valdrin pjetri

valdrin-pjetri.jpg
Autor E15:10 | 17/12/2019

Prokuroria e Përgjithshme ka publikuar rezultatet e verifikimeve të bëra për figurën e ish-kreut të Bashkisë së Shkodrës, Valdrin Pjetri me kërkesë të Partisë Demokratike. Prokuroria thotë se Pjetri është dënuar nga Gjykata e Firences në Itali për veprën penale “Mbajtje e paligjshme e lëndëve narkotike në bashkëpunim”.

Ish-kreu i Bashkisë së Shkodrës ishte arestuar në flagrancë nga policia e Firences në datën 27 janar të 2003, bashkë me një shtetas tjetër shqiptar.

Ndërkohë sipas organit qëndror të akuzës, Pjetri u dënua nga gjykata e Firences për veprën penale “Mbajtje e paligjshme e lëndëve narkotike në bashkëpunim”. Sipas Gjykatës së Firences, subjekti Valdrin Pjetri u dënua me vendim të formës së prerë përfundimisht me 18 muaj burg dhe me gjobë të barabartë me 1.000 Euro. Por dënimi u pezulla dhe Pjetri dëbohet me urdhër të Prefektit të Firences nga territori Italian më datë 04 shkurt të 2003 masë e marrë nga Prefekti i Firences. Sipas shkresës, afati i dëbimit përfundoi më datë 2 prill 2015.

Në fund prokuroria e Përgjithashme thekson se, në lidhje me mosdeklarimet prej subjektit në Formularët e Vetëdeklarimeve të fakteve të konstatuara materialet i kaluan për kompetencë Prokurorisë pranë Gjykatës së Rrethit Gjyqësor Tiranë, për veprën penale “Falsifikimi i vulave, i stampave ose i formularëve”, të parashikuar nga neni 190 i Kodit Penal.

Njoftimi i plotë

Partia Demokratike e Shqipërisë, me shkresën Nr.121 Prot., datë 01.08.2019 ka depozituar në Prokurorinë e Përgjithshme kërkesën me objekt “Verifikimin e pastërtisë së figurës të shtetasit Valdrin Luigj Pjetri”. Në vijim, me shkresën Nr.121/1 Prot., datë 05.08.2019, në zbatim të përcaktimeve të pikës 2 të nenit 7, të Ligjit Nr.138/2015 “Për garantimin e integritetit të personave që zgjidhen, emërohen ose ushtrojnë funksione publike”, ky subjekt ka dërguar bashkëlidhur nënshkrimet e jo më pak se 500 shtetasve me të drejtë vote, në mbështjetje të kërkesës për verifikim të figurës së shtetasit Valdrin Luigj Pjetri.

Prokuroria e Përgjithshme, bazuar në parashikimet e Ligjit Nr.138/2015 ka kryer verifikime të thelluara të deklarimeve të subjektit Valdrin Pjetri, të paraqitura në dy Formularë Vetëdeklarimi.

1. Formularit të Vetëdeklarimit, dorëzuar pranë Komisionit Qëndror të Zgjedhjeve nga subjekti Valdrin Luigj Pjetri, në cilësinë e kandidatit për Kryetar të Bashkisë Shkodër.

2. Formularit të Vetëdeklarimit dorëzuar pranë Departamentit të Administratës Publike, nga subjekti Valdrin Luigj Pjetri, në cilësinë e Drejtorit të Drejtorisë së Aseteve në Ministrinë e Mbrojtjes.

Në përfundim të verifikimeve të kryera është provuar se subjekti Valdrin Luigj Pjetri:
• Është arrestuar në flagrancë nga personeli i Policisë së Shtetit së Firences në datën 27.01.2003 së bashku me një shtetas tjetër shqiptar për shkelje të ligjeve mbi lëndën narkotike bazuar në ex art 73 DPR 309/90.

• Me vendimin penal Nr.474 të Gjykatës së Firences, subjekti Valdrin Luigj Pjetri është deklaruar fajtor për veprën penale “Mbajtje e paligjshme e lëndëve narkotike në bashkëpunim”, parashikuar nga neni 110 i Kodit Penal Italian dhe nga neni 73 paragrafi i 1 i Dekretit të Presidentit të Republikës të Republikës së Italisë, nr.309/90 dhe është dënuar me 36 (tridhjetë e gjashtë) muaj burgim dhe me gjobë të barabartë me 2000 (dymijë) Euro, të zbritur për shkak të njohjes së rrethanave lehtësuese të përgjithshme, në 27 (njëzet e shtatë) muaj burgim dhe me gjobë të barabartë me 1.500 (njëmijë e pesëqind) Euro, e cila është zbritur për shkak të llojit të gjykimit në 18 (tetëmbëdhjetë) muaj burgim dhe me gjobë të barabartë me 1.000 (njëmijë) Euro. Pezullim të dënimit dhe mospërmendje. Vendim i formës së prerë.

• I është revokuar leja e qëndrimit më datë 03.02.2003 nga Kuestori i Firencës.

• Është dëbuar nga territori Italian më datë 04.02.2003, masë e marrë nga Prefekti i Firences. Afati i dëbimit përfundoi më datë 24.07.2015.

Mbi këtë bazë dhe referuar parashikimeve të ligjit Nr.138/2015, si dhe Vendimit të Kuvendit Nr.17/2016 është arritur në konkluzionet se:

1. Subjekti deklarues Valdrin Luigj Pjetri, përfshihet në fushën e veprimit të nenit 2 pika 1 gërma “a” e ligjit Nr.138/2015, “Për garantimin e integritetit të personave që zgjidhen, emërohen ose ushtrojnë funksione publike”, për shkak të dënimit nga Gjykata e Firences me vendim të formës së prerë.
2. Subjekti deklarues Valdrin Luigj Pjetri, përfshihet dhe në përcaktimet e pikës 3, gërma “ç”, Kreu III-të, i Vendimit Nr. 17/2016 të Kuvendit të Shqipërisë, për shkak të mosdeklarimit prej tij në Formularët e Vetëdeklarimit të arrestit në flagrancë, ndjekjes penale ndaj tij në Itali, mosdeklarimit të dënimit penal të formës së prerë dhënë ndaj tij nga Gjykata e Firences dhe mosdeklarimit të masës së dëbimit nga shteti Italian.

Në përfundim të procesit vendimarrja i komunikohet subjektit politik Partia Demokratike e Shqipërisë, Komisionit Qëndror të Zgjedhjeve dhe Departamentit të Administratës Publike.

Në lidhje me mosdeklarimet prej subjektit në Formularët e Vetëdeklarimeve të fakteve të konstatuara materialet i kaluan për kompetencë Prokurorisë pranë Gjykatës së Rrethit Gjyqësor Tiranë, për veprën penale “Falsifikimi i vulave, i stampave ose i formularëve”, të parashikuar nga neni 190 i Kodit Penal.

ditmir-bushati.jpg
ad min21:32 | 05/09/2019

Ditmir Bushati thotë se nuk është ai propozuesi i Valdrin Pjetrit në Shkodër, siç u shpreh numri dy i socialistëve Taulant Balla. Deklarata u bë gjatë një interviste për Zërin e Amerikës, gatë së cilës ish-drejtuesi politik i qarkut Shkodër tha se për raste të tilla edhe Partia Socialiste duhet të mbajë përgjegjësinë e saj.

Një ditë pas deklaratave të Taulant Ballës se kandidatura e Valdrin Pjetrit në Shkodër ishte propozuar nga Ditmir Bushati, ish-Ministri i Jashtëm ka folur për Zërin e Amerikës.

“Shkodra e di kush e kandidoi Valdrin Pjetrin. Asambleja e Partisë socialiste propozoi 3 kandidatë të tjerë”, citohet Bushati nga Zëri i Amerikës. Ish-drejtuesi politik I qarkut Shkodër thotë se përveç përgjegjësisë ligjore individuale edhe PS duhet të mbajë pjesën e saj të përgjegjësisë për raste si Pjetri.

Ditmir Bushati: Besoj se ne, jo vetëm duhet të njohim përgjegjësinë politike në raste të tilla, por edhe ta ushtrojmë atë. Përgjegjësia politike në këtë rast mund të ushtrohet përmes një reformë politike, që do të sillte në qendër të vendimmarrjeve tona, anëtarin e PS-së. Natyrisht, nuk kam përjashtuar asnjë çast as veten nga përgjegjësi të tilla, edhe kur kam thënë që, ne nuk kemi pse mos të guxojmë të kërkojmë ndjesë për vendimmarrje të gabuara dhe kur kam deklaruar që askush prej socialisteve e progresisteve shqiptarë nuk ka pse të ndjehet i ligështuar prej vendimmarrjeve të gabuara nga ana jonë.

Bushati thotë se ka folur në strukturat e PS për personat me të shkuar të dyshimtë që kanë ndikim politik

Ditmir Bushati: Debatet për sa i përket procesit të dekriminalizimit dhe influencës në politike të njerëz me të shkuar të dyshimtë apo persona të cilët janë shpallur “non grata” nga SHBA, unë kam preferuar për ti zhvilluar brenda kryesisë që në vitin 2016.

Bushati ka hedhur poshtë mundësinë që t’i bashkohet lëvizjes Vetëvendosje, siç u shpreh Albin Kurti në një intervistë për ABC News.

Bushati: Nuk kam asnjë arsye, e jo më ambicie për të lëvizur nga Partia Socialiste të cilën e konsideroj familjen më të madhe politike në vend…. Sot më shumë se kurrë mendoj që ne kemi nevojë për të hedhur një tjetër hap drejt demokratizimit të mëtejshëm të PS-së, për të dëshmuar që jemi në gjendje për tu vetëkorrigjuar.

Ish-Ministri i Jashtëm mendon se kriza politike ka ndikimet e saj si për vendimmarrjen e Tetorit të BE, ashtu edhe në drejtimin nga Shqipëria të OSBE-së në Janar të vitit të ardhshëm. Prandaj sipas tij duhet vullnet nga të gjithë aktorët politikë për të mos i humbur si momente historike për vendin./ABC News Albania 24/7

taulant-balla-1.jpg
ad min16:07 | 04/09/2019

Partia Socialiste nuk e ka të qartë rrugën që do të ndjekë për të përsëritur zgjedhjet në Shkodër. Numri dy i socialistëve, Taulant Balla tha në një intervistë për ABC News se zgjidhja duhet të vijë mes KQZ-së e Presidentit. Balla nuk vë duart në zjarr për pastërtinë e Agim Kajmakun në Vorë, ndërsa thotë se edhe Ditmir Bushati është përgjegjës kandidimin e Valdrin Pjetrit në Shkodër.

Ilir Meta nuk dekreton një datë të re për përsëritjen e zgjedhjeve në Shkodër, pasi fituesi Valdrin Pjetri ju zbulua një dënim i fshehur. Kjo i ka vendosur në vështirësi socialistët, të cilët nuk po e gjejnë dot mekanizmin për të përsëritur zgjedhjet në këtë bashki. Numri dy i socialistëve, tha për ABC News se zgjidhja duhet të gjendet mes institucionit të Presidentit dhe KQZ-së.

“Janë këto institucione të cilat do të marrin përgjegjësinë qoftë për përcaktimin e datës së zgjedhjeve, qoftë edhe për organizimin e zgjedhjeve. Këto institucione duhet ta zgjidhin mes tyre. Partitë politike kanë detyrën të marrin pjesë në zgjedhje”, tha Balla.

Në kushtet kur Meta nuk bën një hap pas, PS kërkon ndërhyrje nga Këshilli Bashkiak i Shkodrës.

“Zonja Ademi ka mbaruar mandatin dhe Këshilli Bashkiak është autoriteti që duhet të komandojë një person tjetër siç e përcakton ligji, njërin prej nënkryetarëve pasi zonja Ademi nuk mund të firmosë qoftë edhe një shkresë të vetme në kushtet e përfundimit të mandatit të saj në 21 Gusht të vitit 2019”, tha Balla.

Por, a po shtyn PS fshehtas KQZ-në që të caktojë ajo vetë një datë zgjedhjesh?

“Duhet të jenë institucionet, ato të cilat hulumtojnë hapësirat ligjore. As nuk kemi hulumtuar në këtë kontekst pasi në fund të fundit KQZ është një organ i pavarur”, tha Balla.

Taulant Balla hedh poshtë idenë se mund të ndryshohet Kodi Zgjedhor që kjo kompetencë t’i hiqet presidentit dhe t’i kalojë KQZ-së.

“Kjo është çështje që i takon komisionit të posaçëm të reformës zgjedhore. Nuk bën pjesë në prioritet e punës së komisionit të posaçëm”, tha Balla.

Socialistët nuk vënë duart në zjarr e nuk japin garanci as për Agim Kajmakun në Vorë, të cilin PD po ashtu e akuzon si të dënuar.

“Në PS nuk ka një prokurori të përgjithshme që bën verifikime. PS nuk bëhet mburojë, por mbështet verifikimin. Nga ajo që është bërë publike, nuk rezulton të ketë një vendim të formës së prerë që të bëjë fjalë për rastin konkret. Përgjegjësia është personale. Për këtë qëllim ne do të marrim masat”, tha Balla.

Por, a duhet të kërkojnë ndjesë socialistët për këto përzgjedhje siç Ditmir Bushati ka sugjeruar?

“Ndjesën e kam thënë i pari, padyshim që edhe zoti Bushati apo kushdo tjetër anëtar i Kryesisë së PS-së ka qenë në mbledhjen e Kryesisë së PS-së kur janë diskutuar kandidaturat, në cilësinë e të deleguarit politik për Shkodrën edhe zoti Bushati ka qenë pjesë e propozimit të kandidaturës së zotit Pjetri”, tha Balla.

Prokuroria ende nuk e ka thënë fjalën e saj të fundit as për Pjetrin e as për Kajmakun./ABC News Albania 24/7

valdrin-pjetri.jpg
ent ela11:43 | 04/09/2019

Duke marrë shkas nga publikimet e fundit në media lidhur me procedurën e verifikimit të subjektit Valdrin Pjetri, ish – kandidat për Kryetar të Bashkisë Shkodër, ju informojmënë lidhje me veprimet e kryera prej Drejtorisë së Marrëdhënieve Juridiksionale me Jashtë dhe Verifikimit të Integritetit të Personave që Zgjidhen Emërohen oseUshtrojnë Funksione Publike, deri ditën e sotme:

Në zbatim të ligjit Nr. 138/2015 “Për garantimin e integritetit të personave që zgjidhen, emërohen ose ushtrojnë funksione publike”, më datë 05.08.2019, Prokuroria e Përgjithshme ka regjistruar kërkesën e administruar prej subjektit “Partia Demokratike” për verifikim të detajuar të subjektit Valdrin Pjetri dhe, në të njëjtën datë ka filluar procedura e verifikimit.

Më datë 06.08.2019, është administruar formulari i vetëdeklarimit të subjektit Valdrin Pjetri prej Komisionit Qendror të Zgjedhjeve.

Më datë 06.08.2019, i është dërguar shkresa për verifikim Zyrës së Gjendjes Gjyqësore, Drejtorisë së Përgjithshme të Gjendjes Civile, Drejtorisë së Policisë së Shtetit, organeve të prokurorisë (prokurorive pranë gjykatës së shkallës së parë, prokurorive pranë gjykatës së apelit, Prokurorisë pranë Gjykatës së Shkallës së Parë për Krime të Rënda).

Më datë 06.08.2019, Prokuroria e Përgjithshme ka dërguar pranë Drejtorisë së Bashkëpunimit dhe Koordinimit Ndërkombëtar pranë Drejtorisë së Policisë së Shtetit, si dhe pranë Ministrisë së Drejtësisë kërkesën për verifikim të mëtejshëm nga autoritetet e drejtësisë italiane, duke iu kërkuar këtyre të fundit vënia në dispozicion e çdo lloji vendimi penal të dhënë nga gjykata, vendim për masa sigurimi personale apo vendime dëbimi, në emër të shtetasit Valdrin Pjetri.

 Më datë 09.08.2019, shtetasit Valdrin Pjetri i është kërkuar të depozitojë gjurmët e tij daktiloskopike pranë Institutit të Policisë Shkencore.

Më datë 14.08.2019, Prokuroria e Përgjithshme ka përcjellë pranë Ministrisë së Drejtësisë kërkesën për ndihmë juridike për subjektin Valdrin Pjetri, duke bashkëngjitur të dhënat kriminale të dënimit penal në shtetin italian.

Më datë 14.08.2019, është dërguar shkresa pranë Departamentit të Administratës Publike për tërheqjen e Formularit të Vetëdeklarimit të subjektit Valdrin Pjetri, të depozituar më parë prej tij, si subjekt i ligjit Nr. 138/2015.

datë 16.08.2019, Departamenti i Administratës Publike ka paraqitur Formularin e Vetëdeklarimit të subjektit Valdrin Pjetri, të depozituar pranë saj me datën 02.05.2016.

datë 19.08.2019, Instituti i Policisë Shkencore ka dërguar në Prokurorinë e Përgjithshme gjurmët daktiloskopike të  depozituara nga subjekti Valdrin Pjetri.

datë 19.08.2019, është dërguar shkresa pranë Drejtorisë së Bashkëpunimit dhe Koordinimit Ndërkombëtar pranë Drejtorisë së Policisë së Shtetit, duke bashkëngjitur gjurmët daktiloskopike të depozituara nga subjekti i sipërcituar, pranë Institutit të Policisë Shkencore.

Ndërkohë, janë administruar nga Prokuroria e Përgjithshme:

  • Më datë 07.08.2019,përgjigja e Zyrës së Gjendjes Gjyqësore pranë Ministrisë së Drejtësisë për subjektin Valdrin Pjetri.
  • Më datë 13.08.2019 dhe datë 15.08.2019, përgjigja e Ministrisë së Drejtësisë në lidhje me përcjelljen pranë autoriteteve italiane të drejtësisë tëKërkesës për Ndihmë Juridike për subjektin Valdrin Pjetri.
  • Më datë 14.08.2019,përgjigja e Drejtorisë së Përgjithshme të Gjendjes Civilenë lidhje me gjeneralitetet e subjektit Valdrin Pjetri,
  • Më datë 16.08.2019,përgjigja e Drejtorisësë Policisë së Shtetitpër subjektin Valdrin Pjetri nëse figuron i ndaluar/arrestuar për veprimtari kriminale.
  • Deri tani janë administruar përgjigjet e 23 prokurorive të rretheve gjyqësore/apelepër subjektin Valdrin Pjetri në lidhje me kërkesën tonë për kallëzime/referime/procedime penale, ka qenë ose jo nën hetim, është caktuar ose jo ndonjë masë sigurimi, është dënuar ose jo,me vendim jopërfundimtar apo të formës së prerë për kryerjen e ndonjë vepre penale.

Jemi në pritje të përgjigjes nga autoritetet italiane të drejtësisë, si dhe të përgjigjes nga autoritetet policore italiane, të cilat janë vendimtare për marrjen e një vendimi.

valdrin-pjetri.jpg
ad min14:26 | 20/08/2019

Valdrin Pjetri i është përgjigjur kërkesës së Prokurorisë së Përgjithshme për të dhënë shenjat e gishtave. Ato pritet të krahasohen me të dhënat që do të mbërrijnë nga Italia, për të verifikuar një dënim të dhënë ndaj tij në vendin fqinj në 2003 dhe që nuk është deklaruar prej tij.

Kryetari i zgjedhur i Bashkisë Shkodër, që nuk pranoi të marrë detyrën Valdrin Pjetri ka dhënë shenjat e gishtave, pas kërkesës së bërë nga Prokuroria e Përgjithshme, në funksion të hetimit të nisur ndaj tij për shkelje të ligjit të dekriminalizimit. Lajmi konfirmohet nga burime zyrtare te institucionit të akuzës. Pas marrjes së gjurmëve daktiloskopike të Pjetrit pritet të bëhet krahasimi i tyre me ato që do të vijnë nga institucionet e drejtësisë në Itali.

Prokuroria e Përgjithshme ka nisur verifikimet për të kaluarën e Valdrin Pjetrit, pasi u vu në lëvizje nga një denoncim i PD-së, sipas së cilës kandidati fitues për Bashkinë e Shkodrës, kishte qenë i dënuar në Itali për trafik droge. Por këtë dënim nuk e kishte deklaruar në formularin e vetedeklarimit në KQZ, në kundërshtim me ligjin e dekriminalizmit.

Në funksion të këtij verifikimi, Prokuroria e Përgjithshme ka kërkuar informacion nga Ministria e Drejtësisë, prokuroritë e shkallëve të para dhe atyre të Apelit në Tiranë. Gjithashtu përmes letërporosive të dërguara u është kërkuar informacion institucioneve të drejtësisë në Itali, si dhe Interpolit e Europolit.

Burime nga Prokuroria e Përgjithshme konfirmojë se ky institucion është ende në pritje te përgjigjeve me të dhënat për Valdrin Pjetrin. Vetë Pjetri, pas publikimit nga PD të dokumenteve që provojnë dënimin e tij në Itali në 2003 për trafik droge, deklaroi mosmarrjen e detyrës së kryetarit të Bashkisë Shkodër.

Ai tha se do të përballet me ligjin si një qytetar i thjeshtë për të sqaruar të vërtetën e tij. Valdrin Pjetri e quajti episodin për të cilin e akuzon opozita, një ngjarje banale në kohen e adoleshencës, që nuk e përfshin atë dhe së cilës nuk i ka kushtuar asnjë rëndësi./ABC News Albania 24/7

taulant-balla-2.jpg
ad min13:04 | 19/08/2019

Kryetari i grupit parlamentar të PS, Taulant Balla i kërkoi ndjesë shkodranëve për situatën e ndodhur me rastin e kandidatit socialist, Valdrin Pjetrit. Pas konstituimit të Këshillit Bashkiak, Balla deklaroi se Shkodra ka tani Kuvendin e saj lokal, ndërkohë që  i bëri thirrje edhe kreu të shtetit të marrë përgjegjësitë që i jep Kushtetuta. Në një tjetër reagim, kryetari i opozitës, Lulzim Basha theksoi se rezistenca e shkodranëve është tregues se shqiptarët nuk e pranojnë dhunën dhe paralajmëroi se beteja me qeverinë do të mbyllet me politikanë me pranga në duar.

Partia Socialiste i kërkoi ndjesë shkodranëve për situatën e krijuar me rastin e Valdrin Pjetrit pas zgjedhjeve të 30 Qershorit. Pas konstituimit të Këshillit të ri  Bashkiak, numri dy i socialistëve Taulant Balla deklaroi se edhe në këtë rast PS demonstroi se jashtë çdo interesi politik qëndroi në anën e ligjit.

“Sot shkodranët kanë “Kuvendin” e tyre të ri lokal, të përbërë nga 51 këshilltarë bashkiakë të zgjedhur në Zgjedhjet Vendore të 30 Qershorit. Duke i uruar Këshillit të ri bashkiak urime në punën e tij shumë të rëndësishme, Partia Socialiste i shpreh ndjesë komunitetit te nderuar të Bashkisë së Shkodrës për situatën e krijuar pas dorëheqjes së detyrueshme të Kryetarit të zgjedhur të Bashkisë. Por si në çdo rast në qëndruam përtej çdo interesi partiak, politik apo individual, vetëm në anën e ligjit dhe të interesit publik. Si në çdo rast, kur mes palëve politike përfshihen institucionet ligjzbatuese dhe kur bëhet fjalë për raportin e individit me ligjin, Partia Socialiste nuk investohet në asnjë debat. Ligji është i barabartë për të gjithë dhe ai vetëm duhet zbatuar nga kushdo”.

Pas konstatimit të Këshillit Bashkiak të vakancës me kryetarin e Bashkisë, Taulant Balla iu kërkoi institucioneve të marrin përgjegjësitë dhe të zgjidhur situatën e krijuar, duke nënkuptuar shpalljen e një date zgjedhjesh të pjesshme në Shkodër nga ana e Presidentit të Republikës.

“Në lidhje me kompetencën e Këshillit Bashkiak në raport me Kryetarin e Bashkiksë, në mbledhjen e parë të Këshillit Bashkiak u konstatua fakti i mosparaqitjes se fituesit si Kryetar Bashkie Shkodër në zgjedhjet e datës 30 qershor 2019, Z. Valdrin Pjetri për të bërë betimin në përputhje me ligjin. Sa më sipër, institucionet e ngarkuara nga Kushtetuta dhe ligji duhet të marrin përgjegjësitë që ju takojnë në situatën e krijuar”.

Ndërsa për Lulzim Bashën, rezistenca e treguar nga demokratët e Shkodrës ishte tregues se shqiptarët nuk do të pranojnë dhunën, arrogancën dhe padrejtësitë e pushtetit të Edi Ramës.

“Qëllimi ynë është t’i nxjerrim këta banditë dhe hajdutë nga institucionet, nga parlamenti, nga bashkitë e pushtuara dhunshëm, t’i nxjerrim nga lokalet dhe hotelet luksoze, t’i nxjerrim nga studiot e mediave të kapura, t’i nxjerrim nga ekonomia, e t’i çojmë para ligjit. Tu vëmë prangat dhe t’i pastrojmë institucionet dhe rrugët e Shqipërisë, të pastrojmë ekonominë shqiptare nga këta banditë dhe hajdutë dhe t’ua kthejmë Shqipërinë njerëzve”./ABC News Albania 24/7

shkodra.jpg
ad min12:51 | 19/08/2019

Kryetari i Partisë Demokratike, Lulzim Basha, reagoi në rrjetet sociale pas konstituivit të këshillit të ri bashkiak të Shykodrës. Në një postim nëFacebook, Basha shkruan se qëllimi i opozitës është që të nxjerrë nga institucionet dhe parlamenti banditët dhe hajdutët.

“Beteja e sotme në Shkodër është beteja e çdo shqiptari që nuk pranon dhunën, hajdutërinë dhe kriminelët e Edi Ramës, nuk pranon papunësinë, padrejtësinë dhe arrogancën e Hajdutit Psiqik.

Qëllimi ynë është t’i nxjerrim këta banditë dhe hajdutë nga institucionet, nga parlamenti, nga bashkitë e pushtuara dhunshëm, t’i nxjerrim nga lokalet dhe hotelet luksoze, t’i nxjerrim nga studiot e mediave të kapura, t’i nxjerrim nga ekonomia, e t’i çojmë para ligjit. Tu vëmë prangat dhe t’i pastrojmë institucionet dhe rrugët e Shqipërisë, të pastrojmë ekonominë shqiptare nga këta banditë dhe hajdutë dhe t’ua kthejmë Shqipërinë”, shkruan Basha.

Këshilli i Bashkisë së Shkodrës u konstituua mes protestave këtë të hënë. Ashtu siç e kishin paralajmëruar, simpatizantë të opozitës u mblodhën përpara ambienteve të Bibliotekës së Universitetit dhe e rrethuan atë me një shirit të verdhë, nga ata që përdor policia në skenar e krimit. Sipas mbështetësve të PD, është krim, skenari i qeverisë, i cili detyron Këshillin e ri Bashkiak të Shkodrës të shpallë mbarimin e mandatit të kryebashkiakes Voltana Ademi dhe të bëjë zëvendësimin e saj me një nga nënkryetarët./abcnews.al

oerd-bylykbashi-1.jpg
ad min15:43 | 18/08/2019

Partia Demokratike e konsideron të jashtëligjshme mbledhjen e Këshillit Bashkiak të Shkodrës, në kushtet kur nga zgjedhjet e paligjshme të 30 Qershorit nuk ka asnjë kandidat fitues, pas largimit të Valdrin Pjetrit. Ish-deputeti demokrat, Oerd Bylykbashi ka sjellë në vëmendje rastin e Kavajës dhe largimin e Elvis Roshit, për të treguar se vetëm përmes një procesi të ri zgjedhor mund të ketë konstituim të organeve të reja vendore në Shkodër. Në një intervistë për ABC Neës, Bylykbashi e sheh 30 Qershorin një proces nul dhe të pacertifikuar nga Gjykata Kushtetuese.

Socialistët janë të vendosur që edhe pa një kryetar për drejtimin e bashkisë, të largojnë Voltana Ademin nga zyra dhe të drejtojnë institucionin me nënkryetar të zgjedhur prej tyre. Por për ish-deputetin demokrat, Oerd Bylykbashi rasti i Shkodrës është i ngjashëm me atë të Kavajës, dy vjet më parë kur ish-kryebashkiaku Elvis Roshi ra në rrjetën e dekriminalizimit dhe Presidenti dekretoi zgjedhje të reja vendore. Në një intervistë për ABC News, Bylykbashi sqaron se themeli kushtetues i 30 Qershorit ka rënë me dekret Presidencial.

“Askush të mos mendojë që zgjedhjet lokale u mbyllën me 30 Qershor. Janë të vetmet zgjedhje në historinë 25-vjeçare, pas rënies së komunizmit që kanë një pikëpyetje të hapur, thelbësore, kushtetuese përpara një gjykate, pra anulimi i datës 30 Qershor si datë zgjedhjesh dhe dekretimi i datës 13 Tetor si datë tjetër zgjedhjesh i kanë hequr themelin kushtetues dhe ligjor zgjedhjeve të 30 Qershorit. Për rrjedhojë, ato zgjedhje janë në procesin kushtetues nul”, tha Bylykbashi.

Gishtin e akuzës për situatën e krijuar, Bylykbashi e drejton te anëtarët socialist të Komisionit Qendror të Zgjedhjeve, për të cilët paralajmëron se do të përgjigjen penalisht për dëmin miliona euro që i kanë shkaktuar shtetit shqiptar.

“Të mbajnë përgjegjësi penale katër anëtarët socialistë të KQZ-së, do ta mbajnë këtë përgjegjësi penale, nuk i shpëtojnë dot. Kanë shpërdoruar miliona euro pasuri publike shqiptare për të organizuar zgjedhjet e PS-së, kështu që janë të vetmet zgjedhje të cilat nuk kanë fjalën e Gjykatës Kushtetuese. Këtë e thonë OSBE/ODHIR-i, këtë e thotë Departamenti i Shtetit, këtë e thonë ata që kanë minimumin e kuptimit të demokracisë, që është Gjykata Kushtetuese që shprehet”, tha Bylykbashi.

Ndonëse Partia Demokratike nuk është regjistruar në zgjedhjet e 13 Tetorit, Bylykbashi e sheh plotësisht të mundur zhvillimin e zgjedhjeve të parakohshme në këtë datë, e cila në rrafshin Kushtetutës është akoma e vlefshme.

“Ne jemi të gatshëm kurdo që sipas parametrave kushtetuese të ketë zgjedhje. 13 Tetori është një datë, e cila është brenda këtyre lloj parametrash. Problemi kryesor është sjellja e KQZ-së”, tha Bylykbashi.

Dorëheqja e Valdrin Pjetrit nga marrja e detyrës së kryebashkiakut të Shkodrës, pas publikimit nga PD të dënimit të tij në Itali për trafik të lëndëve narkotike, u pasua me një sërë takimesh në kampin opozitar. Lulzim Basha u takua me aleaten e LSI-së, Monika Kryemadhi dhe atë republikan, Fatmir Mediu për të përcaktuar aksionin e radhës përballë qeverisë. /ABC News Albania 24/7

bashkia-shkoder-1280x713.jpg
ad min15:27 | 18/08/2019

Bashkia e Shkodrës është institucioni i fundit i qeverisjes vendore që nuk është konstituuar pas zgjedhjeve të 30 Qershorit. Prefekti i qarkut ka thirrur paraditen e të hënës mbledhjen e Këshillit të ri Bashkiak, por dorëheqja e Valdrin Pjetrit do të lërë sërish në detyrë kryebashkiaken aktuale. Burime pranë Partisë Socialiste konfirmojnë se gjatë mbledhjes së Këshillit Bashkiak do të konstatohet vetëm vakanca e kryetarit dhe nuk do të zgjidhet një nënkryetar. Ndërkohë që socialistët pritet që të imponojnë vendimmarrjen në Këshillin Bashkiak me 51 këshilltarë të fituar në zgjedhje së bashku me aleatët.

Voltana Ademi edhe të hënën si çdo mëngjes do të jetë në zyrën e saj në Bashkinë e Shkodrës. Drejtuesja e vetme vendore që nuk ka lënë detyrën e saj pas zgjedhjeve të 30 Qershorit, pavarësisht se nuk mori pjesë në zgjedhje, pas dorëheqjes së Valdrin Pjetrit nuk ka një kryetar që ta zëvendësojë.

Disa metra larg godinës së Bashkisë,  Prefekti i Qarkut të Shkodrës Çesk Millja ka thirrur mbledhjen për konstituimin e Këshillit Bashkiak dhe zgjedhjen e organeve drejtuese; zgjedhjen e përfaqësuesve të Këshillit të Bashkisë në Këshillin e Qarkut Shkodër dhe shpallja e vlefshmërisë së mandatit të kryetarit të bashkisë Shkodër.

Burime të sigurta pranë Partisë Socialiste, konfirmojnë për ABC News se këshilli i ri, do të vendosë për dy nga tre pikat e rendit të ditës,  por nuk do të zgjedhin një zëvendësues për Voltana Ademin.

Të njëjtat burime, konfirmojnë se Këshilli Bashkiak nuk mund të zgjedhë një kryetar të ri, pasi nuk ka fuqi ligjore as të konstatojë përfundimin e mandatit të Ademit e as vakancën për kreun e ri të institucionit. Këtë situatë juridike, ligji nuk e ka parashikuar, e për pasojë, Voltana Ademi do mbetet në detyrë.

Por mbarëvajtja e drejtimit të saj të bashkisë do varet nga marrëdhënia që do ndërtojë me këshillin e ri bashkiak 51 anëtarësh, me socialistë e aleatë të tyre. Kjo mazhorancë absolute, pritet të imponojë çdo vendimmarrje në Bashkinë e re të Shkodrës.

Nga ana e tyre demokratët nuk do të rrinë duarkryq. Pas paralajmërimeve për të mos u thelluar në paligjshmëri, PD do të zhvillojnë një protestë jashtë ambienteve të rektoratit.

Nga kontaktet e ABC News me të dy palët, nuk pritet të ketë tension mes përfaqësuesve të kampeve të ndryshme politike, pasi të qenit banorë të të njëjtit qytet, imponon respektin reciprok. Ndërkohë që Ademi është e gatshme të qëndrojë në detyrë derisa në zyrën e saj të paraqitet një kryetar i për të marrë detyrën./ABC News Albania 24/7

basha-dhe-kryemadhi.jpg
ad min14:45 | 16/08/2019

Kryetari i opozitës, Lulzim Basha zhvilloi takime me aleatët e tij të LSI dhe PR pas dorëheqjes së kryebashkiakut të Shkodrës, Valdrin Pjetri. Basha priti në një takim në selinë blu, kryetaren e LSI-së, Monika Kryemadhi ndërkohë që një tjetër takim kryedemokrati ka zhvilluar edhe me republikanin Fatmir Mediu. Pas takimit 30 minutësh me Kryemadhin, Basha deklaroi se nuk ka asgjë për të thënë, ndërkohë që PD paralajmëron se do të ketë denoncime të reja për kryebashkiakë socialistë.

Largimi me dorëheqje i kandidatit socialist të Shkodrës, Valdrin Pjetri pas denoncimeve të Partisë Demokratike në selinë blu shihet si fitore, por beteja pritet të vazhdojë. Kryedemokrati ka nisur lëvizjet e para me aleatët në koalicionin opozitar, për të unifikuar qëndrimin që do të mbajnë në lidhje Shkodrën dhe pjesëmarrjen në zgjedhjet e 13 Tetorit ku janë regjistruar vetëm tre parti. Mëngjesin e të premtes, Lulzim Basha priti në një takim aleaten e LSI-së, Monika Kryemadhi. Por pas 30 minutash takimi, as njëri dhe as tjetri nuk dhanë  sqarime si do të vijojë aksioni opozitar dhe se çfarë do të ndodh me Shkodrën.

Një tjetër takim larg vëmendjes së mediave, Lulzim Basha e ka zhvilluar edhe me kreun e republikanëve, Fatmir Mediu. Ky i fundit pas zgjedhjeve vendore ka qenë jo pak kritikë ndaj vendimeve të kryedemokratit dhe i ka bërë thirrje publikisht të regjistrohet në zgjedhjet e 13 Tetorit. Takimet me aleatët e tjerë në koalicion, Lulzim Basha pritet të zhvillojë në ditët në vijim, ndërkohë që PD do të jetë e fokusuar te lista e zezë e 17 kryebashkiakëve. Burime nga selia blu sqarojnë se një tjetër kryebashkiak me të shkuar kriminale do të denoncohet publikisht./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono