uefa

2422026_w2.jpg
ent ela17:07 | 31/12/2018

Goli i Milot Rashicës u shpall nga UEFA, si më I bukuri në Ligën e Kombeve. Futbollisti i Kosovës e shënoi atë rrjetë në barazimin në fushën e Ishujve Faroe.

Një dhuratë për fundvit. Kosova ia kishte bërë vetes dhuratën me kualifikimin në Ligën e Kombeve, por UEFA i shtoi edhe një tjetër.

Ajo shpalli golin e shënuar nga Milot Rashica në fushën e Ishujve Faroe, si më të bukurin e garës, për fazën e grupeve.

UEFA postoi edhe një video të golit, në faqen e saj të Kampionatit Europian 2020, në FB.

Kosova zuri vendin e parë në grupin 3 të nivelit D, duke u ngjitur një kategori më lart, e duke fituar të drejtën për të marrë pjesë në plej ofin e Euro 2020-ës, pra një shans të madh për t’u kualifikuar direkt për në fazën finale.

Ajo fitoi 14 pikë në 6 ndeshje, me 4 fitore e dy barazime, duke lënë pas Azerbajxhanin, Ishujt Faroe dhe Maltën.

Kjo ishte pjesëmarrja e dytë e Kosovës në eleminatoret e turneve të mëdhenj, pas asaj në Kupën e Botës.

Tashmë, nën drejtimin e trajnerit Shaland, ajo shpreson të ketë suksese edhe më të mëdha në të ardhmen, ndërsa në radhët e ekipit më të ri përfaqësues të Europës ka mjaft lojtarë të talentuar.

Mes tyre, Arbër Zeneli, shënues i 4 golave në grup, Benxhamin Kololli, vetë Milot Rashica, portieri Arijanet Muriqi, Rrahmani, Zhegrova apo Kastrati. /abcnews.al

UEFA-VIZITE-NE-TIRANE-1280x720.jpg
ent ela15:50 | 20/12/2018

UEFA vjen në Tiranë, në një mbështetje të qartë për Federatën Shqiptare të Futbollit. Sekretari i Përgjithshëm i saj, Theodhoridhis, vizitoi stadiumin e ri kombëtar dhe foli për arsyet e mbërritjes në Shqipëri.

Një vizitë e tillë padyshim që ka shkaqe të forta. UEFA mbërriti në Tiranë, në personin e vetë Sekretarit të saj të Përgjithshëm, Theodhor Theodhoridhis, në një shenjë të qartë mbështetjeje për Federatën Shqiptare të Futbollit.

Theodhoridhis, krahu I djathtë i presidentit të UEFA-s, Aleksandar Çeferin, vizitoi stadiumin e ri kombëtar dhe shtëpinë e re të Federatës, në ish-kompleksin Dinamo, ndërsa besohet se në Tiranë ka ardhur edhe për lobim tek qeveria shqiptare.

Federata nuk e ka fshehur se është në konflikt me ekzekutivin lidhur me financimin e stadiumit, por njeriu I UEFA-s e thjeshtoi shumë ardhjen e tij.

Theodhoridhis: “Arsyeja e vizitës sime këtu është që të takoj disa miq të mirë përpara pushimeve, dhe të shikoj ecurinë e punimeve në stadium, dhe në zyrat e reja të Federatës. Duhet të them se jam shumë i impresionuar. Duket si një epokë e re. Unë kam qenë shpesh këtu, kam qenë në “Qemal Stafën” e vjetër, dhe nuk ka krahasim. Po ashtu, jam shumë i lumtur me shtëpinë e Federatës, e cila po hyn në një epokë të re, shumë më moderne, dhe në drejtimin më të mirë të mundshëm”.

Dakord, sekretari i UEFA-s nuk foli për qeverinë, por mos ka të bëjë vizita me kandidaturën e Dukës për në Komitetin Ekzekutiv?

Theodhoridhis: “Jo, vizita ime nuk ka të bëjë me kandidaturën e presidentit për në UEFA. Unë jam sekretari i përgjithshëm dhe duhet të jem i paanshëm. Ka shumë kandidatë dhe unë nuk mund t’i lejoj vetes, që të rri më shumë afër me njërin apo me tjetrin. Ne erdhëm për të mbështetur Federatën për punën e shkëlqyer që ka bërë me stadiumin dhe zyrat e saj”.

Presidenti i Federatës, Duka, që natyrshëm e shoqëroi në çdo hap mikun e tij të rëndësishëm, sqaroi për planet me stadiumin.

Duka: “Ka ardhur të shohë zhvillimin e projektit të nisur, zyrat e reja dhe për të biseduar sesi mund të kemi më shumë aktivitete nga këto investime që po bëjmë. Nuk mund të jetë vetëm finalja e superkupës por edhe aktivitete të tjera”.

Duka pohoi se Federata ka marrë mbështetje nga UEFA për stadiumin e ri të Kukësit, impiant me 6 000 spektatorë, dhe do të shikojë edhe për të tjera, duke i përzgjedhur edhe sipas të ardhurave që mund të përfitohen. /abcnews.al

MILANI-NDALET-NE-BOLONJE.mpg_snapshot_00.00-1280x720.jpg
G. P.20:02 | 19/12/2018

Milani mori një tjetër goditje në një sezon tepër të vështirë për të. Barazimi në fushën e Bolonjës, në Serinë A, tregoi se skuadra e trajnerit Gatuzo nuk do ta ketë të lehtë të arrijë Championsin.

Nuk është e lehtë të kthehet koha e lavdishme. Milani nuk mundi të kalonte në Bolonjë, duke u ndalur në një barazim 0-0 për Serinë A, në një tjetër ngecje drejt synimit kryesor të sezonit. Skuadra e trajnerit Xhenaro Gatuzo u detyrua të kënaqej me vetëm 1 pikë, dhe të mos niste shkëputjen nga rivalët për vendin e katërt që të kualifikon për në Champions. Kuqezinjtë kanë 27 pikë, shumë pranë me Lacion, Atalantën, Romën, Sampdorian apo Fiorentinën, pa harruar Sasuolon. Vendet e para, Juventusi, Napoli dhe Interi po shkëputen gjithnjë e më shumë, një tregues I qartë I mundësive të sotme të milanistëve.

“Ne nuk mundëm t’ia dilnim në Bolonjë, – deklaroi trajneri Gatuzo, – gjithsesi, në këtë fushë nuk ishte e mundur ndryshe. Interi fitoi po me këtë stil, Roma humbi. Nga ana cilësore, ishte një ndeshje mediokre”. Mediat italiane nuk është se e falën skuadrën e madhe. “As Milani dhe as Pipita”, shkruan “La Gazeta delo Sport”, në fushën e ngritë të Bolonjës, Higuain bën 7 ndeshje pa shënuar gol”. “Il Korriere delo Sport” vazhdon duke titulluar se “fitoi vetëm Pipo”, duke e pasur fjalën për Inzagin, trajnerin e Bolonjës, që sipas gazetës ndaloi një Milan të shëmtuar. Kjo ishte goditja e radhës për klubin e madh milanez, pas dy lajmeve negative që erdhën këto ditë.

Së pari, gjoba prej 12 milionë eurosh vendosur nga UEFA, një nga gjobat më të mëdha në histori, për shkeljen e Lojës së Ndershme Financiare. Po ashtu, dënimi I mundshëm me 1 vit përjashtim nga Europa, nëse kjo vazhdon. Goditja tjetër ishte eleminimi nga Liga e Europës, pas disfatës në fushën e Olimpiakosit, me një objektiv më pak për të luftuar këtë sezon, me humbje të tjera financiare, dhe me dëm të madh për besimin./abcnews.al

duka123.jpg
G. P.15:56 | 11/12/2018

Presidenti i Federatës Shqiptare të Futbollit, Armand Duka, do të hedhë sërish kandidaturën për të qenë anëtar i Komitetit Ekzekutiv të UEFA-s. Ishte vetë Duka që e njoftoi vendimin, në një deklaratë në faqen e tij në Facebook.

“Shpresoj që në Kongresin që do të mbahet në Romë, në shkurt 2019, të kem sa më shumë federata mbështetëse, – shkruan Duka, – kandidoj për të pëfaqësuar futbollin shqiptar dhe interesat e federatave të vogla”.

Duka kandidoi për herë të parë në Kongresin e UEFA-s në vitin 2017, duke marrë 22 vota, dhe duke mos arritur të zgjidhej vetëm për pak vota. Ai është president i Federatës Shqiptare të Futbollit, që nga viti 2002, dhe ky është mandati i tij i pestë në këtë post./abcnews.al

var.jpg
ent ela22:41 | 03/12/2018

Teknologjia VAR do të përdoret në Ligën e Kampionëve, duke nisur nga muaji Shkurt i vitit të ardhshëm. Ky ishte vendimi i UEFA-s, që vjen pasi FIFA vendosi që VAR të përdorej në Kupën e Botës.

Ky kompeticion nuk duhet të presë më gjatë. Liga e Kampionëve do të ketë të drejtën e përdorimit të teknologjisë VAR, duke nisur që këtë sezon, në ndeshjet e raundit të dytë. Risia në garën më të madhe të klubeve në Europë do të nisë në 16 Shkurt të vitit të ardhshëm, kur të nisin ndeshjet me eleminim direkt. Ky ishte vendimi i marrë nga Komiteti Ekzekutiv I UEFA-s, në mbledhjen e zhvilluar në Dublin të Irlandës, një ditë pas hedhjes së shortit për eleminatoret e Euro 2020-s.

VAR është ndryshimi më i madh i kohëve të fundit në futboll, që shërben për të analizuar momentet e dyshimta për golat e shënuar, pretendimet për penallti, kartonët e kuq direktë apo gabimin në dhënien e një kartoni të verdhë apo të kuq. Teknologjia u përdor në Kupën e fundit të Botës në Rusi, dhe bëri ndryshime të rëndësishme në shumë ndeshje. UEFA njoftoi se VAR do të jetë edhe në finalen e Ligës së Europës të këtij sezoni, në finalet e Ligës së Kombeve dhe në turneun final të Europianit U21 po në vitin 2019.

Sezonin që vjen, teknologjia do të jetë në Champions që nga fillimi. VAR-i po përdoret me sukses në disa nga turnetë kryesorë të Europës si Seria A në Itali, Bundesliga në Gjermani apo Kupa e Anglisë./abcnews.al

giANN.png
G. P.16:23 | 03/11/2018

Presidenti i FIFA-s, Infantino, ndodhet përpara një skandali të madh. Ai akuzohet se ndihmoi Manchester City-n dhe Paris Saint Germain që t’i shpëtonin dënimit për shkelje të rregullave financiare të UEFA-s.

Skandalet dhe shkeljet e ligjeve nuk janë ekskluzivitet shqiptar. U kuptua me Zep Blaterin, por ja që edhe presidenti pasardhës i FIFA-s nuk ndodhet në pozitë më të mirë. Xhani Infantino akuzohet se ka shkelur ligjet e vetë institucioneve të futbollit dhe kjo kur ishte sekretar i përgjithshëm i UEFA-s.

Revista gjermane “Der Shpigel” boton dokumente sipas të cilave, Infantino ndihmoi klube miliarderë si Manchester City e Paris SG që t’i shmangeshin dënimeve të rënda për shkelje të rregullave të Lojës së Ndershme Financiare. Hajdutët e informatikës, hakerat, kanë vjedhur dokumente sekrete nga UEFA, që tregojnë se presidenti i sotëm i FIFA-s pranoi të fshihte “mëkatet” e City-t e PSG-së, duke i ndihmuar që të dënoheshin lehtë.

Në sezonet 2011-12 dhe 2012-13, dy klubet patën humbje të përbashkëta prej gati 200 milionë eurosh, shumë më tepër se kufiri i lejuar. Infantino bëri bisedime me drejtuesit e tyre, Al Helaifin e Paris SG dhe Haldun Al Mubarakun e Sitit, pas kurrizit të inspektorëve të pavarur, duke bërë të mundur që ata të mos përjashtoheshin nga Championsi. Gjithçka përfundoi me një gjobë, edhe pse të lartë, prej dhjetëra milionë eurosh.

Titujt e “Der Shpigelit” ishin shumë domethënës”.

“Si paratë e naftës shtrembërojnë futbollin”!

Përshëndetje kapo! Shërbeju dhe sundo! Si presidenti i FIFA-s dështoi në pastrimin e futbollit!

Infantino iu përgjigj akuzave, duke thënë se ato vijnë nga kundërshtarë të tij që kanë humbur pushtetin.

“Gjithnjë është e vështirë të ndryshosh gjërat, – u shpreh ai, – FIFA po bën reforma të rëndësishme dhe e prisja që të hasja në rezistencën e atyre që nuk do të mund të përfitojnë më nga sistemi ku kanë bërë pjesë”.

Presidenti i FIFA-s nuk tregoi se cilët ishin kundërshtarët e tij, ndërsa nuk ka mundur të hedhë poshtë akuzat e bëra ndaj tij. Pritet që skandali të zgjerohet dhe nuk dihet fati i City-t dhe PSG-së, pra nëse ata do të dënohen, apo nëse do të jenë të detyruar të shesin disa nga yjet më të rëndësishëm për të rregulluar bilancet./abcnews.al

UEFA-KOSOVA-1280x649.jpg
ent ela21:42 | 19/10/2018

Organi qeverisës i futbollit europian, UEFA, ka bërë të ditur emrat e shteteve që nuk mund të jenë në të njëjtin grup për ndeshjet kualifikuese në kuadër të kampionatit europian Euro 2020. Për rrjedhojë është konfirmuar se përfaqësuesja e Kosovës nuk mund të përballet me Serbinë dhe Bosnje e Hercegovinën.

UEFA vlerëson se në një përballje e mundshme mes Kosovës dhe Serbisë mund të shkaktojë probleme serioze që kalojnë kufijtë e sportit. Prandaj edhe është shmangur mundësia që këto dy ekipe kombëtare të jenë në të njëjtin grup.

Kosova nuk do të luajë as kundër Bosnjës, në një skenar të ndikuar nga zhvillimet politike dhe incidentet që UEFA shpreson se në këtë mënyrë, do të shmangen.

Shorti për EURO 2020 do të hidhet më 2 dhjetor, ndërsa për herë të parë në historinë prej gjashtë dekadash të UEFA-s, do të zhvillohet në 10 shtete dhe 12 qytete. /abcnews.al

lii.jpg
G. P.22:08 | 22/08/2018

Duke parë suksesin e përdorimit të VAR-it në Kupën e Botës, organizata më e lartë e futbollit në Europë, UEFA, po planifikon prezantimin e teknologjisë në kompeticionin më elitar të futbollit, Champions League.

Sipas një artikulli në The Times, stafi i UEFA-s ka qenë duke punuar për një strategji, në të cilën mendohet që VAR-i të përdoret në çerekfinalet e Ligës së Kampioneve.

Punimet mbi këtë strategji do të vazhdojnë javën e ardhshme në Monaco, ku do të mblidhet një komitet, i cili do të japë vendimin përfundimtar mbi çështjen në fund të muajit.

UEFA shpreson që me teknologjinë e re të ketë sa më pak gabime në ndeshjet më të rëndësishme të Ligës së Kampioneve. VAR pritet që të përdoret edhe në Euro 2020, mirëpo për këtë çështje nuk është marrë një vendim zyrtar ende./abcnews.al

SKENDERBEU-JASHTE-EUROPES-1280x720.jpg
ent ela18:45 | 14/06/2018

Skënderbeu nuk do të luajë këtë sezon në Europë. Ky ishte vendimi i KAS-it në Lozanë, ndonëse ende nuk është vendosur për dënimin 10-vjeçar të dhënë nga UEFA. Në Champions shkon Kukësi

Kjo festë nuk mund të ndodhë këtë vit.

Rrezikon edhe më shumë se kaq, por gjithsesi lajmi i konfirmuar është që Skënderbeu nuk do të marrë pjesë në Champions këtë sezon.

Vendimi I KAS-it është fatal, dhe hedh poshtë kërkesën e klubit shqiptar për ta lejuar në Ligën e Kampionëve, dhe për të vazhduar gjyqin ndaj dënimit 10-vjeçar të dhënë nga UEFA.

Kukësi do ta zëvendësojë Skënderbeun në kompeticionin-elitë kontinental, ndërsa ka festë edhe për Partizanin, i cili do të marrë pjesë në Ligën e Europës.

Gjykata e Arbitrazhit Sportiv në Lozanë ende nuk ka vendosur për çështjen kryesore, përjashtimin e Skënderbeut me 10 vjet nga Europa dhe gjobën prej 1 milionë eurosh.

Për këtë dënim të konfirmuar nga të dyja shkallët e UEFA-s, KAS do të marrë vendim një herë tjetër.

Gjithsesi, edhe me një përgjigje të tillë, Skënderbeu merr një goditje të rëndë sportive dhe financiare, e cila mund të bëhet shkatërrimtare nëse konfirmohet edhe dënimi i UEFA-s.

Skuadra korçare e mori ndëshkimin e akuzuar për trukim të disa ndeshjeve në Champions dhe Ligën e Europës disa sezone më parë, dhe flitej për ndeshjet ndaj Krusejdërsit, Dinamos së Zagrebit, Sportingut të Lisbonës apo Lokomotivës së Moskës./abcnews.al

kukesii.jpg
G. P.13:05 | 15/05/2018

Kukësi është vendosur paraprakisht nga UEFA si skuadër pjesëmarrëse në Ligën e Kampionëve, sezonin e ardhshëm. Gjithsesi, duhet pritur vendimi i KAS-it për dënimin e Skënderbeut.

Mund të jetë aty për të dytin vit radhazi.

Kukësi në Champions nuk është një ëndërr aq e largët, me UEFA-n që e ka vendosur në listën e ekipeve të Ligës së Kampionëve sezonin e ardhshëm, pasi siguroi vendin e dytë në Superligë.

Ëndrra do të bëhet realitet, sidoqoftë, vetëm pasi Gjyqi i Arbitrazhit Sportiv në Lozanë do të vendosë për dënimin e dhënë nga UEFA ndaj Skënderbeut.

Skuadra kuksiane, nëse gjithçka do të ecë mirë për të, do të jetë në vazon e parë në turin e parë eleminator, pra mes ekipeve më të fortë, ndryshe nga sezoni i kaluar, kur u ndesh me Sherifin e Tiraspolit.

Shorti hidhet në 19 Qershor, ndërsa ndeshja e parë është në program për t’u luajtur në 10 ose 11 Korrik.

Vjet, Kukësi mori pjesë në Champions si kampion i Shqipërisë, ndërsa nuk pati fat ndaj Sherifit të Moldavisë, duke u eleminua me gol në fushë kundërshtare.

Skënderbeu, ndërkaq, është i bindur se gjithçka do të jetë ndryshe, dhe se do të fitojë pafajësinë në KAS.

Presidenti Ardian Takaj, sqaroi kështu strategjinë e klubit, në një intervistë të posaçme për abc neës-in.

Ardian Takaj: “Do kërkojmë pezullimin e vendimit për marrjen pjesë në Champions League. Nuk është se gjykohemi për një çështje të re, është një çështje e vjetër. Ne kemi marrë pjesë një vit më parë në grupet e Europa League, prandaj nuk është se cënojmë garën në këtë aspekt”.

Gjykata Sportive në Lozanë pritet të japë vendimin për heqjen ose jo të dënimit të kampionëve të Shqipërisë përpara hedhjes së shortit në 19 Qershor.

Korçarët janë dënuar me 10 vjet përjashtim dhe 1 milionë euro gjobë nga Komisioni i Disiplinës dhe i Etikës në UEFA, ndërsa ky ndëshkim mbeti në fuqi edhe në Apel./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono