uefa

ujkani.jpg
Vladimir Prenga23:00 | 06/12/2019

FFK nuk ka qetësi, teksa ditët e fundit është raportuar për tentativa për të larguar nga qeveria e futbollit dardan presidentin Agim Ademi. Mes të tjerash është lakuar edhe mundësia e një dënimi të FFK nga UEFA. Kjo ka shqetësuar tifozët e përfaqësueses së Kosovës, por edhe vetë futbollistët. Një prej veteranëve të ekipit, portieri Samir Ujkani, ka reaguar mbi situatën e krijuar ditët e fundit.

“Të shqetësuar nga lajmet që kemi lexuar sot në media, jemi të detyruar të reagojmë ndaj një situate për të cilën jemi habitur që ndodh tani, pikërisht në kohën kur kemi nevojë për stabilitet dhe mbështetjen e të gjithëve.

Futbolli i Kosovës ka mbijetuar e është zhvilluar me sakrifica të skajshme të shumë e shumë brezave dhe vetëm të bashkuar kemi arritur deri këtu. Rrugën nuk e kemi pasur të lehtë, jo vetëm ne brezi aktual i futbollistëve, por dhe ata që shtruan rrugën për ne deri këtu. Prandaj, pas gjithë këtyre sakrificave, nuk mund të lejojmë që për interesa personale të kujtdo qoftë, të rrezikohet një proces kaq i rëndësishëm siç është rrugëtimi drejt kampionatit europian.

Prandaj, në një situatë të tillë, u bëjmë thirrje të gjithëve që t’i lënë anash interesat personale dhe të rreshtohen pas nesh në qëllim për të realizuar ëndrrën, jo vetëm në aspektin sportiv, por dhe për të gjithë ata që gjatë këtyre dekadave kanë sakrifikuar për arritjen e këtij qëllimi; kualifikimit të Kosovës në një garë të madhe siç është kampionati europian. Si futbollistë, ne jemi në krah të pjesës institucionale të Federatës së Futbollit të Kosovës. Me respekt, Samir Ujkani, kapiteni i Kombëtares së Kosovës në futboll”, shkruan Ujkani. /abcnews.al

Postimi i Ujkanit
Ceferin.jpg
Klejdi Kaimi11:59 | 04/12/2019

Përdorimi i teknologjisë VAR në ligat më elitare në Europë ka shkaktuar shumë debate. Pozicione jashte loje për shkak të hundës, vija imagjinare që ndërtohet nga gjyqtarët në dhomën e VAR-it apo edhe prishja e bukurisë së lojës, janë disa nga problematikat që ajo ka sjellur. President i UEFA-s, Aleksander Ceferin tregon se ai është kundër përdorimit si dhe shpejgon idetë që bordi i UEFA-s po mendon në përdorimin e VAR.

‘’Nëse ti ke një hundë të gjatë, atëherë ti je në pozicion jashtë loje këto ditë. Vijat imagjinare që ndërtohen gjithashtu janë shumë subjektive. Do të kemi një takim shumë shpejt me gjyqtarët e kampionateve dhe propozimi jonë është që të ketë një tolerancë prej 10-20 centimetrash. Në Angli gjyqtarët ka raste që nuk e shikojnë fare VAR-in, ndërkohë në Itali një rast mund të shkojë edhe deri në 30 minuta gjykim, është një rrëmujë e vërtetë’’, tregon presidenti në një intervistë për ‘Mirror’.

‘’Unë kurrë nuk kam qenë një fans për përdorimin e VAR-it. Anësorët nuk e përdorin më flamurin, ato vetem presin, presin e presin. Lojtarët? Askush nuk feston nëse goli nuk është kontrolluar nga VAR-i, tifozët festojnë të gjithë dhe më pas ata heshtin si të kenë pësuar gol. Me shumë mundësi teknologjia do të jetë dhe në Euro 2020, pasi ekipet nuk mund të durojnë gabimet në kurrizin e tyre. Ajo që ne mund të bëjmë është vetëm përmirësimi dhe zhvillimi i përdorimit të tij’’, mbyll Ceferin. /abcnews.al

Ademi-1.jpg
Veronik Istrefaj17:59 | 02/12/2019

Është krijuar një situatë kaotike në Kosovë, sa i takon zgjedhjeve për kreun e FFK-së, që i fitoi Agim Ademi. Një dokument është publikuar nga mediet kosovare, aty ku thuhet se ka pasur shkelje në zgjedhjet për kreun e FFK-së.

Pas gjendjes së krijuar, FaktePlus ka kontaktuar me sekretarin e FFK-së, Eroll Salihu, i cili e ka quajtur krejt këtë situatë skandaloze.

“Fillimisht, shikoni kujt i është dërguar letra, njëfarë Bajram Zeqiri, ai në futsallë punon, nuk ka lidhje me delegatë. Ai është thirrur për delegat të Kuvendit e asnjë emër të delegatëve nuk e keni.

E dyta, shkresën e ka lëshuar dikush në Ministri që nuk ka emër as mbiemër, nuk është shërbimi ligjor. Është shkelje drastike, është shkelje e rëndë kundër OJQ-ve. Këtë me marrë vesh UEFA dhe FIFA, menjëherë na dënojnë”, ka deklaruar Salihu./abcnews.al

 

tkz.jpg
Vladimir Prenga08:59 | 01/12/2019

Mobilizim nga të gjitha anët për të ndihmuar shqiptarë e tronditur nga tërmeti i 26 nëntorit. Tifozat Kuqezi prej ditësh janë në terren, duke ndihmuar njerëzit në nevojë me ushqime, veshmbathje dhe materiale të tjera jetike në këtë periudhë të vështirë.

Aksioni i tyre nuk do të ndalet dhe diçka të tillë ata e kanë njoftuar përmes faqes së tyre zyrtare. Mbledhja e ndihmave vazhdon, ndërkohë që kushdo që dëshiron mund të japë kontributi e tij përmes llogarisë bankare. Anëtarët e këtij grupimi kanë dhënë kontributin e tyre dhe vazhdojnë ta japin.

Edhe FSHF është angazhuar dhe një ditë më parë ka kërkuar nga shqiptarët që të hapin kontributin e tyre. Një dorë për këtë ia ka dhënë edhe UEFA, që në faqen në Twitter ka shpërndarë postimin e bërë nga ana e qeverisë shqiptare të futbollit. Gjithashtu edhe Luis Figo ka bërë të njëjtin veprim. /abcnews.al

Figo i bën Retweet postimit të UEFA-s

 

ceferin-duka.jpg
Veronik Istrefaj19:07 | 30/11/2019

Presidenti i FSHF-së, Armando Duka, ka qenë i pranishëm në Bukuresht, aty ku është hedhur shorti i Euro2020. Numri një i Federatës Shqiptare të Futbollit është takuar me presidentin e UEFA-s, Ceferin, si dhe disa homologë të tij, të cilëve iu ka kërkuar ndihmë për të prekurit nga tërmeti në Shqipëri. Me shumë gjasa, kombëtarja jonë kuqezi do të luajë ndonjë miqësore luksi me një nga skaudrat e mëdha europiane dhe të ardhurat, do të shkojnë për familjet e viktimave dhe të prekurve nga tërmeti.

Postimi i FSHF-së:

Presidenti i Federatës Shqiptare të Futbollit Armand Duka e ka përdorur pjesëmarrjen në ceremoninë e hedhjes së shorteut të Euro2020, për të siguruar ndihma për zonat e prekura nga tërmeti.

Presidenti Duka, ka biseduar nga afër me Presidentin e UEFA-s Ceferin lidhur me situatën e emergjente në Shqipëri dhe i ka kërkuar mbështetjen e institucionit më të lartë të futbollit evropian. Kjo temë është diskutuar edhe me këshillëtarin e lartë të UEFA-s, ish-futbollistin legjendar portugez, Luis Figo.

Presidenti Duka ka takuar disa nga homologët e tij, Presidentë të Federatave të vendeve evropiane dhe u ka kërkuar mbështetjen e tyre. Ata kanë marrë përsipër si hap të parë të shpërndajnë thirrjen për ndihmë të Shqipërisë në vendet e tyre. /abcnews.al

Euro-2020-eli.gif
Vladimir Prenga09:37 | 30/11/2019

Shorti i Euro 2020 hidhet ditën e sotme. Në “ROMEXPO”, prej orës 18:00 do të nisë ceremonia e hedhjes së shortit, nga ku do të mësohen përballjet në kampionatin europian, që këtë herë është i veçantë për faktin se do të zhvillohet në disa shtete.

Aktualisht dihen 20 prej kombëtareve pjesëmarrëse në Europian, ndërkohë që katër ekipet e tjera do të mësohen pas ndeshjeve të Nations League. Finalet e këtij kompeticioni zhvillohen më 31 mars. Sa i takon vazove, ato janë përcaktuar më parë dhe rrezikohen përballje mjaft interesante.

VAZO 1 ka gjashtë ekipe si Belgjika, Italia (pritëse), Anglia (pritëse), Gjermania (pritëse), Spanja (Pritëse) dhe Ukraina. Për shkak të problemeve me këta të fundit, Rusia (pritëse) zhvendoset në vazon e dytë. Në këtë vazo ka ekipe mjaft të forta, si Franca kampionë bote dhe Kroacia finaliste. Kjo vazo plotësohet edhe me kombëtare si Polonia, Zvicra dhe Holanda (pritëse).

Në vazon e tretë spikat Portugalia, ndërkohë që janë edhe këto kombëtare: Turqia, Danimarka (Pritëse), Austria, Suedia dhe Çekia. Në vazon e katërt dihen vetëm dy ekipe: Uellsi dhe Finlanda. Katër ekipet e tjera do të vijnë nga Nations League.

Nga Liga A vjen një mes Islandës, Bullgarisë, Hungarisë dhe Rumanisë. Nga liga B një mes Bosnje-Hercegovinës, Sllovakisë, Irlandës ose Irlandës së Veriut, kurse në nga liga C ka kombëtare si Skocia, Norvegjia, Izraeli dhe Serbia. Një shans e ka edhe Kosova, që do të tentojë të kalojë Maqedoninë e Veriut në gjysmëfinale dhe më pas të kërkojë të mundë fituesin e çiftit Gjeorgji-Bjellorusi. /abcnews.al

termeti-durres-1280x718.jpg
Vladimir Prenga12:10 | 28/11/2019

UEFA dhe Federata Holandeze e Futbollit kanë dërguar mesazhe solidariteti për shqiptarët, të cilët po kalojnë një periudhë shumë të vështirë pas tërmeteve që vazhdojnë të tronditin vendin tonë. FSHF ka publikuar “e-mail”-et që këto organizata kanë dërguar në FSHF.

NJOFTIMI I FSHF – Menjëherë pas ngjarjes së tmerrshme që preku vendin tonë nga një seri tërmetesh të njëpasnjëshme, Presidenti i FSHF-së, Armand Duka ka marrë mesazhe, telefonata, dhe telegrame zyrtar nga Presidenti i UEFA-s, z.Aleksander Čeferin, Presidenti i Federatës së Futbollit të Hollandës, z.Michael van Praag dhe shumë personalitete të futbollit evropian dhe botëror.

Në letrën e tij, Presidenti Ceferin shprehet: “I dashur Armand, ju përcjellim ngushëllimet tona të thella për viktimat e tërmetit, zemrat tona janë me familjet e tyre! Sinqerisht, UEFA Aleksander Čeferin President”. /abcnews.al

UEFA.jpg
Veronik Istrefaj18:48 | 26/11/2019

Edhe UEFA ka shprehur ngushëllimet për viktimat nga tërmetet në Shqipëri. Qeveria e Futbollit Europian ka shkruar një mesazh ngushëllimi për familjet e prekura. Në faqen e tyre zyrtare në Twitter, UEFA shkroi:

“Të gjithë ne të familjes së futbollit europian, jemi prekur shume dhe ndjejmë keqardhje të madhe për tërmetet në Shqipëri. Ngushëllimet tona janë me familjet dhe miqtë e viktimave që janë prekur nga këto tërmete”.

cHAMPIONS.png
Vladimir Prenga08:48 | 26/11/2019

Champions League rikthehet me raundin e parafundit të ndeshjeve në grupe. Ka disa përballje që janë të rëndësishme, por ka edhe takime që luhen për statistika. Në grupin A PSG i ka mbyllur llogaritë e kualifikimit, por ka një sfidë ku duhet të përballojë “inatin” e Real Madrid për atë humbje që i shkaktuan në ndeshjen e parë. Galatasaray dhe Club Brugge kanë një sfidë vendimtare për të vijuar rrugëtimin në Europa League.

Juventus-Atletico Madrid është një nga sfidat më interesante të mbrëmjes dhe luhet për vendin e parë dhe kualifikimin në grupin D. Bardhezinjtë e kanë siguruar kalimin në raundin tjetër, kurse Atletico ende. Spanjollët “kërcënohen” nga Bayer Leverkusen, që duhet të përballojnë Lokomotiv Moscow në të ftohtin rus.

Grupi C është interesant. Manchester City ka nevojë vetëm për një pikë dhe luan në shtëpi kundër Shakhtar Donetsk. Ukrainasit janë të motivuar për të marrë pikë, pasi po garojnë për vendin e dytë me Dinamo Zagreb. Edhe këta të fundit luajnë jashtë fushe, me italianët e Atalanta. Të dyja ekipet numërojnë nga pesë pikë në renditje.

Grupi B nuk ka shumë pikëpyetje. Tottenham sot do kërkojë kualifikimin dhe e ka gjithçka në dorë, pasi pret grekët e Olympiacos. Crvena Zvezda do mundohet të shfrytëzojë faktorin fushë për të mundur gjermanët e Bayern Munich, për të ruajtur vendin e tretë në grup.

CHAMPIONS LEAGUE – FAZA E GRUPEVE

E martë, më 26 nëntor, ora 18:55
Galatasaray-Club Brugge
Lokomotiv Moscow-Bayer Leverkusen

E martë, më 26 nëntor, ora 21:00
Atalanta-D. Zagreb
Crvena Zvezda-Bayern Munich
Juventus-Atl. Madrid
Manchester City-Shakhtar Donetsk
Real Madrid-Paris SG
Tottenham-Olympiacos Piraeus

/abcnews.al

de-bruyne.jpg
Klejdi Kaimi14:14 | 21/11/2019

Belgjika arriti të kualifikohej në Euro 2020 duke i fituar të gjitha ndeshjet në grup, madje në ndeshjen e fundit mposhti 6-1 Qipron, duke e mbyllur vitin kalendarik në mënyrë të shkëlqyer. Por, Kevin De Bruyne nuk është dakord me formatin e ri të UEFA-s.

UEFA e ka projektuar që Euro 2020 të luhet në 12 vende të ndryshme verën tjetër. Turnamenti do të zhvillohet në këto qytete si Roma, Mynih, Baku, Bilbao, Budapest, Glasgow, Copenhagen, Dublin, Bukuresht, Shën Petersburg, Amsterdam si dhe Londër, ku do të mbahet dhe finalja e madhe.

Por, ylli i Manchester Cityt është kundër këtij formati. “Për mua duket si një kompeticion fals”, deklaron belgu për ‘HLN’. “Është një budallallëk, futbolli sa vjen edhe kthehet më shumë në biznes, po e humb bukurinë e lojës”, mbyll De Bruyne i irrituar. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono