ushtria

iraq-1.jpg
ad min18:02 | 26/10/2019

42 persona humbën jetën gjatë protestave të dhunshme në Irak ndërkohë që Ushtria e Irakut ka pranuar se ka përdorur “forcë të tepruar” ndaj protestuesve. Ushtria tha se ka nisur të kërkojë përgjegjësi nga të gjithë ata oficerë komandues “që kanë kryer këto akte të gabuara”.

Numri i viktimave në protestat në Irak ka arritur në 42. Protestat anti-qeveritare nisën më 25 tetor, pasi disa protesta të nisura më herët gjatë këtij muaji, ishin shtypur nga autoritetet, të cilët kishin përdorur dhunë ndaj protestuesve.

Protestuesit u mblodhën edhe të shtunën në Bagdad, në Sheshin Tahrir. Pothuajse 200 persona janë vrarë gjatë muajit të kaluar në protestat kundër korrupsionit, papunësisë dhe mungesës së shërbimeve publike.

Ushtria e Irakut ka pranuar se ka përdorur “forcë të tepruar” ndaj protestuesve dhe ka thënë se ka nisur të kërkojë përgjegjësi nga të gjithë ata oficerë komandues “që kanë kryer këto akte të gabuara”.

Vala e protestave, që janë më vdekjeprurëset që prej se grupi militant Shteti Islamik (IS) u mposht në Irak më 2017,  është parë si sfida e parë më e madhe për qeverinë e kryeministrit, Adil Abul-Mahdi, i cili erdhi në pushtet rreth një vit më parë./ABC News Albania

aleksander-vucic.jpg
ad min14:35 | 26/10/2019

Presidenti i Serbisë, Aleksandër Vuçiç falënderoi Rusinë për dërgimin e raketave të sofistikuara në stërvitje të përbashkëta për mbrojtjen ajrore. Ministria e Mbrojtjes e Rusisë bëri të ditur se sistemet e saj raketore S-400 dhe Pantsir-S po marrin pjesë në stërvitje të përbashkëta me forcat serbe në Serbi.

Presidenti i Serbisë Aleksandër Vuçiç tha gjatë vizitës në një aeroport ushtarak pranë Beogradit, se është i impresionuar nga ajo që mund të bëjnë sistemet ruse tokë-ajër.

“U jemi mirënjohës miqve tanë rusë që kanë rritur në mënyrë dramatike kapacitetet tona mbrojtëse”, është shprehu Vuçiç.

Ministria e Mbrojtjes e Rusisë bëri të ditur se sistemet e saj raketore S-400 dhe Pantsir-S po marrin pjesë në stërvitje të përbashkëta me forcat serbe në Serbi. Sistemi S-400 do të kthehet në Rusi pas gjashtë ditësh stërvitje, ndërsa Vuçiç tha se qeveria e tij e ka blerë sistemin Pantsir-S.

“Po flasim për sisteme fantastike. Sikur të kishim S-400, askush nuk do të guxonte të fluturonte mbi Serbi”, tha Vuçiç.

Rusia ka kontribuar në ushtrinë e Serbisë me aeroplanë luftarakë, helikopterë sulmues dhe tanke. Ndërkohë të premten, Serbia nënshkroi edhe marrëveshje për tregti të lirë me Bashkimin Ekonomik Euro-aziatik, të udhëhequr nga Rusia./ABC News Albania

chile_evacuate1_wide-4da488b5c7504f20123b5703da11bf845373e09e-1280x719.jpg
nev ila11:35 | 20/10/2019

Tre persona humbën jetën nga zjarri në një dyqan në kryeqytetin e Kilit, Santiago, i cili u shkaktua gjatë natës së dytë të protestave të dhunshme që kanë përfshirë këtë vend të Amerikës Jugore. Dy persona vdiqën në vendin e ngjarjes dhe një tjetër më vonë në spital.

Protestat u nxitën nga vendimi për rritjen e çmimit të transportit në metro, vendim që u anullua nga presidenti i Kilit, Sebastian Pinera, pasi vendi u përfshi nga protestat. Protestuesit larguan barrikadat e vendosura nga policia dhe u vunë flakën autobusëve. Policia u kundërpërgjigj me gaz lotsjellës dhe ujë.

Sipas të dhënave të policisë, të cituara nga BBC, më shumë se 300 persona janë arrestuar dhe 156 policë dhe 11 civilë janë plagosur gjatë trazirave.

Ushtarë dhe tanke janë vendosur në rrugët e kryeqytetit të vendit Santiago pasi qeveria shpalli gjendjen e emergjencës.  Ushtria u pa për herë të parë në rrugë që nga viti 1990, kur u rrëzua diktatura e gjeneralit Augusto Pinoçet./abcnews.al

 

 

 

merlin_159610446_4debe2b4-189f-477d-b633-1de9be9690c0-articleLarge.jpg
ent ela13:30 | 24/08/2019

Presidenti Brazilian Bolsonaro me anë të një fjalimi të transmetuar drejt për drejt në television konfirmoi dërgimin e ushtrisë në Amazonë për shkak të situatës së zjarreve. Ai u shpreh se kjo situatë nuk mund të shërbejë si një justifikim për sanksione të reja ndaj vendit.

Për të ndihmuar në shuarjen e zjarreve në Amazonë, që tashmë janë kthyer në një krizë ndërkombëtare, presidenti Brazilian Bolsonaro urdhëroi dërgimin e ushtrisë dhe premtoi tolerancë zero ndaj atyre që ndezin zjarre.

Sipas tij, zjarret në Amazonë nuk mund të justifikojnë sanksione ndërkombëtare tregtare ndaj Brazilit. Ai shtoi se zjarret në pyje ndodhin në të gjithë botën. Bolsonaro u shpreh se pyjet në Amazonë janë një pjesë shumë e rëndësishme e historisë së Brazilit dhe mbrojtja e tyre është një detyrim.

Gjatë transmetimit të fjalës së kreut të shtetit në televizion në qytete të ndryshme të vendit janë zhviluar protesta kundër politikave për ambjentin të qeverisë aktuale. Në San Paolo dhjetëra mijëra protestues bllokuan trafikun rrugor. /ABC News Albania 24/7

KINA-KERCENIMI-1280x720.jpg
ent ela19:15 | 01/08/2019

Përmes një videoje që tregon stërvitjen e trupave të saj në situata protestash, ushtria kineze u ka dërguar një mesazh aktivistëve që prej 8 javësh protestojnë në Hong Kong kundër ligjeve që do ta bënin rajonin autonom më të varur nga Kina mëmë.

Ushtria kineze në Hong Kong ka publikuar një video 3-minutëshe që tregon trupat e saj teksa kryejnë stërvitje për të vënë nën kontroll protestat, një lëvizje kjo që shihet si një paralajmërim ndaj protestuesve që kërkojnë ruajtjen e pavarësisë nga Kina. Videoja e postuar në rrjetet sociale nis me një ushtar që thotë: “Pasojat e veprimeve të tua bien mbi ty”, një deklaratë kjo që sipas aktivistëve nuk lë vend për interpretime. Tensionet në Hong Kong mbeten të larta pas disa javë protestash anti-qeveritare. Të mërkurën mbi 40 aktivistë dolën në gjykatë për t’u përballur me akuzën e kryengritjes, pasi protesta e së dielës u bë e dhunshme. Nëse dënohen, aktivistët mund të përballen deri në 10 vjet burg secili. Ushtria kineze deri më sot ka qëndruar larg protestave, duke ia lënë kontrollin e territorit policisë. Por në një ceremoni të mbajtur të mërkurën në kuadër të 92-vjetorit të themelimit, komandanti i ushtrisë kineze në Hong Kong tha se protestat kanë kërcënuar seriozisht jetën e banorëve dhe kanë shkelur thelbin e politikës “një vend, dy sisteme”. “Kjo nuk mund të tolerohet dhe ne dënojmë ashpër”, deklaroi oficeri i lartë. Videoja e postuar në rrjetin social kinez Ueibo tregon trupat e pajisura me mburojë dhe shkopinj të performojnë stërvitje anti-protestë. Gjithashtu, në të shfaqen tanke, raketahedhëse dhe tela me gjëmba e më pas trupa të armatosura që zbresin nga helikopterët dhe pushtojnë rrugët dhe hyjnë në shtëpitë e banorëve. /ABC News Albania 24/7

north-korea.jpg
ad min18:00 | 01/08/2019

Koreja e Veriut ka pësuar një tjetër dezertim në radhët e ushtrisë së saj. Një efektiv ka kaluar ish-zonën ushtarake që ndan dy Koretë duke depërtuar në Jug, ku është marrë nën arrest nga autoritetet vendase.

Autoritetet në Korenë e Jugut kanë ndaluar një ushtar koreano-verior që kishte kaluar ilegalisht ish-zonën ushtarake që ndan dy Koretë. Zyrtarët në Seul deklaruan se ushtari ishte lokalizuar gjatë orëve të natës përmes pajisjeve termike.

Persona të shumtë arratisen nga Koreja e Veriut çdo vit, por dezertimet përmes ish-zonës ushtarake janë jashtëzakonisht të rrezikshme dhe të rralla. Në Nëntor të vitit 2017, një ushtar koreano-verior u qëllua nga ish-kolegët e tij teksa përpiqej të kalonte zonën.

Ndërkohë, në incidentin e fundit personi u lokalizua gjatë mesnatës pranë lumit Imxhin, që rrjedh nga Koreja e Veriut drejt asaj të Jugut, përmes ish-zonës ushtarake në perëndim të Gadishullit Korean.

Ai u mor nga trupat koreano-jugore dhe po mbahet nën arrest. Dezertimi vjen një ditë pasi regjimi në Penian testoi dy raketa me rreze të shkurtër veprimi. Mediat lokale bënë të ditur se testet, të mbikëqyrura nga lideri Kim Jong un, ishin për të provuar një sistem të ri lëshimi të raketave të kalibrit të madh.

Gjithashtu, regjimi shtoi se testet ishin edhe një paralajmërim për Korenë e Jugut në lidhje me stërvitjet ushtarake që janë planifikuar të zhvillohen më vonë gjatë muajit me Shtetet e Bashkuara./ABC News Albania 24/7

MIke-pompeo-1280x883.jpg
ad min13:30 | 30/07/2019

Sekretari amerikan i Shtetit, Mike Pompeo deklaroi se kreu i Shtëpisë së Bardhë synon të tërheqë të gjithë trupat ushtarakë amerikanë nga Afganistani para zgjedhjeve presidenciale të 2020-s.

Presidenti amerikan Donald Trump dëshiron të nisë tërheqjen e trupave ushtarake amerikane nga Afganistani para zgjedhjeve presidenciale të 2020-s, ku do të garojë për një mandat të dytë. Deklarata u bë nga sekretari amerikan i Shtetit Mike Pompeo. Kreu i diplomacisë amerikane u shpreh se negociatat me talebanët kanë lejuar që të ketë progres real dhe se ai ndihej shumë optimist për situatën.

Gjatë vitit të parë të presidencës, këshilltarët i propozuan Trump që të rriste numrin e ushtarëve në Afganistan, duke pohuar domosdoshmërinë për të shmangur faktin që talebanët të rimerrnin në dorë kontrollin e plotë të vendit. Ndër të tjera, ata e paralajmëruan për rrezikun se Afganistani mund të kthehej në një bazë për sulme të reja terroriste kundër Shteteve të Bashkuara të Amerikës.

Trump vendosi të ndjekë këshillën e stafit të tij. Gjatë një fjalimi për situatën në Afganistan në Gusht të 2017-s, kreu i Shtëpisë së Bardhë shprehej se instikti i tij i parë ishte për tërheqjen e trupave dhe se zakonisht atij i pëlqente të ndiqte instiktin. Por nga ana tjetër ai shtoi se vendimet janë shumë ndryshe kur je i ulur në tryezën e zyrës ovale.

Duke parë progreset pas dy vitesh presidencë, Trump u ankua te këshilltarët e tij duke vendosur që të niste tërheqjen e trupave ushtarake amerikane nga Afganistani. Sipas sekretarit amerikan të Shtetit Pompeo kjo është një mënyrë për të reduktuar dhunën dhe rreziqet terroriste në Shtetet e bashkuara të Amerikës.

Një javë më parë, Shtetet e Bashkuara të Amerikës dhe Afganistani publikuan një deklaratë të përbashkët për shtyp ku theksohej se të dyja palët synonin përshpejtimin e procesit të paqes për t’i dhënë fund luftës si dhe për të reduktuar praninë amerikane në vend./ABC News Albania 24/7

ushtriaaa.jpg
ad min16:00 | 04/07/2019

Presidenti i Maqedonisë së Veriut Stevo Pendarovski firmosi vendimin për riemërimin e Armatës së Maqedonisë. Emri i ri do të jetë Armata e Maqedonisë së Veriut.

Armata e Maqedonisë së Veriut është emri i ri i ushtrisë së vendit. Presidenti Stevo Pendarovski ka njoftuar se dje ka nënshkruar vendimin për riemërim. Kjo do të thotë se në periudhën e ardhshme Armata duhet të furnizohet me uniforma që do të përmbajnë emrin e ri.

Ndryshe, rreth mos ndryshimit të shkurtesës ARM, muajin e kaluar në një takim të përfaqësuesve të Armatës së Maqedonisë dhe NATO-s kishte reaguar Greqia.

“Dje nënshkrova dekretin për mbishkrimet në uniformat e armatës. Tash e tutje do të jetë Armata e Maqedonisë së Veriut. Do të thotë, ka përfunduar edhe kjo pjesë teknike dhe në periudhën e ardhshme furnizimet do të bëhen me mbishkrimet e reja”.

Presidenti Stevo Pendarovski, gjatë vizitës në kufirin jugor dhe qendrës transitore për pranimin e emigrantëve, ka deklaruar se pjesëtarët e armatës nuk do të tërhiqen nga kufiri jugor.

Sipas tij, aktualisht nuk ka rrezik për valë emigrantësh, kurse vlerësimet e BE-së kanë treguar se Armata është e gatshme të përballet me sfida të këtilla eventuale./ABC News Albania 24/7 

KOMANDOT-USHTARAKE-TEK-AMBASADAT.mpg_snapshot_00.03-1280x720.jpg
ent ela14:03 | 29/06/2019

Të gjitha ambasadat janë marrë nën mbrojtje nga ushtria shqiptare. Forcat komando janë vendosur në çdo seli diplomatike dhe do t’i ruajnë ato gjatë kësaj periudhe, kur policia është e fokusuar në procesin zgjedhor.

Nën mbrojtje janë edhe ambasadat që ndodhen jashtë bllokut kryesor tek Rruga e Kavajës.

Kjo është ambasada ruse. Pranë saj mbrohet dhe ambasada zvicerane dhe ajo e Kosovës. Po ashtu edhe selia diplomatike serbe.

Edhe Sali Berisha e nis ditën e tij të punës në prani të komandove ushtarakë, kjo, sepse zyra e tij është ngjitur me ambasadën italiane.

Komandot më të specializuara janë vendosur pranë ambasadës amerikane, por filmimi i tyre nuk lejohet.

Forcat e armatosura ushtarake do të rrinë në mbrotjeje të objekteve me rëndësi të vecantë, deri në mbarimin e procesit zgjedhor, kur policia mund të kthejë forcat e saj në pozicionet e zakonshme.

Gazetare e ABC News: Esiona Konomi

 

lezhe-1280x720.jpg
ad min15:20 | 27/06/2019

Fletët e votimit janë shpërndarë thuajse në të gjitha KZAZ-të e vendit. Transporti i tyre është bërë nën masa të forta sigurie, ku autokolona e kamionëve ushtarakë, është shoqëruar me eskortë policore. ABC News udhëtoi këtë mëngjes nga Lundra në Lezhë bashkë me fletët e votimit.

“Është ora 8 e mëngjesit dhe ne ndodhemi pranë ambienteve të Komisionit Qendror të Zgjedhjeve në Lundër. Aktualisht, një task forcë e përbërë nga stafi i KQZ-së, punonjës të ushtrisë dhe policisë së shtetit janë duke punuar për të shpërndarë materialet zgjedhore”.

ABC News do të ndjekë transportin e materialit më të rëndësishëm zgjedhor, fletëve të votimit, nga magazinat e Lundrës deri në selitë e Komisioneve Zonale të Administrimit të Zgjedhjeve.

 “Në këtë kamion të ushtrisë shqiptare po transportohen rreth 170 000 fletë votimi për qarkun e Lezhës. Ky qark ka 4 KZAZ, dy në Lezhë, një në Kurbin dhe një në Mirditë”.

Gjatë gjithë rrugës, kamionët e ushtrisë ecin në autokolonë, dhe shoqërohen nga policia shqiptare. Pas dy orësh udhëtim, gjithçka shkon qetë. Lezha ka dy KZAZ në zonë të qeverisura nga demokratët, referuar protestave në këtë bashki, vëmendja është maksimale.

 Kryetari i bashkisë Fran Frrokaj është nën hetim për pengim të subjekteve zgjedhore, ndaj policia ka marrë të gjitha masat në rast surprizash.

“Kjo KZAZ me numërin 13 po funksionon në një ambient të bashkisë, e cila, e qeverisur nga demokratët kërkon lirimin e ambienteve”.

Por, siç kishin paralajmëruar demokratët, forcat policore lokale u hodhën në aksion. Policia bashkiake kërkon lirimin e ambienteve.

Socialistët i përgjigjen shkurt.

“Ne sapo kemi marrë në dorë materialet zgjedhore dhe gjithçka është në rregull. Ne kemi një vendim të KQZ-së që prevalon mbi atë të bashkisë dhe do t’i bindemi atij, konform të gjitha rregullave dhe ligjeve”, -thotë Elona Ndrecaj, anëtare e KZAZ-se numer 13.

Pas të dielës, kjo sallë do të kthehet në vend për numërimin e votave, ku për herë të parë do të mungojnë numëruesit e PD dhe LSI.

Në bashkinë Lezhë Pjerin Ndreu i Socialistëve ka dy rivalë: Salvador Kaçajn e Bindjes Demokratike, që edhe pse ka emrin në fletën e votimit, është tërhequr nga gara, dhe Eduard Ndocajn, që vijon përpjekjet./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono