërtetë duhet të kemi vëmendjen ndaj vendimeve përfundimtare nga gjykata. Ka shumë për të bërë, si në aspektin e vendimeve që kanë të bëjnë me persona të rrezikshëm të cilët, jo vetëm për rastet që duket sikur janë të lehta, që persona të arrestuar në flagrancë dhe të përfshirë në veprimtari të organizuar kriminale. Kemi parë që persona të dënuar me burg përjetë kanë dalë nga burgu në mënyrë absurde. Kjo e bën më të domosdoshme avancimin e qeverisë shqiptare për të reaguar ndaj një situate të tillë, e cila vjen edhe si një përgjigje e këtyre fenomeneve për të parandaluar situata të tilla.

Juli Xhokaxhi: A po punohet për një strategji ndryshe për parandalimin e krimit nga policia shqiptare ? A duhet të kalojmë në një stad tjetër?

Besfort Lamallari: Sigurisht, ajo çfarë ne i mëshojmë fort është lufta kundër krimit të organizuar. Ka një program të mirëmenduar të Ministrisë së brendshme e adresuar në aspektin e inteligjencës dhe analizës kriminale.

Juli Xhokaxhi: Kemi një fillim të 2020 me bilanc lufte për shkak të vrasjeve dhe aksidenteve. Rasti i Rrëshenit është një nga rastet e rënda, të lë shijen e një vrasjeje mafioze, çfarë ndodh në këto lloj rastesh? Si punohet?

Besfort Lamallari: Kapacitetet e policisë shqiptare janë shumë më të larta në krahasim me ato në të shkuarën. Mekanizmat për hetimin dhe zbulimin e ngjarjeve të caktuar sot gjithmonë e më tepër policia përdor hetime me metoda të ndryshme speciale. Metodat janë tepër të sofistikuara në bashkëpunim edhe me partnerët ndërkombëtarë, mjafton të përmend faktin se në shumë prej vrasjeve janë përdorur teknika tepër të avancuara duke filluar nga gjurmët e gishtave, analizat e ADN të cilat orientojnë drejt zbardhjes së autorëve.

Besfort Lamallari: Për rastin konkret, nga raportimi i policisë së shtetit, jam besimplotë se oficerët që merren me këtë çështje por edhe me të tjera në një kohë të shkurtër do të zbardhin çështjen./abcnews.al

capokuuuuuuuu.png
ger ta14:20 | 12/01/2020

Gjykata Penale e Tiranës dha masën “arrest me burg” për Erdet Çapokun, 34-vjeçari i cili vrau kunatën e tij.

Ishte gjykatësi Llazer Sallaku ai që dha masën e sigurisë për 34-vjeçarin, i cili në pamje të parë është shfaqur i qetë në seancë.

Ndërsa në dëshminë e tij, 34-vjeçari është shprehur se nuk është në gjendje të rikujtojë atë që ka ndodhur.

Unë nuk mbaj mend në lidhje me ngjarjen qe kam kryer. Unë kam investuar për kunatën dhe mbesën por ato nuk më kanë mbështetur. Nuk jam në gjendje të rikujtoj hap pas hapi çfarë ka ndodhur”, mësohet të ketë thënë Erdet Çapoku para trupës gjykuese.

Ngjarja e rëndë ndodhi në Paskuqan në të gdhirë të së premtes. Kunati i Enkeledës hyri me dhunë në banesën e saj dhe e goditi me mjete të forta duke i shkaktuar asja plagë të rënda që sollën edhe vdekjen e 35-vjeçares.

Ai pretendon se e ruante kunatën pasi bashkëshorti i saj njëherësh i vëllai i Erdeti t’ja kishte lënë amanet./abcnews.al

aaa-11.png
ger ta13:21 | 12/01/2020

Kjo që shihni në këtë foto është Enkeleda Çapoku, gruaja që u masakrua nga kunati brenda shtepisë së saj, mesnatën e së enjtes.

Enkeleda u përcoll dje për në banesën e fundit, ndërsa autori i krimit, Erdet Çapoku ka dalë sot para trupës gjykuese.

Gruaja u masakrua nga kunati i saj me mjete të forta, ndërsa ky i fundit u arrestua disa orë pas krimit. Nga dëshmia e tij para hetuesve Çapoku është shprehur se me kunatën kishte keqkuptime, madje dyshonte se i tradhtonte të vëllanë.

Enkeleda kishte denocuar kunatin e saj, por nuk ishte pajisur me udrdhër mbrojtje nga policia. Ndërkaq, bashkëshorti i viktimës ndodhet në burg, pasi është dënuar për trafikim të lëndëve narkotike./abcnews.al

 

vrasesi.jpg
ger ta15:33 | 10/01/2020

Krimi i rëndë në familjem Çapoku mund të ishte parandaluar nëse policia do të kishte prangosur më hëret autorin e dyshuar të ngjarjes, Erdet Çapoku.

Kjo është pamja e 34-vjeçarit pak çaste pasi u prangos nga efektivët e policisë së Tiranës. Ai nuk ka bërë rezistencë, ndërsa për kapjen e tij kanë nëgociuar edhe familjarët. Pas vrasjes së kunatës së tij Enkeleda Çapoku u largua në drejtim të zonës së Laprakës me një biçikletë, duke u fshehur në një banesë.

Vetëm gjashtë muaj më parë në komisariatin nr.5., e ndjera kishte bërë kallzim penal pasi kërcënohej dhe shantazhohej nga vëllai i burrit të saj. Madje Enkeleda kishte marrë edhe urdhër të menjëhershëm të mbrojtjes por ndaj Erdetit nuk u lëshua asnjë urdhër-ndalimi. Ndërkohë bashkëshorti i të ndjerës është dënuar me 10 vite burg dhe i kanë mbetur për të kryer rreth 2 vite të tjera.

Dyshohet se një autori i ngjarjes e filmonte kunatën e tij dhe më pas e kërkcënonte se do të vinte në dijeni vëllain. Kjo ishte edhe arsyeja që Enkeleda kishte bërë denoncim në polici, pasi kërcënohej edhe në publik nga Erdeti. Ndërkohë familjarët e viktimës pohojnë se autori i vrasjes e shantazhonte Enkeledën për ti marrë para, pasi ishte edhe konsumator i lëndëve narkotike.

“Gjendja u acarua kur motra ime nuk pranonte të tërhiqte denoncimin në polici dhe kunati i saj vinte shpesh për ta kërcënuar edhe brenda në benda në saj”, -theksoi vëllia Enkeledës, Ervin Fiolla.

Shërbimi për Çështjet e Brendshme dhe Ankesave kanë nisur verifikimet për të parë praktikën e ndjekur nga komisariati nr.5., në lidhje me kallzimin penal të bërë nga viktima Enkeleda Çapoku disa muaj më parë./abcnews.al

 

snajperi.jpg
ger ta23:00 | 09/01/2020

Gazetari i Abc News, Artan Hoxha ka dhënë detaje të reja për ekzekutimin e biznesmenit Kastriot Reçi në Rreshen.

I ftuar në emisionin “Opinion”, Hoxha tha se arma e përdorur nga vrasësi për të ekzekutuar Reçin është prodhim italian dhe është përdorur gjatë luftës së Kosovës.

“Kjo lloj arme nuk është e fiksuar sipër është prodhim italian. Kjo lloj arme është përdorur në luftën Kosovës dhe nuk ka rëndësi sa kushton kjo, por se kush e përdor atë. Vrasje e ngjashme e tillë është më 3 dhjetor të vitit 2000 është vrarë Ylli Haklaj në një distancë në 250 metra, me një të shtënë”, tha Hoxha.

Sa i përket viktimës, gazetari investigativ thotë se prej kohësh ruhej dhe kishte lëvizje të pakta.

“Kastriot Reçi nuk dilte, deri para vitit të ri nuk dilte. Ky ka pas dhe vilën e vet që në një farë mënyre kontrollonte dhe nuk dilte. Shiko dhe këndin nga hyn ai aty është e mbuluar zona, ai ka rreth shoqëror dhe farefisnor shumë të madh dhe ruhej dhe e dinte shumë mirë që ishte objektiv goditje dhe mesa duket që ata që kanë bërë planin e dinin që nga afër nuk mund të afroheshin fare pasi mund të dëmtoheshin edhe vet. I gjithë cikli i vrasjeve, është vrarë Gasperi, vëllai i këtij në Romë dhe nuk e kanë gjetur dot italianët, i është vrarë nipi atij tjetrit në Belgjikë dhe nuk e kanë gjetur belgët. E kupton se në çfarë situate je, e ta gjejmë ne. Nuk është hakmarrje e thjeshtë ajo. I kishte tërhequr vëmendje policisë, por nuk ka çfarë i bën policia. E ka liruar prokurori herë tjetër, nuk i afrohej policia fare”, tha Hoxha.

Kujtojmë se policia e Lezhës ka shoqëruar disa persona dhe pasi janë marrë në pyetje, janë lënë të lirë. Po ashtu është vendosur edhe shpërblim prej 2 milionë lekësh për çdo informacion që do të çonte në kapjen ose identifikimin e autorëve./abcnews.al

droni-iran-1280x718.jpg
nev ila18:25 | 09/01/2020

Janë publikuar për herë të parë pamjet e vrasjes së gjeneralit Iranian Qasem Soleimani nga forcat amerikane në Baghdad. Telekamera ishte instaluar në dronin që kreu sulmin.

Pamjet e vrasjes së Sulejmanit, lideri i padiskutuar, i dyti pas liderit supreme Ali Khameneit, dhe shumë herë i përmendur si pasardhës i presidentit Iranian Hasan Rouhani, janë publikuar nga amerikanët.

Si në një video – lojë lufte, droni ndjek automjetet ushtarake që shoqërojnë gjeneralin dhe i godet. Disa ushtarë mbijetojnë dhe përpiqen të largohen në këmbë. Por dhe ata janë shënjestruar dhe eleminuar fizikisht.

Pjesa tjetër është kronikë e këtyre ditëve: reagimi Iranian ndaj vrasjes së ish komandantit rojeve revolucionare të Iranit, u konkretizua me një sulm me raketa ndaj bazave ushtarake amerikane në Irak. Sulejmani, u varros në qytetin e tij të lindjes Kerman./abcnews.al

vrasja-korce.jpg
nev ila18:00 | 09/01/2020

Vrasja e Altin Balliut, një vit më parë në Korçë ka përplasur Prokurorinë me Gjykatën. ABC News ka zbardhur dosjen hetimore të vrasjes. Gjykata ka vendosur që ta kthejë çështjen për rihetim pasi ka konstatuar mangësi në zbardhjen e ngjarjes.

Ndërsa familjarët pretendojnë se prokurori i çështjes po favorizon autorin e vrasjes, Olger Mustafa, duke kërkuar dënim me 20 vite burg. Vrasja e Altin Balliut në janar të 2019-së, ka përplasur Gjykatën dhe Prokurorinë e Korçës, për shkak të pretendimeve të familjarëve të viktimës dhe autorit të dyshuar.

Gjykata e Korçës ka vendosur që të kthejë për hetime të mëtejshme çështjen me argumentin se hetimet janë të paplota. Gjykata vlerëson se nuk është hetuar nga prokuroria konflikti që ka ndodhur përpara se të kryhej vrasja. Gjithashtu sipas gjykatës, nuk është bërë në mënyre të rregull transkriptimi i pamjeve filmike nga kamerat e sigurisë të bizneseve që kanë regjistruar ngjarjen.

Përplasja për këtë çështje ka nisur pas akuzës së ngritur nga Prokuroria, ndaj autorit Olger Mustafa. Prokuroria e akuzon Musten për “Vrasje me dashje”, ndërsa familjarët dhe avokati i viktimës pretendojnë se duhet të bëhet klasifikimi i akuzës në “vrasje në rrethana të tjera cilësuese ndaj dy ose më shumë personave, duke vënë në rrezik shumë njerëz”.

Sipas akuzës së prokurorisë, autori i krimit nuk mund të dënohet më shumë se 20 vite burg, ndërsa vepra penale e pretenduar nga familjarët e ka marzhin e dënimit nga 20 deri me burgim të përjetshëm.

Familjarët i kanë dërguar një ankesë Këshilli të Lartë të Prokurorisë për prokurorin Edmond Shytko, duke theksuar se ai po favorizon vrasësin e të afërmit të tyre.

Familjarët e Altin Balliut kërkojnë nga KLP që prokurori të zbatojë urdhrat e gjykatës për të rimarrë në pyetje të gjithë dëshmitarët dhe gjithashtu të zbardh me procesverbal numrat e telefonave të paidentifikuar që kanë komunikuar me autorin përpara se të kryhej krimi.

I dyshuari Olgert Mustafa u vetdorëzua në policinë e Korçes në mars të vitit të shkuar, ku ka deklaruar se është ndjerë i fyer dhe se krimin e ka kryer në gjendje të rënduar psikologjike. /abcnews.al

adoleshente-1280x720.jpg
nev ila19:50 | 08/01/2020

Pas arrestimit, tre të rinjtë, edhe pse kanë hezituar fillimisht të flasin, nuk kanë rezistuar gjatë. Nipi i burrit të viktimës, L. S., ka filluar të qajë gjatë marrjes në pyetje nga oficerët e Policisë.

Burimet njoftojnë se ai është shprehur para hetuesve se e ka frikë burgun. Ai ka arritur ta pranojë edhe krimin, duke thënë se u duheshin paratë, por çdo gjë u iku nga kontrolli pasi gruaja e kishte njohur dhe kishte nisë të bërtiste.

Neve donim vetëm të merrnim paratë. Ajo më njohu dhe filloi të bërtiste, duke na trembur se mund ta na gjente Policia brenda. Nuk e kishim menduar ta vrisnim. Na doli jashtë kontrollit situata. Ju lutem, më falni se e kam frikë burgun”, mësohet të ketë thënë për hetimin 16-vjeçari L. S.

Krimin e kanë pranuar edhe shokët e tij, bashkëpunëtorë. Edhe ata kanë thënë se nipi i familjes i ka orientuar duke u thënë se në shtëpi nuk ka njerëz, por kur kanë ndeshur në rezistencën e gruas, kanë bërë edhe lidhjen e saj dhe më pas vrasjen dhe hedhjen në rezervuar.

Sipas informacioneve të grupit hetimor, gjendja e tyre psikologjike është mjaft e rëndë, ndërsa gjatë gjithë kohës 16-vjeçari, i cili është edhe nipi i burrit të viktimës, ka qenë duke qarë. Pas zbardhjes së krimit të rëndë, në Polici janë shoqëruar edhe familjarët e viktimës dhe autorëve të dyshuar.

Të afërmit e 50-vjeçares që bënë edhe denoncimin mëngjesin e djeshëm për zhdukjen e saj, kanë hedhur akuza të rënda ndaj të rinjve. Ata janë shprehur se autorët duhet të vuajnë dënimin më të rëndë për veprimin që kanë kryer. Ndërkohë, familjarët e autorëve janë pyetur nëse kanë pasur dijeni rreth veprimeve të të rinjve.

Po ashtu, ata mësohet të jenë shprehur se ditët e fundit i mituri ka qenë mjaft i heshtur dhe rrinte i menduar. Por kjo nuk i ka shtyrë ata që ta pyesnin se çfarë kishte ndodhur me të. Ngjarja ka ndodhur më 5 janar, ndërsa Policia bëri me dije se janë arrestuar tre persona për vrasjen, nipin e burrit të viktimës dhe dy shokë të tij./abcnews.al

adoleshente-1280x720.jpg
ger ta18:15 | 08/01/2020

Ata në foton e mësipërme janë dy adoleshentët që  i morën jetën 50-vjeçares në Mallakastër, pasi u futën në banesën e saj si mysafirë.

Drita Saliaj gruaja që jetonte e vetme pasi bashkëshorti dhe djemtë punonin në Greqi në vend të mbrohej nga të afërmit u masakrua, nga i afërmi 17 vjeçari Luis Saliaj dhe dy shokët e tij.

Gazetarja Valbona Davidhi ka qënë në Gjerbës të Mallakastrës dhe ka biseduar me bashkëshortin e saj që është i tronditur dhe kërkon vetëm drejtësi.

Kjo ngjarje që ndodhi në këtë zonë të qetë ka tronditur thellë dhe banorët e fshatit dhe mikeshat e saj.

Nuk dihet ende nëse të adoleshntët e kishin planifikuar këtë ngjarje pasi kishin hyrë në banesë miqësisht kishin pirë dhe kafe, por më pas rezultoi se ata kishin qëllim të vidhnin paratë pasi kishin informacion se bashkëshorti i Dritës kishte shitur bagëtitë. Mësohet se paratë ishin depozituar në bankë dhe ata nuk i gjetën dhe morën vetëm sende me vlerës dhe  një armë gjahu të cilën nuk e vunë në përdorim.

Trupin e 50 vjecares e transportuan me një makinë benz. Autorët udhëtuan 7 km në rrugë të pakalueshme drejt rezervuarit të fshatit me qëllim zhdukjen e trupit. Mësohet se pas kthimit ata kanë plaçkitur edhe shtëpinë e kunatit të viktimës. Këto janë pamjet e banesës.

Këtë fakt e pohon dhe vetë kunati i Dritës, Mitati.

Policia po dokumenton ngjarjen pasi arrestoi autorët. Këta të fundit mësohet se kanë pranuar krimin. 17 vjeçari banonte vetëm disa metra larg shtëpisë së viktimës, po kështu dhe një prej shokëve të tij, ndërsa tjetri tek fshati fqinj.

Në mesditë Drita Saliaj u përcoll mes lotësh për në banesën e fundit./abcnews.al

 

 

 

 

 

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono