votimi

lavrov.png
ent ela22:40 | 22/10/2018

Kremlini ka kritikuar votimin pro ndryshimeve kushtetuese të mbajtur të premten në Maqedoni. Në një reagim për shtyp, qeveria ruse ka deklaruar se kuorumi parlamentar u arrit përmes shantazheve dhe kërcënimeve politike.

Moska zyrtare ka kritikuar votimin për ndryshimet kushtetuese të mbajtur javën e kaluar në Parlamentin maqedonas, duke e cilësuar atë një proces të manipuluar. “Ajo që ndodhi është një shkelje e hapur e të gjitha normave, si nga këndvështrimi ligjor ashtu dhe ai moral. Manipulime të tilla nuk mund të jenë shprehje e vullnetit parlamentar”, thuhet në një komunikatë për shtyp të Ministrisë së Jashtme ruse.

Në të theksohet se 8 votat e duhura për të arritur shumicën prej dy të tretat u siguruan përmes shantazheve, kërcënimeve dhe shit-blerjes së votës. Parlamenti maqedonas votoi të premten në mbrëmje në parim ndryshimet kushtetuese që rrjedhin nga marrëveshja e Prespës, të cilat përfshijnë edhe ndryshimin e emrit të vendit në Maqedonia e Veriut. Marrëveshja i jep zgjidhje kontestit që zgjat prej dekadash mes Greqisë dhe ish-republikës jugosllave, si dhe i hap Shkupit rrugën e anëtarësimit në NATO.

Kjo është dhe ajo që kundërshton Rusia, e cila i druhet zgjerimit të influencës së aleancës ushtarake në Ballkan. Pak muaj më parë, ambasadori rus në Shkup paralajmëroi se Maqedonia do të përballet me pasoja nëse anëtarësohet dhe lejon ngritjen e bazave ushtarake në territorin e saj./abcnews.al

THACI-DEKLARATAT-1280x671.jpg
G. P.12:05 | 20/10/2018

Listës së gjatë të urimeve për Maqedoninë pas miratimit në parlament të ndryshimeve kushtetuese në kuadër të marrëveshjes për emrin me Greqinë, i është bashkuar dhe presidenti i Kosovës Hashim Thaçi. Ky i fundit u shpreh se parlamenti i Maqedonisë dha një shembull shumë të mirë uniteti.

Presidenti i Kosovës Hashim Thaçi është shprehur i lumtur me votimin mbrëmjen e së premtes në Kuvendin e Maqedonisë për ndryshimin e emrit. Me anë të një mesazhi në profiling e tij në Facebook, kreu I shtetit kosovar u shpreh se shteti fqinj zgjodhi rrugën e integrimeve euroatlantike dhe bëri një hap të madh për forcimin e paqes në tërë rajonin.Sipas Thaçit, Kuvendi i Maqedonisë ka dhënë shembullin e bashkimit të të gjitha partive për të mirën e qytetarëve dhe shtetit të tyre.

“Maqedonia e zgjodhi rrugën e integrimeve euroatlantike dhe bëri një hap të madh për forcimin e paqes në tërë rajonin tonë. Kuvendi i Maqedonisë mbrëmë dha shembullin e bashkimit të të gjitha partive për të mirën e qytetarëve dhe shtetit të tyre. Shteti forcohet dhe integrohet kur të zgjedhurit e popullit marrin vendimet e duhura dhe tejkalojnë interesat politike për interesat shtetërore. Republika e Kosovës i gëzohet këtij vendimi shumë të rëndësishëm të shtetit tonë fqinj. Paqen dhe stabilitetin në rajon e forcojmë vetëm duke dëshmuar vendosmëri në orientimin euroatlantik dhe duke punuar shumë për integrimin në familjen evropiane”, shkruan ndër të tjera Thaçi./abcnews.al

MBULIM-ZAEV-TSIPRAS.mpg_snapshot_00.23-1280x720.jpg
G. P.10:48 | 20/10/2018

Kryeministri grek Aleksis Tsipras uroi kryeministrin Zaev për hapjen e rrugës së ndryshimeve kushtetuese ku parashikohet zgjidhja e përplasjeve shumë vjeçare mes Greqisë dhe Maqedonisë.
Me anë të një mesazhi në Tuiter ai shkruan: “Urime miku im Zoran Zaev ! Vota e sotme është një hap i madh drejt suksesit tonë të përbashkët. Një hap shumë i rëndësishëm drejt të ardhmes paqësore dhe prosperuese për qytetarët tanë”./abcnews.al

GettyImages-923478558-714x497.jpg
G. P.10:44 | 20/10/2018

Urimet për votimin në Kuvendin e Maqedonisë të nismës për ndryshime kushtetuese kanë arritur edhe nga presidenti i Këshillit Europian, Donald Tusk.
“Një votë, një hap i madh drejt afrimit të marrjes së vendit që iu takon në komunitetit tonë transatlantik”- ka shkruar Tusk në gjuhën maqedonase në llogarinë e tij të Tuiter.
Më herët reaguan dhe eurokomisioneri për zgjerimin Johanes Hahn si dhe kryediplomatja europiane Federika Mogerini, e cila nëpërmjet një deklarate në emër të BE-së thekson se kjo ishte me të vërtetë e vetmja mundësi që vendi të lëvizë në rrugën e sigurt drejt Bashkimit Evropian, si dhe qetësisë në rajon. Bashkimi Evropian do të vazhdojë të mbështesë vendin, të gjithë qytetarët e saj dhe institucionet e tij “, thuhet në deklaratë.

Pas votimit për ndryshimet kushtetuese në Maqedoni vjen edhe reagimi i Sekretarit të përgjithshëm të NATO-s Jans Stoltenberg. Ai ndërsa përshëndeti votimin në parlamentin e Maqedonisë theksoi se tani, qeveria dhe udhëheqësit politikë duhet të plotësojnë procedurat për zgjidhjen e emrit dhe të përdorin këtë mundësi historike për ta çuar vendin në NATO”, shkruan Stoltenberg në rrjetin social Tuiter./abcnews.al

MBULIM-META-RAMA-REAGIME-PER-MAQEDONINE.mpg_snapshot_00.19-1280x720.jpg
G. P.10:31 | 20/10/2018

Kreu i shtetit shqiptar, presidenti ilir Meta ka reaguar ne lidhje me votimin e mbrëmshëm në parlamentin e Maqedonisë. Në një mesazh të bërë publik në rrjetet sociale, Meta shkruan se Votimi në Kuvendin e Maqedonisë pro nismës për ndryshimet kushtetuese është një hap i rëndësishëm, shprese e besimi se procesi i anëtarësimit të Maqedonisë në NATO dhe BE është në rrugën e duhur.
Kreu i shtetit përgëzoi qeverinë e Kryeministrit Zaev për përpjekjet e vendosura në këtë drejtim dhe të gjithë ligjvënësit e Kuvendit të Maqedonisë për mbështetjen e një procesi që jo vetëm çliron Maqedoninë nga një ngërç integrimi disa vjeçar, por ndikon edhe në sigurinë, stabilitetin e mirëqenien e rajonit tonë.

Edhe Kryeministri shqiptar Edi Rama ka reaguar menjëherë pas këtij votimi që i hapi udhë ndryshimeve kushtetuese, për të proceduar më pas me miratimin e ndryshimit të emrit në Republikën e Maqedonisë Veriore. Në një postim në rrjetin social Twitter, Rama uroi për “lindjen” e kësaj republike të re si dhe kryeministrin Zoran Zaev dhe të gjithë ata që punuan për të arritur këtë sukses.
“Gëzuar ditëlindjen Republika e Maqedonisë Veriore. Urime të përzemërta kryeministrit Zoran Zaev dhe të gjithë atyre që luftuan për këtë moment historik. Një derë e re e të ardhmes u hap për dy popujt tanë në Republikën e Maqedonisë Veriore”, shkroi kreu i ekzekutivit shqiptar në Twitter./abcnews.al

MAQEDONI-FUSHATA-1280x720.jpg
G. P.18:15 | 15/10/2018

Në seancën e diskutimit të ndryshimeve kushtetuese që rrjedhin nga marrëveshja e Prespës, kryeministri Zoran Zaev i ka bërë thirrje opozitës që të marrë parasysh të ardhmen e gjeneratave të reja dhe të lërë mënjanë dallimet politike.

“Është koha që t’i lëmë mënjanë lojërat politike dhe ta çojmë përpara interesin tonë të përbashkët”, ka thënë Zaev.

Kreu i qeverisë u ka kërkuar deputetëve të opozitës të veprojnë edhe në mënyrë individuale nëse shohin se partitë ku aderojnë nuk ndryshojnë qëndrim për një gjë kaq të rëndësishme.

Ndër të tjera, Zaev është shprehur i gatshëm të falë përgjegjësit e ngjarjes së 27 prillit, kur deputetët e VMRO-DPMNE-së sulmuan kolegët dhe vetë kryeministrin në Parlament për të penguar ardhjen e tij në pushtet.

“Ky është momenti i duhur kur për të mbështetur të ardhmen e Maqedonisë dhe atë të fëmijëve tanë duhet të falim dhe të pajtohemi”, ka vijuar Zaev.

Zaev është shprehur i vetëdijshëm se një gjë e tillë do të ketë një çmim politik, por ka shtuar se është i gatshëm ta paguajë atë./abcnews.al

SINKRONE-MAQEDONI.mpg_snapshot_00.42-1280x720.jpg
G. P.18:05 | 30/09/2018

Pjesëmarrja në referendumin për emrin kushtetues të Maqedonisë ka qenë relativisht e ulët. Nga të dhënat e fundit të komunikuara nga Komisioni Shtetëror i Zgjedhjeve, deri në orën 17:00 ka votuar vetëm 28.83 për qind e popullsisë, kuotë që e përkthyer në shifra i bie 455 mijë qytetarë nga mbi 1 milion e 800 mijë me të drejtë vote.

Në mënyrë që referendumi të konsiderohet i vlefshëm duhet që në procesin e votimit të kenë marrë pjesë mbi 50 për qind e qytetarëve. Qendrat zgjedhore mbyllen në orën 19. Procesi i votimit monitorohet nga rreth 12 mijë vëzhgues vendas dhe 493 të huaj.

Deri në orët e pasdites gjithçka ka kaluar qetë dhe pa incidente. Komunat me numrin më të lartë të votuesve kanë qenë ajo e Sarajit, ajo e Qendrës dhe e Karposhti.

Në komunat me shumicë shqiptare pjesëmarrja ka qenë lehtësisht më e ulët. Deri në orën 15, pjesëmarrja në proces ka qenë 36% në Tetovë, 20 për qind në Gostivar, 22 për qind në Kumanovë dhe 20 për qind në Strugë./abcnews.al

SEANCA-DIALOGU-1280x720.jpg
ent ela18:47 | 05/09/2018

Përsëri dështoi seanca e qeverisë dhe opozitës në Kosovës lidhur me ekipin negociator që do të marrë pjesë në dialogun me Serbinë në Bruksel. Dështimet ndodhën për shkak të mungesës së kuorumit. Në këtë situatë, kryeparlamentari Veseli tha se vazhdimi i seancës do të bëhet të enjten.

Kuvendi i Kosovës po kalon një periudhë krize të rëndë pasi nuk arrin të përmbyllë punimet në seancat e thirrura si nga qeveria ashtu edhe nga opozita. Edhe të mërkurën dështoi seanca e jashtëzakonshme parlamentare për ekipin e dialogut që përfaqëson Kosovën në bisedimet me Serbinë në Bruksel. Pasi u tentua disa herë, kryetari i Kuvendit Kadri Veseli njoftoi se votimi për këtë ekip të prezantuar nga kryeministri Ramush Haradinaj nuk do të zhvillohet pasi mungon kuorumi i nevojshëm.

Nga ana tjetër, veseli njoftoi se gjatë mbrëmjes të së mërkurës do të mbahej seanca e kërkuar nga opozita. Megjithëse u tentua dy herë, edhe deputetët e opozitës nuk ia dolën të grumbullonin 61 deputetë në sallë. Përpjekjet e tyre treguan shumë lidhur me situatën politike në të cilën gjëndet vendi. Nisma për Kosovën, që bën pjesë në koalicionin qeveritar vendosi të marrë pjesë në seancën e opozitës, duke dërguar një mesazh të qartë, që qeveria është tepër e brishtë.

Ndërkohë, në këtë seancë, opozita kërkon miratimin e një rezolute që ndalon presidentin Hashim Thaçi të marrë pjesë në dialogun me Serbinë. Kjo nismë erdhi pasi kreu i shtetit mbështeti korrigjimin e kufijve, më saktësisht u përfol se Presheva, Bujanoci dhe Medvegja do t’i bashkohen Kosovës dhe në këmbim edhe Serbia do të përfitonte diçka./abcnews.al

VOTIM-PARLAMENTI-1280x720.jpg
ent ela13:36 | 10/05/2018

Pas fjalës së kryeministrit Rama në Kuvend, deputetët e mazhorancës të pranishëm në sallë, nuk kanë vijuar me diskutimet për pikat e rendit të ditës por me propozim të kryetarit të grupit Taulant Balla kanë kaluar në votim.

Me 76 vota pro u miratuan raportet e veprimtarisë vjetore të Komisionerit për Mbikqyrjen e Shërbimit Civil, të Departamentit të Administratës Publike e të Institutit të Studimeve për Krimet dhe Pasojat e Komunizmit.

Me 75 vota të mazhorancës janë miratuar ndryshimet në projektligjin “Për pafajësinë, amnistinë dhe rehabilitimin e ish-të dënuarve dhe të përndjekurve politikë”,  si dhe projektligjet për kornizën shqiptare të kualifikimeve e atë mbi kontabilitetin e pasqyrat financiare.

Ky proces zgjati 15 minuta dhe në orën 13.00, seanca përfundoi. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono