unaza e re

protesta-banoret.jpg
G. P.22:42 | 22/10/2019

Banorët e Unazës së Re në Tiranë kanë vazhduar protestat e tyre edhe përgjatë mbrëmjes së të martës. Ata kërkojnë anulimin e projektit të unazës së madhe  dhe dëmshpërblim të njehsuar në vlerën e tregut.

Prej afro 10 ditësh protesta e tyre është zhvendosur në trotuar pas hyrjes në fuqi të ndryshimeve në Kodin Penal që ndëshkon me deri në tre vjet burg këdo që bllokon akset rrugorë kombëtare. Prej po kaq ditësh forcat e rendit kanë vendosur dy kordonë policorë për të mos lejuar zhvillimin e protestës në rrugën “Teodor Keko” duke e bërë atë të kalueshme për automjetet.

Banorët e Unazës së re janë mbështetur edhe këtë të martë nga ish deputeti i Partisë Demokratike Klevis Balliu. Ata kanë përsëritur thirrjen për të liruar tre bashkëqytetarët e tyre për të cilët është dhënë masa “Arrest me burg”./ABC News Albania

protesta-astiri.jpg
G. P.19:39 | 21/10/2019

Banorët e Astirit kanë vazhduar me protestat e tyre, të cilat vijojnë prej gati një viti. Ata kërkojnë anulimin e projektit për Unazën e Re. Ata zhvilluan një protestë edhe këtë të hënë. Pas ndryshimeve në Kodin Penal, tanimë ata kanë vijuar me tubimet në trotuare.

Megjithatë në të dyja korsitë e rrugës kryesore kishte forca policie. Gjatë mbrëmjes së sotme nuk pati asnjë tension mes tyre dhe tubuesve.

Megjithatë banorët kanë kërkuar që policia të luftojë krimin e organizuar dhe të mos qëndrojë ndaj protestuesve. Edhe në këtë protestë kishte prezencë të përfaqësuesve të opozitës, si Klevis Balliu, Tritan Shehu dhe Kejdi Mehmetaj.

/ABC News Albania 

banoret-e-unazes-se-re.jpg
G. P.21:38 | 20/10/2019

Banorët e Unazës së Re kanë vijuar protestën e tyre edhe pasditen e të dielës, duke apeluar sërish anulimin e projektit që prish banesat e tyre.

Duke qenë koherent me zhvillimet politike, banorët e Unazës mbanin në duart e tyre pankarta në cilat fajësohej qeveria dhe kryeministri Edi Rama për vendimin e Këshillit Europian për të mos çelur negociatat me Shqipërinë.

Banorët kanë kërkuar largimin e kryeministrit Rama, duke e bërë atë përgjegjës për situatën që po kalon vendi dhe për projektet korruptive, një prej të cilave është edhe ai që prish banesat e tyre.

Në mbështetje të banorëve ka qenë edhe ish-deputeti demokrat, Klevis Balliu i cili i ka bërë thirrje banorëve të mos e ndalin revoltën e tyre pasi kauza e tyre është e drejtë. Balliu që protestat e grupeve të ndryshme të interesit që po zhvillohen në Tiranë të grupohen, pasi të gjitha bëhen kundër qeverisë dhe kryeministrit Rama.

Në Nëntor protesta e banorëve të Unazës së Re bën 1 vit nga nisja e saj, ndërkohë që banorët çdo ditë grumbullohen dhe protestojnë kundër projektit të qeverisë./ABC News Albania 

protesta-unaza-3.jpg
G. P.19:00 | 20/10/2019

Banorët e Astirit vazhdojnë me protestat e tyre. Me pankarta, flamuj dhe jelekë portokallinj ata kërkojnë anulimin e projektit për Unazën e Re. “Ky është genocid. Mbrojmë familjet tona”, shkruhej në një nga pankartat e protestuesve këtë të diel. Gjithashtu ata kërkuan edhe dorëheqjen e kryeministrit Rama.

Ndërkohë në mbështetje të protestuesve ishin edhe përfaqësues të Partisë Demokratike. Një ndër edhe ish-deputeti Klevis Balliu i cili gjatë fjalimit të tij tha se projekti mafioz i Unazës së Re ka bërë që shumë fëmijë të kenë nevojë për psikolog. Sipas tij, banorët kërkuan dialog me qeverinë, por ajo iu solli dhunë policore.

“Janë këto projekte të tilla mafioze të cilat i kanë bërë këta fëmijë të kenë nevojë për psikologë, të cilat i kanë bërë këto nëna të qajnë me lot. Këto projekte mafioze kanë bërë që këta familje të rrinë në rrugë, në shi, në breshër. Çfarë kërkojnë? Dialog me qeverinë. Të diskutojnë me qeverinë për hallin e tyre. Këta nuk iu përgjigjën në dialog, këta nuk iu përgjigjën me një përfaqësues, këta iu përgjigjën me dhunë policore. A ka turp më të madh se sa të shohësh trupa policore që kërcënojnë banorët”, tha Balliu.

Më tej, Balliu u shpreh se kryeministri Rama është bërë kërcënim për rajonin. Për këtë mori shembull deklaratën e Emmanuel Macron në përfundim të samitit të KiE. Presidenti francez deklaroi se kundër Shqipërisë ishin shumica e vendeve dhe për këtë shkak u dënua edhe Maqedonia e Veriut.

“Ky është përgjegjës që nuk u hapën negociatat edhe për Maqedoninë e Veriut. Edi Rama është bërë kërcënim për gjithë rajonin”, tha Balliu.

Protesta e kësaj të diele u zhvillua në trotuar dhe jo në rrugë. Qarkullimi i automjeteve vazhdoi normalisht, ndërkohë pati edhe prani të forcave policore./abcnews.al

protesta-unaza-2-1280x695.jpg
nev ila21:28 | 19/10/2019

Protesta e banorëve të Unazës së Re gjatë mbrëmjes së të shtunës pati si kryefjalë mos hapjen e negociatave me Bashkimin Evropian. Përfaqësuesit e opozitës që ishin të pranishëm në protestë fajësuan kryeministrin Rama si përgjegjës kryesor për mos hapjen e negociatave dhe i kërkuan atij të largohej.

Banorët e Unazës së Re u mblodhën në protestën e tyre edhe gjatë së të shtunës, ku në mbështetje të tyre ishin dhe përfaqësues të opozitës. Ish-deputeti i PD-së, Klevis Balliu u shpreh para banorëve se kryeministri Rama duhet të largohet pasi është përgjegjës për mos hapjen e negociatave

Të pranishëm në vendin ku u mbahet protesta ishin edhe efektivë të policisë së shtetit të cilët nuk lejuan bllokimin e rrugës kryesore.

Pas protestës që zgjati rreth 60 minuta ku nuk pati as incidente, banorët e Unazës së Re u shpërndanë drejt banesave tyre./abcnews.al

 

protesta-e-banoreve-te-unazes-1280x712.jpg
nev ila21:42 | 16/10/2019

Banorët e Unazës së Re zhvilluan protestën e tyre të radhës edhe pasditen e së mërkurës, e cila është monitoruar nga policia. Pas lirimit nga Gjykata Penale e Tiranes së bashku me 9 banorë të tjerë të Unazës së Re të arrestuar nga policia, ish-deputeti i PD, Klevis Balliu i është bashkuar sërish protestës. Balliu ka akuzuar Kryeministrin Rama për për sjelljen e policisë me banorët e Unazës.

Ndërsa bëhet një vit nga nisja e protestës së tyre, banorët kërkuan anulimin e projektit të Unazës së Madhe.

Protesta e së mërkurës u zhvillua pa incidente. Banorët protestuan në trotuar duke mos bllokuar qarkullimin e automjeteve./abcnews.al

gjykata-1.jpg
G. P.11:54 | 16/10/2019

Gjykata Penale e Tiranës dha masën e sigurisë detyrim paraqitje për 10 personat, të cilët u arrestuan pas protestës që u zhvillua në Unazën e Re të dielën. Ata janë Kujtim Ylli, Bajram Noka, Benard Nezha, Safet Maksuti, Ruzhdi Maqinaj, Artan Muçmata, Dritan Noku, Andi Sharra dhe Agron Thaçi ndërsa mes tyre është edhe ish-deputeti i Partisë Demokratike, Klevis Balliu. Prezent në seancë ishin edhe disa ish-deputetë të Partisë Demokratike.

“Do të vazhdojë protesta e tyre sepse është e ligjshme. Kanë njoftuar çdo ditë pranë policisë dhe faktin që janë përpjekur ti akuzojnë për bllokim rrugës është përgjegjësi e policisë sepse duhet të kishte arrë masa. E drejta e tyre është e shenjtë dhe do të triumfojë. Koha mund të jetë sot e batakçinjve dhe mashtruesve, por e drejta është e shqiptarëve”, tha ish-deputeti Flamur Noka në përfundim të seancës gjyqësore.

Ndërkohë jashtë gjykatës qëndronin një numër i madh qytetarësh dhe banorësh të Unazës së Re. Policia e rendit mori masa dhe u bllokuar hyrja e gjykatës, për shkak të numrit të madh të pjesëmarrjes së banorëve të Astirit.

Të arrestuarit u ndaluan pas protestës që u zhvillua të dielën në Unazën e Re. Në atë tubim, protestuesit bllokuan një aks të rrugës, ndërsa për disa momente pati edhe tensione me policinë.

Ndaj tyre rëndojnë akuzat “Organizimi, pjesëmarrja, grumbullimi dhe manifestime të paligjshme”, “Pengimi i qarkullimit të mjeteve të transportit”, “Prishje e rendit dhe qetësisë publike, “Kundërshtimi i punonjësit të policisë së rendit publik” dhe “Mosbindja ndaj urdhrit të punonjësit të policisë së rendit publik”./ abcnews.al

grate-e-unazes-se-re.jpg
G. P.22:40 | 15/10/2019

Banorët e Unazës së Re i janë drejtuar me një letër ambasadave të huaja dhe institucioneve ndërkombëtare për të drejtat e njeriut ku kërkojnë shkarkimin e ambasadorit të OSBE në Tiranë, Bernd Borchardt. Nisur nga gjesti ofendues që Borchardt bëri pak ditë më parë ndaj tyre, banorët kërkojnë që përfaqësuesi i OSBE të largohet menjëherë nga Shqipëria.

Me duar të lidhura me zinxhirë e gojë të mbyllur me shirita të bardhë banorët e Unazës së Re protestuan sërish për 60 minuta kundër projektit që prish banesat e tyre.

Protesta e dominuar nga gratë që mbanin pranë vetes fëmijët e tyre në fund u mbyll me një akt proteste kundër ambasadorit të OSBE  në Shqipëri, Bernd Borchardt për gjestin e bërë prej tij pak ditë më parë ndaj tyre.

Të grupuara në atë që e cilësuan si Lëvizja e Grave për Dinjitet, protestueset nënshkruan një shkresë që synon shkarkimin e ambasadorit të OSBE, Borchardt dhe që iu drejtua disa prej institucioneve më të rëndësishme brenda dhe jashtë vendit.

Protestuesit kanë paralajmëruar një përshkallëzim të protestës. Duke kujtuar se durimi i tyre po mbaron, banorët e Unazës kanë vendosur 18 tetorin si datën finale ku qeveria do të ketë kohë t’i jap një përgjigje kërkesave të tyre./ABC News Albania

themelimi.jpg
G. P.19:18 | 15/10/2019

Banorët e Unazës së Re kanë zhvilluar një protestë tjetër mbrëmjen e kësaj të marte. Mësohet se në mbështetje të protestuesve janë edhe përfaqësues nga Partia Demokratike dhe Lëvizja Socialiste për Integrim.

Banorët e kanë bazuar protestën e sotme në simbolika. Ata kanë vendosur shirita të bardhë në gojë dhe kanë kryqëzuar duart në shenjë proteste ndaj qeverisë.

Gjithashtu ata i kanë kërkuar presidentit të shpërndajë parlamentin. Ka pasur ultimatum që të ketë transparencë për projektin e unazës së re ose në të kundërtën protestat do të përshkallëzohen.

Ndërkohë në fund të protestës ata themeluan një lëvizje. Ajo do të cilësohet Lëvizja e Grave për Dinjitet. Kjo nismë është vazhdimësi e firmave që u mblodhën dje ndaj gjestit të bërë nga ambasadori Bernd Borchardt.

Gjithashtu të pranishme janë edhe forca të shumta policie. Ata janë të distancuar nga vendi ku po protestohet, por po ruajnë perimetrin që të mos bllokohet rruga./abcnews.al

banori-protesta-1280x717.jpg
nev ila17:34 | 15/10/2019

Ermal Maloku, një nga banorët e Unazës së re, qëndron në arrest shtepie prej më shumë se 5 muajsh. Ai thotë në një intervistë për ABC News se i rrezikohet shëndeti pasi nuk mund të shkojë në spital, për të kontrolluar shpatullën e dëmtuar nga policia gjatë arrestimit. 32 vjeçari shprehet se nuk mund të paguajë qeranë e banesës, pasi është i papunë.

Protesta është e drejta universale e ç’do shoqërie demokratike në botë… Por nuk mund të thuhet e njëjta gjë për Ermal Malokun. Ai u arrestua në protestën e 8 majit të organizuar nga banorët e Unazës së Re.

Gjykata e Tiranës vendosi që Ermali të qëndrojë në masë  sigurisë “Arrest Shtëpie”. Pas këtij vendimi 32-vjeçarit nuk ka me çfarë të paguar qiranë e banesës së tij, ku pronari i apartamentit i ka lënë afat edhe dy javë kohë për detyrimet e prapambetura.

Babai i një fëmijë 4-muaj kërkon të hetohet në gjendje të lirë, pasi ai është i vetmi person që mund të sigurojë të ardhura në familje.

I revoltuar, Ermali tregon se në çfarë gjendje ndodhet familja e tij. Preokupimi më i madh është sigurimi i ushqimit për foshnjën e vogël. Gjendja shëndetësore e të riut nuk është e stabilizuar ende nga dhuna policore e ushtruar në përfundim të protestës së 8-majit.

Nga fillimi i protestës në zonën e Unazës së Re rreth 1 vit më parë janë arrestuar dhe kanë dalë për masë sigurie në gjykatë mbi 40 banorë. Ndërsa janë shoqëruar në Komisariatin nr.6.,  dhe në drejtorinë e Policisë së Tiranës afërsisht 120 persona të cilët, preken drejtpërdrejt tek banesat e tyre nga projekti i zgjerimi i Unazës së Madhe dhe devijimi i Lumit të Lanës./abcnews.al

 

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono