Vllaznia

teuta-vllaznia.jpg
Vladimir Prenga11:14 | 20/09/2019

Në një stadium si “Loro Boriçi” të boshatisur, Vllaznia do të kërkojë të rikthehet te fitorja. Shkodranët presin të dielën Luftëtarin dhe trajneri Mirsad Jonuz do të duhet të rreshtojë një skuadër konkurruese. Marrja e tre pikëve ndaj gjirokastriteve shikohet si detyrim.

Sa i takon grupit të lojtarëve, Vllaznia do të ketë mungesa. Mesfushori Ardit Krymi, për shkak dëmtimi nuk e ndihmoi dot skuadrën e tij në transfertën me Teutën dhe pritet që edhe ndaj Luftëtarit të mungojë. Sigurisht që ky nuk është një lajm i mirë për Jonuz.

Veç Krymit, një tjetër lojtar që nuk mund të aktivizohet ndaj bluzinjve është edhe mesfushori Behar Ramadani. Shkodrani, i cili ka qenë kapiten te Luftëtari, u ndëshkua me karton të kuq ndaj Teutës dhe këtë javë do të qëndrojë pushim. Trajneri Jonuz duhet të gjejë zgjidhjen për qendrën e mesfushës. /abcnews.al

shenkolli-Tirana.jpg
Vladimir Prenga09:05 | 19/09/2019

Dita e djeshme pa në fushë të gjitha ekipet e Superiores dhe të Kategorisë së Parë, pasi u zhvilluan takimet e turit të parë të Kupës së Shqipërisë. Këtë vit munguan goleadat e frikshme, siç ka ndodhur në të shkuarën. Bylisi ishte ekipi që regjistroi fitoren më të thellë, 4-1, kundër Pogradecit në transfertë.

Katër gola shënoi edhe Skënderbeu ndaj Devollit, por korçarët e kanë pësuar një. Partizani, Teuta dhe Kukësi i kaluan me sukses ndeshjet e para. Të kuqtë thyen Vorën me rezultatin 3-0, Kukësi 3-1 mposhti Shkumbinin, ndërsa Teuta triumfoi në Pukë ndaj Tërbunit me shifrat 0-2. Dje pati edhe surpriza.

Laçi nuk ia doli të shënojë në portën e Elbasanit, në një ndeshje ku Starova kishte lënë pushim titullarët. Barazoi pa gola edhe Tirana, që ishte vënë përballë Shënkollit. Nga ekipet e Superiores u mposht vetëm Flamurtari. Vlonjatët u thyen 3-2 nga Veleçiku në Shkodër dhe ky ishte rezultati më i papritur.

Vllaznia dhe Luftëtari festuan fitoren minimale 1-0 në transferta, respektivisht ndaj Burrelit dhe Turbinës. Gjirokastritët iu falën një goli të Filit me penallti, ndërkohë që cërrikasit kanë shfaqur pakënaqësi për gjykimin. Sa i takon Vllaznisë, shkodranët triumfuan ndaj Burrelit me një gol të çuditshëm të Wenderson.

GRUPI A
Vora-Partizani 0-3
Tërbuni-Teuta 0-2
Veleçiku-Flamurtari 3-2
Shënkolli-Tirana 0-0
Iliria-Kastrioti 2-1
Burreli-Vllaznia 0-1
Erzeni-Dinamo 3-0
Korabi-Besëlidhja 2-1

GRUPI B
Shkumbini-Kukësi 1-3
Devolli-Skënderbeu 1-4
Elbasani-Laçi 0-0
Turbina-Luftëtari 0-1
Apolonia-Kamza (nuk u zhvillua)
Pogradeci-Bylis 0-4
Egnatia-Besa 0-1
Lushnja-Oriku 2-1

Goli i shënuar nga braziliani Wenderson, pamjet ShkodraSport.com

mirsid-jonuz.jpg
G. P.15:45 | 13/09/2019

Trajneri i skuadrës së Vllaznisë, Mirsad Jonuz beson në një rezultat pozitiv në transfertën e Teutës dhe zbulon se grupi i lojtareve nuk është i plotë.

Trajneri i Vllaznisë, Mirsad Jonuz është optimist për duelin ndaj Teutës dhe beson se skuadra që ai drejton do të marrë pikë në Durrës. Kreu i pankinës së shkodranëve zbulon se në radhët e Vllaznisë ka disa mungesa.

“Mund të them që skuadra është gati. Kemi pasur shtatë ditë kohë që të punojmë fort. Luajtëm edhe një ndeshje miqësore. Pas këtij takimi disa lojtarë janë dëmtuar. Të shohim se si është situata me lojtarët e rinj dhe më pas do të vendosim. Krymi dhe Gligorov nuk do të jenë gati. Edhe Emerson ka shqetësime dhe do të vendosim në stërvitjen e fundit. Jemi ndeshur me Teutën në Korçë në një ndeshje miqësore dhe i njohim çfarë skuadre janë. Do të jetë një ndeshje shumë e fortë dhe ne si skuadër do të japim maksimumin. Kemi disa dyshime sa i përket formacionit titullar që do të zbres në fushë. Jam i kënaqur nga lojtarët për atë që kanë treguar në tre ndeshjet e para. Gjatë kësaj periudhe kemi punuar me aspektin psikologjik me lojtarët. Fitorja ndaj Teutës do të ishte një plus shumë i madh për skuadrën”.

Pas tre takimeve të para Vllaznia renditet në vendin e shtatë në kuotën e 4 pikëve./ABC News Albania 24/7

protesta-paga.jpg
G. P.13:37 | 12/09/2019

Punonjësit e klubit të futbollit të Vllaznisë së Shkodrës dalin në protestë për vonesën e pagave. Ata fajësojnë politikën dhe deklarojnë se kanë 5 muaj pa u paguar.

Janë jo pak, por 30 njerëz. Punonjës të klubit të futbollit të Vllaznisë së Shkodrës, që nuk kanë dalë të bëjnë punën e tyre të përditshme, por të protestojnë për rrogat. Ata dolën në fushën sportive “Reshit Rusi” dhe me ta ishin edhe trajnerë të akademisë së klubit. Njëri nga punonjësit tregon situatën.

“Ne as kërkojmë rroga shtesë, as kërkojmë vjetërsi pune, kërkojmë atë rrogë minimumin që nuk e ka kurrkush në Shkodër dhe atë nuk na e japin. Këtu ka njerëz që janë për bukë të thatë nuk kanë me ça me paguar drita, ujë”, tha ai.

Në protestë, edhe Bashkimi i Sindikatave të Pavarura të Shqipërisë, me kryetarin e tij për Shkodrën, Albert Tukën.

“Për shkak të ngatërresave politike primitive këta punonjës janë penalizuar dhe kanë 5 muaj pa paga. Pa përmendur sigurimet shoqërore, sigurimet shëndetësore, puna jashtë orarit, ditët e shtuna e të diela që dalin në punë. I bëj thirrje institucionit të perfektit që të ndërhyjë urgjent që të zhbllokojë fondin e pagave për këta punonjës”, tha ai.

Tuka pyetet për afatin që presin prefektin dhe për hapat e mëtejshëm.

“Pas vendimit që do marrin këta do u delegohet institucioneve që kanë në varësi zgjedhjen e këtij problemi”, tha Tuka./ABC News Albania 24/7

VLLAZNIA-HUMBET-BE-CHAMPIONS.mpg_snapshot_00.03-1280x720.jpg
ent ela21:34 | 11/09/2019

Skuadra e Vllaznisë për femra humbi me rezultatin 1-0 ndaj danezëve te Fortuna në sfidën e vlefshme për fazën me eleminim direkt në Champions League

Skuadra e Vllaznisë për femra nuk ia doli të marrë një rezultat pozitiv përballë danezëve të Fortuna në ndeshjen e fazës me eleminim direkt në Champions League. Fatet e takimit u vendosën nga një penallti në pjesën e dytë të lojës.

Vllaznia zhvilloi në ndeshje mjaft të mirë, por mungoi finalizimi për gol. Skuadra shkodrane humbet një rast të pastër në minutën e 10 me topin që përfundon jashtë kuadratit. Reagojnë miqtë vetëm katër minuta më pas, por shtylla shpëton vllazninë. Loja është tepër e balancuar dhe skuadrat tregohen të kujdesshme. Në minuten e ‘24 Vllaznia ndihmohet sërish nga fati pasi danezët ndalen nga shtylla.

Në pjesën e dytë miqtë tregohen më të qarte në lojë dhe në minutën e ‘67 fitojnë një 11 metërsh.

Nga pika e bardhë e penalltisë realizon Moler duke i dhënë një fitore me mjaft vlera danezëve.

Rezultati mbeti i pandryshuar deri në fund të takimit, ndërkohë që sfida e kthimit do të zhvillohet në Danimarkë në datën 25 shtator. /ABC News Albania 24/7

NDRYSHIMET-TE-VLLAZNIA-DHE-KUKSI_ABC-M2-T1.mpg_snapshot_00.35-1280x720.jpg
ent ela14:32 | 02/09/2019

Skuadra e Vllaznisë bën një tjetër ndërhyrje në merkato, kësaj radhe në repartin mbrojtës. Mbrojtesi Godfrij Ualasambi ka firmosur për një sezon me shkodranët dhe do të jetë nën urdhrat e trajnerit Mirsad Jonuz në fundjavë.

Ashtu siç ishte premtuar nga pjestarët e stafit teknik, KF Vllaznia ka bërë realitet edhe marrjen e një tjetër lojtari. Bëhet fjalë për mbrojtësin e majtë Ualusimbi Godfrey. Me këtë futbollist është firmosur një kontratë njëvjeçare dhe ai pritet të mbërrijë në Shkodër brenda kësaj jave, sapo të paiset me vizën hyrëse në Shqipëri. Ndërkohë, Godfrey është federuar brenda afateve të mbylljes së merkatos dhe tashmë edhe zyrtarisht është pjesë e Vllaznisë. 30 vjeçari ka një karrierë të gjatë e të suksesshme dhe prej 10 vitesh është pjesë e kombëtares së Ugandës me të cilën ka luajtur 93 ndeshje dhe ka shënuar 3 gola. Me përvojën e tij, Godfrey pritet të jetë një element i rëndësishëm për ekipin e Vllaznisë në repartin e mbrojtjes, njofton skuadra e Vllaznisë.

Skuadra e Kukësit ka njoftuar ndërprerjen e bashkëpunimit me futbollistin Faton Xhemaili. 20 vjeçari u transferua te Kukësi në merkaton e janarit por nuk e fitoi vendin e titullarit. /ABC News Albania 24/7

VLLAZNIA-PERGATITET-PER-TIRANEN.mpg_snapshot_00.03-1280x720.jpg
nev ila19:10 | 30/08/2019

Vllaznia vlerëson lart derbin e përjetshëm ndaj Tiranës, por shpreson t’ia dalë me sukses. Trajneri Jonuz dhe kapiteni Lika flasin për ndeshjen e Superligës

Katër pikë në dy ndeshje janë një fillim i mirë.

Aq më tepër kur skuadra vjen nga një kategori më poshtë, ndonëse kur kjo e ka emrin Vllazni, diçka e tillë bëhet detyrim.

Detyrim apo jo, tashmë vjen derbi më i vjetër i futbollit shqiptar, dueli me Tiranën që do të luhet këtë të shtunë në “Loro Boriçi”.

Trajneri me origjinë shqiptare nga Maqedonia, Mirsad Jonuz, gjithsesi, ndihet i qetë.

“Jam mësuar me ndeshje të tilla, pasi kam luajtur shumë derbi si lojtar dhe si trajner. Gjithsesi, kjo është e veçantë, pasi është derbi i përjetshëm. Ka kaq shumë histori në këtë duel dhe gjithnjë ka pasur emocion për rezultatin. E shoh që ka shumë vëmendje nga tifozët dhe mediat, e kjo gjë është e mirë për futbollin në Shqipëri dhe në Shkodër. Ky do të jetë motiv më i madh për ne, që të japim maksimumin në këtë ndeshje”.

Pas vlerësimit të lartë për derbin, Jonuz flet edhe për synimin e tij.

Dua të theksoj se lojtarët e mi janë gati, dhe disa prej tyre kanë luajtur më parë derbi të tillë, pra kanë përvojë. Edhe situata ku jemi, me 4 pikë, na jep të drejtë të jemi optimistë. Kush nuk do të donte që në fund të gëzoheshim së bashku. Kjo do të ishte shkëlqyeshëm. Me 7 pikë në 3 ndeshje do të ishte fillimi më i mirë i kampionatit”.

Kapiteni Gilman Lika ka luajtur më parë për Tiranën, ndërsa tani do ta ketë kundërshtar.

Vllaznisë i mungon vetëm Gligorovi i dëmtuar për derbin e madh, nuk ka asnjë dëmtim tjetër apo pezullim./ABC News Albania 24/7

 

vllaznia-2.jpg
G. P.18:00 | 27/08/2019

Vllaznia nuk është në formën më të mirë, por trajneri Mirsad Jonuz beson tek rezultati pozitiv në ndeshjen ndaj Bylisit. Jonuz refuzoi të deklaronte se cili është objektivi i skuadrës në këtë kampionat.

Duket sikur në Shkodër kampionati nuk ka nisur ende. Pavarësisht fitores me Laçin, diçka me të vërtetë e rëndësishme, trajneri Mirsad Jonuz, sheh si detyrë kryesore të harmonizojë skuadrën, të krijuar vonë.

Trajneri me origjinë shqiptare, ardhur nga Maqedonia, gjithsesi, nuk harron se detyra e Vllaznisë është të marrë rezultatet, ndaj edhe së pari flet për ndeshjen e radhës ndaj Bylisit.

“E kam studiuar Bylisin, edhe në televizion, edhe në pamje filmike në disk. Kam diskutuar me lojtarët dhe mund të them se kundërshtari është I fortë, dhe ndeshja do të jetë e hapur. Edhe Bylisi ka trajner nga ish-Jugosllavia, dhe luan me të njëjtin sistem si ne. Nuk mund të parashikoj rezultatin, por besoj se lojtarët tanë do të japin maksimumin për të marrë tri pikët. Gjithsesi, e rëndësishme është të mos humbasim”.

Jonuz ngacmohet duke i thënë se si shumë eufori u krijua pas suksesit me kurbinasit.

“Jo, nuk mund të jetë kështu. Një fitore është thjesht një fitore, ndeshja e radhës është diçka tjetër. Është puna e radhës. Gjithsesi, jam i kënaqur me mentalitetin e lojtarëve të mi. Dua të përgëzoj dhe të falenderoj për ndeshjen ndaj Laçit. Ishte një paraqitje mjaft e mirë, dhe një rezultat tepër pozitiv për ne. Pas asaj ndeshjeje, patëm disa probleme me lojtarët, por pas dy ditësh stërvitjeje të gjithë janë mirë, dhe vetëm Gligorovi nuk e ka marrë dot veten”.

Laçi e Bylisi kanë rëndësi, por po ashtu duhet të dihet se cili është objektivi i Vllaznisë në këtë kampionat?

“Për momentin, është e rëndësishme të krijojmë skuadrën, sepse kemi lojtarë që kanë ardhur vonë dhe janë stërvitur pak me ne.  Ne na duhen pikët ndaj Bylisit dhe Tiranës, por do të vazhdojmë të punojmë gjatë periudhës së pushimit. Për sa i përket objektivave, mbijetesës, Ligës së Europës apo Championsit, për këtë do të flasim pas 6 muajsh”./ABC News Albania 24/7

vllaznia-1-1280x720.jpg
nev ila19:00 | 24/08/2019

Vllaznia rikthehet me sukses në Superligë duke fituar ndeshjen e parë, atë ndaj Laçit. Në stadiumin “Loro Boriçi” vendosi goli i brazilianit Hygor.

Frika ishte e madhe për ndonjë dështim, kur ekipi doli në fushë.

Gjithsesi, përtej kritikave për klubin dhe kaosit në Bashkinë e Shkodrës, Vllaznia nderoi emrin e saj në ndeshjen e parë të rikthimit në Superligë.

Nuk pati përballë ndonjë kundërshtar dosido, por Laçin, një nga ekipet më të mirë të sezonit të kaluar dhe pjesëmarrës në Ligën e Europës, veçse djemtë e drejtuar nga Mirsad Jonuzi, thuajse u dhanë një leksion atyre të mjeshtrit Sulejman Starova.

Një pjesë e parë e interpretuar shumë mirë nga shkodranët që krijuan rast pas rasti, duke luftuar me më shumë dëshirë në fushën e “Loro Boriçit, si për të thënë se edhe kur punët nuk u shkojnë mirë, ata mbeten djepi i futbollit shqiptar.

Sidoqoftë, u desh një gol i veçantë i brazilianit Hygor, pikërisht në minutën e fundit, që të mposhtej portieri i kurbinasve, moldavi Stazhilla.

Pesëmbëdhjetë minutat e pushimit nuk i mjaftuan Laçit për të mbledhur veten, pasi Vllaznia mund të kishte shënuar edhe golin e dytë, por megjithatë kur ekipi i Starovës doli në lojën e tij, krijoi panik në “Loro Boriçi”.

Redon Xhixha u bë heroi i rasteve të humbura, ndërsa portieri Sherri dhe fati ndihmuan vendasit.

Çfarë mund të thuhet për skuadrën më të vjetër të Shqipërisë pas kësaj fitoreje?

Me shumë shkodranë e disa të huaj në përbërje mund të paraqitet mirë, gjithnjë nëse nuk pengohet nga ndërhyrjet e së kaluarës nga jashtë ekipit.

Është vetëm java e parë e kampionatit dhe gjithçka mund të ndodhë në vazhdim./ABC News Albania 24/7

partizani-2.jpg
G. P.14:53 | 19/08/2019

Përcaktohet axhenda e javës së parë të kampionatit kombëtar të futbollit. Edicioni i ri i Kategorisë Superiore starton këtë të premten. Pas superkupës kalendari risjell sërish sfidën Kukësi-Partizani, ndeshjen që do të ngrejë siparin e sezonit 2019-2020.

Si për ironi të fatit, dhe koincidencë të kalendarit sërish Kukësi e Partizani kthehen të luajnë bashkë të premten, në “Elbasan Arena”në sfidën e parë hapëse të kampionatit të 81-të kombëtar të futbollit.

Edhe për disa kohë do të duhet që Kukësi të luajë në fushë neutral deri në përfundim të stadiumit të ri, punimet e të cilit kanë nisur. Kështu, kampionati do të çelë siparin ditën e premte në orën 19:00, në “Elbasan Arena”. Katër sfidat e tjera të javës së parë janë planifikuar të zhvillohen ditën e shtunë.

Në orën 16:00 do të zhvillohen përballjet mes Vllaznisë dhe Laçit dhe Skënderbeu-Flamurtari. Ndërsa në orën 19:00, nën dritën e projektorëve do të zhvillohen edhe 2 sfidat e tjera, Tirana-Luftëtari dhe Teuta-Bylis.

Ky edicion la sërish në fuqi skuadrat që vjet luajtën duke rikthyer në elitën e futbollit shqiptar Vllazninë dhe Bylisin, teksa Kastrioti ra në Kategorinë e parë ndërsa Kamza u përjashtua.

Ndërkaq, sipas rregullores merkato do të vijojë deri në datën 31 Gusht, ndërkohë që skuadrat tashmë janë në etapën e fundit të përforcimeve të tyre. Kukësi-Partizani prodhoi rivalitet shumë të madh në Superkupë ditën e dielë në një kohë që parashikohet si një sfidë rivalësh për titull deri në fund.

Ndërkaq, edhe Tirana shikohet si një pretendente e fortë për titullin, në një kohë që ka qenë shumë aktive me prurjet e saj në këtë merkato vere. Ky kampionat u përfol shumë gjatë ditëve të Korrikut që mund të kishte një shtyrje për shkak të problemeve me disa klube, por definitivisht nis sipas datave të caktuara./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono