Vllaznia

gilman-lika-alban-hasani-1280x720.jpg
ent ela18:04 | 10/02/2019

Polemika të ashpra kanë tronditur Vllazninë e Shkodrës. Ka akuza mes drejtorit të akademisë dhe kapitenit të skuadrës. nNuk mjafton eleminimi në Kupë dhe rreziku në kampionat.

Vllaznia është e detyruar të përballet edhe me një polemikë të brendshme mes drejtorit teknik të Akademisë, Alban Hasani, dhe kapitenit të skuadrës së të rriturve, Gilman Lika.

Nisur që më 4 shkurt me kritikat e Hasanit ndaj ekipit dhe trajnerit Lika, kjo polemikë rrezikon të dëmtojë në mënyrë të pandreqshme sezonin e shkodranëve.

Hasani ka deklaruar se lojtarët nuk po luajnë siç duhet dhe se duhet të ketë masa ndaj tyre, ndërsa Lika i është përgjigjur duke i thënë se kritikat i presin nga njerëzit e sportit, jo nga ata që vijnë nga jashtë futbollit.

Drejtori i sotëm teknik i Vllaznisë ka qenë njeri I futbollit, por Lika e akuzon për lidhje me politikën, ndërsa burime pranë klubit shtojnë se bëhet fjalë edhe për lidhje të tjera, jashtë partive.

Akuzat janë bërë edhe më të rënda pasi të dy e kanë akuzuar njëri-tjetrin si njerëz që punojnë kundër interesave të Vllaznisë.

Është hera e parë që ndodh një konflikt i tillë brenda një klubi, që nga vjeshta e vitit 2017, kur Sulejman Starova, këshilltari i presidentit të Partizanit Demi, sulmoi ish-trajnerin Iuliano dhe ish-drejtuesin Luçiano Moxhi, se kishin dështuar në projektin e tyre.

Partizani vjet rrezikoi të mbetej jashtë Europës, ndërsa nuk luftoi dot për titull, edhe pse u formua me pretendime të mëdha, ndërsa këtë vit, pa asnjë polemikë të brendshme, është në krye të renditjes.

Tek Vllaznia, ndërkaq, duket se klubi nuk po reagon për të mbyllur këtë polemikë, dhe burime në Shkodër bëjnë me dijë se kjo ndodh sepse Bashkia nuk interesohet, pra klubi nuk ka drejtues që të vendosin harmoninë.

Skuadra e drejtuar nga trajneri Hasan Lika është në krye të Kategorisë së Parë, por u eleminua nga Kupa e Shqipërisë pas humbjes me Kamzën, si dhe ka konkurrencën e Erzenit të Shijakut në përpjekjen për t’u rikthyer në Superligë./abcnews.al

penalltia.jpg
G. P.14:15 | 07/02/2019

Polemika dhe dyshime pas ndeshjeve të Kupës së Shqipërisë. Trajneri i Flamurtarit, Daja, akuzon arbitrin, ndërsa Kamza luajti me formacion të plotë ndaj Vllaznisë, ndryshe nga takimi me Partizanin.

Kësaj skuadre i ndodh shpesh, madje jo vetëm në Superligë. Flamurtari pati pretendime të mëdha ndaj gjykimit të Laver Allës në ndeshjen e Kupës së Shqipërisë ndaj Tiranës, duel që e fitoi, por pas të cilit u eleminua.

Vlonjatët u acaruan shumë për një penallti që menduan se duhej t’u jepej në minutën e tretë shtesë, por arbitri nuk sinjalizoi. Pamjet filmike të bëjnë të besosh se ishte me të vërtetë ndërhyrje e gabuar në zonë ndaj lojtarit vendas. Gjithsesi, trajneri Daja, nuk u mor shumë me këtë rast, por me arbitrimin në përgjithësi.

Nuk mbetën pas futbollistët e tij dhe ja reagimi në Instagram i Emiljano Mustës.

“Fluturo, fluturo Laver Alla”, – ishte postimi it tij, ndërsa pranë mesazhit ishte një tufë me dollarë. Trajneri i Tiranës, Ardian Mema, nuk e hodhi poshtë mundësinë që për vlonjatët mund të ishte dhënë penallti.

Gjithsesi, polemikat dhe dyshimet nuk ishin vetëm për sfidën e Vlorës. Kamza u kualifikua ndaj Vllaznisë me fitoren 1-0, duke luajtur me formacion të plotë, vetëm pak ditë pasi shumë lojtar bojkotuan ndeshjen e kampionatit ndaj Partizanit.

Kjo ndeshje u sulmua ashpër nga emri i njohur i futbollit shkodran dhe shqiptar, Edi Martini, në emisionin “Presing”, në Abc News. Të shtunën, Kamza u mund 0-1 nga Partizani, ndërsa lojtarët u shprehën se bojkotuan për shkak të vonesës së rrogave, me një rrogë që thuhet se u ndaj para takimit ndaj Vllaznisë./abcnews.al

lorenc-trashi.jpg
G. P.16:26 | 20/12/2018

Lorenc Trashi i Partizanit dhe Megi Doçi e Vllaznisë, u shpallën më të mirët e vitit 2018 në futbollin shqiptar. Federata ndau edhe disa çmime për figura të këtij sporti në Shqipëri.

Sakrifica e tyre nuk shkoi kot. Lorenc Trashi i Partizanit dhe Megi Doçi e Vllaznisë, u shpallën më të mirët e futbollit shqiptar për vitin 2018, për meshkuj e femra. Trashi, padyshim një nga lojtarë më të mirë të kryeqytetasve, po jep kontribut në përmbushjen e ëndrrës së tifozëve për të fituar titullin kampion pas më shumë se çerek shekulli.

“Unë shpresoj që meqë e nisa kampionatin me një trofe, ta përmbyll me një trofe në fund. Kjo do ishte perfekte. Kampionati do jetë shuëm  ashpër këto dy faza që kanë ngelur dhe do fitoj në fund ekipi që do bëjë më pak gabime”, tha Trashi.

Nëse për Trashin kishte kuptim rivaliteti, kjo nuk mund të thuhej për Megi Doçin. Sulmuesja e re e Vllaznisë shënon kaq shumë gola, ndërsa vesh edhe fanelën e kombëtares, saqë nuk lë vend për diskutim.

“Ndihem shumë e kënaqur sepse është një çmim që jepet për herë të parë, por është meritë e gjithë ekipit dhe stafit që më kanë ndihmuar që të jap një performancë shumë të mirë në fushën e lojës dhe të shënoj sa më shumë gola”, tha Doçi.

Në mbrëmjen e ndarjes së çmimeve, presidenti i Federatës Shqiptare të Futbollit, Armand Duka, deshi t’i jepte një çmim edhe institucionit të tij, për investimet në infrastrukturë.

“Punimet drejt përfundimit të stadiumit kombëtar, fillimin e projektit të madh të shtëpisë së futbollit një kompleks, i cili do pranojë për ç’do lloj aktiviteti të futbollit shqiptar, jo vetëm për zyrat, por për çdo ambient ndihëm për ekipet shqiptare. Ambient ndihmës të stadiumit të Kukësi”, tha Duka.

U vlerësuan me çmimin Nderi i futbollit shqiptar, lojtarë të së kaluarës si Perlat Musta, Agim Canaj, Genc Tomori, Osman Mema, Qamil Teliti (pas vdekjes) dhe Edvin Murati./abcnews.al

hasan-likaa.png
G. P.18:52 | 17/10/2018

Vllaznia ka një provë të fortë këtë fundjavë. Do të ndeshet në Shkodër me Erzenin e Shijakut, dhe trajneri Lika premton maksimumin për ta kaluar me sukses edhe këtë ndeshje.

Pesë fitore radhazi janë sukses edhe në Kategorinë e Parë.

Vllaznia përgatitet për të gjashtën, ndërsa këtë fundjavë luan ndaj Erzenit në Shkodër, ndërsa trajneri Hasan Lika po i jep dorën e fundit përgatitjeve.

Flitet për një ndeshje rivalësh, pasi nëse shkodranët janë në vend të parë, shijakasit ndodhen të tretët.

“Ne po përgatitemi ashtu siç përgatitemi çdo ndeshje. E dimë që kemi një kundërshtar të fortë përballë, i cili ka arritur rezultate pozitive dhe ka futbollistë cilësorë”, tha Lika.

Ndërprerja e kampionatit, për shkak të kombëtares, ndoshta i ka pëlqyer Likës, që ka pasur më shumë kohë për të punuar.

Presioni në Kategorinë e Parë nuk është aq i madh sa në Superligë, por tepër e fortë është trysnia e publikut për t’u rikthyer në elitë.

Lika premton vetëm diçka.

“Stërvitemi që çdo ndeshje ta kalojmë me sukses dhe në radhë të parë duam fitoeren në fushën tonë dhe jashtë”, u shpreh Lika.

Konkurrenca është më e madhe pas ardhjes së një sulmuesi nigerian, ndërsa në ekip është edhe një sulmues brazilian, por edhe lojtarë vendas./abcnews.al

partizaan.jpg
ent ela20:45 | 02/09/2018

Partizani vërtet arriti fitoren e dytë radhazi në Superligë, por ende nuk po i kënaq tifozët. Trajneri Gega kërkon kohë, ndërsa projekti i klubit kryeqytetas është i bazuar tek lojtarët e rinj.

Humbja e fillimit tashmë mund të quhet e lënë pas.

Partizani arriti fitoren e dytë radhazi në Superligë, duke iu afruar maksimalisht kreut të tabelës.

Gjithsesi, ndaj Kastriotit u shënua sërish vetëm 1 gol, ashtu si në suksesin në Kamzë, ndërsa kryeqytetasit vazhdojnë sëmundjen e vjetshme, duke pasur më shumë pikë e ndeshje të luajtura sesa gola.

Trajneri Skënder Gega e shprehu shqetësimin e tij pas takimit, duke thënë se një pjesë të dytë si ajo ndaj krutanëve nuk dëshiron ta shikojë më.

E njëjta gjë siç ndodhi me Kamzën, por me ndryshimin që e dobët ishte pjesa e parë, ndërsa pas pushimit të kuqtë luajtën shumë më mirë.

Përse këto luhatje tek Partizani?

Besohet se kjo po ndodh kryesisht sepse ekipi ka shumë ndryshime në krahasim me vjet, duke nisur me trajnerin, e duke vazhduar me lojtarët.

Po ashtu, mund të ndikojë mosha tepër e re, me shumë futbollistë nga 18 deri në 23 vjeç.

Të tillë janë Gojkoviç, Hebaj, Asani, Bardhi apo Mala.

Gega ka vendosur të bazohet tek të rinjtë, për të pasur një ekip fitues për shumë vjet.

Shembujt më të mirë ishin largimi i Gerhard Prognit, njërit prej shënuesve më të mirë vjet, dhe afrimi nga Vllaznia i Eraldo Çinarit, 21-vjeçar.

Për sulmuesin shkodran, kryeqytetasit paguan 60.000 euro, sipas burimeve në klub, duke ia dalë në momentet e fundit.

Të kuqtë donin edhe shkodranin tjetër, Krymin, për të cilin interesohej edhe Skënderbeu, por që mbeti tek Vllaznia.

Gega ka në ekip lojtarë shumë të mirë si Belicën, Trashin, Gojkoviçin apo Telushin, autorin e golit ndaj Kamzës, por besohet do t’i duhet kohë për të krijuar ekipin e duhur.

Gjithsesi, e rëndësishme është që tek Partizani nuk ka probleme të brendshme, ndonëse flitet se ka ende ndërhyrje.

Dyshja Gazmend Demi-Olsi Rama mesa duket po krijon një ambient të qetë, që ta lejojë trajnerin të punojë siç duhet./abcnews.al

VLLAZNIA-MIQESORJA-E-PARE-1280x720.jpg
ent ela12:19 | 27/08/2018

Vllaznia barazon me Veleçikun në miqësoren e parë, nën drejtimin e trajnerit Hasan Lika. Gjithsesi, klubi nuk kishte mundur t’i siguronte lojtarëve ujin e pijshëm për këtë ndeshje.

Më shumë se miqësorja ndaj Veleçikut, tërhoqi vëmendjen diçka tjetër. Skena e lojtarëve të Vllaznisë, duke mbajtur radhë për të pirë ujë, në një tub plastik, që shërbente për të vaditur barin e fushës.

Klubi më i vjetër në Shqipëri, 9 herë kampion i vendit, pavarësisht se sot në Kategorinë e Parë, nuk kishte siguar as furnizimin me ujë të skuadrës.

Flitet për Vllazninë që, sipas anëtarëve të këshillit bashkiak, pati mbi 1 miliardë lekë të vjetër buxhet nga pushteti vendor. Në fushën e lojës nuk mund të pritej shumë, pasi ishte fillimi.

Vllaznia e Veleçiku i Koplikut e mbyllën në barazim 1-1, por trajneri i shkodranëve, Hasan Lika, nuk e bëri dramë.

Lika: Kërkon të foksuohemi në fushë me impenjmin, me dëshirën, rezultati nuk na kënaq, sepse duhet ta kishim fituar ndeshjen dhe javën që vjen do të planifikojmë që të bëjmë deri të shtunën dy ndeshje miqësore.

Drejtori teknik, Firat, është shprehur se kjo Vllazni del kampione me këtë ekip. Lika flet pak më ndryshe.

Lika: Shumë lojtarë të Vllaznisë janë larguar, nuk është e kollajtë që të zëvendësohen. Është fortë , jo e  frikshme. Pamë edhe ndeshjen e sotme ka lojtarë

Trajneri i Veleçikut, Besnik Duli, ishte padyshim i kënaqur.

Duli: Do isha i kënaq edhe me humb 2,3-0 me vllazninë. Ekipi i Vllaznisë e drejtoi pjesën e parë triumfoi mbi ne mbi të gjitha drejtimet, pavarësisht rezultatit minimal 1-0. Ekipi ynë u mbrojt më shumë. Ne jemi një ekip që vijmë nga kategoria e dytë dhe pretendojme me ndenj në këtë kategori. /abcnews.al

HASAN-LIKA-NIS-PUNEN-TEK-VLLAZNIA-1280x720.jpg
ent ela22:56 | 14/08/2018

Hasan Lika nisi punën si trajner i Vllaznizë. Tekniku tiranas foli për objektivat, fazën përgatitore dhe përforcimet e mundshme për skuadrën shkodrane.

Mbërriti thjesht, ashtu siç ka edhe natyrën.

Hasan Lika u rikthye në Shkodër pas 9 vitesh, për t’u bërë përsëri trajner i Vllaznisë.

Fillimisht, ai u takua me lojtarët, me ata që do të përpiqet të arrijë suksesin këtë edicion.

Më pas një prezantim i thjeshtë, por i qartë përpara mediave, pra përpara gjithë publikut shkodran, duke deklaruar objektivin.

Besohet se trajneri me përvojë do të mbajë të gjithë lojtarët, por a do të jetë nevoja për përforcime?

Vllaznia nuk ka pasur një fazë përgatitore deri tani, a planifikohet të zhvillohet një e tillë jashtë vendit?

Lika, trajner i njohur me Partizanin, Teutën, Kukësin apo Luftëtarin, sa për të përmendur disa momente të karrierës, do të ketë ndihmës nga Shkodra.

Ai u shpreh se emri i Vllaznisë ishte arsyeja kryesore që kërkoi të ishte trajner I saj, edhe pse këtë sezon do të luajë në Kategorinë e Parë. /abcnews.al

HASAN-LIKA-TRAJNER-I-VLLAZNISE.mpg_snapshot_00.20-1280x720.jpg
G. P.16:35 | 12/08/2018

Vllaznia e caktoi më në fund trajnerin e saj të ri. Hasan Lika ishte kandidatura fituese pas një gare me konkurrencë të fortë.

Enigma u zgjidh dhe drejtuesit vendosën. Vllaznia e gjeti trajnerin e ri dhe ai nuk është aspak një emër i ri e i panjohur në futbollin shqiptar, përkundrazi, quhet Hasan Lika. Specialisti tiranas kishte kohë që përflitej si i përzgjedhuri i shkodranëve, dhe u konfirmua nga klubi, pas një procesi me konkurrencë të fortë, me rivalë të tillë si Edi Martinin, Dervish Haxhiosmanoviçin apo turkun Ergin Firat.

Ky i fundit u emërua në postin e drejtorit teknik, bazuar në përvojën e gjatë me klube në Iran, Turqi, Shtetet e Bashkuara apo Gjermani.
Lika pritet të prezantohet këtë fillim jave dhe të nisë punën menjëherë, pasi Vllaznia duhet të jetë gati për nisjen e kampionatit të Kategorisë së Parë, që bëhet në 9 shtator.

Hasan Lika drejtoi Luftëtarin në pjesën më të madhe të vitit të kaluar sportiv, duke dhënë futboll spektakolar e duke i kualifikuar gjirokastritët në Ligën e Europës, për herë të parë në historinë e tyre. Vllaznia, ndërkaq, skuadra më e vjetër në Shqipëri, u rrëzua nga Superliga në përfundim të edicionit të vjetshëm, duke shkaktuar një tronditje të madhe, të ngjashme me atë të Tiranës një vit më parë.

E drejtuar nga trajnerë të njohur si Ernest Gjoka e më parë nga Armando Cungu, Vllaznia nuk ia doli të kapërcente problemet që, sipas shumë analistëve, erdhën nga zotërimi i aksioneve prej Bashkosë së Shkodrës. Klubi besohet se është në proces privatizimi, por deri tani nuk ka ndodhur asgjë./abcnews.al

hasan-lika.jpg
G. P.16:15 | 22/07/2018

Vllaznia e ka gjetur trajnerin për sezonin e ardhshëm. Në stol do të ulet i njohuri, Hasan Lika, që ka pranuar ta drejtojë ekipin në Kategorinë e Parë.

Detyra e re do të jetë prestigjioze, pavarësisht kategorisë. Hasan Lika ka zgjedhur Vllazninë për ta drejtuar sezonin e ardhshëm, po ashtu shkodranët janë bindur se tekniku tiranas do të ishte mundësia më e mirë.

Skuadra nga Shkodra u rrëzua në Kategorinë e Parë në fund të sezonit të kaluar, një dramë e vërtetë, veçse synimi është për të kopjuar Tiranën e për t’u kthyer shpejt në Superligë.

Lika e ka pohuar vetë arritjen e marrëveshjes, ndërsa pritet vetëm fillimi i punës.

Sezonin e kaluar, ai drejtoi me sukses Luftëtarin, duke e kualifikuar për në Ligën e Europës për herë të parë në histori, e duke dhënë një futboll të nivelit të lartë.

Në mënyrë të habitshme, Likës nuk iu rinovua kontrata për sezonin në vazhdim.

Vllaznia pati edhe vjet një trajner nga Tirana, Ernest Gjokën, që zëvendësoi Armando Cungun e dorëhequr, por nuk qe e mundur që skuadra më e vjetrër e futbollit shqiptar të mbijetonte në Superligë./abcnews.al

shkodra.jpg
G. P.19:20 | 24/05/2018

 Në qytetin e Shkodrës mbizotëron heshtja. Të trishtuar nga rënia e Vllaznisë në kategorinë e parë, qytetarë dhe tifozë e kanë të vështirë të gjejnë fjalë për të përshkruar gjendjen e tyre.

“Më keq nuk ka. Më vjen keq për Superioren se s’ka kuptim Superiorja pa Vllazninë, pa Shkodrën”.

Në Shkodër të gjithë e kanë mendjen tek Vllaznia, por të paktë janë ata që gjejnë fjalë për t’u shprehur. Trishtimi është shumë i madh për rënien e skuadrës së futbollit në Kategorinë e Parë. Në raste të tilla, përgjegjës janë të gjithë.

“Ditë zie. Fajtorë janë këta të godna në krajët të djathtë që është fajtori kryesor. Futbollistat, që pas ndeshjes as fanelat nuk i lajnë sepse nuk djerësiten, menaxhimi dhe ne tifozët, që nuk protestojmë”.

Stadiumi ‘Loro Boriçi’ do të shohë ndeshje, por të paktën për një sezon aty nuk do të luhen përballje mes skuadrave më të mëdha shqiptare.

Edhe ata që nuk e kanë ndjekur me fanatizëm skuadrën shkodrane, mund ta përkufizojnë mjaft mirë situatën e Vllaznisë.

“Ditur s’ka patur këpucë për të luajtur, por ka patur lojtarë. Sot ka plot këpucë, por nuk ka lojtarë”./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono