ushtri

dbc30ae9-155e-46ac-b79d-e508c3a72c52.jpg
So Nila10:18 | 23/01/2020

Forcave tona të Armatosura tashmë janë shtuar edhe me 49 ushtarakë të rinj të cilët do të jenë tashmë pjesë e dy njesive më elitare të tyre.

Pjesë e ceremonisë së posaçme të përfundimit të kurseve ka qenë ministrja e Mbrojtjes, Olta Xhaçka, e cila i konsideroi forcat shqiptare Komando e Speciale njëlloj të afta me kolegët e tyre nga vendet më të zhvilluara të NATO-s.

“Ju jeni zyrtarisht pjesë e një elite të Forcave të Armatosura shqiptare dhe të NATO. Çertifikimi që keni marrë njihet nga çdo ushtri anëtare e Aleancës dhe secili prej jush mund të marrë pjesë si i barabartë, me kokën lart, krah për krah me homologët amerikanë, britanikë, gjermanë, italianë, turq në çdo mision e ndërhyrje ku do të na thërrasë në të ardhmen angazhimi që kemi marrë kundrejt Aleancës”, ka thënë ministrja.

Xhaçka ka bërë me dije se në vijim do të ketë investime në Forcat Tokësore, jo vetëm për rindërtimin e objekteve të dëmtuara nga tërmeti, por mbi të gjitha për rritjen e profesionalizmit dhe përmirësimit të trajtimit financiar për ushtarakët.

“Jemi angazhuar për një ushtri profesioniste, me ushtarakë të trajnuar me standardet më të larta. Por edhe me ushtarakë që marrin një trajtim shumë më të mirë nga ai që kanë sot sepse në fund të ditës, zemra e forcave të armatosura janë djemtë e vajzat, burrat e gratë me uniformë. Prandaj kjo është sfida jonë më e madhe, pra një trajtim më i mirë, në qoftë se duam që FA të mbledhë të rinjtë më të talentuar e më të zotë” u shpreh Ministrja  Xhaçka.

Kursi Special zgjat më shumë 6 muaj, ndërsa ai Komando rreth 3 muaj dhe konsiderohen si kurset më të vështira fizike dhe psikologjike në Forcat e Armatosura. Këto kurse synojnë përzgjedhjen e ushtarakëve sipas standardeve të kërkuara dhe përgatitjen e tyre për kryerjen e detyrave speciale./abcnews.al

d048fd1e-4938-4b20-be27-441819304609.jpg
R D09:50 | 23/01/2020

Presidenti Ilir Meta gjatë vizitës në Izrael shkoi në bazën ushtarake të Ramlës, pjesë e Forcave izraelite të Mbrojtjes. I shoqëruar nga komandanti i bazës, Gjeneral-Major Tamir Yadai si dhe nga Koloneli Golan Vach, Presidenti Meta u takua me personelin ushtarak, një pjesë e të cilit dha kontribut të veçantë për tërmetin tragjik të 26 nëntorit.

Siç bën të ditur zyra e shtypit, Meta vlerësoi Njësinë izraelite të Shpëtimit Kombëtar me “Dekoratën e Artë të Shqiponjës” duke shprehur mirënjohjen shtetërore, por edhe në emër të qytetarëve shqiptarëpër ndihmesën e jashtëzakonshme dhe profesionalizmin e lartë gjatë operacioneve të kërkim-shpëtimit.

Presidenti Meta i dorëzoi “Dekoratën e Artë të Shqiponjës” Kolonelit Vach duke vënë në dukje se ky vlerësim iu shkon ushtarakëve izraelitë: “Për vullnetarizmin dhe gatishmërinë e menjëhershme, profesionalizmin e spikatur dhe sakrificat e pakursyera të treguara gjatë operacioneve të kërkimit dhe shpëtimit të viktimave, pas tërmetit të 26 nëntorit 2019.

Ajo ç’ka bie në sy në foto është se Presidenca është kujdesur t’i mbulojë fytyrën njërit prej ushtarakëve në foto. Arsyeja mbetet enigmë, edhe pse dyshimet janë se personi në foto mund të jetë pjesë e shërbimit sekret ushtarak. /abcnews.al

Turqia.png
Vladimir Prenga09:31 | 12/10/2019

Turqia nuk po kalon momente të qeta, teksa ka nisur një mësymje në Sirinë Veriore. Një ditë më parë populli turk gëzoi për triumfin ndaj Shqipërisë në futboll, por sigurisht sytë janë në tjetër vend. Gjithçka e qartë, mjafton vetëm të lexosh atë që trajneri Senol Gunes ka shprehur pas ndeshjes me kuqezinjtë tanë.

“Vendi ynë lufton prej vitesh me terrorizmin. Është e vështirë të flasësh për futboll në një ditë si kjo. Jemi gati të jetojmë në harmoni me të gjithë në vendin tonë, pa dallim rrace, gjuhe apo feje. Ata që rrisin terroristë, shpresoj që të mbyten në gjakun e tyre. Ka qenë një periudhë e vështirë për shtetin tonë dhe zhvilluam një ndeshje stresuese. I uroj të gjithë tifozët, ndërsa lojtarët i putha në ballë. Po kalojmë një moment jashtëzakonisht të vështirë. Ishte një përballje stresuese dhe shumë e vështirë, kështu që nuk dua të bëj shumë analiza për takimin”, ka deklaruar Gunes.

Në fakt gjithçka ishte kuptuar pa nisur ndeshja. Masa sigurie të një niveli të lartë, ndalim i futjes së pankartave dhe shumë sendeve të tjera në stadium, kontrolle të rreptësishme, ndërkohë që edhe festa e golit ishte me një qëndrim “gati-tu”. Edhe Turqia e futbollit po e përjeton luftën.

Lojtarët e Turqisë, duke festuar golin e Tosun

LOTËT DHE GAFAT – Tërbim për humbjen. Shqipëria nuk e meritonte, por në futboll ndodh gjithçka. Rey Manaj mund të ishte kthyer në një hero, por lushnjari në dy raste nuk ia doli të shënonte dot. I pari ishte më flagranti dhe sulmuesi sqaroi pas ndeshjes se ia devijuan topin, ndërsa në rastin e dytë e mori keq dhe nuk diti të përfitonte.

Të gjithë gabojnë, sikurse bëri edhe portieri Thomas Strakosha. “Nuk munda ta ndihmoj skuadrën time atëherë kur duhej. Më vjen keq, pasi jam 24 vjeç dhe e kam njëfarë eksperience. Nuk më lejohet të bëj gabime të tilla”, deklaroi pas ndeshjes portieri, i cili më parë kishte marrë mbështetjen e gjithë shokëve të skuadrës.

Madje i pari që shkoi drejt Strakoshës së përlotur ishte Etrit Berisha, ai të cilit “gardiani” i Lazios i ka zënë vendin. Shqipëria vjen e para dhe normalisht të gjithë mbështesin njëri-tjetrin. Berisha ka provuar në të shkuarën të jetë në vendin e Strakoshës dhe e di çfarë do të thotë të gabojë portieri. Turqia i përket së shkuarës, Shqipëria tani duhet të mendojë për Moldavinë dhe më shumë për të ardhmen. Është momenti… /abcnews.al

Manaj në një aksion kundër Turqisë
RRITJA-E-PAGAVE-PER-VITIN-2019.mpg_snapshot_00.47-1280x720.jpg
ent ela17:18 | 06/01/2019

Këtë vit rriten pagat për 65 mijë punonjës të administratës shtetërore. Rritja do te jete nga 5 deri në 20 përqind, sipas sektorëve të përcaktuar nga vendimi i këshillit të ministrave.

Paga më të larta do të marrin gjatë këtij viti 65 mijë të punësuar. Vendimi i qeverisë ka parashikuar disa nga kategoritë që do jenë përfitues. Duke filluar nga 3 mujori i dytë i këtij viti paga do të rritet 10 % në sistemin e shëndetësisë.Në arsim rritja është vendosur të jetë 7%.

Sipas kategorive janë edhe ushtarakët që do të përfitojnë rritje page nga 5% deri në 7%.

Ndryshime pagash do të ketë edhe për punonjësit në sistemin penitenciar. Për herë të parë përfitojnë edhe diplomatët, paga e të cilëve do të rritet 20%.Të gjitha këto ndryshime janë bërë publike më herët edhe nga Ministri i Financave Arben Ahmetaj.

Prej një janarit të këtij viti ka ndryshuar edhe paga minimale. Në shkallë vendi do të jetë 26 mijë lekë nga 24 mijë lekë, që ishte më parë.

Me hyrjen në fuqi të Paketës Fiskale 2019, zgjerohet edhe kufiri i pagës që do të taksohet me 23%, nga 13 mijë lekë të rinj në 15 mijë lekë të rinj. /abcnews.al

20141201_141201a-012_rdax_775x440.jpg
ad min22:51 | 05/12/2018

Sekretari i Përgjithshëm i NATO-s, Jens Stoltenberg, ka këshilluar Prishtinën sa i përket formimit të ushtrisë. Ai thotë se kjo nismë e Kosovës vjen në një kohë të pa përshtatshme, dhe është në kundërshtim me rekomandimet e shumicës së vendeve të cilat janë pjesë e NATO-s.

Kreu i Aleancës ushtarake thotë se një nismë e tillë mund të ketë impakt serioz negativ në rrugën e integrimeve Euro-Atlantike për Kosovën. Qeveria e Kosovës kohë më parë u ka dhënë dritën jeshile tri projektligjeve për shndërrimin e Forcave të Sigurisë në Ushtri. Me 14 Dhjetor të këtij viti pritet të mbahet seanca në të cilën do të votohen këto tri projektligje për formimin e ushtrisë së Kosovës./abcnews.al

Nebojsha-Stefanoviç.jpg
ad min16:16 | 17/11/2018

Ministri i Brendshëm serb thotë se Kosova do të zyrtarizojë formimin e ushtrisë me 28 Nëntor, ditë kur festohet dhe pavarësia e Shqipërisë. Ai theksoi se Beogradi ka përgatitur disa skenarë për këtë zhvillim dhe mënyrën e kundërpërgjigjes.

Ministri serb i Punëve të Brendshme, Nebojsha Stefanoviç, thotë se ekziston mundësia që administrata shtetërore në Prishtinë më 28 Nëntor, kur shënohet Dita e pavarësisë së Shqipërisë, të shpallë formimin e Ushtrisë së Kosovës. Duke komentuar këtë mundësi, ministri serb ka thënë për televizionin shtetëror serb RTS, se një akt i tillë do të ishte në kundërshtim me të gjitha marrëveshjet ndërkombëtare, dhe se pret të reagojë NATO dhe BE, si garantues të marrëveshjeve.

“Prishtina po punon që ajo datë të jetë momenti i shpalljes së Ushtrisë edhe nëse kjo është në kundërshtim me kushtetutat dhe rregulloret e nxjerra dhe miratuara nga Prishtina”, u shpreh ministri serb. Ndërsa më tej nënvizoi se Prishtina “nuk ka as mbështetje nga serbët për këtë”.

“Ministria jonë e Mbrojtjes dhe ajo e Punëve të Brendshme dhe të gjitha shërbimet kanë analizuar të gjitha njohuritë që kemi në lidhje me këtë dhe kemi përgatitur disa skenarë të mundshëm që do të mund të ndodhin dhe natyrisht përgjigjen e Serbisë, por mbi të gjitha ne duam të diskutojmë seriozisht me partnerët të cilët ishin garantues, NATO dhe BE, se një gjë e tillë të mos mund të ndodhë”, shtoi Stefanoviç.

Ai vlerëson se kjo është një çështje serioze dhe pret një përgjigje.  Gjithashtu tha se në takimin e Byrosë për Koordinim të Shërbimeve të Sigurisë, shërbimet serbe kanë marrë detyra të caktuara, duke marrë parasysh paralajmërimin e formimit Ushtrisë së Kosovës dhe në vigjilje të Asamblesë së Përgjithshme të Interpolit, në agjendën e së cilës do të jetë aplikimi i Kosovës për pranim, gjë të cilën e kundërshton Serbia./abcnews.al

SIRIA-SAMITI.mpg_snapshot_01.26.jpg
ad min08:17 | 28/10/2018

Rusia, Gjermania, Franca dhe Turqia zhvilluan të shtunën në Stamboll një samit katërpalësh në lidhje me Sirinë. Propozimi më i rëndësishëm gjatë diskutimeve ishte ai i kancelares Merkel, se zgjidhja ushtarake për Sirinë duhet të ndiqet nga një proces politik dhe zgjedhje të lira.

Të nxitur nga dhuna e regjistruar gjatë javës në bastionet e mbetura të rebelëve, liderët e Rusisë, Gjermanisë, Francës dhe Turqisë u mblodhën të shtunën në Stamboll për një samit mbi Sirinë. Duke reaguar në përfundim të takimit, kancelarja gjermane Angela Merkel deklaroi se zgjidhja e krizës siriane nuk mund të jetë vetëm ushtarake, por duhet të përfshijë edhe një proces politik të mbikëqyrur nga OKB. “Dhe në fund të këtij procesi duhet të ketë zgjedhje të lira, tek të cilat duhet të kenë akses të gjithë sirianët, përfshirë diasporën”, tha Merkel. Nga ana tjetër, presidenti rus Vladimir Putin vlerësoi bashkëpunimin me palën turke për implementimin e marrëveshjes dypalëshe për Sirinë, që lidhet me rajonin e Idlibit, bastioni i fundit i rebelëve.

Ndërsa presidenti francez Emanuel Makron tha se komuniteti ndërkombëtar duhet të mbikëqyrë situatën, për t’u siguruar se Turqia dhe Rusia do të respektojnë marrëveshjen e negociuar të shtunën, për të krijuar një zonë joushtarake në rajonin në fjalë. “Ne do të tregohemi tejet të vëmendshëm për t’u siguruar që angazhimet e marra përsipër të përmbushen dhe që armëpushimi të jetë solid dhe i qëndrueshëm”, tha Makron. Makron shtoi se çdo ofensivë e nisur nga regjimi i presidentit Bashar al Assad dhe aleatët e tij do të ketë pasoja të papranueshme humanitare dhe në aspektin e sigurisë. Takimi i së shtunës në Stamboll shërbeu edhe që Gjermania dhe Turqia të ulnin tonet mes tyre. Presidenti turk Rexhep Taip Erdogan i tha kancelares Merkel se shtetasit gjermanë të dënuar në Turqi për përfshirje në grushtin e shtetit do të mund ta apelojnë vendimin./abcnews.al

ushtriiia.jpg
ad min11:16 | 25/09/2018

Forcat e Sigurisë së Kosovës po vazhdojnë stërvitjet intensive në pritje për tu transformuar në ushtri. Vendimi për krijimine ushtrisë u mor nga qeveria e kryeministrit Haradinaj ditë më parë, por  ky projektligj ende nuk ka shkuar në parlament.

Ditë më parë, qeveria e Kosovës e kryeministrit Ramush Haradinaj, procedoi projektligjin për transformimin e Forcave të Sigurisë së Kosovës në Forca të Armatosura të Kosovës.

Forca e Sigurisë së Kosovës ditët e fundit po kryejnë stërvitje intensive me grupe të ndryshme, me qëllim që të jenë sa më të përgatitur në të ardhmen.

Mediat kosovare shkruajnë se një grup ushtarësh kosovarë ndodhen në Shqipëri ku edhe po kryejnë një super-stërvitje nga NATO, disa të tjerë po kryejnë stërvitje në kampin “Bondsteel”, në Ferizaj nga KFOR-i.

Gjatë këtij trajnimi, FSK kanë mësuar për lëvizjet individuale, teknikat e kujdesit mjekësor dhe gamën e sulmeve të shpërthimit të granatës.

Përfaqësues të institucioneve të Kosovës tashmë kanë nisur procedurat për transformimin e FSK-së, pavarësisht se kjo mund të përdoret si argument nga Serbia, se ushtria po bëhet pa pëlqimin e serbëve të Kosovës./abcnews.al

STERVITJA-PUTIN-KINA.mpg_snapshot_00.11-1280x720.jpg
ent ela23:03 | 11/09/2018

Rusia ka filluar stërvitjen më të madhe ushtarake që prej Luftës së Ftohtë. Në këto ushtrime merr pjesë Kina dhe Mongolia. Ndërkohë, presidenti Putin u takua sot me homologun e tij kinez.

Rusia zhvillon stërvitjen më të madhe ushtarake që nga Lufta e Ftohtë, duke përfshirë rreth 300,000 ushtarë, në Lindje të Siberisë. Kina ka dërguar 3,200 trupa për të marrë pjesë në “Vostok-2018”, me shumë automjete të blinduara kineze dhe avionë. Mongolia gjithashtu ka dërguar disa njësi. Ushtrimi i fundit rus i shkallës së ngjashme ishte në vitin 1981, gjatë Luftës së Ftohtë, por Vostok-2018 përfshin më shumë trupa. Manovrat, që zgjasin një javë, mbërrijnë në një kohë të tensionuar mes NATO-s dhe Rusisë.

Ndërsa ushtrimet filluan, Presidenti rus Vladimir Putin u takua me homologun e tij kinez Xi Jinping në një forum në qytetin lindor të Vladivostok dhe i tha atij se “kemi një marrëdhënie besimi në sferën e politikës, sigurisë dhe mbrojtjes”. Marrëdhëniet ndërmjet Rusisë dhe NATO-s – aleancës mbrojtëse prej 29 anëtarësh të dominuar nga SHBA-të – janë përkeqësuar që kur Rusia aneksoi Krimenë nga Ukraina në 2014. Zëdhënësi i Kremlinit Dimitri Peskov tha se stërvitjet ishin të justifikuara duke pasur parasysh qëndrimet “agresive dhe jo miqësore” ndaj Rusisë.

Ministria ruse e mbrojtjes thotë se 36.000 tanke, transportues të personelit të blinduar dhe automjete të këmbësorisë të blinduara do të marrin pjesë në Vostok-2018, nga 11 deri më 17 shtator, së bashku me më shumë se 1,000 avionë. Vostok do të thotë lindje. Ushtrimi do të përhapet në pesë baza të stërvitjes ushtarake, katër bazave ajrore dhe zonave në Detin e Japonisë, Rrethin Bering dhe Detin e Okhotskut. Deri në 80 anije detare do të marrin pjesë, nga dy flota ruse. Shkalla e Vostok-2018 është ekuivalente me forcat e vendosura në një nga betejat e mëdha të Luftës së Dytë Botërore. Rusia numëron deri në 1 milionë personel ushtarak në total.

erdogan-sot-betimi.jpg
ad min17:12 | 15/07/2018

Qeveria e presidentit turk, Erdogan, ka marrë në kontroll ushtrinë e vendit dhe shtabin qëndror. Ky zhvillim ka ndodhur në përvjetorin e dytë të grushtit të dështuar të shtetit. Erdogan njoftoi se do të vijojë beteja kundër ndjekësve të imamit Gylen, të cilin e akuzon si organizator të grushtit të shtetit.

Presidenti i Turqisë nuk njeh limite dhe vijon të zgjerojë pushtetin e tij. Qeveria e re turke e Rexhep Tajip Erdogan do të kontrollojë stafin e përgjithshëm të ushtrisë. Kjo u mundësua me një dekret të lëshuar në bazë të fuqive të reja të sistemit presidencial, në ditën kur Turqia përkujton përvjetorin e dytë të grushtit të dështuar të shtetit. Tashmë Forcat e armatosura kalojnë nën autoritetin e Ministrisë së Mbrojtjes, në kokën e të cilit Erdogan emëroi ish-shefin e shtabit të Ankarasë disa ditë më parë, Hulusi Akar.

Ndërkohë, në një event për 15 Korrikun, Presidenti i Turqisë tha se organizata e drejtuar nga imami Fetullah Gylen, ashtu si kurdët dhe ISIS, si dhe organizata të tjera të ngjashme duan të rrezikojnë unitetin dhe të ardhmen e vendit. Me rastin e përvjetorit të dytë të përpjekjes së dështuar të grusht shtetit, për të cilin Ankaraja akuzon imamin Gylen dhe organizatën e tij, duke iu referuar me shkrutimin FETO, Erdogan porositi se Turqia dhe populli i saj nuk do ta harrojnë dhe as nuk do të lejojnë që të harrohet 15 Korriku.

“Nuk do të ndalojmë së luftuari kundër FETO-s. Do t’i zbulojmë dhe do t’i shkatërrojmë të gjitha celulat dhe poret ku ata kanë deportuar”, paralajmëron Erdogan, duke lënë të kuptohet se do të vijojë me heqjen nga puna të qytetarëve që dyshohen se kanë qenë pjesë e strukturave të Gylen. Ndërkohë, nga ana tjetër, kleriku që jeton në ekzil në Shtetet e Bashkuara, ka mohuar çdo përfshirje në ngjarjet e 15 Korrikut të 2016-s./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono